“ວັນທີ 17–23 ເດືອນມິຖຸນາ: ‘ພຣະເຢຊູຄຣິດຈະສະເດັດມາໄຖ່ຜູ້ຄົນຂອງພຣະອົງ.’ ແອວມາ 8–12,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 17–23 ເດືອນມິຖຸນາ. ແອວມາ 8–12,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

ຮູບພາບ

ແອວມາກຳລັງສັ່ງສອນ

Teaching True Doctrine [ການສິດສອນຄຳສອນທີ່ແທ້ຈິງ], ໂດຍ ໄມໂກ ທີ ມອມ

ວັນທີ 17–23 ເດືອນມິຖຸນາ: ພຣະເຢຊູຄຣິດຈະສະເດັດມາໄຖ່ຜູ້ຄົນຂອງພຣະອົງ

ແອວມາ 8–12

ວຽກງານຂອງພຣະເຈົ້າຈະບໍ່ລົ້ມເຫລວ. ແຕ່ຄວາມພະຍາຍາມຂອງເຮົາທີ່ຈະຊ່ວຍໃນວຽກງານຂອງພຣະອົງ ບາງເທື່ອກໍເບິ່ງຄືວ່າລົ້ມເຫລວ—ຢ່າງໜ້ອຍ, ເຮົາບໍ່ເຫັນຜົນທີ່ເຮົາຄາດໝາຍໃນທັນທີທັນໃດ. ເຮົາອາດຮູ້ສຶກຄືກັນກັບແອວມາ ເມື່ອເພິ່ນສິດສອນພຣະກິດຕິຄຸນຢູ່ເມືອງອຳໂມນໄນຮາ—ຖືກປະຕິເສດ, ຖືກຖົ່ມນ້ຳລາຍໃສ່, ແລະ ຖືກຂັບໄລ່ໜີ. ແຕ່ເມື່ອທູດອົງໜຶ່ງໄດ້ແນະນຳເພິ່ນໃຫ້ກັບຄືນໄປ ແລະ ພະຍາຍາມເຮັດອີກ, ແອວມາກໍໄດ້ “ກັບຄືນໄປຢ່າງວ່ອງໄວ” ດ້ວຍຄວາມກ້າຫານ (ແອວມາ 8:18), ແລະ ພຣະເຈົ້າໄດ້ຈັດກຽມວິທີທາງໄວ້ໃຫ້ເພິ່ນ. ບໍ່ພຽງແຕ່ພຣະອົງໄດ້ຈັດຫາອາຫານ ແລະ ທີ່ພັກອາໄສໃຫ້ແອວມາເທົ່ານັ້ນ, ແຕ່ພຣະອົງຍັງໄດ້ຈັດກຽມແອມມິວເລັກໄວ້ໃຫ້ເພິ່ນນຳອີກ, ຜູ້ທີ່ໄດ້ກາຍເປັນເພື່ອນຮ່ວມງານຂອງເພິ່ນ, ເປັນຜູ້ປົກປ້ອງພຣະກິດຕິຄຸນທີ່ມີພະລັງ, ແລະ ເປັນເພື່ອນທີ່ຊື່ສັດ. ເມື່ອເຮົາປະເຊີນກັບຄວາມຫຍຸ້ງຍາກ ແລະ ຄວາມຜິດຫວັງ ຂະນະທີ່ເຮົາຮັບໃຊ້ຢູ່ໃນອານາຈັກຂອງພຣະຜູ້ເປັນເຈົ້າ, ເຮົາສາມາດຈື່ຈຳວິທີທີ່ພຣະເຈົ້າຄ້ຳຈູນ ແລະ ນຳພາແອວມາ, ແລະ ເຮົາສາມາດໄວ້ວາງໃຈວ່າພຣະເຈົ້າຈະຄ້ຳຈູນ ແລະ ນຳພາເຮົາຄືກັນ, ແມ່ນແຕ່ໃນສະຖານະການທີ່ຫຍຸ້ງຍາກກໍຕາມ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ແອວມາ 8

ຮູບພາບ
ໄອຄອນຫ້ອງຮຽນສາດສະໜາ
ຄວາມພະຍາຍາມຂອງເຮົາທີ່ຈະແບ່ງປັນພຣະກິດຕິຄຸນຂອງພຣະເຢຊູຄຣິດຮຽກຮ້ອງຄວາມອົດທົນ.

