29 Ianuari–4 Fepuari. “O Le A Ou Saunia le Ala i o Outou Luma”

1 Nifae 16–22

A o faimalaga le aiga o Liae agai atu i le nuu folafolaina, sa tuu atu e le Alii ia i latou le folafolaga lenei: “O le a Ou saunia le ala i o outou luma, e tusa ma le tou te tausiga o a’u poloaiga” (1 Nifae 17:13). E manino lava, o lena poloaiga sa le faapea o le a faigofie le malaga—sa feeseeseai lava tagata o le aiga, sa gau ‘aufana, sa pagatia tagata ma feoti, ma sa tatau lava ona latou fauina se vaa mai mea e lei gaosiina. Peitai, ina ua fetaiai le aiga ma puapuaga po o galuega sa foliga mai e le mafai ona faia, sa iloa e Nifae sa le o mamao ese lava le Alii. Sa ia iloa o le Atua “e tausia [e faamaoni], ma faamalolosi i latou, ma fai ala e mafai ai ona latou faataunuuina o le mea ua ia poloaiina ai i latou” (1 Nifae 17:3). Afai e te taumanatunatu pe aisea e tutupu ai mea e leaga i tagata lelei e pei o Nifae ma lona aiga, e mafai ona e mauaina malamalamaaga i nei mataupu. Ae atonu e sili atu ona taua, o le a e vaai i mea e fai e tagata lelei pe a tutupu mea leaga.

Manatu mo le Aoaoina i le Aiga ma i le Lotu

1 Nifae 16–18

O le a fesoasoani le Faaola ia te au e feagai ma luitau o le olaga.

Na feagai le aiga o Nifae ma ni luitau faigata—e pei o i tatou uma. O le a se mea e mafai ona e aoao mai ia Nifae e uiga i le feagai ai ma faigata faatasi ai ma le faatuatua ia Iesu Keriso? Faitau e uiga i ona aafiaga i le 1 Nifae 16:17–32; 16:34–39; 17:7–16; 18:1–4; ma le 18:9–22. Mafaufau e tusifaamaumau mea e te maua i lalo o ulutala e pei o nei: “Luitau,” “Auala na Tali Atu ai Nifae,” ma le “Auala na Fesoasoani ai le Alii.” O le a se mea ua e aoaoina e mafai ona e faaaogaina i luitau o loo feagai ma oe?

A uma ona aoao mai ia Nifae ma lona aiga, e mafai ona e faamaumauina ni manatu faaopoopo i lalo o nei ulutala: “O O’u Luitau,” “Auala o le a Ou Tali Atu Ai,” ma le “Auala e Mafai Ai e le Alii ona Fesoasoani mai ia te A’u.” A o e faia, e mafai ona e faasino i mau e pei o nei: Mataio 11:28–30; Ioane 14:26–27; Mosaea 24:13–15. O se pese faapenei “O Fea Lo’u Filemu?” O le (Viiga, nu. 68), e mafai ona faamalosia lou faatuatua i le Faaola ma le fesoasoani e ofoina mai e Ia i taimi o tofotofoga.

Tagai foi Anthony D. Perkins, “Ia Manatua Lau Au Paia Mafatia, Lo Matou Atua,” Liahona, Nov. 2021, 103–5; “O Le a Ia Avatu ia te Oe le Fesoasoani,” “Ua Taialaina e le Alii le Malaga a Liae,” “Ua Poloaiina e le Alii Nifae e Fau se Vaa,” ma le “Ua Tuuvaa le Aiga o Liae i le Nuu Folafolaina” (vitio), Gospel Library; “Fesoasoaniga o le Olaga,” Potutusi o le Talalelei.

O Le a Ia Avatu ia te Oe le Fesoasoani

O le feagai ai ma le tiga loloto ma le maliu, o lea na liliu atu ai se talavou ma ni ana uo i Kanata i le Atua ia maua mai ai tali i fesili o’oo’o o o latou loto.

Ua Taialaina e le Alii le Malaga a Liae | 1 Nifae 16

Ua faaauau e aiga o Liae ma Isamaeli la latou malaga i le vao ma ua taialaina e le Alii i le faatuatua.

Ua Poloaiina e le Alii Nifae e Fau se Vaa | 1 Nifae 17–18

Ua mulimuli Nifae i le poloaiga a le Alii e fau se vaa e ui i sauaga mai ona uso matutua.

