« ថ្ងៃទី ១០ ខែ មេសា ។ តើខ្ញុំអាចពង្រឹងសេចក្តីជំនឿរបស់ខ្ញុំលើព្រះយេស៊ូវគ្រីស្ទរាល់ថ្ងៃយ៉ាងដូចម្តេច ? និក្ខមនំ ១៤–១៧ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២២ ( ឆ្នាំ ២០២១ )
« ថ្ងៃទី ១០ ខែ មេសា ។ តើខ្ញុំអាចពង្រឹងសេចក្តីជំនឿរបស់ខ្ញុំលើព្រះយេស៊ូវគ្រីស្ទរាល់ថ្ងៃយ៉ាងដូចម្តេច ?» ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២២
ថ្ងៃទី ១០ ខែ មេសា
តើខ្ញុំអាចពង្រឹងសេចក្តីជំនឿរបស់ខ្ញុំលើព្រះយេស៊ូវគ្រីស្ទរាល់ថ្ងៃយ៉ាងដូចម្តេច ?
ប្រឹក្សាជាមួយគ្នា
ដឹកនាំដោយសមាជិកម្នាក់ក្នុងគណៈប្រធានកូរ៉ុម ឬគណៈប្រធានថ្នាក់ មានរយៈពេល ១០–២០ នាទី
នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ រួចហើយ បន្ថែមលើការប្រឹក្សាជាមួយគ្នាអំពីកិច្ចការក្នុងថ្នាក់ ឬកូរ៉ុមជាក់លាក់នានា បងប្អូនអាចពិភាក្សាពីចំណាប់អារម្មណ៍ និងបាវចនាមកពីសន្និសីទទូទៅបាន ។ សំណួរខាងក្រោមនេះអាចនឹងជួយបាន ។
-
តើយើងចាប់អារម្មណ៍លើបាវចនា ឬសារលិខិតអ្វីខ្លះ ? តើអ្វីទៅដែលបានពង្រឹងសេចក្តីជំនឿរបស់យើងលើព្រះយេស៊ូវគ្រីស្ទ ?
-
តើអ្វីទៅដែលបានពង្រឹងទីបន្ទាល់របស់យើងលើពួកព្យាការីនៅរស់ ? តើយើងមានអារម្មណ៍បំផុសគំនិតឲ្យធ្វើអ្វីខ្លះ ដោយសារតែអ្វីដែលយើងបានរៀន ឬទទួលអារម្មណ៍នេះ ?
-
តើយើងត្រូវធ្វើអ្វីខ្លះក្នុងនាមជាថ្នាក់ ឬកូរ៉ុមមួយ ដើម្បីចងចាំ ហើយធ្វើតាមការប្រឹក្សាដែលយើងស្ដាប់ឮនៅក្នុងសន្និសីទទូទៅ ?
នៅចុងបញ្ចប់នៃមេរៀននេះ សូមធ្វើនូវអ្វីដែលត្រឹមត្រូវដូចខាងក្រោមនេះ ៖
-
ថ្លែងទីបន្ទាល់អំពីគោលការណ៍ដែលបានបង្រៀន ។
-
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។
បង្រៀនគោលលទ្ធិ
ដឹកនាំដោយអ្នកដឹកនាំជាមជ្ឈិមវ័យ ឬជាយុវវ័យម្នាក់ មានរយៈពេល ២៥–៣៥ នាទី
រៀបចំខ្លួនខាងវិញ្ញាណ
ដើម្បីរស់រានមានជីវិតនៅក្នុងទីរហោស្ថាន កូនចៅនៃអ៊ីស្រាអែលចាំបាច់ត្រូវរៀនពីរបៀបពឹងផ្អែកលើព្រះអម្ចាស់ ។ ពួកគេបានពឹងផ្អែកលើទ្រង់ដើម្បីទទួលបានអព្ភូតហេតុសង្គ្រោះដល់ជីវិត ដូចជាការញែកសមុទ្រក្រហម ហើយក៏ដើម្បីទទួលបានអព្ភូតហេតុគាំទ្រដល់ជីវិតផងដែរ ដូចជានំម៉ាន៉ាមកពីស្ថានសួគ៌ ។ រឿងនេះក៏កើតមានដូចគ្នាចំពោះមនុស្សដែលបងប្អូនកំពុងបង្រៀន ។ ប្រសិនបើពួកគេចង់រស់រានមានជីវិតនៅលើដំណើរខាងវិញ្ញាណរបស់ពួកគេនៅក្នុងទីរហោស្ថាននៃជីវិតរមែងស្លាប់ នោះពួកគេត្រូវតែអនុវត្តសេចក្ដីជំនឿលើព្រះយេស៊ូវគ្រីស្ទ ។ ហើយពួកគេត្រូវតែអនុវត្តសេចក្ដីជំនឿនោះរៀងរាល់ថ្ងៃ ពុំមែនម្ដងម្កាលទេ ។ មនុស្សមួយចំនួនដែលបងប្អូនបង្រៀនប្រហែលជាមិនបានទទួលអារម្មណ៍ថា សេចក្ដីជំនឿរបស់ពួកគេរឹងមាំខ្លាំងនោះទេ ។ បងប្អូនអាចជួយពួកគេឲ្យមើលឃើញថា សេចក្ដីជំនឿនោះរីកចម្រើនម្ដងបន្តិចៗ ពីមួយថ្ងៃទៅមួយថ្ងៃ ។ វាត្រូវបានចិញ្ចឹមបីបាច់តាមរយៈកិច្ចការតូចតាច ហើយសាមញ្ញដែលយើងធ្វើជាទៀងទាត់ ។ សូមសញ្ជឹងគិតពីរឿងទាំងនេះ នៅពេលបងប្អូនសិក្សា និក្ខមនំ ១៤–១៧ នៅសប្ដាហ៍នេះ ។ បងប្អូនក៏អាចសិក្សាសារលិខិតរបស់ប្រធាន ដាល្លិន អេក អូក « Small and Simple Things » ( Liahona ខែ ឧសភា ឆ្នាំ ២០១៨ ទំព័រ ៨៩–៩២ ) ។
យើងអាចពង្រឹងសេចក្ដីជំនឿរបស់យើងរៀងរាល់ថ្ងៃតាមវិធីតូចតាច ហើយសាមញ្ញ ។
រៀនជាមួយគ្នា
ដើម្បីចាប់ផ្ដើមការពិភាក្សាមួយ បងប្អូនអាចសុំយុវវ័យឲ្យចែកចាយទម្លាប់ប្រចាំថ្ងៃរបស់ពួកគេមួយចំនួនដែលជួយពួកគេឲ្យធ្វើរឿងល្អៗ ។ រឿងទាំងនេះអាចដាក់បញ្ចូលនូវការរក្សាសុខភាពល្អ ឬការពង្រឹងទីបន្ទាល់របស់ពួកគេ ។ តើអ្វីខ្លះអាចនឹងកើតឡើង ប្រសិនបើយើងមិនបានរក្សាទម្លាប់ទាំងនេះ ? តើការខិតខំប្រចាំថ្ងៃរបស់យើងដើម្បីធ្វើរឿងល្អៗអាចប្រៀបធៀបទៅនឹងសេចក្ដីបង្គាប់ដែលព្រះអម្ចាស់បានប្រទានដល់ពួកសាសន៍អ៊ីស្រាអែលឲ្យប្រមូលនំម៉ាន៉ាដោយរបៀបណា ? ( សូមមើល និក្ខមនំ ១៦:១៦–២១ ) ។ បងប្អូនអាចជួយថ្នាក់ ឬកូរ៉ុមប្រៀបធៀបបទពិសោធន៍របស់ពួកសាសន៍អ៊ីស្រាអែលទៅនឹងការខិតខំរបស់យើងដើម្បីពង្រឹងសេចក្ដីជំនឿរបស់យើងលើព្រះយេស៊ូវគ្រីស្ទជារៀងរាល់ថ្ងៃ ។ ឧទាហរណ៍ តើព្រះអម្ចាស់ប្រទានអ្វីខ្លះដល់យើង ដែលប្រៀបបាននឹងនំម៉ាន៉ាប្រចាំថ្ងៃដែលទ្រង់បានប្រទានដល់ពួកសាសន៍អ៊ីស្រាអែល ? តើយើងអាចធ្វើអ្វីខ្លះដែលប្រៀបបាននឹងការប្រមូលនំម៉ាន៉ា ? ដើម្បីបន្តការពិភាក្សារបស់បងប្អូន សូមប្រើសកម្មភាពមួយ ឬច្រើនដូចខាងក្រោមនេះ ឬសកម្មភាពមួយរបស់បងប្អូនផ្ទាល់ ។