ທ່ານເຄີຍພະຍາຍາມແບ່ງປັນພຣະກິດຕິຄຸນຂອງພຣະເຢຊູຄຣິດໃຫ້ກັບຄົນໃດຄົນໜຶ່ງ, ແຕ່ຄຳເຊື້ອເຊີນຂອງທ່ານຖືກປະຕິເສດຫລືບໍ່? ແອວມາກໍເຄີຍປະສົບຄືກັນ. ທ່ານຮຽນຮູ້ຫຍັງແດ່ຈາກເພິ່ນໃນ ແອວມາ 8:13–16 ກ່ຽວກັບການແບ່ງປັນພຣະກິດຕິຄຸນເຖິງແມ່ນຈະມີການທ້າທາຍ ແລະ ການຕໍ່ຕ້ານ? ສືບຕໍ່ອ່ານໃນ ຂໍ້ທີ 17–32, ແລະ ຊອກຫາວະລີທີ່ດົນໃຈທ່ານໃຫ້ແບ່ງປັນພຣະກິດຕິຄຸນຕໍ່ໄປ, ເຖິງແມ່ນເບິ່ງຄືວ່າທ່ານບໍ່ປະສົບຄວາມສຳເລັດກໍຕາມ.

ສາດສະດາ ແລະ ອັກຄະສາວົກເປັນພະຍານພິເສດຂອງພຣະຄຣິດ, ສະນັ້ນພວກເພິ່ນຈຶ່ງມີຄຳແນະນຳທີ່ດົນໃຈຢ່າງຫລວງຫລາຍເພື່ອແບ່ງປັນກ່ຽວກັບການເປັນພະຍານເຖິງພຣະອົງ. ໃຫ້ເບິ່ງສິ່ງທີ່ແອວເດີ ດີເດີ ແອັຟ ອຸກດອບ ໄດ້ກ່າວໃນ “But What If It’s Hard?” (ພາກສ່ວນໜຶ່ງໃນ “Missionary Work: Sharing What Is in Your Heart,” Liahona, May 2019, 18) ຫລື ສິ່ງທີ່ແອວເດີ ແກຣີ ອີ ສະຕີບເວັນສັນ ໄດ້ແບ່ງປັນໃນ “Love, Share, Invite,” (Liahona, May 2022, 84–87). ທ່ານພົບເຫັນຫຍັງແດ່ໃນນັ້ນທີ່ສາມາດຊ່ວຍຄົນໃດຄົນໜຶ່ງຜູ້ເລີ່ມຮູ້ສຶກທໍ້ຖອຍໃຈກ່ຽວກັບການແບ່ງປັນພຣະກິດຕິຄຸນ?

ທ່ານຈະສະຫລຸບທຸກສິ່ງທີ່ທ່ານໄດ້ສຶກສາໃນນີ້ເປັນໜຶ່ງ ຫລື ສອງຂໍ້ກ່ຽວກັບການແບ່ງປັນພຣະກິດຕິຄຸນໄດ້ແນວໃດ? ໃຫ້ຄິດທີ່ຈະເຮັດໂປສເຕີ້ ຫລື ສິ່ງຂອງທີ່ໜ້າສົນໃຈ ທີ່ສາມາດດົນໃຈທ່ານ (ແລະ ຄົນອື່ນໆ) ໃຫ້ພະຍາຍາມຕໍ່ໄປ.

