“ວັນທີ 29 ເດືອນກໍລະກົດ–ວັນທີ 4 ເດືອນສິງຫາ: ‘ຫວັງເພິ່ງພຣະເຈົ້າ ແລະ ມີຊີວິດ.’ ແອວມາ 36–38,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 29 ເດືອນກໍລະກົດ–ວັນທີ 4 ເດືອນສິງຫາ. ແອວມາ 36–38,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ຮູບພາບ

ຜູ້ຍິງກຳລັງອະທິຖານ

Woman [ຜູ້ຍິງ], ໂດຍ ເຈນ ໂທແມນ, ຫ້າມຄັດລອກ

ວັນທີ 29 ເດືອນກໍລະກົດ–ວັນທີ 4 ເດືອນສິງຫາ: “ຫວັງເພິ່ງພຣະເຈົ້າ ແລະ ມີຊີວິດ”

ແອວມາ 36–38

ເມື່ອແອວມາໄດ້ເຫັນຄວາມຊົ່ວຮ້າຍຢູ່ອ້ອມຮອບເພິ່ນ, ເພິ່ນໄດ້ຮູ້ສຶກ “ເສົ້າສະຫລົດໃຈ,” “ທຸກຍາກລຳບາກ,” ແລະ “ເຈັບປວດໃນຈິດວິນຍານ” ຫລາຍ (ແອວມາ 8:14). “ຄວາມຊົ່ວຮ້າຍ … ໃນບັນດາຜູ້ຄົນພວກນີ້,” ເພິ່ນໄດ້ກ່າວເຖິງຊາວໂຊຣຳ, “ເຮັດໃຫ້ຈິດວິນຍານຂອງຂ້ານ້ອຍເຈັບປວດ” (ແອວມາ 31:30). ເພິ່ນຮູ້ສຶກເຖິງບາງສິ່ງທີ່ຄ້າຍຄືກັນຫລັງຈາກໄດ້ກັບຈາກການເຜີຍແຜ່ຂອງເພິ່ນຕໍ່ຊາວໂຊຣຳ—ເພິ່ນໄດ້ສັງເກດເຫັນວ່າໃຈຂອງຊາວນີໄຟຫລາຍຄົນ “ເລີ່ມດື້ດ້ານຂຶ້ນ, ແລະ ພວກເຂົາບໍ່ພໍໃຈຍ້ອນວ່າຄວາມເຄັ່ງຄັດຂອງພຣະຄຳ,” ແລະ ສິ່ງນີ້ເຮັດໃຫ້ໃຈຂອງເພິ່ນ “ເສົ້າໂສກຢ່າງຍິ່ງ” (ແອວມາ 35:15). ແອວມາໄດ້ເຮັດສິ່ງໃດກ່ຽວກັບສິ່ງທີ່ເພິ່ນໄດ້ເຫັນ ແລະ ຮູ້ສຶກ? ເພິ່ນບໍ່ໄດ້ພຽງແຕ່ທໍ້ຖອຍໃຈ ແລະ ເຍາະເຍີ້ຍສະພາບຂອງໂລກເທົ່ານັ້ນ. ກົງກັນຂ້າມ, “ເພິ່ນໃຫ້ພວກລູກຊາຍຂອງເພິ່ນມາຫາເພິ່ນ” ແລະ ໄດ້ສິດສອນພວກເຂົາ “ກ່ຽວກັບຄວາມຊອບທຳ” (ແອວມາ 35:16). ເພິ່ນໄດ້ສິດສອນພວກເຂົາວ່າ “ບໍ່ມີທາງອື່ນ ຫລື ວິທີອື່ນໃດທີ່ມະນຸດຈະລອດໄດ້, ມີແຕ່ໃນ ແລະ ໂດຍທາງພຣະຄຣິດເທົ່ານັ້ນ. … ຈົ່ງເບິ່ງ, ພຣະອົງເປັນພຣະຄຳແຫ່ງຄວາມຈິງ ແລະ ຄວາມຊອບທຳ” (ແອວມາ 38:9).

