“ວັນທີ 3–9 ເດືອນມິຖຸນາ: ‘ພວກເຂົາຍັງແນ່ວແນ່ ແລະ ບໍ່ຫວັ່ນໄຫວ.’ ໂມໄຊຢາ 29–ແອວມາ 4,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 3–9 ເດືອນມິຖຸນາ. ໂມໄຊຢາ 29–ແອວມາ 4,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

Alma the Younger Preaching [ແອວມາຜູ້ເປັນລູກກຳລັງສັ່ງສອນ], ໂດຍ ແກຣີ ແອວ ແຄບ

ວັນທີ 3–9 ເດືອນມິຖຸນາ: “ພວກເຂົາຍັງແນ່ວແນ່ ແລະ ບໍ່ຫວັ່ນໄຫວ”

ໂມໄຊຢາ 29–ແອວມາ 4

ບາງຄົນອາດເຫັນວ່າ ຄຳສະເໜີຂອງກະສັດໂມໄຊຢາ ໃຫ້ເລືອກຕັ້ງຜູ້ຕັດສິນແທນກະສັດ ເປັນພຽງແຕ່ການປະຕິຮູບດ້ານການເມືອງທີ່ສະຫລາດເທົ່ານັ້ນ. ແຕ່ຊາວນີໄຟ, ໂດຍສະເພາະຜູ້ທີ່ຢູ່ໃຕ້ອຳນາດຂອງກະສັດໂນອາທີ່ຊົ່ວຮ້າຍ, ເຫັນວ່າການປ່ຽນແປງນີ້ ມີຄວາມສຳຄັນທາງວິນຍານນຳອີກ. ພວກເຂົາໄດ້ເຫັນວ່າ ກະສັດທີ່ບໍ່ຊອບທຳໄດ້ມີອິດທິພົນຕໍ່ປະຊາຊົນຂອງເພິ່ນຢ່າງໃດ, ແລະ ພວກເຂົາກໍມີຄວາມ “ກະຕືລືລົ້ນຢ່າງຍິ່ງ” ທີ່ຈະເປັນອິດສະລະຈາກອິດທິພົນເຊັ່ນນັ້ນ. ການປ່ຽນແປງນີ້ຈະປ່ອຍໃຫ້ພວກເຂົາຮັບຜິດຊອບຕໍ່ຄວາມຊອບທຳຂອງພວກເຂົາເອງ ແລະ “ຮັບເອົາບາບ [ຂອງພວກເຂົາ] ເອງ” (ໂມໄຊຢາ 29:38).

ແນ່ນອນ, ເມື່ອບໍ່ມີກະສັດ ກໍບໍ່ໄດ້ໝາຍຄວາມວ່າ ຈະບໍ່ມີບັນຫາໃນສັງຄົມຂອງຊາວນີໄຟ. ຜູ້ຄົນທີ່ເຕັມໄປດ້ວຍເລ່ຫລ່ຽມ ເຊັ່ນ ນີຮໍ ແລະ ອາມລິໄຊ ໄດ້ສົ່ງເສີມແນວຄິດທີ່ຜິດ, ຜູ້ທີ່ບໍ່ເຊື່ອຂົ່ມເຫັງໄພ່ພົນ, ແລະ ສະມາຊິກຂອງສາດສະໜາຈັກເປັນຈຳນວນຫລວງຫລາຍ ກັບກາຍເປັນຄົນທະນົງຕົວ ແລະ ຕົກໄປ. ແຕ່ “ຜູ້ຕິດຕາມທີ່ຖ່ອມຕົວຂອງພຣະເຈົ້າ” ຍັງ “ແນ່ວແນ່ ແລະ ບໍ່ຫວັ່ນໄຫວ” ເຖິງແມ່ນສິ່ງຕ່າງໆຈະເກີດຂຶ້ນອ້ອມຮອບພວກເຂົາກໍຕາມ (ແອວມາ 4:15; 1:25).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ໂມໄຊຢາ 29:26–27; ແອວມາ 2:1–7

ເຮົາສາມາດເປັນອິດທິພົນໃນທາງບວກ ໃນຊຸມຊົນຂອງເຮົາ.

