Kape in peba ko an Bok in Mormon

Pāpode 10–16: “Bwe Kwōn Maron̄ Rianjo̧”

Katak im Bujen Ko 10–11

Ke ukook eo an Bok in Mormon ekar wōnm̧aanļo̧k wōt, ekar wanlōn̄tak juon kajjitōk: Ta eo Josep Smith im Oliver Cowdery rej aikuj kōm̧m̧ane kōn peij ko raar jako? Emaron̄ ekkar n̄an kar ukōt m̧ōttan ko, bōtaab Irooj ekar lo juon men raar jab maron̄ loe: rikōjdāt ro aer raar ļōmņak in ukōt naan ko jān peij ko n̄an kwaļo̧k pere ilo jerbal eo ekar im̧we Josep. Ekar wōr juon an Anij karōk n̄an kabōjrak jorrāān jab in n̄an kowōnm̧aanļo̧k wōt jerbal eo. Taujin iiō ko m̧oktaļo̧k, Anij ekar im̧we Nipai n̄an je ļo̧o̧k eo kein karuo me ekar kōnono kōn ejja tōre in iien eo wōt “kōn juon un eo E ejeļā kake” (1 Nipai 9:5).

“Mālōtlōt eo Aō,” Irooj ekar ba n̄an Josep, “eļapļo̧k jān aujiid ko an devil” (Katak im Bujen Ko 10:43). Ej juon ennaan in kam̧ool ilo juon raan āinwōt ko ad, n̄e rikapo eo ekajoor an kijejeto n̄an kōm̧ōjņo̧ikļo̧k tōmak. Āinwōt Josep, jemaron̄ “niknik im wōnm̧aanļo̧k wōt” ilo jerbal in an Anij me ekar kūr kōj n̄an kōm̧m̧ane (eoon 3). Innām jenaaj lo bwe Ekar kōpooj kadede juon iaļ bwe “aor ko an hell rej jamin naaj anjo̧” ņae kōj (eoon 69).

Lale Armej ro Rekwojarjar, 1:51–61

Ļōmņak ko n̄an Ekaatak ilo M̧weeo im ilo Kabun̄ in

Katak im Bujen Ko 10:1–33

Anij “jamin kōtļo̧k bwe Setan en naaj kōtōprak karōk nana eo an.”

Setan ekōņaan bwe jen meļo̧kļo̧k ke ewōr e—ak bwe jej pād ilo ad likjab in kile bwe ej kajjieon̄ kapoik kōj (lale 2 Nipai 28:22–23). Bōtaab naan ko an Irooj ilo Katak im Bujen Ko 10 rej kapen bwe Setan ej lukkuun—im eniknnik n̄an jum̧ae jerbal eo an Irooj. Ilo eoon 1–33, kile ta eo Anij ekar jeļā kōn kijejeto ko an Setan (bar lale eoon 62–63). Kwomaron̄ barāinwōt kajjitōk ippān Irooj n̄an jipan̄ eok lale ekōjkan an Setan maron̄ kapoik eok. Ilo am̧ riiti jekjōn 10, kejekļo̧kjeņ kōn ekōjkan an Rilo̧mo̧o̧r eo maron̄ jipan̄ eok jum̧ae kijejeto ko an Setan.

Katak im Bujen Ko 10:34–52

An Irooj “mālōtlōt eļapļo̧k jān aujiid ko an devil.”

Nipai ekar jab jeļā etke ekar im̧we n̄an kōm̧m̧ane ruo kōro̧ro in ļo̧o̧k ko an armej ro doon. Im Mormon ekar jab jeļā etke ekar im̧we n̄an kobaik m̧ōttan eo kein karuo ippān piliej gold ko. Bōtaab rikanaan rein jim̧or raar lōke bwe Anij ekar wōr “un eo E ejeļā kake” (1 Nipai 9:5; Naan ko an Mormon 1:7). Rainin jejeļā jidik in m̧ōttan un jab in: n̄an bōk jikin peij ko 116 raar jako ilo Bok in Mormon. Ta eo kwoj ļōmņak Irooj ej kōņaan bwe kwon katak jān aolepān menin? Kejekļo̧kjeņ kajjitōk jab in ilo am̧ riiti Katak im Bujen Ko 10:34–52. Kwomaron̄ bar kōm̧m̧ane juon laajrak in m̧ool ko kwoj katak kaki kōn Irooj jān eoon kein. Ekōjkan an m̧ool kein jelet jemjerā eo am̧ Ippān? Ta eo ej im̧we eok kōn māletlet eo an Irooj im an lo jekļaj ilo m̧aanjabpopo n̄an peij ko 116 raar jako?

