« ថ្ងៃទី ១៣ ខែ កុម្ភៈ ។ តើយើងបន្តនៅពិតចំពោះព្រះអង្គសង្រ្គោះនៅក្នុងពិភពលោកដ៏ទុច្ចរិតនេះយ៉ាងដូចម្តេច ? លោកុប្បត្តិ ១២–១៧; អ័ហ្រាហាំ ១–២ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២២ ( ឆ្នាំ ២០២១ )
« ថ្ងៃទី ១៣ ខែ កុម្ភៈ ។ តើយើងបន្តនៅពិតចំពោះព្រះអង្គសង្រ្គោះនៅក្នុងពិភពលោកដ៏ទុច្ចរិតនេះយ៉ាងដូចម្តេច ? » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២២
ថ្ងៃទី ១៣ ខែ កុម្ភៈ
តើយើងបន្តនៅពិតចំពោះព្រះអង្គសង្រ្គោះនៅក្នុងពិភពលោកដ៏ទុច្ចរិតនេះយ៉ាងដូចម្តេច ?
ប្រឹក្សាជាមួយគ្នា
ដឹកនាំដោយសមាជិកម្នាក់ក្នុងគណៈប្រធានកូរ៉ុម ឬគណៈប្រធានថ្នាក់ មានរយៈពេល ១០–២០ នាទី
នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ បន្ទាប់មកសូមដឹកនាំការពិភាក្សាមួយអំពីកិច្ចការនៃសេចក្តីសង្រ្គោះ និងភាពតម្កើងឡើង ដោយប្រើសំណួរមួយ ឬច្រើនដូចខាងក្រោម ឬ សំណួររបស់បងប្អូនផ្ទាល់ ( សូមមើល ក្បួនខ្នាតទូទៅ ១០.២, ១១.២, នៅលើគេហទំព័រ ChurchofJesusChrist.org ) ។ ដាក់ផែនការដើម្បីអនុវត្តតាមអ្វីដែលបងប្អូនពិភាក្សា ។
-
រស់នៅតាមដំណឹងល្អ ។ តើបងប្អូនកាន់តែខិតជិតព្រះអង្គសង្គ្រោះដោយរបៀបណា ? តើយើងព្យាយាមប្រែក្លាយដូចជាទ្រង់យ៉ាងដូចម្តេច ?
-
ការមើលថែដល់អ្នកដែលត្រូវការជំនួយ ។ តើនរណាដែលយើងគិតដល់នាពេលថ្មីៗនេះ ? តើយើងអាចជួយបុគ្គលទាំងនេះយ៉ាងដូចម្តេច ?
-
ការអញ្ជើញមនុស្សទាំងអស់ឲ្យទទួលយកដំណឹងល្អ ។ តើយើងអាចឆ្លើយសំណួរពីមិត្តភក្តិរបស់យើងអំពីសាសនាចក្រតាមរបៀបមួយដែលពង្រឹងសេចក្តីជំនឿរបស់យើងនៅលើព្រះអង្គសង្រ្គោះយ៉ាងដូចម្តេច ?
-
រួបរួមក្រុមគ្រួសារសម្រាប់ភាពអស់កល្បភាពអស់កល្បជានិច្ច ។ តើមានវិធីណាខ្លះដែលយើងអាចភ្ជាប់ទំនាក់ទំនងបានប្រសើរជាមួយសាច់ញាតិដូចជាជីដូនជីតា និងបងប្អូនជីដូនមួយ ?
