« ថ្ងៃទី ១២–១៨ ខែ សីហា ៖ ‹ ឈរឲ្យខ្ជាប់ខ្ជួននៅក្នុងសេចក្ដីជំនឿជឿដល់ព្រះគ្រីស្ទ › ។ អាលម៉ា ៤៣–៥២ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៣ )
« ថ្ងៃទី ១២–១៨ ខែ សីហា ។ អាលម៉ា ៤៣–៥២ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៣ )
For the Blessings of Liberty [ សូមព្រះពរនៃឥស្សរភាព ] ដោយ ស្កត អិម ស្នូ
ថ្ងៃទី ១២–១៨ ខែ សីហា ៖ « ឈរឲ្យខ្ជាប់ខ្ជួននៅក្នុងសេចក្ដីជំនឿជឿដល់ព្រះគ្រីស្ទ »
អាលម៉ា ៤៣–៥២
នៅពេលយើងអានពាក្យសម្ដីទាំងនេះនៅដើមជំពូកនៃ អាលម៉ា ជំពូកទី ៤៣—« ហើយឥឡូវនេះ ខ្ញុំត្រឡប់មកនិយាយអំពីសង្គ្រាមទាំងឡាយរវាងពួកសាសន៍នីហ្វៃ និងពួកសាសន៍លេមិនវិញ »—វាគឺជារឿងធម្មតាទេដែលយើងងឿងឆ្ងល់ថា ហេតុអ្វីបានជាមរមនដាក់បញ្ចូលដំណើររឿងអំពីសង្គ្រាមទាំងនេះទៅក្នុងផ្ទាំងចំណារ កាលដែលលោកមានកន្លែងមានកំណត់សម្រាប់សរសេរនៅក្នុងផ្ទាំងចំណារនេះដូច្នេះ ( សូមមើល ពាក្យសម្ដីនៃមរមន ១:៥ ) ។ វាជាការពិតដែលថា យើងក៏មានសង្គ្រាមជាច្រើនផងដែរនៅជំនាន់ចុងក្រោយរបស់យើង ប៉ុន្តែពាក្យសម្ដីរបស់លោកគឺមានគុណតម្លៃ ហួសពីការពិពណ៌នាអំពីយុទ្ធសាស្ត្រ និងសោកនាដកម្មនៃសង្គ្រាមទៅទៀត ។ ពាក្យសម្ដីរបស់លោកក៏បានរៀបចំយើងសម្រាប់សង្គ្រាមផងដែរ ដែល « យើងទាំងអស់ជាទាហាន » ( ទំនុកតម្កើង ល.រ. ១៥៦ ) ជាសង្គ្រាមដែលយើងកំពុងប្រយុទ្ធរាល់ថ្ងៃ គឺប្រយុទ្ធទាស់នឹងកម្លាំងនៃសេចក្ដីអាក្រក់ ។ សង្គ្រាមនេះគឺមានពិត ហើយលទ្ធផលរបស់វាជះឥទ្ធិពលដល់ជីវិតដ៏អស់កល្បជានិច្ចរបស់យើង ។ ដូចពួកសាសន៍នីហ្វៃដែរ យើងត្រូវបានបំផុសគំនិតដោយបុព្វហេតុដ៏បរិសុទ្ធមួយ—« ព្រះរបស់យើង សាសនា និងសេរីភាពរបស់យើង និងសេចក្ដីសុខសាន្ត ភរិយារបស់យើង និងកូនចៅរបស់យើង »—អ្វីដែលមរ៉ូណៃហៅថា « ឧត្តមគិតនៃពួកគ្រីស្ទាន » ( អាលម៉ា ៤៦:១២, ១៦ ) ។
គំនិតសម្រាប់ការរៀនសូត្រនៅឯគេហដ្ឋាន និងសាសនាចក្រ
ព្រះយេស៊ូវគ្រីស្ទអាចជួយខ្ញុំក្នុងចម្បាំងខាងព្រលឹងវិញ្ញាណរបស់ខ្ញុំបាន ។
នៅពេលបងប្អូនអាន អាលម៉ា ៤៣–៥២ សូមកត់សម្គាល់អំពីអ្វីដែលពួកសាសន៍នីហ្វៃបានធ្វើដែលនាំឲ្យពួកគេទទួលបានជោគជ័យ ( ឬបរាជ័យ ) ។ បន្ទាប់មក សូមពិចារណាអំពីរបៀបដែលបងប្អូនអាចប្រើអ្វីដែលបងប្អូនរៀន ដើម្បីជួយបងប្អូនឲ្យច្បាំងឈ្នះចម្បាំងខាងវិញ្ញាណរបស់បងប្អូនបាន ។ សូមកត់ត្រាគំនិតរបស់បងប្អូន ។