ແນວຄິດສຳລັບການສິດສອນຢູ່ທີ່ບ້ານ ແລະ ຢູ່ທີ່ໂບດ

ແອວມາ 36; 38:5–6

ເຮົາສາມາດເກີດຈາກພຣະເຈົ້າ.

ມີໜ້ອຍຄົນໃນພວກເຮົາທີ່ຈະມີປະສົບການທີ່ໜ້າຕື່ນເຕັ້ນຄືກັນກັບການປ່ຽນໃຈເຫລື້ອມໃສຂອງແອວມາ. ແຕ່ທຸກຄົນຕ້ອງ “ເກີດຈາກພຣະເຈົ້າ,” ເຖິງແມ່ນວ່າ ຕາມປົກກະຕິແລ້ວ ມັນຈະເກີດຂຶ້ນເທື່ອລະເລັກລະນ້ອຍ (ແອວມາ 36:23; 38:6). ຂະນະທີ່ທ່ານອ່ານ ແອວມາ 36, ໃຫ້ຄິດກ່ຽວກັບວ່າ ການເກີດໃໝ່ຈາກພຣະເຈົ້າໝາຍຄວາມວ່າແນວໃດ. ຍົກຕົວຢ່າງເຊັ່ນ, ໃນຂັ້ນຕອນຂອງການເກີດຈາກພຣະເຈົ້າ, ເຮົາຮູ້ສຶກແນວໃດກ່ຽວກັບບາບ? ກ່ຽວກັບພຣະເຢຊູຄຣິດ? ການເກີດຈາກພຣະເຈົ້າມີຜົນກະທົບຕໍ່ສິ່ງທີ່ທ່ານເຮັດ ໃນການຕອບຮັບຕໍ່ຄວາມຜິດພາດຂອງທ່ານເອງແນວໃດ? ມີການປ່ຽນແປງອື່ນອີກຢ່າງໃດແດ່ເກີດຂຶ້ນກັບຄວາມເຊື່ອ ແລະ ການກະທຳຂອງທ່ານ? ໃຫ້ໄຕ່ຕອງວິທີທີ່ທ່ານກຳລັງປະສົບກັບການປ່ຽນແປງເຫລົ່ານີ້ແນວໃດ.

ເບິ່ງ ໂມໄຊຢາ 5:7; 27:25–26; ແອວມາ 5:14; 22:15; ຮີລາມັນ 3:35; “Alma the Younger Is Converted unto the Lord” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ແອວມາ 36:12–24; 38:8–9

ພຣະເຢຊູຄຣິດປັບປ່ຽນຄວາມໂສກເສົ້າດ້ວຍຄວາມຊື່ນຊົມ.

ບາງເທື່ອຜູ້ຄົນບໍ່ກ້າກັບໃຈເພາະເຂົາເຈົ້າເຫັນວ່າ ການກັບໃຈເປັນການລົງໂທດຢ່າງເຈັບປວດສຳລັບບາບ. ທ່ານຄິດວ່າແອວມາຈະເວົ້າຫຍັງແດ່ກ່ຽວກັບສິ່ງນັ້ນ? ເພື່ອຈະພົບເຫັນ, ທ່ານສາມາດປຽບທຽບຊີວິດຂອງແອວມາວ່າເປັນແນວໃດກ່ອນເພິ່ນໄດ້ກັບໃຈ (ເບິ່ງ ແອວມາ 36:6–17) ກັບຄຳບັນຍາຍເຖິງຕົວເພິ່ນເອງ ຫລັງຈາກເພິ່ນໄດ້ກັບໃຈ (ເບິ່ງ ຂໍ້ທີ 18–27). ອີງຕາມ ແອວມາ 36:17–18, ແອວມາໄດ້ຮັບການໃຫ້ອະໄພນີ້ແນວໃດ?

ເບິ່ງ Matthew S. Holland, “The Exquisite Gift of the Son,” Liahona, Nov. 2020, 45–47 ນຳອີກ.