នៅចុងបញ្ចប់នៃមេរៀននេះ សូមធ្វើនូវអ្វីដែលត្រឹមត្រូវដូចខាងក្រោមនេះ ៖
-
ថ្លែងទីបន្ទាល់អំពីគោលការណ៍ដែលបានបង្រៀន ។
-
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។
បង្រៀនគោលលទ្ធិ
ដឹកនាំដោយអ្នកដឹកនាំជាមជ្ឈិមវ័យ ឬជាយុវវ័យម្នាក់ មានរយៈពេល ២៥–៣៥ នាទី
រៀបចំខ្លួនខាងវិញ្ញាណ
ការរស់នៅដោយសុចរិតនៅក្នុងពិភពលោកទុច្ចរិតពុំងាយស្រួលនោះទេ ។ ចំពោះអ័ប្រាហាំ សម្ពាធក្នុងការងាកចេញពីព្រះ មិនមែនមកពីពិភពលោកខាងក្រៅទេ—សូម្បីតែឪពុករបស់លោក អ័ប្រាហាំ ក៏បានបោះបង់ចោលព្រះអម្ចាស់ដែរ ( សូមមើល អ័ប្រាហាំ ១:៥–១២; ២:៥ ) ។ អ័ប្រាហាំ និងសារ៉ា បានប្រឈមមុខនឹងភាពលំបាក ប៉ុន្តែពួកលោកបានទុកចិត្តលើសេចក្តីសន្យារបស់ព្រះអម្ចាស់ « ហើយក៏ទទួលគំនាប់ដែរ ទាំងយល់ព្រមថា ខ្លួនគេជាអ្នកដទៃ ដែលគ្រាន់តែសំណាក់នៅផែនដីប៉ុណ្ណោះ » ( ហេព្រើរ ១១:១៣ ) ។
តើបងប្អូនអាចជួយសមាជិកថ្នាក់ ឬកូរ៉ុមឲ្យរក្សាភាពស្មោះត្រង់យ៉ាងដូចម្តេច នៅពេលពួកគេមានអារម្មណ៍ដូចជា « អ្នកដទៃ និងជាអ្នកសំណាក់ » នៅក្នុងពិភព លោកដោយសារពួកគេរស់នៅតាមបទដ្ឋានរបស់ព្រះអម្ចាស់ ? តើបងប្អូនអាចបំផុសឲ្យពួកគេមានភាពក្លាហាននៅពេលពួកគេរស់នៅតាមព្រះអម្ចាស់យ៉ាងដូចម្តេច ? កាលបងប្អូនរៀបចំខ្លួនបង្រៀន សូមពិចារណារំឭកឡើងវិញពី យ៉ូហាន ១៥:១៨–២០ និងសារលិខិត អែលឌើរ នែល អិល អាន់ឌើរសិន « Overcoming the World » ( Liahona ខែ ឧសភា ឆ្នាំ ២០១៧ ទំព័រ ៥៨–៦២ ) ។
សិស្សរបស់ព្រះយេស៊ូវគ្រីស្ទអាចស្វែងរកសេចក្តីសុខសាន្តកាលដែលពួកគេរស់នៅដោយស្មោះត្រង់ ទោះបីជាមានការប្រឆាំងក៏ដោយ ។
រៀនជាមួយគ្នា
សមាជិកថ្នាក់ ឬកូរ៉ុមរបស់បងប្អូនអាចទទួលបានការបំផុសគំនិតតាមរយៈគំរូរបស់អ័ប្រាហាំនៅសប្តាហ៍នេះកាលដែលពួកគេបានសិក្សា លោកុប្បត្តិ ១២–១៧ និង អ័ប្រាហាំ ១–២ ។ បងប្អូនអាចអញ្ជើញពួកគេឲ្យមើល អ័ប្រាហាំ ១:១–១៩ និងចែកចាយអ្វីដែលបានបំផុសគំនិតដល់ពួកគេអំពីគំរូរបស់អ័ប្រាំហាំ ។ តើយើងឃើញភាពស្រដៀងគ្នាអ្វីខ្លះរវាងឧបសគ្គដែល អ័ប្រាហាំបានប្រឈម និងបញ្ហាដែលយើងប្រឈមមុខសព្វថ្ងៃនេះ ? សូមជ្រើសរើសសកម្មភាពមួយ ឬច្រើនខាងក្រោមនេះ ដើម្បីលើកទឹកចិត្តឲ្យមានការពិភាក្សាអំពីរបៀបដែលយើងអាចបន្តមានភាពស្មោះត្រង់ចំពោះព្រះយេស៊ូវគ្រីស្ទក្នុងគ្រប់កាលៈទេសៈ ។