-
អាលម៉ា ៤៣:១៩ ៖ ពួកសាសន៍នីហ្វៃត្រូវបានរៀបចំខ្លួនដោយមានអាវក្រោះ ។ ( ខ្ញុំអាចព្យាយាមរៀបចំខ្លួនខ្ញុំដោយពាក់គ្រឿងសឹកខាងវិញ្ញាណ ) ។
-
អាលម៉ា ៤៣:២៣–២៤ ៖ ពួកគេស្វែងរកការណែនាំរបស់ព្យាការី ។
សូមមើលផងដែរថា តើបងប្អូនអាចរៀនអ្វីខ្លះ មកពីការខិតខំរបស់ពួកសត្រូវរបស់ពួកសាសន៍នីហ្វៃ ។ សូមពិចារណាអំពីរបៀបដែលសាតាំងអាចវាយប្រហារបងប្អូនតាមរបៀបស្រដៀងគ្នានេះ ៖
-
អាលម៉ា ៤៣:៨ ៖ សេរ៉ាហិមណា បានព្យាយាមធ្វើឲ្យប្រជាជនរបស់គាត់ខឹងដើម្បីគាត់បានមានអំណាចលើពួកគេ ។ ( សាតាំងអាចល្បួងខ្ញុំឲ្យធ្វើសកម្មភាពដោយកំហឹង ) ។
សូមមើលផងដែរ រ័សុល អិម ណិលសុន « Embrace the Future with Faith » Liahona ខែ វិច្ឆិកា ឆ្នាំ ២០២០ ទំព័រ ៧៣–៧៦; « ព្រះនៃយើងជាបន្ទាយយ៉ាងមាំ » ទំនុកតម្កើង ល.រ. ២៨ ។
មីនើរវ៉ា ថៃឆើត ( ឆ្នាំ ១៨៨៨–១៩៧៦ ) ការការពារទីក្រុងរបស់ពួកសាសន៍នីហ្វៃ ឆ្នាំ ១៩៤៩–១៩៥១ រូបគំនូរគូរប្រើប្រេងនៅលើបន្ទះក្ដារ ទំហំ ៣៦ x ៤៨ អ៊ីនឆ៍ ។ សារមន្ទីរសិល្បៈសាកលវិទ្យាល័យ ព្រិកហាំ យ៉ង់ ឆ្នាំ ១៩៦៩ ។
« ឈរឲ្យខ្ជាប់ខ្ជួននៅក្នុងសេចក្ដីជំនឿជឿដល់ព្រះគ្រីស្ទ » ។
តើបងប្អូនចង់កាត់បន្ថយអំណាចរបស់សត្រូវនៅក្នុងជីវិតរបស់បងប្អូនដែរឬទេ ? វិធីមួយគឺត្រូវធ្វើតាមដំបូន្មាននៅក្នុង អាលម៉ា ៤៨:១៧ ដើម្បីក្លាយ « ដូចជាមរ៉ូណៃ » ។ សូមពិចារណាធ្វើបញ្ជីមួយអំពីពាក្យដែលពិពណ៌នាអំពីមរ៉ូណៃ នៅពេលបងប្អូនអាន អាលម៉ា ៤៦:១១–២៨; ៤៨:៧–១៧ ។ តើបងប្អូនរៀនអ្វីខ្លះមកពីមរ៉ូណៃអំពី « [ ការ ] ឈរឲ្យខ្ជាប់ខ្ជួននៅក្នុងសេចក្ដីជំនឿជឿដល់ព្រះគ្រីស្ទ » ? ( អាលម៉ា ៤៦:២៧ ) ។
បងប្អូនក៏អាចសិក្សាបានផងដែរ អំពីរបៀបដែលមរ៉ូណៃបានបំផុសគំនិតអ្នកដទៃនៅក្នុង « ឧត្ដមគតិនៃពួកគ្រីស្ទាន » ( សូមមើល អាលម៉ា ៤៦:១១–២២ ) ។ តើបងប្អូននឹងពណ៌នាអំពីឧត្តមគតិនោះយ៉ាងដូចម្ដេច ? តើបងប្អូនអាចធ្វើអ្វីបានខ្លះ ដើម្បីចូលរួមចំណែកនៅក្នុងឧត្តមគតិនោះ ? តើបងប្អូនអាចបំផុសគំនិតដល់មនុស្សដទៃឲ្យចូលរួមចំណែកផងដែរដោយរបៀបណា ?