ແອວມາ 37

ພຣະຄຳພີໄດ້ຖືກຮັກສາໄວ້ “ເພື່ອຈຸດປະສົງອັນສະຫລາດ.”

ໃຫ້ພິຈາລະນາສິ່ງມະຫັດສະຈັນ ແລະ ພອນທີ່ເຮົາມີພຣະຄຳພີໃນທຸກວັນນີ້! ຂະນະທີ່ທ່ານອ່ານ ແອວມາ 37, ໃຫ້ຊອກຫາພອນທີ່ມາຈາກການມີພຣະຄຳພີ (ເບິ່ງ, ຍົກຕົວຢ່າງ, ຂໍ້ທີ 7–10, 18–19, 44–45).

ໃນ ແອວມາ 37:38–47, ແອວມາໄດ້ປຽບທຽບ “ພຣະຄຳຂອງພຣະຄຣິດ” ໃສ່ກັບ ເລຍໂຮນາ. ຂະນະທີ່ທ່ານໄຕ່ຕອງກ່ຽວກັບການປຽບທຽບນີ້, ໃຫ້ສະທ້ອນຄິດເຖິງຕອນທີ່ທ່ານໄດ້ປະສົບກັບສິ່ງມະຫັດສະຈັນ ແລະ ພະລັງຂອງຄຳສອນຂອງພຣະຄຣິດ “ມື້ແລ້ວມື້ເລົ່າ” (ແອວມາ 37:40).

ເບິ່ງ D. Todd Christofferson, “The Blessing of Scripture,” Liahona, May 2010, 32–35; “ຈາລຶກທອງຄຳ,” ເພງສວດ ແລະ ເພງຂອງເດັກນ້ອຍ, 71; “Alma Testifies to His Son Helaman” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ພຣະຄຳພີສິດສອນເຮົາເຖິງວິທີທີ່ຈະຕິດຕາມພຣະເຈົ້າ

ແອວມາ 37:1–14

ຮູບພາບ
seminary icon
“ໂດຍເລື່ອງເລັກນ້ອຍ ແລະ ງ່າຍໆຈະນຳເລື່ອງໃຫຍ່ມາ.”

ບາງເທື່ອເຮົາອາດຮູ້ສຶກຄືກັບວ່າ ບັນຫາຂອງເຮົາໃຫຍ່ໂຕ ແລະ ສັບສົນຫລາຍ ຈົນວ່າການແກ້ໄຂຈະຕ້ອງໃຫຍ່ໂຕ ແລະ ສັບສົນຄືກັນ. ແຕ່ນັ້ນບໍ່ແມ່ນວິທີທາງຂອງພຣະຜູ້ເປັນເຈົ້າສະເໝີໄປ. ຂະນະທີ່ທ່ານອ່ານ ແອວມາ 37:1–14, ໃຫ້ພິຈາລະນາສິ່ງທີ່ປະທັບໃຈທ່ານກ່ຽວກັບວ່າພຣະອົງເຮັດວຽກງານຂອງພຣະອົງແນວໃດ. ແລ້ວທ່ານສາມາດໄຕ່ຕອງ ແລະ ບັນທຶກວິທີທີ່ທ່ານເຫັນຫລັກທຳຂໍ້ນີ້ໃນຊີວິດຂອງທ່ານແນວໃດ.

ຖ້າຫາກທ່ານຈະສິດສອນຫລັກທຳຂໍ້ນີ້ໃຫ້ຄົນໃດຄົນໜຶ່ງ, ທ່ານຈະໃຊ້ຕົວຢ່າງຈາກທຳມະຊາດ ຫລື ຊີວິດປະຈຳວັນໃດແດ່ເພື່ອສະແດງໃຫ້ເຫັນຫລັກທຳນັ້ນ? ທ່ານສາມາດພົບເຫັນບາງສິ່ງຢູ່ໃນຂ່າວສານຂອງ ປະທານດາລິນ ເອັຈ ໂອກສ໌ “Small and Simple Things,” (Liahona, May 2018, 89–92).