ເບິ່ງ “ສິດທິຊົນມາ,” ເພງສວດ ແລະ ເພງຂອງເດັກນ້ອຍ, 2; “Alma Is Commanded by an Angel to Return to Ammonihah” (ວິດີໂອ), ຫ້ອງສະໝຸດພຣະກິດຕິຄຸນ; Gospel Topics, “Inviting All to Receive the Gospel of Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

ແອວມາ 9:14–23

ພອນຂອງພຣະເຈົ້າມາກັບໜ້າທີ່ຮັບຜິດຊອບທີ່ຍິ່ງໃຫຍ່.

ເມື່ອອ່ານກ່ຽວກັບວິທີທີ່ຊາວນີໄຟ ຢູ່ໃນເມືອງອຳໂມນໄນຮາກະທຳຕໍ່ຜູ້ຮັບໃຊ້ຂອງພຣະຜູ້ເປັນເຈົ້າ, ມັນງ່າຍທີ່ຈະລືມໄປວ່າ ຄັ້ງໜຶ່ງພວກເຂົາເຄີຍດຳລົງຊີວິດຕາມພຣະກິດຕິຄຸນ ແລະ “ເປັນຄົນທີ່ໂປດປານທີ່ສຸດຂອງພຣະຜູ້ເປັນເຈົ້າ” (ແອວມາ 9:20). ຂະນະທີ່ທ່ານອ່ານກ່ຽວກັບພອນທີ່ຍິ່ງໃຫຍ່ທີ່ພຣະເຈົ້າປະທານໃຫ້ຜູ້ຄົນຂອງນີໄຟ (ເບິ່ງ ໂດຍສະເພາະ ແອວມາ 9:14–23), ໃຫ້ໄຕ່ຕອງກ່ຽວກັບພອນທີ່ຍິ່ງໃຫຍ່ທີ່ພຣະອົງໄດ້ປະທານໃຫ້ທ່ານ. ໜ້າທີ່ຮັບຜິດຊອບໃດທີ່ມາກັບພອນເຫລົ່ານີ້? ທ່ານກຳລັງເຮັດຫຍັງເພື່ອຍຶດໝັ້ນໃນໜ້າທີ່ຮັບຜິດຊອບເຫລົ່ານີ້?

ເບິ່ງ ຄຳສອນ ແລະ ພັນທະສັນຍາ 50:24; 82:3; 93:39 ນຳອີກ.

ແອວມາ 11–12

ແຜນຂອງພຣະເຈົ້າເປັນແຜນແຫ່ງການໄຖ່.

ໃນ ແອວມາ 11–12, ແອວມາ ແລະ ແອມມິວເລັກໄດ້ອ້າງເຖິງແຜນຂອງພຣະເຈົ້າວ່າເປັນແຜນແຫ່ງການໄຖ່. ຂະນະທີ່ທ່ານອ່ານບົດເຫລົ່ານີ້, ໃຫ້ໄຕ່ຕອງວ່າເປັນຫຍັງ ການໄຖ່ ຖືກໃຊ້ເພື່ອບັນຍາຍແຜນຂອງພຣະເຈົ້າ. ໃຫ້ຄິດທີ່ຈະຂຽນບົດສະຫລຸບສັ້ນໆເຖິງສິ່ງທີ່ແອວມາ ແລະ ແອມມິວເລັກໄດ້ສິດສອນກ່ຽວກັບພາກສ່ວນຂອງແຜນດັ່ງຕໍ່ໄປນີ້:

ການຕົກ
ພຣະຜູ້ໄຖ່
ການກັບໃຈ
ຄວາມຕາຍ
ການຟື້ນຄືນຊີວິດ
ການພິພາກສາ

ໃຫ້ສັງເກດເບິ່ງຜົນກະທົບຂອງຖ້ອຍຄຳຂອງແອມມິວເລັກ ທີ່ມີຕໍ່ຜູ້ຄົນ (ເບິ່ງ ແອວມາ 11:46). ການຮູ້ຈັກກ່ຽວກັບແຜນຂອງພຣະເຈົ້າມີຜົນກະທົບຕໍ່ທ່ານແນວໃດ?