រឿងមួយដែលមរ៉ូណៃបានធ្វើដើម្បីបំផុសគំនិតដល់អ្នកដទៃគឺ ការបង្កើតទង់ឥស្សរភាពដែលបានសង្កត់ធ្ងន់ទៅលើគោលការណ៍ទាំងឡាយដើម្បីបំផុសគំនិតដល់ពួកសាសន៍នីហ្វៃ ( សូមមើល ខទី ១២ ) ។ តើថ្នាក់ដឹកនាំរបស់យើងសង្កត់ធ្ងន់ទៅលើគោលការណ៍អ្វីខ្លះ នៅក្នុងសម័យរបស់យើង ? បងប្អូនអាចរកមើលគោលការណ៍ទាំងនោះនៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( កូនសៀវភៅ ឆ្នាំ ២០២២ ); « ក្រុមគ្រួសារ ៖ ការប្រកាសដល់ពិភពលោក »; បាវចនា យុវនារី និង កូរ៉ុមបព្វជិតភាពអើរ៉ុន ឬសារលិខិតសន្និសីទទូទៅថ្មីៗនេះ ។ បងប្អូនអាចសង្ខេបនូវអ្វីដែលគោលការណ៍ទាំងនោះបង្រៀន ឲ្យទៅជាសេចក្ដីថ្លែងការណ៍សាមញ្ញមួយចំនួន ដើម្បីបង្កើតទង់ឥស្សរភាពផ្ទាល់ខ្លួនរបស់បងប្អូន—ជាអ្វីមួយដែលរំឭកបងប្អូនឲ្យស្មោះត្រង់ចំពោះព្រះអង្គសង្រ្គោះ និងដំណឹងល្អរបស់ទ្រង់ ។
សូមមើលផងដែរនូវ Gospel Topic « Faith in Jesus Christ » នៅលើបណ្ណាល័យដំណឹងល្អ ។
សាតាំងល្បួង និងបោកបញ្ឆោតបន្តិចម្តងៗ ។
សាតាំងដឹងថា ពួកយើងភាគច្រើននឹងមិនព្រមធ្វើអំពើបាបធំៗ ឬជឿទៅលើការកុហកធំៗនោះទេ ។ ហេតុដូច្នេះហើយ វាប្រើការភូតភរកុហក និងការល្បួងតូចតាច—កាន់តែច្រើនតាមដែលវាគិតថា បងប្អូននឹងជឿតាម—ដើម្បីនាំបងប្អូនឲ្យចាកឆ្ងាយពីសុវត្ថិភាពនៃការរស់នៅដ៏សុចរិត ។
សូមរកមើលលំនាំនេះនៅក្នុង អាលម៉ា ៤៧ ហើយពិចារណាអំពីរបៀបដែលសាតាំងអាចនឹងព្យាយាមដើម្បីបោកបញ្ឆោតបងប្អូន ។ សូមពិចារណាពីគំនិតយោបល់ទាំងនេះមកពីអែលឌើរ រ៉ូបឺត ឌី ហែល ៖
« អាម៉ាលិកាយដ៏មានឧបាយកលបានជម្រុញឲ្យ លីហុនតៃ ‹ ចុះមក › ហើយជួបនឹងលោកនៅជ្រលងភ្នំមួយ ។ ប៉ុន្តែពេល លីហុនតៃ បានចាកចេញពីទីខ្ពស់របស់គាត់ គាត់ត្រូវបានបំពុល ‹ ជាសន្សឹមៗ › រហូតដល់គាត់ស្លាប់ ហើយពួកពលទ័ពរបស់គាត់បានធ្លាក់ចូលទៅក្នុងដៃរបស់អាម៉ាលិកាយ ( សូមមើល អាលម៉ា ៤៧ ) ។ ដោយការឈ្លោះប្រកែកគ្នា និងការចោទប្រកាន់គ្នា មនុស្សខ្លះដាក់អន្ទាក់យើងឲ្យចាកចេញពីទីទួលខ្ពស់ ។ ទីទួលខ្ពស់គឺជាកន្លែងដែលមានពន្លឺ ។… វាជាទីសុវត្ថិភាព » ( « Christian Courage: The Price of Discipleship » Liahona ខែ វិច្ឆិកា ឆ្នាំ ២០០៨ ទំព័រ ៧៤ ) ។
តើបងប្អូនរៀនអ្វីខ្លះមកពីវីដេអូ « Temptation Fades as We Seek Christ in Every Thought » ( នៅលើបណ្ណាល័យដំណឹងល្អ ) ដែលអាចជួយបងប្អូនឲ្យទប់ទល់នឹងការល្បួងបាន ?