-
ព្រះអម្ចាស់ និងព្យាការីរបស់ទ្រង់តែងតែជំរុញអស់អ្នកទាំងឡាយណាដែលពួកគេបង្រៀនឲ្យរស់នៅដោយស្មោះត្រង់ ទោះបីមានអំពើទុច្ចរិតនៅជុំវិញពួកគេក៏ដោយ ។ តើមានវិធីណាខ្លះដែលសាតាំងល្បួងយុវជនឲ្យបំពានព្រះបញ្ញត្តិរបស់ព្រះនៅសម័យរបស់យើងនេះ ? អស់អ្នកដែលបងប្អូនបង្រៀនអាចអានបទគម្ពីរ មួយចំនួនដែលមាននៅក្នុង « ធនធានគាំទ្រ » ។ សូមអញ្ជើញពួកគេឲ្យពិភាក្សាអំពីអ្វីដែលពួកគេរៀនពីការបន្តមានភាពស្មោះត្រង់ចំពោះព្រះគ្រីស្ទ នៅពេលដែលពិភពលោកល្បួងយើងមិនឲ្យធ្វើដូច្នេះ ឬក៏ចំអកឲ្យយើង ។ ពួកគេអាចចែកចាយវិធីដែលពួកគេបានរកឃើញដើម្បីរស់នៅដោយស្មោះត្រង់ ទោះបីអ្នកដទៃមិនរស់នៅតាមក្តី ។ តើនៅពេលណាដែលយើង ឬអ្នកដទៃដែលយើងស្គាល់អាចធ្វើរឿងនេះបាន ? បងប្អូនក៏អាចបង្ហាញវីដេអូមួយ ឬច្រើនដែលមាននៅក្នុង « ធនធានគាំទ្រ » ។
-
ដើម្បីជួយថ្នាក់ ឬកូរ៉ុមរបស់បងប្អូនយល់ពីរបៀបដើម្បីយកឈ្នះពិភពលោកនេះ និងទទួលពរជ័យដែលបានទទួលមកពីការធ្វើដូច្នោះ សូមសរសេរនៅលើក្តារខៀន ការយកឈ្នះលោកិយគឺ … និង ការយកឈ្នះលោកិយនាំមកនូវ … បន្ទាប់មកបងប្អូនអាចសូមឲ្យយុវវ័យមើល អែលឌើរ នែល អិល អាន់ឌើរសិន « ការយកឈ្នះលើលោកិយ » ។ សូមអញ្ជើញពួកគេឲ្យស្វែងរកវិធីដើម្បីបំពេញប្រយោគទាំងនេះដោយសរសេរអ្វីដែលពួកគេរៀននៅលើក្តារ ។ ពិភាក្សាពីអ្វីដែលពួកគេរកឃើញ ។ សូមអញ្ជើញសិស្សម្នាក់ជាមុនឲ្យមករៀនដោយត្រៀមចែកចាយរឿងមួយដែលបង្ហាញពីរបៀបដែលព្រះយេស៊ូវគ្រីស្ទនៅតែស្មោះត្រង់ចំពោះព្រះវរបិតារបស់ទ្រង់ទោះបីមានការប្រឆាំងក៏ដោយ ( សម្រាប់ឧទាហរណ៍ សូមមើល ម៉ាថាយ ៤:១–១១; លូកា ២២:៣៩–៤៤ ) ។ តើគំរូរបស់ព្រះអង្គសង្រ្គោះជួយយើងឲ្យយល់អំពីការយកឈ្នះលើពិភពលោកនេះអ្វីខ្លះ ? ( សូមមើល យ៉ូហាន ១៦:៣៣ ) ។