ພຽງແຕ່ຫ້າປີໃນການປົກຄອງຂອງຜູ້ຕັດສິນ, ວິກິດໄດ້ເລີ່ມປະກົດຕົວ ທີ່ຈະທົດສອບຄຳປະກາດຂອງໂມໄຊຢາ ທີ່ວ່າ ສຽງຂອງຜູ້ຄົນ ຕາມປົກກະຕິແລ້ວ ຈະເລືອກເອົາສິ່ງທີ່ຖືກຕ້ອງສະເໝີ (ເບິ່ງ ໂມໄຊຢາ 29:26). ສຶກສາ ແອວມາ 2:1–7 ເພື່ອຄົ້ນຫາວ່າ ບັນຫານັ້ນແມ່ນຫຍັງ ແລະ ຊາວນີໄຟໄດ້ເຮັດຫຍັງກ່ຽວກັບມັນ. ແມ່ນຫຍັງອາດເກີດຂຶ້ນ ຖ້າ “ຜູ້ຄົນຂອງສາດສະໜາຈັກ” ບໍ່ໄດ້ເຮັດໃຫ້ສຽງຂອງພວກເຂົາເປັນທີ່ໄດ້ຍິນ? ທ່ານຮຽນຮູ້ຫຍັງອີກຈາກເລື່ອງລາວນີ້ ກ່ຽວກັບວ່າ ພຣະຜູ້ເປັນເຈົ້າຢາກໃຫ້ທ່ານມີສ່ວນຮ່ວມໃນຊຸມຊົນຂອງທ່ານແນວໃດ? (ເບິ່ງ ໂມໄຊຢາ 29:26–27 ນຳອີກ).

ມີບັນຫາສຳຄັນຫຍັງແດ່ທີ່ຊຸມຊົນຂອງທ່ານກຳລັງປະເຊີນ? ໃຫ້ພິຈາລະນາວ່າ ທ່ານ, ເຊັ່ນດຽວກັບຊາວນີໄຟ, ສາມາດເຮັດແນວໃດທ່ານຈຶ່ງຈະແນ່ໃຈໄດ້ວ່າ ສຽງຂອງທ່ານແມ່ນລວມຢູ່ໃນ “ສຽງຂອງຜູ້ຄົນ.” ມີວິທີໃດແດ່ທີ່ທ່ານ, ໃນຖານະຜູ້ຕິດຕາມຂອງພຣະເຢຊູຄຣິດ, ສາມາດມີອິດທິພົນຕໍ່ຊຸມຊົນຂອງທ່ານໃນທາງທີ່ດີ?

ເບິ່ງ Dallin H. Oaks, “Love Your Enemies,” Liahona, Nov. 2020, 26–29 ນຳອີກ.

ແອວມາ 1

ພຣະຄຳຂອງພຣະເຈົ້າສາມາດຊ່ວຍໃຫ້ເຮົາຮູ້ຈັກຫລັກຄຳສອນເທັດໄດ້.

ເຖິງແມ່ນວ່ານີຮໍ ໃນທີ່ສຸດໄດ້ສາລະພາບວ່າ ສິ່ງທີ່ລາວໄດ້ສິດສອນເປັນສິ່ງທີ່ຜິດ, ແຕ່ຄຳສອນຂອງລາວກໍຍັງມີອິດທິພົນຕໍ່ຊາວນີໄຟເປັນເວລາຫລາຍປີ. ທ່ານຄິດວ່າເປັນຫຍັງຜູ້ຄົນຈຶ່ງມັກສິ່ງທີ່ນີຮໍສິດສອນ? ໃນ ແອວມາ 1:2–6, ໃຫ້ຊອກຫາຄຳຕົວະໃນຄຳສອນຂອງນີຮໍ—ແລະ ຄວາມຈິງທີ່ລາວໄດ້ໃຊ້ເພື່ອປິດບັງຄຳຕົວະນັ້ນ.

