Sanza ya Yambo 6–12: “Boyoka, O Bino Bato”

Malongi mpe Mayokani 1

Na Sanza ya zomi na moko 1831, Eklezia ezongisama ya Yesu Klisto ezalaki bobele na mobu moko na ndambo. Atako ezalaki kokola, ezalaki kaka liboke eyebana moke ya bandimi kofandaka na bingomba pene moke, ekambamaki na profeta moko na mibu katikati ya bantuku mibale. Kasi Nzambe atalaki bandimi oyo lokola basali mpe bantoma na Ye, mpe Alingaki ete bimoniseli oyo Apesaki bango ebimisama na mokili.

Malongi mpe Mayokani eteni 1 ezali prefasi ya nkolo, to boyingisi, na bimoniseli oyo. Elakisi polele ete kutu atako bandimi ya Eklezia bazalaki moke, eloko moko ya moke ezalaki te etali nsango Nzambe alingaki Basantu na Ye bakabola. Ezali “mongongo ya bokebisi” mpo na banso ya “bato ya mabele,” koteyaka bango bayambola mpe batia “boyokani ya seko” ya Nzambe (milongo 4, 8, 22). Basali oyo bazali komema nsango oyo bazali “bato na botau mpe bato mpamba lokola bato nyonso.” Kasi basali ya komikitisa bazali kaka baoyo Nzambe abiangaka—na kala mpe sikawa—mpo na kobimisa Eklezia na Ye “libanda ya butu mpe libanda ya molili” (milongo 23, 30).

Makanisi mpo na Koyekola na Ndako mpe na Eklezia

Malongi mpe Mayokani 1

“Boyoka, O bino bato”

Prefasi ezali nkoma na ebandeli mpo na koyingisa buku. Ezali kolobela bampo mpe bantina ya buku mpe ezali kosunga batangi bamilengela mpo na kotanga. Ntango bozali kotanga Eteni 1—“prefase” ya Nkolo na Malongi mpe Mayokani (molongo 6)—boluka bampo mpe bantina oyo Nkolo apesaki mpo na bimoniseli na Ye. Nini boyekoli oyo ekosalisa bino na boyekli na bino ya Malongi mpe Mayokani mobu oyo? Ndakisa, bokoki komanyola nini yango elingi koloba mpo na “koyoka mongongo ya Nkolo” na bimoniseli oyo (molongo 14) to mpo na “koluka mitindo oyo” (molongo 37).

Botala lisusu boyingisi na Malongi mpe Mayokani.

Malongi mpe Mayokani 1:4–6, 23–24, 37–39

Nkolo alobaka na nzela ya basali na Ye, kosangisaka baprofeta ya mikolo mya nsuka.

Eteni 1 ebandi mpe esuki na esakola ya Nzambe ete Ye alobaka na nzela ya basali na Ye baponama (tala milongo 4–6, 23–24, 38 Bokoma oyo boyekoli uta na emoniseli oyo etali:

• Nkolo mpe mongongo na Ye.

• Mpo na nini baprofeta basengelami na mikolo na biso.

Boyoki nini na makanisi mpo na kosala lokola mbano ya maye bomoni?

Ntango nini boyokaki mongongo ya Nzambe na nzela ya mongongo ya basali na Ye? (tala molongo 38

Bokoki kokanisa ete moninga moko oyo ayebi ntina ya baprofeta na bomoi te azali kotanga eteni 1 elongo na bino. Mituna nini moninga na bino akoki kozala na yango? Milongo nini bolingaki kolobela elongo na moninga na bino mpo na kosalisa ye asosola lolenge nini bozali koyoka na oyo etali kozala na baprofeta na mikolo na biso?

Bokoki kosepela koyeba ete ntango lisanga ya bampaka ekutanaki na 1831 mpo na kolobela oyo etali kobimisa bimoniseli ya Joseph Smith, bato misusu batelemelaki likanisi wana. Bamitungisaki na botau ya Joseph na kokoma, mpe babangaki ete kobimisa bimoniseli yango ekokaki kosala pkokoso mingi na Basantu (tala Basantu, 1:140–43). Soki bozalaki moto moko ya lisanga oyo, lolenge nini bolingaki kosilisela makambo oyo? Mabongi to mateya nini bozwi na eteni 1 oyo ekokaki kosalisa? (tala, ndakisa milongo 6, 24, 38).

Bokanisa kokwaka loyembo lokola: “Come, Listen to a Prophet’s Voice” (Hymns, no. 21) na boyekoli mpe bokumbameli na bino. Boluka biteni ya maloba na loyembo yango oyo ezali koteya mabongisi se moko lokola milongo na eteni 1.

Botala lisusu Makambo mpe Mituna, “Baprofeta,” Bibilioteki ya Nsango Malamu.

Nkolo alobaka na biso na nzela ya basali ba Ye, baprofeta.

Malongi mpe Mayokani 1:12–30, 34–36

Bozongisi esalisaka ngai nalonga mikakatano ya mikolo ya nsuka.

Na Malongi mpe Mayokani eteni 1, Nkolo alimboli mpo na nini Ye azongisaki nsango malamu. Botala bantina boni bokoki kosalela molongo ntango bozali kotanga milongo 12–23. Na boyebi na bino, lolenge nini bantina ya Nkolo mpo na Bozongisi ezali kokokisama?