-
សូមអានជាមួយគ្នាក្នុង អាលម៉ា ៣៧:៦–៧ ។ ដោយរួមគ្នាជាថ្នាក់ ឬកូរ៉ុម សូមរៀបរាប់នៅលើក្ដារខៀននូវ « កិច្ចការតូចតាច ហើយសាមញ្ញ » ដែលព្រះអម្ចាស់បានអញ្ជើញយើងឲ្យធ្វើរៀងរាល់ថ្ងៃដើម្បីមករកទ្រង់ ។ បន្ទាប់មកមនុស្សដែលបងប្អូនបង្រៀនអាចរំឭកនូវសារលិខិតរបស់ប្រធាន ដាល្លិន អេក អូក « Small and Simple Things » ដើម្បីស្វែងរកកិច្ចការតូចតាចបន្ថែមទៀតដែលអាចមានឥទ្ធិពលដ៏ធំធេងមួយចំពោះជីវិតរបស់យើង ។ តើកិច្ចការទាំងនេះអាចមានឥទ្ធិពលអ្វីខ្លះ ? តើយើងត្រូវបានបំផុសគំនិតឲ្យធ្វើអ្វីខ្លះ ដើម្បីធ្វើឲ្យកិច្ចការទាំងនេះក្លាយជាផ្នែកដ៏ទៀងទាត់នៅក្នុងជីវិតប្រចាំថ្ងៃរបស់យើង ?
-
ហេតុអ្វីសេចក្ដីជំនឿលើព្រះយេស៊ូវគ្រីស្ទចាំបាច់ត្រូវការការចិញ្ចឹមបីបាច់ប្រចាំថ្ងៃ ? ដើម្បីជួយសមាជិកយល់ដឹងកាន់តែប្រសើរពីកិច្ចការនេះ បងប្អូនអាចបង្ហាញវីដេអូមួយ ឬច្រើនដែលមាននៅក្រោម « ធនធានគាំទ្រ » ។ នៅក្នុងវីដេអូទាំងនេះ អែលឌើរ ឌី ថត គ្រីស្តូហ្វឺសិន បានបង្រៀនពីសេចក្ដីត្រូវការសម្រាប់កិច្ចការប្រចាំថ្ងៃដើម្បីគាំទ្រសេចក្ដីជំនឿរបស់យើង ។ សូមអញ្ជើញសមាជិកដែលបងប្អូនបង្រៀនឲ្យចែកចាយកិច្ចការដែលពួកគេបានរៀន ដែលបានបំផុសគំនិតពួកគេឲ្យបង្កើនសេចក្ដីជំនឿរបស់ពួកគេលើព្រះយេស៊ូវគ្រីស្ទជារៀងរាល់ថ្ងៃ ។
-
ការខិតខំប្រចាំថ្ងៃជាទៀងទាត់គឺជាវិធីដ៏ល្អបំផុតដើម្បីពង្រឹងសេចក្ដីជំនឿរបស់យើងទៅលើព្រះយេស៊ូវគ្រីស្ទ ។ ដើម្បីពិភាក្សាពីគំនិតនេះ សូមអានរួមគ្នានូវការណែនាំទីបីរបស់អែលឌើរ ដេវីឌ អេ បែដណា នៅក្នុងសារលិខិតរបស់លោក « More Diligent and Concerned at Home » ( Liahona ខែ វិច្ឆិកា ឆ្នាំ ២០០៩ ទំព័រ ១៧–២០ ) ។ តើយើងអាចរៀនមេរៀនអ្វីខ្លះមកពីការពិពណ៌នារបស់លោកស្ដីពីរូបគំនូរនៅក្នុងការិយាល័យរបស់លោក ? តើមេរៀនទាំងនេះអនុវត្តចំពោះការខិតខំរបស់យើងដើម្បីស្ថាបនាសេចក្ដីជំនឿរបស់យើងលើព្រះយេស៊ូវគ្រីស្ទដោយរបៀបណា ? ការអាន អាលម៉ា ៣២:២១, ២៦–៤៣ រួមគ្នាអាចបន្ថែមដល់ការពិភាក្សារបស់បងប្អូន ។ តើយើងរកឃើញការយល់ដឹងអ្វីខ្លះអំពីរបៀបពង្រឹងសេចក្ដីជំនឿរបស់យើងលើព្រះយេស៊ូវគ្រីស្ទ ?
