Te Kaikonaki n te Kai ae te Oriwa, iroun Brad Teare

Eberi 8–14: E Mwakuri te Uea ma Ngaira

Iakobwa 5–7

A mwaiti kurikuri, aomata aika a tuai ongo taekan ana euangkerio Iesu Kristo. Ngkana ko namakinna bwa ko a taonaki ni buburan te mwakuri ni botiia nako nanon ana Ekaretia te Uea, tera ae taekinna Iakobwa ibukin te kai ae te oriwa n Iakobwa 5 iai inanona te kauring ni kamatoa ae: te nne ni kurebe bon ana bwai te Uea. E a tia n anganiira n tatabemaniira te tabo ae uarereke n ibuobuoki n Ana mwakuri—ara utu, raora ake n ara mronron, te tabo are e korakora ara kakairi iai. Ao n tabetai te moan n aomata ae ti buokia ni kaokia boni ngaira. Bwa ti aki kona ni katukaki n ti ngaira n te mwakuri aei, ibukina bwa Uean te nne ni kurebe e mwakuri irarikiia ana toro (taraa Iakobwa 5:72). Te Atua e kinaia ao e tangiriia Natina, ao E na katauraoa te kawai ibukiia n tatabemaniia bwa a na ongo Ana euangkerio, riki irouia naake a tia n aki Butimwaia n taai aika nako (taraa Iakobwa 4:15–18). Ao imwiina, ngkana e a tia te mwakuri, ni kabane naake a tia ni “kakaonimaki ni mwakuri ma [Ngaia] … kam na kimwareirei ma [Ngaia] ibukin uaan [Ana] nne ni kurebe” (Iakobwa 5:75).

Taraa naba “Jacob Teaches about the Gathering of Israel” (video), Gospel Library.

Iango ibukin Reiakinana n te Mweenga ao n te Taromauri

Iakobwa 5

Iesu Kristo bon Uean te nne ni kurebe.

Iakoba 5 bon te karaki ma nanona n te kanikina. E kabwarabwarai kaai ao uaanikai ao taan ni mwakuri, ma bon ibukin ana reitaki te Atua ma Ana aomata rinanon rongorongon ngkoa. Ngaia ae ngkana ko wareka te karaki, iangoia bwa tera bwaai tabeua n te karaki aika a na kona n tei ibukina.

Te katooto, te nne ni kurebe e tei ibukin te aonaaba, ao te kai ae te oriwa e tei ibukin Iteraera (ka naake a tia ni karaoi berita ma te Atua; taraa Iakoba 5:3), tera ae na kona n tei ibukin te kai ae te oriwa? Tera ae kona n tei ibukin te uaa ae raoiroi ao ae buakaka? Tera tabeua kanikina aika ko noori?

E ngae ngke Iakobwa 5 e reirei taekaia aaba ao tienture n rongorongon te aonaaba, bon ibukim ao ibukin naba maium. Tera rongorongo aika ko kunei inanon Iakobwa 5?

Ma ae moan te kakawaki, Iakobwa 5 bon taekan Iesu Kristo. Ukoukoria ngkana ko wareware. Tera ae ko reiakinna Ibukina, te katooto, inanon kiibu 40–41, 46–47?

Ibukin atatai aika nano riki iaon Iakobwa 5, taraa te taeakuraem ni banen te kamataata aei.

Iakobwa 5:61–75

E kaoai te Uea bwa N na mwakuri ma Ngaia n Ana nne ni kurebe.

Ao “taan ni mwakuri ake tabeman” (Iakobwa 5:70) ake a weteaki nako nanon Ana nne ni kurebe te Uea a raonaki ma aomata n aromi. Tera koaua aika ko kunei inanon Iakobwa 5, riki ni kiibu 61–62 ao 70–75, ibukin te mwakuri n ana nne ni kurebe te Uea? Tera ae ko a tia n reiakinna mai Irouna man am ibuobuoki n Ana mwakuri?

Ngkai ko wareka taekan te “kabanea n tai” ngke e mwakuri te Uea n Ana nne ni kurebe, tera ae kaungako bwa ko na beku ibukin te Uea “ma korakoram ni kabane”? (Iakobwa 5:71). Tao ko kona ni iangoa am taneiai are ko namakina iai te kimwareirei ngke ko mwakuri ibukin te Uea n te nneni kurebe—te katooto, rinanon tibwauakin te euangkerio, te beku inanon te tembora, ke kakorakoraia tabeman. Ko kona naba n rinanon te katooto are e tibwauaia Unimwaane Neil L. Andersen n ana rongorongo “E Bon Tamaroa—Tamaroa man Bebete” (Riaona, Nob. 2021, 47–50).

E reirei Beretitenti Nelson: “N te tai are ko karaoa iai te bwai teuana are buoka temanna—n iteran te rabuna are teuana—ni karaoi berita aika tabu ma te Atua ao ni karekei aia otenanti ni bwabetito ao n te tembora aika kakawaki, ko buokia ni ikota te bata are Iteraera. E bon bebete n aron anne” (“Hope of Israel” [worldwide youth devotional, Tuun 3, 2018], ChurchofJesusChrist.org). Iangoia ni moana korean iango n te bwai ae ko kona ni karaoia ni buokia ni ikota te bata are Iteraera. Man iango ake ko a tia ni koroi, tera ae ko namakinna ae na kona n tuangko te Uea bwa ko na karaoia n te bong aei n Ana nne ni kurebe? Ni kaineti nakon te kibu 75, e kanga te Uea n anganiira kaniwangara ibukin te mwakuri n ibuobuoki n Ana nne ni kurebe?