ກີເດໂອນໄດ້ຕໍ່ຕ້ານນີຮໍ “ດ້ວຍພຣະຄຳຂອງພຣະເຈົ້າ” (ແອວມາ 1:7, 9). ຕໍ່ໄປນີ້ ແມ່ນຂໍ້ພຣະຄຳພີທີ່ຫັກລ້າງຄວາມເທັດຂອງນີຮໍ: ມັດທາຍ 7:21–23; 2 ນີໄຟ 26:29–31; ໂມໄຊຢາ 18:24–26; ແລະ ຮີລາມັນ 12:25–26. ລອງສະຫລຸບຂໍ້ພຣະຄຳພີແຕ່ລະຂໍ້. ທ່ານໄດ້ຮຽນຮູ້ຫຍັງແດ່ຈາກບັນດາສາດສະດາທີ່ມີຊີວິດຢູ່ ທີ່ຫັກລ້າງຄຳສອນເທັດຕ່າງໆໃນວັນເວລາຂອງພວກເຮົາ?

ແອວມາ 1:19–31; 4:6–15

ສານຸສິດທີ່ແທ້ຈິງຂອງພຣະເຢຊູຄຣິດຄື “ຜູ້ຕິດຕາມທີ່ຖ່ອມຕົວຂອງພຣະເຈົ້າ.”

ບົດທີ 1 ແລະ 4 ຂອງ ແອວມາ ໄດ້ບັນຍາຍເຖິງໄລຍະທີ່ສາດສະໜາຈັກໄດ້ຈະເລີນຮຸ່ງເຮືອງຂຶ້ນ, ແຕ່ສະມາຊິກຂອງສາດສະໜາຈັກຕອບຮັບຕໍ່ຄວາມຈະເລີນຮຸ່ງເຮືອງໃນທາງທີ່ແຕກຕ່າງກັນ. ຍົກຕົວຢ່າງ, ປຽບທຽບ ແອວມາ 1:19–30 ກັບ ແອວມາ 4:6–15 ເພື່ອເບິ່ງວ່າ ສະມາຊິກຂອງສາດສະໜາຈັກໄດ້ປ່ຽນແປງໄປແນວໃດພຽງແຕ່ໃນບໍ່ເທົ່າໃດປີ. ອີງຕາມສິ່ງທີ່ທ່ານໄດ້ອ່ານ, ຜູ້ຕິດຕາມທີ່ແທ້ຈິງຂອງພຣະເຢຊູຄຣິດຮູ້ສຶກແນວໃດກ່ຽວກັບຜູ້ຄົນທີ່ມີຄວາມເຊື່ອທີ່ແຕກຕ່າງ? ຜູ້ຕິດຕາມຂອງພຣະຄຣິດມີທ່າທີແບບໃດຕໍ່ຄວາມຮັ່ງມີ ແລະ ຄວາມຈະເລີນຮຸ່ງເຮືອງ? ທ່ານຮູ້ສຶກຖືກດົນໃຈໃຫ້ປ່ຽນແປງສິ່ງໃດ ກ່ຽວກັບທ່າທີຂອງທ່ານເອງ?

ປຽບທຽບພຣະຄຳພີໃສ່ກັບຕົວທ່ານເອງ. ໃຫ້ພິຈາລະນາວິທີທີ່ເລື່ອງລາວ ແລະ ຄຳສອນຂອງພຣະຄຳພີກ່ຽວຂ້ອງກັບຊີວິດຂອງທ່ານແນວໃດ. ຍົກຕົວຢ່າງ, ທ່ານອາດພົບເຫັນຄວາມຄ້າຍຄືກັນ ລະຫວ່າງບັນຫາທີ່ທ່ານສັງເກດເຫັນໃນທຸກວັນນີ້ ແລະ ບັນຫາທີ່ຊາວນີໄຟໄດ້ປະເຊີນ ຢູ່ໃນ ແອວມາ 1–4.

ແອວມາ 4:6–20

ແບບຢ່າງ ແລະ ປະຈັກພະຍານຂອງເຮົາສາມາດປ່ຽນຈິດໃຈໄດ້.