Ua Folau Atu le Aiga o Liae i le Nuu Folafolaina | 1 Nifae 18

Ua folau atu le aiga o Liae i le nuu folafolaina i le vaa na fausia e Nifae ma ona uso.

1 Nifae 16:10–16, 23–31; 18:11–22

E taiala a’u e le Alii e ala i mea laiti ma le faigofie.

Ina ua taitai e le Atua le aiga o Liae i le vao, Na te lei tuuina atu ia i latou se faafanua e faaalia ai auiliiliga uma o le malaga. Nai lo lena, na Ia tuuina atu ia i latou le Liahona e taiala ai i latou i aso taitasi. A o e faitauina le 1 Nifae 16:10–16, 23–31, ma le 18:10–22, mafaufau e fai se lisi o upumoni e faapupula ai le ala e taiala ai e le Atua Ana fanau (mo se faataitaiga, o le 1 Nifae 16:10 e mafai ona aoao mai o isi taimi e taitai ai e le Atua i tatou i auala e lei mafaufauina). O a ni mea talitutusa ua e vaaia i le va o le Liahona ma le Agaga Paia? O a “mea faatauvaa” ua Ia aumaia ai “mea tetele” i lou olaga?

Tagai foi Alema 37:7, 38–47; Mataupu Faavae ma Feagaiga 64:33–34.

Afai Ua Saunia Outou, o le a Outou Le Matata’u ai Lava, saunia e Clark Kelley Price

1 Nifae 17:1–6, 17–22

O o’u tofotofoga e mafai ona avea ma se faamanuiaga.

E ui lava na tutusa luitau na oo i ai Nifae ma ona uso i le vao, ae sa matua eseese lava o latou aafiaga. Atonu e mafai ona faatusatusa le eseesega o le tala a Nifae i le malaga i le vao (tagai 1 Nifae 17:1–6) ma le tala i ona uso (tagai 1 Nifae 17:17–22). O le a le mea na iloa pe na faia e Nifae na fesoasoani ia te ia e maua ai se vaaiga faatuatua? Mafaufau e tusi e uiga i se tofotofoga lata mai nei po o le taimi nei mai se vaaiga o le faatuatua ma le lotofaafetai. O le a sou lagona po o se mea na aoao mai i lenei mea?

Tagai foi Amy A. Wright, “E Faamalolo e Keriso Mea Ua Gauia,” Liahona, Me 2022, 81–84; “No Strength without Struggle” (vitio), Gospel Library.

Taimi filemu e toe manatunatu ai. O le faaaluina o le taimi e mafaufau ai, mafaufau loloto, manatunatu, pe tusitusi ai e mafai ona taitai atu ai i musumusuga. E mafai ona fesoasoani tatou te iloa ai pe faapefea ona fesootai aoaoga faavae po o mataupu faavae o le talalelei i o tatou olaga. A e aoao atu isi, tuu atu ia i latou le taimi e manatunatu ai ma tusi o latou lagona uunaia. E mafai foi e lenei mea ona faateleina lo latou naunau e faasoa atu o latou manatu ma lagona i isi.

1 Nifae 19:22–24; 20–22

E mafai ona ou “faatatauina tusitusiga paia uma” ia te au lava ia.

Talu ai ua leva ona tusia tusitusiga paia, atonu e foliga mai e le talafeagai ia i tatou i aso nei. Ae, ua sili atu le iloa e Nifae. Na faapea mai Nifae “sa ou faatatauina tusitusiga paia uma ia te i matou, ina ia avea ma o matou manuia ma aoaoga” (1 Nifae 19:23). O se tasi lea o mafuaaga na maua ai e Nifae le mana faaleagaga tele i tusitusiga paia.

Mafaufau i fesili e pei o nei a o e faitauina le 1 Nifae 20–22:

1 Nifae 20:1–9.O a mea ua aoao mai e nei fuaiupu e uiga i tagata i le vaitaimi o Isaia? O a ni mea na e mauaina e aoga ia te oe?

1 Nifae 20:17–22.O a mea o aoao mai e nei fuaiupu e uiga i le ala na taitai ai e le Tama Faalelagi tagata o le vaitaimi o Isaia? E faapefea ona Ia valaaulia oe e mulimuli ia te Ia?