ແມ່ນຫຍັງຄືເລື່ອງເລັກນ້ອຍ ແລະ ງ່າຍໆທີ່ນຳທ່ານມາຢູ່ໃກ້ພຣະບິດາເທິງສະຫວັນ ແລະ ພຣະເຢຊູຄຣິດຫລາຍຂຶ້ນ?

ສ່ວນຫລາຍແລ້ວ, ການເລືອກ “ເລັກນ້ອຍ ແລະ ງ່າຍໆ” ຂອງເຮົາສ້າງຄວາມແຕກຕ່າງທີ່ຍິ່ງໃຫຍ່ໃນຊີວິດຂອງເຮົາ. ໃຫ້ຄິດທີ່ຈະເລືອກຫົວຂໍ້ໜຶ່ງຈາກປຶ້ມ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ ແລະ ຖາມຕົວເອງຄຳຖາມທີ່ຄ້າຍກັບດັ່ງຕໍ່ໄປນີ້: ການເລືອກຂອງເຮົາກ່ຽວກັບເລື່ອງນີ້ມີຜົນກະທົບຕໍ່ຕົວເຮົາ ແລະ ຜູ້ຄົນທີ່ຢູ່ອ້ອມຮອບເຮົາແນວໃດ? ມີການປ່ຽນແປງເລັກນ້ອຍ ແລະ ງ່າຍໆໃດແດ່ທີ່ເຮົາສາມາດເຮັດໄດ້ ທີ່ຈະນຳໄປສູ່ຄວາມສະຫງົບ ແລະ ຄວາມສຸກຫລາຍຂຶ້ນ?

ເບິ່ງ Michael A. Dunn, “One Percent Better,” Liahona, Nov. 2021, 106–8; Gospel Topics “Agency,” ຫ້ອງສະໝຸດພຣະກິດຕິຄຸນ ນຳອີກ.

ໃຊ້ເລື່ອງເລັກນ້ອຍ ແລະ ງ່າຍໆ. ຄ້າຍຄືກັນກັບສິ່ງອື່ນໆຫລາຍສິ່ງໃນຊີວິດ, ການສິດສອນ ແລະ ການຮຽນຮູ້ພຣະກິດຕິຄຸນສາມາດເຮັດຂຶ້ນມາໄດ້ຜ່ານວິທີທາງເລັກນ້ອຍ ແລະ ງ່າຍໆໄດ້. ຍົກຕົວຢ່າງ, ເຮົາສາມາດໃຊ້ເກືອ ຫລື ເຊື້ອແປ້ງໜ້ອຍໜຶ່ງ ເພື່ອສິດສອນເຖິງພະລັງຂອງສິ່ງເລັກນ້ອຍ ແລະ ງ່າຍໆໄດ້ແນວໃດ? (ເບິ່ງ ມັດທາຍ 5:13; 13:33).

ແອວມາ 37:35–37

“ຈົ່ງປຶກສານຳພຣະຜູ້ເປັນເຈົ້າ.”

ໃນ ແອວມາ 37:35–37, ໃຫ້ຊອກຫາຄຳເຊື້ອເຊີນຂອງແອວມາຕໍ່ຮີລາມັນ ລູກຊາຍຂອງເພິ່ນ. ມີຄຳເຊື້ອເຊີນໃດແດ່ທີ່ທ່ານຮູ້ສຶກຖືກກະຕຸ້ນໃຫ້ກະທຳຕາມ? ຍົກຕົວຢ່າງ, ທ່ານອາດໄຕ່ຕອງຄວາມໝາຍຂອງຖ້ອຍຄຳທີ່ວ່າ “ຈົ່ງປຶກສານຳພຣະຜູ້ເປັນເຈົ້າ” (ຂໍ້ທີ 37). ທ່ານໄດ້ພະຍາຍາມເຮັດສິ່ງນີ້ໃນວິທີໃດແດ່? ພຣະອົງໄດ້ຊີ້ນຳທ່ານ ເພື່ອຄວາມດີແນວໃດ?

