“Mantswe a Tsosoloso: Thanolo ya Buka ya ga Momone,” Tlayang, Ntshalang Morago—Ya Legae le Kereke: Dithuto le Dikgolagano 2025 (2025)
“Thanolo ya Buka ya ga Momone,” Tlayang, Ntshalang Morago—Ya Legae le Kereke: 2025
Mantswe a Tsosoloso
Thanolo ya Buka ya ga Momone
Ka Moranang 1829, kgwedi e dikgaolo 6–9 tsa Dithuto le Dikgolagano di amogetsweng, tiro e tona ya ga Joseph Smith e ne e le thanolo ya Buka ya ga Momone. Ga re itse dintlha tse dintsi ka ga tsamaiso ya dikgakgamatso tsa thanolo, fela re a itse gore Joseph Smith e ne e le molebi, a thusiwa ke di dirisiwa tse Modimo a di baakantseng: matlapa a mabedi a a bonalang ka kwa a a bidiwang Urime le Thumime le le lengwe letlapa le le bidiwang letlapa la molebi.
Fa a bodiwa kgabagare go tlhalosa ka fa polelo e e neng ya ranolwa, Joseph o ne a re “gore ga go a tshwanela go bolelela lefatshe dintlha tsotlhe.” Gangwe le gape o ne a bua gore e ranotswe “ka neo, le thata ya Modimo.”
Polelo e e latelang, go tswa go basupi ba ba boneng ka matlho tsamaiso ya thanolo, ba thusa bosupi jwa ga Joseph.
Go dumelwa gore lebokoso le, le e neng e le la ga Hyrum Smith, le ne la dirisiwa ka nakwana go fitlha dipapetlana tsa gauta.
Emma Smith
“Fa monna wa me a ranola Buka ya ga Momone, ke kwadile karolo ya yone, jaaka a ne a peleta polelwana nngwe le nngwe, lefoko ka lefoko, mme fa a ne a bua ka maina a a rileng a a neng a sa kgone go a bitsa, kgotsa mafoko a maleele, o ne a a peleta, fa nna ke ne ke a kwala, fa ke dira phoso mo go kwaleng, o ne a nkemisa mme a baakanye mokwalo le fa gone go retela gore a bone ka fa ke neng ke a kwala ka teng ka nako eo. Le lefoko Sara o ne a sa kgone go le bua lantlha, mme a tshwanelwa ke go le peleta, mme ka le bua mo boemong jwa gagwe.”
“Dipapetlana gantsi di ne di le mo tafoleng go sena maiteko ape go di fitlha, di fapilwe ka letsela le lennye la tafole, le Ke le mo neetseng go di potoka. Nako nngwe ke ne ka tshwara dipapetlana, jaaka di ne di le mo tafoleng, go di sekaseka jaaka dintse le popego. Di ne di tshwana le jaaka bokima kwa pampiri, mme di utlwala jaaka tshipi fa di ne di sutisiwa ka monwana, jaaka mongwe nako tse dingwe aka dira ntlha ya buka. …
“Tumelo ya me ke gore Buka ya ga Momone ke ya boammaaruri jwa selegodimo—ga ke na le fa e le pelaelo epe. Ke dumela gore ga gona motho yo o ka bong a laetse gore mekwalo e kwalwe jang fa e se fela fa ane a tlhotlhelediwa; gonne, fa ke dira jaaka mokwadi wa gagwe, [Joseph] o ne a ntaela oura morago ga oura; mme fa a bowa morago ga dijo, kgotsa morago ga kgoreletsego, ka gangwe o ne a simolola fa a tlogetseng teng, a sa bone mokwalo kgotsa bontlha bongwe a bo balelwa. Se e ne e le selo se a tlwaetseng go se dira. Go ne go sa lekana gore motho yo o rutegileng o ka dira se; mme, mongwe yo o sa itseng e bile a sa rutega jaaka ene, gone go sa kgonege.”
Oliver Cowdery
“Ke kwadile Buka ya ga Momone yotlhe ka pene ya me (fa e se tsebe di sekae) jaaka gone go tswa mo molomong wa moporofeti, jaaka a e ranola ka neo le thata ya Modimo, ka thuso ya Urime le Thumime, kgotsa, jaaka e e bidiwa ke buka, baranodi ba ba boitshepo. Ke bone ka matlho a me, le go tshwara ka diatla tsa me, dipapetlana tsa gauta eo e ranotsweng mo go yone. Gape ke ne ka bona baranodidi.”