សូមមើលផងដែរ នេហមា ៦:៣; នីហ្វៃ ទី ២ ២៦:២២; ២៨:២១–២២ ។
សាមគ្គីភាពនាំឲ្យមានសុវត្ថិភាព ។
ទោះបីជាពួកសាសន៍នីហ្វៃមានគ្រឿងសឹក និងបន្ទាយជាច្រើនក៏ដោយ ក៏មិនយូរប៉ុន្មាន ពួកសាសន៍លេមិនបានដណ្តើមយកទីក្រុងជាច្រើនរបស់ពួកគេបានដែរ ( សូមមើល អាលម៉ា ៥១:២៦–២៧ ) ។ តើរឿងនោះកើតឡើងយ៉ាងដូចម្ដេចបាន ? សូមរកមើលចម្លើយនៅពេលបងប្អូនអានជំពូកទាំងនេះ ( សូមមើលជាពិសេសនៅក្នុង អាលម៉ា ៥១:១–១២ ) ។ សូមពិចារណាអំពីការព្រមានទាំងឡាយដែលដំណើររឿងនេះអាចមានសម្រាប់បងប្អូន និងគ្រួសាររបស់បងប្អូន ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
អាលម៉ា ៤៣:១៧–២១; ៤៨:៧–៨; ៤៩:១–៥; ៥០:១–៦
ខ្ញុំអាចរកឃើញការការពារខាងវិញ្ញាណនៅក្នុងដំណឹងល្អនៃព្រះយេស៊ូវគ្រីស្ទ ។
-
សូមពិចារណាប្រើ « ជំពូកទី ៣១ ៖ មេទ័ពមរ៉ូណៃប្រយុទ្ធឈ្នះសេរ៉ាហិមណា » ( ដំណើររឿងព្រះគម្ពីរមរមន ទំព័រ ៨៥–៨៨ ) ដើម្បីប្រាប់កូនៗរបស់បងប្អូនអំពីសង្គ្រាមរវាងពួកសាសន៍នីហ្វៃ និងពួកសាសន៍លេមិន ។ នៅពេលដែលបងប្អូនអានអំពីគ្រឿងសឹករបស់ពួកសាសន៍នីហ្វៃនៅក្នុង អាលម៉ា ៤៣:១៩ បងប្អូនអាចប្រៀបធៀបគ្រឿងសឹកដែលការពាររូបកាយរបស់យើងទៅនឹងអ្វីដែលព្រះបានប្រទានឲ្យយើងដើម្បីការពារវិញ្ញាណរបស់យើង ។ ប្រហែលជាបងប្អូន និងកូនៗរបស់បងប្អូនអាចគូររូបភាពរបស់ក្មេងម្នាក់ ហើយបន្ថែមបំណែកគ្រឿងសឹកទៅក្នុងរូបភាពនោះ សម្រាប់អ្វីៗគ្រប់យ៉ាងដែលកូនៗរបស់បងប្អូនអាចរៀបរាប់ឈ្មោះអំពីគ្រឿងសឹកដែលអាចការពារយើងខាងវិញ្ញាណបាន ។
-
ខគម្ពីរទាំងនេះពិពណ៌នាអំពីបន្ទាយទាំងឡាយដែលពួកសាសន៍នីហ្វៃបានកសាងឡើង ៖ អាលម៉ា ៤៨:៧–៩; ៤៩:១–៩; ៥០:១–៦ ។ បន្ទាប់ពីអានខគម្ពីរទាំងនេះជាមួយគ្នាហើយ នោះកូនៗរបស់បងប្អូនអាចរីករាយក្នុងការសង់បន្ទាយតូចៗចេញពីរបស់របរដូចជាកៅអី និងភួយជាដើម ។ វីដេអូ « Elder Stevenson on Fortifying Families » ( នៅលើបណ្ណាល័យដំណឹងល្អ ) អាចជួយបងប្អូនឲ្យពិភាក្សាអំពីរបៀបដើម្បីពង្រឹងផ្ទះរបស់បងប្អូនខាងវិញ្ញាណបាន ។
អាលម៉ា ៤៦:១១–១៦; ៤៨:១១–១៣, ១៦–១៧
ខ្ញុំអាច « រឹងប៉ឹងនៅក្នុងសេចក្ដីជំនឿជឿដល់ព្រះគ្រីស្ទ » ដូចជាមេទ័ពមរ៉ូណៃដែរ ។
