te aine ae nakonako

Tebetembwa 10

N na Kanga ni Kunea te Raunnano iroun Iesu Kristo Ngkana e Mate Au Utu Temanna?

1 I-Korinto 14–16

te aikaon ibukin te uaia ni marooro

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta,, 10.2, 11.2). Bairei aron mwakuriian bwaai ake a tia n maroroakinaki.

• Maiuakina te euangkerio. E kanga te rairaki nakon te Uea ni buokiira ni kaaitarai kangaanga ao kataaki?

• Tararuakiia naake iai kainnanoia. Antai ae ti ataia are e kainnanoa ara tataro ao ara iraorao?

• Kaoaiia ni kabane bwa a na karekea te euangkerio. Tera babaire n tibwaua te euangkerio n tia ni marooroakinaki inanon bowiin te kauntira n te uoote ibukiia kairake? E na kanga ara kiraati ke kooram ni kairaki n tibwauan te euangkerio?

• Katiteuanakiia utu in akea tokina. A kanga mwakurian rongorongon te utu e na kakorakora reitakira ma Tamara are i Karawa ao Iesu Kristo?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringa te kiraati ao membwa n te kooram iaon babaire ao kakao ake a karaoaki n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Ngkana e mate temanna ae ti rangi n tabeakinna, e kona ni karawawata. Karaureakira mairouia ara utu aika ti tangiriia e uota te namakin ae kamaraki man kananokawaki. Ma e reirei Bauro bwa n tokin te tai “e ongaki te mate n te tokanikai” (1 I-Korinto 15:54) ibukin Mangautin Iesu Kristo. N taekana teuana, “kaweten bukin te mate”—kammarakin ao buan te kantaninga are ti namakinna n te maiu ae mamate—“e anaaki kammarakina iroun Kristo” (Motiaea 16:7–8; taraa naba 1 I-Korinto 15:54–57).

N te tai ae karina, aomata nako a na rinanon maten temanna aia utu ae a tangiria. Ko na kanga ni buokiia naake ko reireiniia ni karekea te raunnano inanon taai ni kaangaanga rinanon aia onimaki iroun Iesu Kristo? Iangoa te titiraki aei ngkai ko katauraoiko n anga reirei man warekan 1 I-Korinto 15, Motiaea 16:7–9, ao Reirei ao Berita aika Tabu 42:44–46.

Te Uaia n Reirei

Ko kona ni kaoiia kaain te kiraati ke te kooram bwa a na tibwauaia nningai are a tia n namakina te bwai ae kammaraki. Ko kona ngkanne n titirakiniia bukin tera n aia iango ngkai Bauro e kabongana te taeka ae “kammaraki” ni kabwarabwara te mate (taraa naba 1 I-Korinto 15:54–56). Anganiia tabeua te miniti n rinanoa 1 I-Korinto 15 ao tibwauai koaua . Ngkanne iangoi waaki ni kakukurei n aron akana inano ni buokiia kairake bwa a na mataata raoi bwa e kanga te Tia Kamaiu ni karaui nanora ngkana e mate temanna are ti rangi n tabeakinna.

• Ko kona ni bwenauaia kaain te kiraati ni katoatoaia ni kakauoman ao n tuanga temanna ma toana bwa a na uaia n rinanon tabeua karaki man koroboki aika tabu inanon “Reitan Bwaai n Mwakuri.” A kona ni korei aia reke ni kaeka te titiraki n aron “Baikara koaua aika a kakawaki ae I kantangaia bwa N na uring ngkana e bua temanna ae I tangiria?” Tuangiia bwa a na karin tabeua rongorongo man taian karaki ni koroboki aika tabu n aia kaeka. Ngkanne kaoiia bwa a na tibwauaia ma kaain te kiraati koaua are a rangi ni bongana irouia ao bukin tera.

• Iangoia n uaia n rinanoa teuana te rongorongo man te maungatabu ni kabuta ni kaotia bwa e kanga te aomata ni kunea te kantaninga inanon Iesu Kristo ngkana e mate temanna are a tangiria. N taian katooto e karinaki ana marooro Titita Reyna I. Aburto “Akea Ana Tokanikai te Ruanimate” (Riaona, Meei 2021, 85–86) ke ana marooro Unimwaane S. Mark Palmer “E na Oneaki Nanokawakira bwa Kakatongara” (Riaona, Meei 2021, 88–89). Ko na bae ni kukurei n tibwaua oin am taneiai ke kaoiia kairake bwa a na tibwauaia bwa a kanga ni karekea te raunnano ao te kantaninga iroun Iesu Kristo imwiin maten temanna are a tangiria.

• Imwiin iangoan kainnanoia kaain am kiraati ke te kooram, kaota teuana ke ae mwaiti riki man taian witeo inanon “Reitan Bwaai ni Mwakuri.” Kaoia ataei bwa a na tibwaua aia namakin. E kanga ataakin Iesu Kristo ae e a tia ni mangauti n roota aron taaralkin te mate iroura? Kaoiia kaain am kiraati ke te kooram n tibwaua aia kakoaua ibukin te Tia Kamaiu ao Mangautina ao e kanga te rabakau aei n uota te kantaninga nakoia.

• Ioane 11 e kabwarabwara ana taneiai te Tia Kamaiu ma maten temanna ae tangiria—raoraona ae Rataro. A na kona kaain te kiraati ke te kooram ni uaia ni wareki kiibu 1–45 ao ngkai a wareware, a kona n tibwauai baike a reiakin man ana banna ni katooto te Tia Kamaiu. Tera ae ti kona n reiakinna man te karaki aei are e kona n anganiira te raunnano ngkana e mate temanna ae ti tangiria? Ti na kanga n ira ana banna ni katooto te Tia Kamaiu n “[tang] ma ake a tang … ao ni [karaunanoia] ake a tangira karauannanoia”? (Motiaea 18:9). Tera riki ae ti reiakinna inanon Reirei ao Berita aika Tabu 42:45–46 aika a kona ni buokiira ni karaoa aei? Ko kona ni kaota te witeo “One-on-One (Ministering with Love)” (ChurchofJesusChrist.org).

te ataeinimwaane ae iango

Ara kakoaua ibukin Mangautin Iesu Kristo e anganiira te kantaninga ngkana e mate temanna ae ti tangiria.

Mwakuri ma te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia bwa a na iangoia bwa e kanga mwakurian aia namakinan ni kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Itaia 25:8; 1 I-Korinto 15:20–22; Motiaea 16:7–9; Aramwa 7:11–12; 11:42–44; 22:14; 28:12–14; 40:11–12

• Dallin H. Oaks, “Tera ae E a Tia Ni Karaoia te Uea Ibukira?,” Riaona, Meei 2021, 75–77

• Moisés Villanueva, “I Akoaki Iroun te Uea n Au Bong ni Kabane,” Riaona, Nob. 2021, 44–46

• Witeo: “Dealing with Death: Sunday Will Come,” “Finding Hope through the Resurrection of Christ,” “He Will Give You Help,” “Until We Meet Again” (ChurchofJesusChrist.org)

Reirei n ana Kawai te Tia Kamaiu

Te anga reirei e irekereke ma te tangira ao buokakiia tabeman ni karekei ana kakabwaia te euangkerio, ao te ibuobuoki aei n angin te tai bon aei ae kainnanoia kaain te kirati ae aki bati ni kakaonimaki. Ti bon bane ni kainnanoa te uaia ni mwakuri ni karoko irouia ake a korakai, ao ngkai te tia reirei ngkoe ko mena n te nakoa ae onoti n ibuobuoki.