Kwomaron̄ barāinwōt en̄jake im̧we n̄an pukōt kein kam̧ool kōn mālelet eo An im an lo jekļaj ilo mour eo am̧. Riiti bwebwenato eo ilo ennaan eo an Elder Ronald A. Rasband “Kōn Karōk eo Ekwojarjar”—remaron̄ bōktok waanjon̄ak ko n̄an ļōmņak eo am̧ (Liaona, Nob. 2017, 55–57). Ļōmņak in jei ilo aer itok n̄an eok. Ekōjkan an kar Irooj jerbal ilo mour eo am̧? N̄an waanjon̄ak, ta ko “rekar jide” E kar kōpooji n̄an eok? Ta pedped ko E ekar doori n̄an kōjeraam̧m̧an ko am̧? N̄aat eo E kar tōl eok n̄an jerbal in karejar n̄an juon eo ej pād ilo aikuj?

Bar lale Rom 8:28; Katak im Bujen Ko 90:24; Unin Kōnono ko im Kajjitōk ko, “Karōk in Lo̧mo̧o̧r,” Gospel Library eo.

Meļeļe ko jān Mormon ej Kōkaduduik Pileij ko, jān Tom Lovell

Katak im Bujen Ko 11

“Likūt am lōke ilo Jetōb [eo an Irooj].”

Ļeo jein Josep Hyrum ekar kijooror n̄an jeļā ankilan Irooj n̄an e, kōn menin ekar kajjitōk ippān Josep n̄an pukōt juon revelesōn ilo etan. Rikanaan eo ekar m̧ōņōņō n̄an kōm̧m̧an āindein, bōtaab juon ennaan ilo revelesōn jab in (Katak im Bujen Ko 11) ej bwe Hyrum emaron̄ barāinwōt pukōt juon revelesōn n̄an e make. Im āindein bwe “aolep ro ewōr aer kōņaan ko rem̧m̧an, im rekar bun̄raake sickle ko aer n̄an m̧adm̧ōd” (eoon 27). Ilo am̧ riiti jekjōn 11, ta eo kwoj en̄jake Irooj ej katakin eok kōn revelesōn eo an juon make? Ekōjkan an menin iookļo̧k ta eo E ekar katakin Oliver Cowdery ilo jekjōk 6–9? Ta ennaan ko jet me ewōr An n̄an kwe?

Bar lale “Let the Holy Spirit Guide,” Hymns, no. 143.

Karuwaineneik rikkatak ro n̄an kajjitōk kajjitōk ko. Uwaak ko remakijkij aer tōlļo̧k n̄an revelesōn. Eļan̄n̄e kwoj katakin baam̧le eo am̧ ak juon kūlaaj an Kabun̄ in, kōketak er n̄an kajjitōk kajjitōk ko, im jipan̄ er pukōt uwaak ko ilo jeje ko rekwojarjar. N̄an waanjon̄ak, eļan̄n̄e ewōr aer kajjitōk kōn revelesōn an juon make, lale ippān doon uwaak ko ilo Katak im Bujen Ko 11:12–14.

Katak im Bujen Ko 11:15–26

Ilo aō kappukōt n̄an “bōk naan eo [an Anij],” Inaaj bōk Jetōb eo An im kajoor.