ເບິ່ງ Dallin H. Oaks, “The Great Plan,” Liahona, May 2020, 93–96; “Amulek Testifies of Jesus Christ” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ແອວມາ 12:8–18

ຖ້າຫາກເຮົາບໍ່ເຮັດໃຈແຂງກະດ້າງ, ເຮົາຈະສາມາດຮັບເອົາພຣະຄຳຂອງພຣະເຈົ້າໄດ້ຫລາຍກວ່າເກົ່າ.

ບາງຄົນອາດສົງໄສວ່າ ເປັນຫຍັງພຣະບິດາເທິງສະຫວັນຈຶ່ງບໍ່ເຮັດໃຫ້ທຸກສິ່ງເປັນທີ່ຮູ້ຈັກແກ່ເຮົາ. ໃນ ແອວມາ 12:9–14, ແອວມາໄດ້ອະທິບາຍເຫດຜົນທີ່ເປັນໄປໄດ້ຢ່າງໜຶ່ງ. ຄຳຖາມເຫລົ່ານີ້ສາມາດຊ່ວຍໃຫ້ທ່ານໄຕ່ຕອງກ່ຽວກັບສິ່ງທີ່ເພິ່ນໄດ້ສິດສອນ:

ທ່ານເຮັດໃຈແຂງກະດ້າງໝາຍຄວາມວ່າແນວໃດ? ແມ່ນຫຍັງຄືຜົນສະທ້ອນຂອງການມີໃຈແຂງກະດ້າງ? (ເບິ່ງ ແອວມາ 8:9–11; 9:5, 30–31; ແລະ 10:6, 25 ນຳອີກ).
ທ່ານສາມາດເຮັດຫຍັງໄດ້ແດ່ເພື່ອຫັນຫົວໃຈມາຫາພຣະເຈົ້າ? (ເບິ່ງ ເຢເຣມີຢາ 24:7; ແອວມາ 16:16; ຮີລາມັນ 3:35).
ທ່ານສາມາດເຮັດຫຍັງໄດ້ແດ່ ເພື່ອໃຫ້ແນ່ໃຈວ່າ ພຣະຄຳຂອງພຣະເຈົ້າຖືກ “ພົບໃນຕົວ [ທ່ານ]”? (ແອວມາ 12:13). ເມື່ອທ່ານມີພຣະຄຳຂອງພຣະເຈົ້າຢູ່ໃນຕົວທ່ານ, ມັນມີຜົນກະທົບຫຍັງແດ່ຕໍ່ “ຄຳເວົ້າ,” “ການກະທຳ,” ແລະ “ຄວາມນຶກຄິດ” ຂອງທ່ານ? (ແອວມາ 12:14).

ປະສົບການຂອງແອມມິວເລັກສິດສອນທ່ານຫຍັງແດ່ກ່ຽວກັບພອນຂອງການມີຫົວໃຈທີ່ອ່ອນໂຍນ? (ເບິ່ງ ແອວມາ 10:1–11).

ເບິ່ງ “Alma Warns Zeezrom” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ແອວມາ 8–10

ເຮົາສາມາດແບ່ງປັນພຣະກິດຕິຄຸນຂອງພຣະເຢຊູຄຣິດ.