-
កូនៗរបស់បងប្អូនអាចមើលរូបភាពនៅក្នុងគម្រោងនេះ ដើម្បីប្រាប់ពីដំណើររឿងទង់ឥស្សរភាពបាន ( សូមមើល អាលម៉ា ៤៦:១១–១៦; « ជំពូកទី ៣២ ៖ មេទ័ពមរ៉ូណៃ និងទង់ឥស្សរភាព » ដំណើររឿងព្រះគម្ពីរមរមន ទំព័រ ៨៩–៩០ ) ។ តើមរ៉ូណៃចង់ឲ្យប្រជាជនចងចាំអ្វី ( សូមមើល ខទី ១២ ) ? តើព្រះវរបិតាសួគ៌សព្វព្រះទ័យឲ្យយើងចងចាំអ្វី ? ប្រហែលកូនៗរបស់បងប្អូនអាចច្នៃប្រឌិតបង្កើតជា « ទង់នៃឥស្សរភាព » ផ្ទាល់របស់ពួកគេជាមួយនឹងឃ្លា ឬរូបភាពដែលនឹងជួយពួកគេឲ្យចាំពីរឿងទាំងនេះ ។
-
ដើម្បីបង្រៀនកូនៗរបស់បងប្អូនអំពីការ « រឹងប៉ឹងនៅក្នុងសេចក្ដីជំនឿជឿដល់ព្រះគ្រីស្ទ » ដូចជាមរ៉ូណៃ ( សូមមើល អាលម៉ា ៤៨:១៣ ) បងប្អូនអាចជួយកូនៗឲ្យស្វែងរក និងប៉ះអ្វីមួយដែលរឹង ។ តើការមានសេចក្ដីជំនឿ « រឹងប៉ឹង » មានអត្ថន័យយ៉ាងដូចម្ដេច ? សូមអានជាមួយគ្នាក្នុង អាលម៉ា ៤៨:១១–១២ ហើយរកមើលអ្វីដែលធ្វើឲ្យមរ៉ូណៃមានភាពរឹងប៉ឹងនៅក្នុងសេចក្តីជំនឿរបស់លោកជឿដល់ព្រះគ្រីស្ទ ។ បងប្អូនក៏អាចច្រៀងបទនេះជាមួយគ្នាបានផងដែរ « ខ្ញុំនឹងធ្វើជាអ្នកក្លាហាន » ( សៀវភៅចម្រៀងកុមារ ទំព័រ ៨៥ ) ។ តើយើងអាចធ្វើអ្វីខ្លះដើម្បីបាន « រឹងប៉ឹងនៅក្នុងសេចក្ដីជំនឿជឿដល់ព្រះគ្រីស្ទ » ?
សាតាំងល្បួង និងបោកបញ្ឆោតយើងបន្តិចម្តងៗ ។
សូមអានខគម្ពីរដែលបានជ្រើសរើសមកពី អាលម៉ា ៤៧:៤–១៩ រួមគ្នា ។ តើនឹងមានអ្វីកើតឡើង ប្រសិនបើអាម៉ាលិកាយបានប្រាប់ លីហុនតៃ នូវអ្វីដែលគាត់បានគ្រោងធ្វើចាប់តាំងពីដំបូងមកនោះ ? តើខគម្ពីរទាំងនេះបង្រៀនយើងអ្វីខ្លះ អំពីរបៀបដែលសាតាំងព្យាយាមដើម្បីបោកបញ្ឆោតយើង ?
សូមជួយកូនៗរបស់បងប្អូនឲ្យសាងទំនុកចិត្ត ។ កុមារមួយចំនួនពុំមានអារម្មណ៍ថាមានសមត្ថភាពរៀនដំណឹងល្អដោយខ្លួនឯងនោះទេ ។ របៀបមួយដើម្បីសាងទំនុកចិត្តរបស់ពួកគេ គឺការសរសើរពួកគេនៅពេលពួកគេចូលរួមក្នុងការរៀនសូត្រ ។ តើបងប្អូនអាចអនុវត្តយោបល់នេះជាមួយនឹងសកម្មភាពនៅក្នុងគម្រោងមេរៀននេះនៅកន្លែងណា?
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
Title of Liberty [ ទង់ឥស្សវភាព ] ដោយ ឡារី ខនរ៉ាត វិនប៊ើហ្គ ។
© ឆ្នាំ ២០១៨ ដោយ ឡារី ខនរ៉ាត វិនប៊ើហ្គ