ແອວມາ 38

ການແບ່ງປັນປະຈັກພະຍານຂອງເຮົາເຖິງພຣະເຢຊູຄຣິດ ສາມາດເພີ່ມຄວາມເຂັ້ມແຂງໃຫ້ແກ່ຄົນທີ່ເຮົາຮັກ.

ຖ້ອຍຄຳຂອງແອວມາເຖິງຊິບລັນ ລູກຊາຍຂອງເພິ່ນ ໃຫ້ຕົວຢ່າງໜຶ່ງທີ່ດີເຖິງວິທີທີ່ຈະເພີ່ມຄວາມເຂັ້ມແຂງ ແລະ ໃຫ້ກຳລັງໃຈແກ່ຜູ້ຄົນທີ່ເຮົາຮັກ ໃນການດຳລົງຊີວິດຕາມພຣະກິດຕິຄຸນ. ການສຶກສາ ແອວມາ 38 ອາດໃຫ້ແນວຄິດບາງຢ່າງແກ່ທ່ານ ເພື່ອຊ່ວຍສະມາຊິກໃນຄອບຄົວ ແລະ ໝູ່ເພື່ອນພົບເຫັນພະລັງໃນພຣະເຢຊູຄຣິດ. ໃຫ້ຂຽນສິ່ງທີ່ທ່ານພົບເຫັນລົງໄວ້.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ແອວມາ 36:6–24

ການກັບໃຈນຳຄວາມຊື່ນຊົມໃນພຣະເຢຊູຄຣິດມາໃຫ້.

ເພື່ອຊ່ວຍລູກໆຂອງທ່ານໃຫ້ເຂົ້າໃຈວ່າ ການກັບໃຈນຳຄວາມຊື່ນຊົມມາໃຫ້, ທ່ານສາມາດເອົາເຈ້ຍໃບໜຶ່ງທີ່ມີຮູບໃບໜ້າທີ່ມີຄວາມສຸກຢູ່ຂ້າງໜຶ່ງ ແລະ ໜ້າເສົ້າຢູ່ອີກຂ້າງໜຶ່ງໃຫ້ພວກເຂົາ. ຂໍໃຫ້ພວກເຂົາຟັງໃນຂະນະທີ່ທ່ານອ່ານ ຫລື ສະຫລຸບ ແອວມາ 36:13, 17–20 ແລະ ຍົກຮູບໃບໜ້າໃດໜຶ່ງຂຶ້ນເພື່ອສະແດງໃຫ້ເຫັນວ່າ ແອວມາໄດ້ຮູ້ສຶກແນວໃດ. ລູກຜູ້ໃຫຍ່ສາມາດຂຽນຖ້ອຍຄຳ ຫລື ວະລີທີ່ບັນຍາຍວ່າເພິ່ນໄດ້ຮູ້ສຶກແນວໃດ. ແມ່ນຫຍັງໄດ້ເຮັດໃຫ້ແອວມາເສົ້າໃຈ, ແລະ ແມ່ນຫຍັງໄດ້ນຳຄວາມຊື່ນຊົມມາໃຫ້ເພິ່ນ? ແລ້ວທ່ານສາມາດບອກພວກເຂົາກ່ຽວກັບຄວາມຊື່ນຊົມທີ່ທ່ານຮູ້ສຶກເມື່ອທ່ານກັບໃຈ.

ແອວມາ 37:6–7

“ໂດຍເລື່ອງເລັກນ້ອຍ ແລະ ງ່າຍໆຈະນຳເລື່ອງໃຫຍ່ມາ.”