ບາງເທື່ອ ທ່ານສາມາດເຂົ້າໃຈຄວາມໂສກເສົ້າທີ່ແອວມາໄດ້ຮູ້ສຶກ ເມື່ອເພິ່ນເຫັນສິ່ງທີ່ກຳລັງເກີດຂຶ້ນກັບຜູ້ຄົນຂອງເພິ່ນ. ຊອກຫາບັນຫາທີ່ເພິ່ນເຫັນໃນ ແອວມາ 4:6–15. ທ່ານເຄີຍສັງເກດເຫັນບັນຫາໃດໆທີ່ຄ້າຍຄືກັນບໍ່? ບາງທີທ່ານອາດກັງວົນກ່ຽວກັບຄົນທີ່ທ່ານຮັກ ຜູ້ທີ່ກຳລັງຕໍ່ສູ້ກັບບັນຫາເຫລົ່ານີ້. ທ່ານເຄີຍຄິດສົງໄສບໍ່ວ່າ ທ່ານສາມາດຊ່ວຍຫຍັງໄດ້ແດ່?

ບາງຄົນອາດເວົ້າວ່າ ແອວມາ, ໃນຖານະຫົວໜ້າຜູ້ຕັດສິນ, ເປັນຄົນທີ່ດີທີ່ສຸດທີ່ຈະແກ້ໄຂບັນຫາເຫລົ່ານີ້. ແຕ່ແອວມາເຊື່ອວ່າ ມີທາງອື່ນທີ່ດີກວ່ານັ້ນ. ຂະນະທີ່ທ່ານອ່ານ ຂໍ້ທີ 16–20, ແມ່ນຫຍັງທີ່ປະທັບໃຈທ່ານຫລາຍກ່ຽວກັບວິທີທີ່ເພິ່ນຊ່ວຍເຫລືອຜູ້ຄົນຂອງເພິ່ນ?

ແອວມາໄດ້ມີສັດທາອັນໃຫຍ່ຫລວງໃນພຣະຄຳຂອງພຣະເຈົ້າ ແລະ “ປະຈັກພະຍານອັນບໍລິສຸດ” (ຂໍ້ທີ 19). ມີຕົວຢ່າງໃດແດ່ທີ່ທ່ານເຄີຍເຫັນກ່ຽວກັບອຳນາດແຫ່ງປະຈັກພະຍານອັນບໍສຸດ? ຂະນະທີ່ທ່ານໄຕ່ຕອງກ່ຽວກັບຫລາຍໆວິທີທີ່ທ່ານສາມາດແບ່ງປັນປະຈັກພະຍານຂອງທ່ານກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ, ທ່ານສາມາດອ່ານ ແອວມາ 4:6–14 ຄືນອີກ. ການກະທຳຂອງສະມາຊິກຂອງສາດສະໜາຈັກໃນຂໍ້ເຫລົ່ານີ້ ເປີດເຜີຍຫຍັງກ່ຽວກັບປະຈັກພະຍານຂອງພວກເຂົາ ກ່ຽວກັບພຣະເຢຊູຄຣິດ ແລະ ຄຳສອນຂອງພຣະອົງ? ທ່ານສັງເກດເຫັນຫຍັງແດ່ກ່ຽວກັບຜົນສະທ້ອນຂອງການກະທຳຂອງພວກເຂົາ—ທີ່ມີຕໍ່ຕົວພວກເຂົາເອງ ແລະ ຄົນອື່ນ? ທ່ານຍັງສາມາດຄິດກ່ຽວກັບວິທີຕ່າງໆທີ່ທ່ານໄດ້ຮັບພອນໂດຍປະຈັກພະຍານອັນບໍລິສຸດຂອງຄົນອື່ນ, ບໍ່ວ່າຈະເປັນການແບ່ງປັນຜ່ານທາງຄຳເວົ້າ ຫລື ການກະທຳກໍຕາມ.

ໃຫ້ຄິດຫາວິທີທາງທີ່ທ່ານສາມາດແບ່ງປັນປະຈັກພະຍານຂອງທ່ານກ່ຽວກັບພຣະເຢຊູຄຣິດ—ຜ່ານຄຳເວົ້າ ຫລື ການກະທຳ. ແມ່ນໃຜຈະໄດ້ຮັບຜົນປະໂຫຍດຈາກຄຳພະຍານຂອງທ່ານ?