ໜ້າກິດຈະກຳຂອງອາທິດນີ້ສາມາດຊ່ວຍໃຫ້ທ່ານສະຫລຸບເຫດການໃນ ແອວມາ 8–10 ສຳລັບລູກໆຂອງທ່ານໄດ້. ທ່ານອາດຕ້ອງໄດ້ຊ່ວຍພວກເຂົາຊອກຫາຫລັກທຳທີ່ເຮັດໃຫ້ແອວມາ ແລະ ແອມມິວເລັກເປັນຜູ້ສອນສາດສະໜາທີ່ດີ. ຍົກຕົວຢ່າງ, ພວກເພິ່ນບໍ່ໄດ້ຍອມແພ້ (ເບິ່ງ ແອວມາ 8:8–13), ພວກເພິ່ນໄດ້ເປັນພະຍານເຖິງພຣະຄຣິດ (ເບິ່ງ ແອວມາ 9:26–27), ແລະ ພວກເພິ່ນໄດ້ເຮັດວຽກງານນຳກັນ (ເບິ່ງ ແອວມາ 10:12).
ເພງກ່ຽວກັບການເຮັດວຽກງານເຜີຍແຜ່, ດັ່ງເຊັ່ນ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50) ສາມາດໃຫ້ແນວຄິດແກ່ລູກໆຂອງທ່ານໄດ້ ກ່ຽວກັບວິທີທີ່ຈະແບ່ງປັນພຣະກິດຕິຄຸນໃຫ້ກັບໝູ່ເພື່ອນຂອງພວກເຂົາ. ເຊື້ອເຊີນພວກເຂົາໃຫ້ຂຽນແນວຄິດບາງຢ່າງທີ່ພວກເຂົາພົບເຫັນ ແລະ ຜູ້ຄົນທີ່ພວກເຂົາສາມາດແບ່ງປັນພຣະກິດຕິຄຸນໃຫ້. ທ່ານກໍຍັງສາມາດປ່ອຍໃຫ້ພວກເຂົາຫລິ້ນລະຄອນກ້ອມກ່ຽວກັບສິ່ງທີ່ພວກເຂົາຈະເວົ້າ ຫລື ເຮັດນຳອີກ.

ຊຸກຍູ້ການມີສ່ວນຮ່ວມ. ຂະນະທີ່ທ່ານກະກຽມເພື່ອສິດສອນ, ແທນທີ່ຈະວາງແຜນສິ່ງທີ່ຈະເວົ້າ, ໃຫ້ຖາມຕົວເອງວ່າ, “ເດັກນ້ອຍຈະເຮັດຫຍັງ ເພື່ອຮຽນຮູ້?” ເດັກນ້ອຍຈະຮຽນຮູ້ໄດ້ດີກວ່າ ແລະ ຈື່ຈຳໄດ້ດົນນານກວ່າ ເມື່ອພວກເຂົາມີສ່ວນຮ່ວມຢ່າງແຂງຂັນ.

ແອວມາ 11–12

ແຜນຂອງພຣະເຈົ້າເປັນແຜນແຫ່ງການໄຖ່.

ບາງທີລູກໆຂອງທ່ານສາມາດແຕ້ມຮູບທີ່ເປັນຕົວແທນໃຫ້ແກ່ຫລັກທຳຂອງແຜນແຫ່ງການໄຖ່, ດັ່ງເຊັ່ນການຕົກຂອງອາດາມ ແລະ ເອວາ, ການຊົດໃຊ້ຂອງພຣະເຢຊູຄຣິດ, ການກັບໃຈ, ຄວາມຕາຍ, ການຟື້ນຄືນຊີວິດ, ແລະ ການພິພາກສາ. ແລ້ວທ່ານສາມາດຊ່ວຍພວກເຂົາຈັບຄູ່ຮູບພາບກັບຂໍ້ຄວາມໃນ ແອວມາ 11–12 ທີ່ສິດສອນກ່ຽວກັບຫລັກທຳເຫລົ່ານີ້.

ແອວມາ 8:18–22

ເຮົາສາມາດເປັນເພື່ອນທີ່ດີ.