ລູກໆຂອງທ່ານອາດມັກຊອກຫາສິ່ງຂອງເລັກໆນ້ອຍໆທີ່ເຮັດໃຫ້ສິ່ງຍິ່ງໃຫຍ່ເກີດຂຶ້ນ. ສິ່ງຂອງດັ່ງເຊັ່ນ ຖ່ານໄຟ, ກະແຈລົດ, ຫລື ແມ່ນແຕ່ຂອງຫລິ້ນທີ່ປອບໂຍນພວກເຂົາກໍອາດເປັນຕົວຢ່າງໄດ້. ແລ້ວທ່ານສາມາດອ່ານ ແອວມາ 37:6–7 ນຳກັນ ແລະ ຄິດເຖິງສິ່ງເລັກນ້ອຍ ຫລື ງ່າຍໆບາງສິ່ງທີ່ພຣະເຈົ້າປະສົງໃຫ້ເຮົາເຮັດ. ຈະມີສິ່ງທີ່ຍິ່ງໃຫຍ່ໃດແດ່ສາມາດເກີດຂຶ້ນເມື່ອເຮົາເຊື່ອຟັງພຣະບັນຍັດເລັກນ້ອຍ ຫລື ງ່າຍໆເຫລົ່ານີ້?
ລູກໆຂອງທ່ານສາມາດລອງເຮັດບາງສິ່ງດັ່ງເຊັ່ນ: ເລີ່ມຢອດນ້ຳໃສ່ຈອກ, ເທື່ອລະຢອດ. ຕົວຢ່າງນີ້ກ່ຽວພັນກັບ ແອວມາ 37:6–7 ແນວໃດ? ແລ້ວທ່ານສາມາດເວົ້າລົມກ່ຽວກັບວ່າ “ເລື່ອງເລັກນ້ອຍ ແລະ ງ່າຍໆ” ຂອງພຣະຜູ້ເປັນເຈົ້າ, ດັ່ງເຊັ່ນການອ່ານພຣະຄຳພີທຸກໆມື້, ກໍຄ້າຍຄືກັນກັບຢອດນ້ຳໃສ່ຈອກແນວໃດ.
ຊ່ວຍລູກຂອງທ່ານໃຫ້ຄິດເຖິງວິທີທີ່ພວກເຂົາຈະນຳສິ່ງທີ່ຍິ່ງໃຫຍ່ມາໃຫ້ ຢູ່ທີ່ບ້ານ, ທີ່ໂຮງຮຽນ, ຫລື ທີ່ໂບດ. ເພງ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70) ກໍສະແດງໃຫ້ເຫັນຫລັກທຳຂໍ້ນີ້ນຳອີກ.

ແອວມາ 37:38–47

ພຣະຄຳພີສາມາດຊ່ວຍເຮົາທຸກໆມື້.

ທ່ານອາດຈະຊ່ວຍລູກໆຂອງທ່ານພັດທະນາຄວາມຮັກທີ່ມີສຳລັບພຣະຄຳຂອງພຣະເຈົ້າໄດ້ແນວໃດ, ດັ່ງທີ່ແອວມາໄດ້ເຮັດໃຫ້ຮີລາມັນ? ໃຫ້ຄິດທີ່ຈະສະແດງຮູບເລຍໂຮນາໃຫ້ພວກເຂົາເບິ່ງ (ດັ່ງເຊັ່ນ ປຶ້ມຮູບພຣະກິດຕິຄຸນ, ເລກທີ 68) ຫລື ເຊື້ອເຊີນພວກເຂົາໃຫ້ແຕ້ມຮູບນັ້ນໃນຂະນະທີ່ພວກເຂົາແບ່ງປັນສິ່ງທີ່ພວກເຂົາຮູ້ກ່ຽວກັບມັນ (ເບິ່ງ ແອວມາ 37:38–47; 1 ນີໄຟ 16:10, 28–29). ພຣະຄຳພີເປັນເໝືືອນດັ່ງເລຍໂຮນາແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

Angel Appears to Alma and the Sons of Mosiah [ທູດປະກົດຕົວຕໍ່ແອວມາ ແລະ ພວກລູກຊາຍຂອງໂມໄຊຢາ], ໂດຍ ຄະລາກ ແຄວລີ ພຣາຍສ໌

ຮູບພາບ

ໜ້າກິດຈະກຳ: ພຣະຄຳພີນຳເຮົາເຂົ້າໃກ້ພຣະຄຣິດຫລາຍຂຶ້ນ