O a nisi mea ua e maua i le 1 Nifae 20–22 e mafai ona e “faatatauina” ia te oe lava?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

1 Nifae 16:10, 28–29; 18:8–13, 20–22

A ou tausia poloaiga, e taitaiina aʻu e le Alii.

• Afai e i ai sau tapasa, se faafanua, po o se isi mea e fesoasoani ia i tatou e saili ai lo tatou ala, e mafai ona e faaali atu i lau fanau. E mafai ona avea lenei mea o se auala lelei e amata ai se talanoaga e uiga i le Liahona, lea e mafai ona e faitau i ai i le 1 Nifae 16:10, 28–29. O a nisi o mafuaaga atonu e le aoga ai se tapasa po o se faafanua? Aisea na le ola ai le Liahona i nisi taimi mo le aiga o Liae? (tagai 1 Nifae 18:9–12, 20–22). O le a se mea ua tuuina mai e le Tama Faalelagi ia i tatou i le asō e toe taitai atu ai i tatou ia te Ia?

• Ina ia fesoasoani i lau fanau e faaaoga mea ua latou aoaoina e uiga i le Liahona i le 1 Nifae 16:10, 26–31; 18:8–22, e mafai ona e valaaulia i latou e mafaufau e uiga i se faaiuga taua pe faigata. O le a se mea ua tuuina mai e le Atua ia i tatou e taiala ai i tatou i aso nei lea e ola e pei o le Liahona? (Mo se faataitaiga, tagai i le Alema 37:38–44.) Mafaufau e faasoa atu se aafiaga patino lea na taialaina ai oe e le Tama Faalelagi.

1 Nifae 16:21–32

E mafai ona avea au ma faataitaiga lelei i loʻu aiga.

• A o outou faitau faatasi i le 1 Nifae 16:21–32 fesoasoani i lau fanau ia iloa pe na faapefea ona faamanuiaina lona aiga i le faataitaiga a Nifae (tagai foi i le vitio “The Lord Guides Lehis Journey” [Gospel Library]). O lenei mea e mafai ona taitai atu ai i se talanoaga e uiga i le auala e mafai ai ona tatou faapei o Nifae. Valaaulia lau fanau e fuafua se mea se tasi e mafai ona latou faia e avea ai ma se faatosinaga lelei i isi tagata o le aiga.

Ua Taialaina e le Alii le Malaga a Liae | 1 Nifae 16

Ua faaauau e aiga o Liae ma Isamaeli la latou malaga i le vao ma ua taialaina e le Alii i le faatuatua.

1 Nifae 17:7–19; 18:1–4

E mafai e le Tama Faalelagi ona fesoasoani ia te au e fai mea faigata.

• E fiafia tamaiti e faamatala tala. E mafai ona e valaaulia i latou e fesoasoani ia te oe e faamatala le tala ia Nifae na poloaiina e fau se vaa (tagai i le 1 Nifae 17:7–19; 18:1–4; tagai foi “Mataupu 7: Fausiaina o le Vaa,” i Tala o le Tusi a Mamona, 21–22; po o le vitio “The Lord Instructs Nephi to Build a Ship” [Gospel Library]). Usu faatasi le fuaiupu lona lua o le “Lototele o Nifae” (Tusipese a Tamaiti, 64–65). O le a le mea na fesoasoani ia Nifae e maua ai le lototele ina ua ulagia o ia e ona uso mo le taumafai e fausia le vaa?

  Ua Faatonuina e le Alii Nifae e Fau se Vaa | 1 Nifae 17 : 17–10

  Ua poloaiina e le Alii ia Nifae e sau se vaa. Ua tali atu Nifae e ala i le fesili atu i le Alii po o fea e su’e mai ai le ‘oa e gaosi ai meafaigaluega.

• Sa lei iloa e Nifae le auala e fau ai se vaa, o lea sa ia faalagolago ai i faatonuga mai le Alii. A uma ona faitau faatasi ma oe le 1 Nifae 18:1 e mafai e lau fanau ona faamaea le itulau o gaoioiga o lenei vaiaso. A o latou faia, talanoa ma i latou e uiga i le ala e mafai ai e le Tama Faalelagi ona fesoasoani ia i tatou e faia mea faigata, e pei lava ona Ia fesoasoani ia Nifae.

Mo nisi manatu, tagai i le lomiga o lenei masina o le mekasini o le Uo .

Sa Latou Matua Agaleaga ia te Au, saunia e Walter Rane