ທ່ານສາມາດເຊື້ອເຊີນລູກຄົນໜຶ່ງໃຫ້ທຳທ່າເປັນແອມມິວເລັກ ແລະ ອີກຄົນໜຶ່ງທຳທ່າເປັນແອວມາ ຂະນະທີ່ທ່ານເລົ່າເລື່ອງໃນ ແອວມາ 8:18–22. ແອມມິວເລັກເປັນເພື່ອນທີ່ດີຕໍ່ແອວມາແນວໃດ? ແລ້ວລູກໆຂອງທ່ານສາມາດແບ່ງປັນວ່າ ບາງຄົນໄດ້ເປັນເພື່ອນທີ່ດີຕໍ່ພວກເຂົາແນວໃດ ແລະ ວ່າປະສົບການນັ້ນເຮັດໃຫ້ພວກເຂົາຮູ້ສຶກແນວໃດ.
ບາງທີທ່ານສາມາດເຮັດແຜ່ນຈິກຊໍມິດຕະພາບ: ຊອກຫາ ຫລື ແຕ້ມຮູບທີ່ເປັນຕົວແທນໃຫ້ກັບມິດຕະພາບ ແລະ ຕັດມັນເປັນຫລາຍໆຕ່ອນ. ຢູ່ຂ້າງຫລັງຂອງແຕ່ລະຕ່ອນ, ໃຫ້ຂຽນບາງສິ່ງທີ່ທ່ານສາມາດເຮັດ ເພື່ອເປັນເພື່ອນທີ່ດີ, ລວມທັງສິ່ງທີ່ແອວມາ ແລະ ແອມມິວເລັກໄດ້ເຮັດ. ລູກໆຂອງທ່ານສາມາດປ່ຽນຜຽນກັນເລືອກເອົາຕ່ອນໜຶ່ງ ແລະ ຕື່ມໃສ່ໃນຈິກຊໍ ຂະນະທີ່ທ່ານອ່ານສິ່ງທີ່ຂຽນໄວ້ຢູ່ຂ້າງຫລັງ. ແມ່ນໃຜຕ້ອງການມິດຕະພາບຂອງເຮົາ?

ແອວມາ 11:43–44

ເພາະພຣະເຢຊູຄຣິດ, ເຮົາຈຶ່ງຈະໄດ້ຟື້ນຄືນຊີວິດ.

ໃຫ້ຄິດທີ່ຈະໃຊ້ບົດຮຽນທີ່ໃຊ້ສິ່ງຂອງດັ່ງເຊັ່ນບົດນີ້ທີ່ສິດສອນກ່ຽວກັບການຟື້ນຄືນຊີວິດ: ມືຂອງທ່ານສາມາດເປັນຕົວແທນໃຫ້ແກ່ວິນຍານ, ແລະ ຊົບມືສາມາດເປັນຕົວແທນໃຫ້ແກ່ຮ່າງກາຍ. ຖອດມືອອກຈາກຊົບມື ເພື່ອສະແດງໃຫ້ເຫັນວ່າວິນຍານ ແລະ ຮ່າງກາຍຂອງເຮົາຈະແຍກອອກຈາກກັນເມື່ອເຮົາຕາຍ. ແລ້ວໃສ່ຊົບມືຄືນອີກ ເພື່ອສະແດງໃຫ້ເຫັນວ່າວິນຍານ ແລະ ຮ່າງກາຍຂອງເຮົາຈະເຂົ້າຄືນຫາກັນອີກໃນຕອນຟື້ນຄືນຊີວິດ. ປ່ອຍໃຫ້ລູກໆຂອງທ່ານປ່ຽນຜຽນກັນໃສ່ຊົບມື ແລະ ຖອດມັນອອກ ຂະນະທີ່ທ່ານອ່ານ ແອວມາ 11:43 ໃຫ້ພວກເຂົາຟັງ. ສະແດງຮູບພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນ (ເບິ່ງ ປຶ້ມຮູບພຣະກິດຕິຄຸນ, ເລກທີ 59), ແລະ ເປັນພະຍານວ່າ ພຣະເຢຊູຄຣິດໄດ້ເຮັດໃຫ້ເປັນໄປໄດ້ສຳລັບທຸກຄົນທີ່ຈະຟື້ນຄືນຊີວິດແນວໃດ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບພາບ

ໜ້າກິດຈະກຳ: ການແບ່ງປັນພຣະກິດຕິຄຸນສາມາດຮຽກຮ້ອງຄວາມບໍ່ລົດລະ ແລະ ຄວາມອົດທົນ