-
យើងអាចបង្កើនសេចក្ដីជំនឿរបស់យើងដោយជ្រើសយកការរៀនសូត្រពីបទពិសោធន៍ដែលសាកល្បងវា ។ បងប្អូនក៏អាចបង្ហាញវីដេអូ « Spiritual Whirlwinds » ( នៅលើគេហទំព័រChurchofJesusChrist.org ) ផងដែរ ។ សូមពិភាក្សារួមគ្នាពីអ្វីដែលយើងអាចធ្វើបាននៅក្នុងគ្រាសាកល្បងដើម្បីពង្រឹងសេចក្ដីជំនឿរបស់យើង ។ ( សូមមើលផងដែរ នែល អិល អាន់ឌើរសិន « Spiritual Whirlwinds, Liahona ខែ ឧសភា ឆ្នាំ ២០១៤ ទំព័រ ១៨–២១ ) ។ បងប្អូនអាចសុំឲ្យសមាជិកថ្នាក់ ឬកូរ៉ុមចែកចាយគ្រាដែលពួកគេបានទទួលអារម្មណ៍ថា សេចក្ដីជំនឿរបស់ពួកគេលើព្រះគ្រីស្ទត្រូវបានសាកល្បង និងអ្វីដែលពួកគេបានធ្វើដើម្បីពង្រឹងសេចក្ដីជំនឿរបស់ពួកគេនៅគ្រានោះ ។ សូមចង្អុលបង្ហាញថា និក្ខមនំ ១៤–១៧ ពិពណ៌នាពីការត្អូញត្អែរជាបន្តបន្ទាប់អំពីពួកសាសន៍អ៊ីស្រាអែលនៅពេលពួកគេបានដកពិសោធន៍ការសាកល្បង ។ តើការត្អូញត្អែរនៅគ្រាការសាកល្បងអាចធ្វើឲ្យសេចក្ដីជំនឿរបស់យើងចុះខ្សោយយ៉ាងដូចម្ដេច ? តើអ្វីទៅជាភាពខុសគ្នារវាងការត្អូញត្អែរ និងការបង្ហាញពីកង្វល់របស់យើងទៅកាន់ព្រះវរបិតាសួគ៌នៅគ្រាលំបាក ?
ធ្វើសកម្មភាពដោយសេចក្ដីជំនឿ
សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។
ធនធានគាំទ្រ
-
« Daily Bread: Pattern »” « Daily Bread: Change, » « Daily Bread: Experience » ( វីដេអូ ), នៅលើគេហទំព័រ ChurchofJesusChrist.org
ការបង្រៀនតាមរបៀបរបស់ព្រះអង្គសង្គ្រោះ
សូមជួយសមាជិកថ្នាក់ ឬកូរ៉ុមឲ្យយល់ពីរបៀបដែលពួកគេអាចអញ្ជើញព្រះវិញ្ញាណឲ្យមានវត្តមាននៅក្នុងការពិភាក្សារបស់ពួកគេ ។ ពួកគេអាចធ្វើកិច្ចការនេះតាមរយៈ « ឥរិយាបថរបស់ពួកគេ … ជាវិធីដែលពួកគេប្រព្រឹត្តចំពោះគ្នា និងវិធីដែលពួកគេបានទទួលអារម្មណ៍អំពីដំណឹងល្អ » ( ការបង្រៀនតាមរបៀបរបស់ព្រះអង្គសង្គ្រោះទំព័រ១៥ ) ។