Mantswe a Tsosoloso

Basupi ba Buka ya ga Momone

Moengele Moroni o supegeditse Joseph Smith , Oliver Cowdery, David Whitmer, le Martin Harris dipapetlana tsa gauta mo sekgweng gaufi le legae la ga Whitmer kwa Fayette, New York. Ka nako eo batsadi ba ga Joseph ba ne ba etetse bo Whitmer. Mmaagwe Joseph, Lucy Mack Smith, o ne a tlhalosa boleng jo maitemogelo a a gakgamatsang a nnileng le one mo basuping.

“E ne ele fa gare ga oura ya boraro le ya bone. Mrs. Whitmer le Mr. Smith le nna re ne re ntse mo kamoreng ya borobalo. Ke ne ke ntse mo letlhakoreng la bolao. Fa Joseph a tsena, a itatlhela fa thoko ga me. ‘Rre! Mme!’ a re. ‘Ga lo itse ka fa ke itumetseng ka teng. Morena o dirile gore dipapetlana di bontshiwe ba bangwe ba bararo kwantle ga me, ba le gone ba boneng moengele mme ba tlaa paka ka boammaaruri jwa se ke se buileng. Gonne ba itse ka bo bone gore ga ke tsamaye ke tsietsa batho. E bile ke ikutlwa jaaka ekete ke gololosegile mo mokgweleong wa khutsafalo, o o neng o le mogolo thata mo go nna go o itshokela. Mme jaanong ba tshwanetse go kaya bontlha bongwe, mme go itumedisa mowa wa me gore ga ke nosi mo lefatsheng lotlhe.’ Martin Harris ka jalo a tsena. O ne a lebega ekete o fenngwa ke boipelo jo bo feteletseng. Go tswa foo one a paka ka se a se boneng le go se utlwa, jaaka ba bangwe le bone, Oliver le David. Bopaki jwa bone bo ne bo tshwana ka boleng jaaka jo bo mo Bukeng ya ga Momone. …

“Martin Harris ka boene o ne a lebega a sa kgone go tlhalosa maikutlo a gagwe ka mafoko. O ne a re, ‘Jaanong ke bone moengele go tswa legodimong yoo ka bonnete a pakileng ka boammaaruri jwa tsotlhe tse ke di utlwileng mabapi le pego, mme matlho a me a mmone. Ke bone le gone dipapetlana le go ditshwara ka diatla tsa me mme ke ka paka ka mo go tshwanang go lefatshe lotlhe. Mme ke amogetse bosupi ka bonna jo mafoko a ka se bo tlhaloseng, gore ga gona loleme le le ka tlhalosang, e bile ke segofatsa Modimo ka tlhwaafalo ya mowa wa me gore o ntshupegeditse, go ntira, mosupi wa tiro ya gagwe e kgolo bogolo le ditogamaano mo boemong [jwa] bana ba batho.’ Oliver le David le bone ba kopanela le ene mo go bakeng Modimo ka tlhwaafalo ka ntlha ya bomolemo jwa gagwe le kutlwelobotlhoko ya gagwe. Ra boela kwa gae [kwa Palmyra, New York,] letsatsi le lelatelang re le setlhopha se se nametsegang, re itumetse.”

Oliver Cowdery, David Whitmer, le Martin Harris

Lucy Mack Smith le ene o ne a le teng fa Basupi ba ba Borobabobedi ba bowa kwa maitemogelo a bone:

“Morago ga basupi ba ba boela kwa ntlung, moengele a iponatsa gape mo go Joseph, ka nako e o Joseph a neng a mo neela dipapetlana. Maitseboa ao ra nna le bokopano mo e leng gore basupi botlhe ba fa bopaki jwa bonnete jaaka go builwe fa godimo, le lelwapa lotlhe la rona, le Don Carlos [Smith] yo a neng a le dingwaga tse 14, a paka ka boammaaruri jwa tebatebelo ya malatsi a bofelo —gore ka jalo e ne e setse e simolotse mo go tletseng.”

Setshwantsho se se betlilweng sa ga Joseph Smith le Basupi ba ba Borobabobedi

Mo go tlaleletseng Basupi ba Bararo le Basupi ba ba Borobabobedi, Mary Whitmer, mmaagwe David Whitmer, le ene o ne a segofala go nna mosupi wa dipapetlana tsa gauta. Moengele Moroni o mmontshitse e le go lemoga setlhabelo se a se dirileng fa Joseph, Emma, le Oliver ba ne ba nna mo legaeng la gagwe. “O ntse o le boikanyego fela thata le botlhaga mo ditirong tsa gago,” Moroni a mo raya. “Go siame, ke gone, gore o amogele bosupi gore tumelo ya gago e nonotshiwe.”

Dintlha

1. Lucy Mack Smith, History, 1844–1845, book 8, 11 through book 9, 1, josephsmithpapers.org; capitalization and punctuation modernized.

2. Lucy Mack Smith, History, 1845, 156–57, josephsmithpapers.org.

3. Mo go Saints, 1:70–71.