Taraa naba “Israel, Israel, God Is Calling,” Boki n Anene, nambwa. 7; “Old Testament Olive Vineyard” (witeo), Gospel Library; Gospel Topics, “Gathering Israel,” “Inviting All to Receive the Gospel of Jesus Christ,” “Participating in Temple and Family History Work,” Gospel Library.

Te Oriwa n te Nne ni Kurebe n Te O Tetemanti

(Jacob 5–6) Seminary students visit an Old Testament olive vineyard and are taught how to care for olive trees. They discover conditions in the vineyard that parallel the conditions in Zenos’s allegory. Segment 1, Old Testament Olive Vineyard

Reirei te reirei. Kakoaua raoi bwa a boboto am marooro iaon boto n reirei ake inanon booki aika tabu. Ko kona ni karaoa aei man warekan booki aika tabu ni bootaki ao n tibwauai imarenami koaua aika kam kunei, n raonaki ma taneiai man maiuakinan koaua aikanne.

Iakobwa 6:4–5

E uringiia Ana aomata te Uea n te tangira ao n te nanoanga.

Teuana nanon te taeka ae nim bon te kamatoaaki nakon ke ni kanimko nakon te bwai teuana, ni kaaniaki, ao n nene ni matoa. E kanga aron te kabwarabwara anne n roota aron otam n Iakobwa 6:4–5? N ni karakinan te kai ae te oriwa, e kanga Uean te nne ni kurebe n taakin “baina n nanoanga”? (taraa, ibukin te katooto, Iakobwa 5:47, 51, 60–61, 71–72). E kanga ni karaoa aei ibukim?

Iakobwa 7:1–23

I kona n teimatoa n onimaki ngkana a kataa au onimaki tabeman iaon Iesu Kristo.

Te taneiai are a rinanona Nibwaite ma Tierem e okioki karaoana ni boong aikai: aomata a kataia ni kamaunaa am onimaki iroun Kristo. E kanga ana kaeka Iakobwa ngke e kataaki ana onimaki? Tera ae ko reiakinna man ana kaeka? Tera ae ko kona ni katauraoia ngkai ibukin taai rimwi ngkana am onimaki iaon te Tia Kamaiu e a kataaki?

Taraa naba Jeffrey R. Holland, “The Cost—and Blessings—of Discipleship,” Ensign ke Riaona, Meei 2014, 6–9; “Sherem Denies Christ” (witeo), Gospel Library.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Iakobwa 5

Te Uea e tabeaianga ibukiia Ana botanaomata.

• Ko na kanga n tibwaua te karaki iaon te kaai ae te oriwa n te kawai are a na kona n ota iai am ataei? Kawaina teuana bwa ko na karekea am tai n nakonako itinaniku n taraa te kai ao n rinanoi boto n iango n te karaki. Tera ae karaoia Uean te nne ni kurebe ibukin Ana kai? Ti na kanga n riki bwa kanga taan ni mwakuri n te karaki ao ni buokiia tabeman bwa a na namakina ana tangira te Tia Kamaiu?

• Iakobwa e tibwaua karakinan te kai ae te oriwa ni kaoiia ana botanaomata n nakomai nakon Kristo. E kona ni karaoa ae ti tebo ma anne ibukiia natimi. Tao kam kona ni kakimototoa te karaki ma kiibu n aron Iakobwa 5:3–4, 28–29, 47, ao 70–72 (taraa naba “Old Testament Olive Vineyard” [witeo], Gospel Library). Ko kona ngkoe ke natim ni wareka ngkanne Iakobwa 5:11, 41, 47, ao 72, n taratarai bwaai ake a kaota mwaitin tabeaiangan Uean te nne ni kurebe (Iesu Kristo) ibukin kaai. Tera ae e karaoia te Tia Kamaiu ni kaotia bwa E tabeaianga ibukira?

Iakobwa 6:4–5

Tamau are i Karawa e tangirai ao e na kabwarai au bure ngkai I raira nanou.

• Iakobwa 6:4–5 iai ana rongorongo ae moan te kakawaki ibukira ngkana ti karaoi rinerine aika bure. Tao ko kona ni buokiia natim bwa a na kakaea. Tera taeka inanon kiibu aikai ae e na anganiira te kaantaninga n ana tangira ni kamaiu te Atua? Ana karaki Unimwaane Allen D. Haynie iaon te kabarekareka n te bokaboka, n ana marooro “Remembering in Whom We Have Trusted” (Riaona, Nobembwa 2015, 121–22), e kona n ibuobuoki. Tera te bwai ae reireiniira te karaki aei ao Iakobwa 6:4–5 iaon te bwai ae ti kainnanoia ni karaoia bwa ti na kamaiuaki n abanuean te Atua?

Iakobwa 7:1–23

I kona ni kamanoa ao ni boutokaa te bwai ae I ataia bwa e koaua.

• Ko na kanga ni kaungaia am ataei bwa a na tei ibukin te koaua n aron are e karaoia Iakobwa? A kona am ataei ni matakuakina te witeo “Chapter 10: Jacob and Sherem” (Gospel Library) ao ni katea kain te reitaki imarenan Iakobwa ao Tierem, ni kabongana Iakobwa 7:1–23 bwa te bwai ni kairi. E kanga Iakobwa n tei ibukin te bwai are e ataia bwa e eeti? Kaoia am ataei bwa a na tibwaua te bwai are a rinanona ngkana a tei ibukin te bwai ae eeti, ke tibwaua are bon mai iroum. Tao a kona naba n anenea te anene ae kabwarabwara te ninikoria n aron Iakobwa, n aron “Stand for the Right,” Aia Boki n Anene Ataei, 159.

Ibukin iango riki tabeua, taraa te beeba ni kaongora n te namwakaina aio n te Rao maekatiin.