ເບິ່ງ Gary E. Stevenson, “Nourishing and Bearing Your Testimony,” Liahona, Nov. 2022, 111–14; “Testimony,” Hymns, no. 137; “Alma the Younger Steps Down as Chief Judge” (ວິດີໂອ), ຫ້ອງສະໝຸດພຣະກິດຕິຄຸນ; Gospel Topics, “Revelation,” ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ແອວມາ 1:2–9

ພຣະຜູ້ເປັນເຈົ້າສາມາດຊ່ວຍໃຫ້ເຮົາຮູ້ຈັກຄຳສອນເທັດໄດ້.

ວິທີໜຶ່ງໃນການສຶກສາ ແອວມາ 1:2–4 ກັບລູກໆຂອງທ່ານ ແມ່ນການຊ່ວຍໃຫ້ພວກເຂົາເຮັດບົດທົດສອບ ແທ້-ຫລື-ເທັດ ໂດຍການໃຊ້ຄຳຖະແຫລງທີ່ນີຮໍ, ຄູສອນປອມໄດ້ສິດສອນ. ແລ້ວທ່ານກໍສາມາດເວົ້າລົມກັບພວກເຂົາກ່ຽວກັບວ່າ ເປັນຫຍັງຊາຕານຈຶ່ງມັກປະສົມຄວາມຈິງກັບຄວາມເທັດ. ຊ່ວຍໃຫ້ລູກໆຂອງທ່ານຄິດຫາບາງຕົວຢ່າງ. ໃນ ຂໍ້ທີ 7–9, ກີເດໂອນໄດ້ຕໍ່ຕ້ານຄຳຕົວະຂອງນີຮໍແນວໃດ? (ເບິ່ງ “ບົດທີ 20: ແອວມາ ແລະ ນີຮໍ,” ເລື່ອງພຣະຄຳພີມໍມອນ, 54–55. ນຳອີກ)

ແອວມາ 1:19–25

ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດ, ເຮົາຮັກ ແລະ ຮັບໃຊ້ຄົນອື່ນ.

ສະມາຊິກບາງຄົນຂອງສາດສະໜາຈັກຂອງພຣະຜູ້ເປັນເຈົ້າໃນສະໄໝຂອງແອວມາເປັນຄົນມີໃຈເພື່ອແຜ່ ແລະ ມັກໃຫ້, ແລະ ສະມາຊິກບາງຄົນເປັນຄົນບໍ່ມີເມດຕາ ແລະ ທະນົງຕົວ. ເພື່ອຊ່ວຍໃຫ້ລູກໆຂອງທ່ານຮຽນຮູ້ຈາກປະສົບການເຫລົ່ານີ້, ພວກທ່ານສາມາດອ່ານ ແອວມາ 1:27, 30 ນຳກັນ ແລະ ເຮັດລາຍການຂອງປະເພດຄົນທີ່ສະມາຊິກຂອງສາດສະໜາຈັກຂອງພຣະຜູ້ເປັນເຈົ້າໄດ້ຊ່ວຍ. ແມ່ນໃຜທີ່ເຮົາຮູ້ຈັກທີ່ອາດ “ຢູ່ໃນຄວາມຕ້ອງການ” (ແອວມາ 1:30) ຄວາມຮັກ ແລະ ການຊ່ວຍເຫລືອຈາກເຮົາ? ທ່ານຍັງສາມາດຮ້ອງເພງນຳກັນກ່ຽວກັບຄວາມຮັກ ແລະ ການຮັບໃຊ້, ເຊັ່ນ “ຄວາມເມດຕາເລີ່ມຈາກເຮົາ” (ເພງສວດ ແລະ ເພງຂອງເດັກນ້ອຍ, 69), ແລະ ຊ່ວຍໃຫ້ເດັກນ້ອຍຄິດເຖິງການກະທຳທີ່ສາມາດເຂົ້າກັບເພງນັ້ນໄດ້.
ເຮົາຄວນເຮັດຫຍັງເມື່ອຄົນທັງຫລາຍເຮັດບໍ່ດີກັບພວກເຮົາ? ໃຫ້ຄິດທີ່ຈະອ່ານກັບລູກໆຂອງທ່ານກ່ຽວກັບວ່າ ຜູ້ຕິດຕາມຂອງພຣະຄຣິດໄດ້ຮັບການປະຕິບັດຕໍ່ຢ່າງໃດໃນ ແອວມາ 1:19–20. ເວົ້າລົມກ່ຽວກັບວ່າ ພວກເຂົາມີປະຕິກິລິຍາແນວໃດໃນ ຂໍ້ທີ 22 ແລະ 25. ບາງທີພວກທ່ານສາມາດຝຶກວິທີທີ່ຈະຕອບໂຕ້ ເມື່ອຄົນອື່ນເຮັດບໍ່ດີ.