-
សិស្សរបស់ព្រះយេស៊ូវគ្រីស្ទគឺត្រូវ « នៅក្នុងលោកិយ ប៉ុន្តែពុំមែនជារបស់លោកិយ » ឡើយ ។ ការ « នៅក្នុងលោកិយ » អាចមានន័យថា យើងប្រឈមមុខនឹងការប្រឆាំង នៅពេលយើងរស់នៅតាមបទដ្ឋានរបស់យើង ។ ប៉ុន្តែវាក៏មានន័យផងដែរថា យើងអាចធ្វើជាឥទ្ធិពលឲ្យអ្នកដទៃធ្វើល្អផងដែរ ។ ដើម្បីបង្រៀនគោលការណ៍នេះ បងប្អូនអាចសូមឲ្យនរណាម្នាក់មករៀនដោយរៀបចំខ្លួនដើម្បីចែកចាយដំណើររឿងមួយ ឬច្រើននៅក្នុងសារលិខិតរបស់ប្រធាន បូនី អេច ខ័រឌុន « That They May See » ( Liahona ខែ ឧសភា ឆ្នាំ ២០២០ ទំព័រ ៧៨–៨០ ) ។ តើយើងរៀនអ្វីខ្លះចេញពីដំណើររឿងទាំងនេះអំពីការប្រើពន្លឺរបស់យើងដើម្បីជួយអ្នកដទៃឲ្យខិតកាន់តែជិតព្រះយេស៊ូវគ្រីស្ទ ? សូមអញ្ជើញថ្នាក់ ឬកូរ៉ុមឲ្យស្វែងរកសារលិខិតរបស់ប្រធាន ខ័រឌុន ចំពោះប្រយោគដែលបំផុសគំនិតពួកគេឲ្យធ្វើជាពន្លឺដល់អ្នកដទៃនៅក្នុងពិភពលោកដ៏ទុច្ចរិតនេះ ។ អញ្ជើញពួកគេឲ្យអានប្រយោគរបស់ពួកគេឲ្យឮៗ ហើយចែកចាយអ្វីដែលពួកគេមានអារម្មណ៍បំផុសគំនិតដើម្បីធ្វើ ។
ធ្វើសកម្មភាពដោយសេចក្ដីជំនឿ
សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។
ធនធានគាំទ្រ
-
ម៉ាថាយ ៥:១៤–១៦; នីហ្វៃទី១ ១៥:២៣–២៥; ហេលេមិន ៥:១២; គោលលទ្ធិ និងសេចក្តីសញ្ញា ១០:៥; ២៧:១៥–១៨; ៨៧:៨ ( របៀបដើម្បីបន្តនៅពិតចំពោះព្រះយេស៊ូវគ្រីស្ទនៅក្នុងពិភពលោកដ៏ទុច្ចរិត )
-
« Stand Ye in Holy Places—Bloom Where You’re Planted » « 195 Dresses » « Guided Safely Home » ( វីដេអូ ) នៅលើគេហទំព័រ ChurchofJesusChrist.org
ការបង្រៀនតាមរបៀបរបស់ព្រះអង្គសង្គ្រោះ
ព្រះអង្គសង្រ្គោះបានអញ្ជើញ ពេត្រុស ឲ្យថ្លែងទីបន្ទាល់តាមរយៈការសួរថា « ចុះឯអ្នករាល់គ្នាវិញ តើថាខ្ញុំជាអ្នកណា ? » ( ម៉ាថាយ ១៦:១៥ ) ។ កាលដែល ពេត្រុស បានឆ្លើយ ទីបន្ទាល់របស់លោកបានត្រូវពង្រឹង ។ តើសំណួរអ្វីដែលនឹងអញ្ជើញអស់អ្នកដែលបងប្អូនបង្រៀនឲ្យថ្លែងទីបន្ទាល់ដើម្បីឲ្យព្រះវិញ្ញាណអាចពង្រឹងទីបន្ទាល់របស់ពួកគេ ?