Nkolo ayebaki ete mikolo na biso elingaki kozala na mikakatano mabe (tala molongo 17). Nini bomoni na molongo 17–30, 34–36 oyo esalisi bino boyoka kimia mpe elikya atako mikakatano oyo?

Botala lisusu Russell M. Nelson, “Yamba Lobi ekoya na Bondimi,” Liahona, Sanza ya zomi na moko 2020, 73–76.

Malongi mpe Mayokani 1:19–28.

Nkolo asalelaka “bato na botau mpe bato mpamba” mpo na kokokisa Mosala na Ye.

Ntango bozali kotanga Malongi mpe Mayokani 1:19 -28, bokoki komanyola nini elingi koloba kozala mosali ya Nkolo. Bizalela nini Nkolo alingi basali na Ye bazala na yango? Nini Nkolo azali kokokisa na nzela ya basali na Ye? Lolenge nini masakoli na milongo oyo ezali kokokisama na mokili mobimba mpe na bomoi na bino?

Boluka Yesu Klisto. Ntina ya makomi ezali mpo na kotatola Mobikisi mpe nsango malamu na Ye. Ntango bozali kotanga Malongi mpe Mayokani 1, bokanisa kotia bilembo to kokoma milongo oyo ezali koteya bino eloko moko etali Yesu Klisto.

Mpo na makanisi koleka, tala nsango ya sanza oyo na bamagazini Lahona mpe Mpo na Bokasi ya Bilenge .

Makanisi mpo na Koteya Bana

Malongi mpe Mayokani 1:4, 37–39

Na nzela ya baprofeta na Ye, Nkolo akebisaka ngai na likama ya molimo.

• Mpo na kobanda lisolo etali makebisi uta na Nkolo, bokoki kosolola oyo etali makebisi oyo tozwaka uta na bato misusu etali makama oyo tokoki komona te. Ndakisa misusu ekoki kokwa pavema moko ya kosielomoka, ekumbaki oyo ezali koya, to bopusani ya motuka. Ntango mosusu bino na bana na bino bokokaki kotala bandakisa ya bilembo ya bokebisi mpe kokokisisa makebisi oyo na makebisi Nkolo apesaka biso. Engebene na Malongi mpe Mayokani 1:1–6, 37–39, lolenge nini Nkolo azali kokebisa biso? Na likambo nini Akebisi biso kala mingi te? Ntango mosusu bokoki kotala to kotanga biteni ya nsango ya likita linene oyo eleki kala mingi te mpe boluka bandakisa ya “mongongo ya bokebisi” ya Nzambe.

• Boyemba elongo loyembo etali baprofeta, lokola molongo ya nsuka ya “Follow the Prophet” (Children’s Songbook, 111). Bokabola litatoli na bino ete profeta alobaka liloba ya Nzambe.

Malongi mpe Mayokani 1:17

Bozongisi esalisaka ngai nalonga mikakatano ya mikolo ya nsuka.

• Mpo na kolendisa lisolo etali Malongi mpe Mayokani 1:17, bino mpe bana na bino bokoki kokanisa bozali komilengela mpo na mobembo. Bokokangisa nini? Soki boyebaki liboso ete mvula ekobeta to ete motuka to bisi na bino ekotoboka pine, lolenge nini yango ekosala na lolenge bomilengelaki mpo na mobembo yango? Botanga elongo molongo 17, mpe bosolola na oyo etali maye Nkolo ayebaki ekosalamela na biso. Lolenge nini Ye alengelaki yango? (Soki esengeli, bolimbola ete “likama” ezali mbeba to eloko moko mabe.) Lolenge nini mitindo ya Nzambe esalisaka biso tolonga na mikakatano ya ntango na biso?

Malongi mpe Mayokani 1:17, 29.

Nkolo abiangaki Joseph Smith azala profeta.

• Mpo na koyekola na ntina ya mosala ya Joseph Smith na kozongisaka nsango malamu ya Mobikisi, bino mpe bana na bino bokoki kotala elilingi moko ya Mobikisi mpe elilingi moko ya Joseph Smith (tala bililingi na liteya oyo) mpe bosolola etali maye Mobikisi apesaki biso na nzela ya Joseph Smith. Bana na bino bakoki koluka bandakisa na Malongi mpe Mayokani 1:17, 29. Bolobela bana na bino lolenge nini boyebi ete Nzambe “abiangaki mosali na ngai Joseph Smith, Jun., mpe alobelaki ye uta na lola” (molongo 17).

© 1998 David Lindsley

Malongi mpe Mayokani 1:30.

Eklezia ya Yesu Klisto ya Basantu ba Mikolo mya Nsuka ezali “eklezia ya solo mpe na bomoi” ya Nkolo.

• Elingi koloba nini mpo na koloba ete Eklezia ezali “solo mpe na bomoi”? Mpo na kosala ete bana na bino bakanisa oyo etali motuna oyo, ntango mosusu bokoki kolakisa bango biloko ya bomoi mpe biloko na bomoi te—ndakisa nzete na bomoi mpe nzete ekufa. Lolenge nini toyebaka eloko moko ezali na bomoi? Nsima bokoki kotanga Malongi mpe Mayokani 1:30 mpe kosolola na oyo etali maye ekokaki koloba ete Eklezia ezali “solo mpe na bomoi.”

Mpo na makanisi koleka, tala nsango ya sanza oyo na magazini Moninga .

Pembeni ya Mai ya Kimia, na Simon Dewey