ແອວມາ 4:8–20

ປະຈັກພະຍານຂອງເຮົາສາມາດເພີ່ມຄວາມເຂັ້ມແຂງໃຫ້ຄົນອື່ນໄດ້.

ສ່ວນຫລາຍ “ປະຈັກພະຍານອັນບໍລິສຸດ” (ແອວມາ 4:19) ຂອງເດັກນ້ອຍຄົນໜຶ່ງ ມັກຈະສາມາດມີອິດທິພົນອັນໃຫຍ່ຫລວງຕໍ່ຄົນອື່ນ. ເພື່ອຊ່ວຍໃຫ້ລູກໆຂອງທ່ານຄົ້ນພົບສິ່ງນີ້, ທ່ານສາມາດອ່ານ ແອວມາ 4:8–12, 15 ກັບພວກເຂົາ, ເພື່ອຊ່ວຍໃຫ້ພວກເຂົາຊີ້ບອກເຖິງບັນຫາທີ່ກຳລັງເກີດຂຶ້ນໃນສາດສະໜາຈັກ. ແອວມາສາມາດເຮັດຫຍັງໄດ້ແດ່ເພື່ອແກ້ໄຂບັນຫາເຫລົ່ານີ້? ຊ່ວຍໃຫ້ພວກເຂົາຄົ້ນພົບສິ່ງທີ່ແອວມາຕັດສິນໃຈເຮັດໃນ ແອວມາ 4:16–20. ບາງເທື່ອທ່ານກໍສາມາດແບ່ງປັນຕໍ່ກັນກ່ຽວກັບວ່າ ປະຈັກພະຍານຂອງຄົນໃດຄົນໜຶ່ງເຖິງພຣະຄຣິດ ໄດ້ສ້າງຄວາມເຂັ້ມແຂງໃຫ້ທ່ານແນວໃດ.
ຖ້າລູກໆຂອງທ່ານຕ້ອງການຕົວຢ່າງວ່າ ປະຈັກພະຍານແມ່ນຫຍັງ, ໃຫ້ຄິດທີ່ຈະສາຍວິດີໂອຂອງຜູ້ກ່າວປາໄສໃນກອງປະຊຸມໃຫຍ່ສາມັນ ທີ່ກຳລັງກ່າວປະຈັກພະຍານ ໃຫ້ພວກເຂົາເບິ່ງ. ທ່ານຍັງສາມາດໃຊ້ໜ້າກິດຈະກຳຂອງອາທິດນີ້ ຫລື ຮ້ອງເພງນຳກັນ ເຊັ່ນ “ພື້ນໝັ້ນຄົງໜັກໜາ” (ເພງສວດ ແລະ ເພງຂອງເດັກນ້ອຍ, 6). ເຮົາຮຽນຮູ້ຫຍັງແດ່ກ່ຽວກັບປະຈັກພະຍານຈາກແຫລ່ງຂໍ້ມູນເຫລົ່ານີ້? ໃຫ້ລູກໆຂອງທ່ານຝຶກການແບ່ງປັນປະຈັກພະຍານຂອງພວກເຂົາ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຊາວນີໄຟກຳລັງຕໍ່ສູ້ກັບຊາວອາມລິໄຊ — Alma and Amlici [ແອວມາ ແລະ ອາມລິໄຊ], ໂດຍ ສະກາດ ເອັມ ສະໂນ

ໜ້າກິດຈະກຳ: ປະຈັກພະຍານຂອງເຮົາສາມາດເພີ່ມຄວາມເຂັ້ມແຂງໃຫ້ຄົນອື່ນໄດ້