Jekdo̧o̧n m̧okta jān an Bok in Mormon kar ukook, Hyrum Smith ekar m̧ōņōņō n̄an jipan̄ ilo jerbal eo an Jepļaaktok eo. Ilo am̧ riiti uwaak eo an Irooj n̄an ikdeleel eo an, ļōmņak kōn ta meļeļein n̄an eok n̄an “bōk naan eo [an Anij]” (eoon 21). Ekōjkan n̄an bōk naan eo an Anij naaj jipan̄ eok jerbal n̄an E kōn kajoor?

N̄an ļōmņak ko reļļapļo̧k, lale ennaan eo an allōn̄ in an Liaona eo im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Katak im Bujen Ko 10:5

Ilo Aō jar iien otemjej, Ij bōk kajoor jān Anij.

• N̄an kwaļo̧k kadkad in eoon in n̄an ajri ro nejūm̧, kwomaron̄ kajjitōk ippāer kōn men ko me rej “iien otemjej” kōm̧m̧ani. Ta eo Irooj ej ba jej aikuj iien otemjej kōm̧m̧ane ilo Katak im Bujen Ko 10:5? Etke E ej kōņaan bwe jen kōm̧m̧ane menin?

• Ekōjkan am̧ maron̄ jipan̄ ajri ro nejūm̧ keememej n̄an jar iien otemjej? Bōlen remaron̄ ain jejjo dekā ko reddik, remeo̧eo̧ im unoik ioer “Katak im Bujen Ko 10:5” ak “Jar Iien Otemjej.” Remaron̄ likūt dekā ko aer ilo elōn̄ jikin ko ijo rej kōņaan in kakeememej n̄an jar, āinwōt turin jikin kiki eo aer, ippān bok in jikuuļ ko aer, ak ijo rej m̧ōn̄ā ie. Ekkar n̄an Katak im Bujen Ko 10:5, ekōjkan an Anij kōjeraam̧m̧an kōj n̄e jej jar? Ajri ro nejūm̧ remaron̄ lo uwaak ko jet ilo juon al āinwōt “A Child’s Prayer” (Children’s Songbook, 13).

Katak im Bujen Ko 11:12–13

Jetōb Kwojarjar ej tōl eō bwe in kōm̧m̧an em̧m̧an.

• Ajri ro remaron̄ katak n̄an kile n̄e Jetōb ej kōnono n̄an er. N̄an jipan̄ er, kwomaron̄ ņooj juon tōm̧a ak tein̄ki ak juon pija in juon turin māj em̧ōņōņō juon jikin ilo rūūm̧ eo; innām kajjitōk ippān ajri ro nejūm̧ n̄an pukōt aitōm kein. Riiti Katak im Bujen Ko 11:13, im jipan̄ ajri ro nejūm̧ kile naan ko me rej ekkeijel ippān aitōm ko raar loi. Ta ko naan kein rej katakin kōj elmen an Jetōb Kwojarjar eo jipan̄ kōj?

• Kwaļo̧k en̄jake ko ilo jetōb am̧ make emaron̄ jipan̄ ajri ro nejūm̧ kile kareel eo an Jetōb Kwojarjar ilo mour ko aer. Ilo am̧ kwaļo̧ke, kajjitōk ippāer n̄an kwaļok en̄jake ko aer barāinwōt. Kwomaron̄ bar riit ippān doon Katak im Bujen Ko 11:12–13, pukōt ekōjkan ad maron̄ kile n̄e Jetōb Kwojarjar ej tōl kōj. Kam̧ool bwe Jemedwōj Ilan̄ ekōņaan tōl kōj ilo wāween Jetōb Kwojarjar.

Katak im Bujen Ko 11:21–26

Ij aikuj jeļā kōn gospel eo bwe in maron̄ jipan̄ ro jet lo m̧ool eo.

• Ejja āinwōt Hyrum Smith, ajri ro nejūm̧ renaaj bōlen wōr aer iien rem̧m̧an n̄an kwaļo̧k gospel eo n̄an ro jet. Kom̧ maron̄ riit ippān doon Katak im Bujen Ko 11:21, 26 im kajjitōk ippān ajri ro nejūm̧ n̄an pukōt ta eo Irooj ekar jiron̄ Hyrum men eo eaikuji bwe en maron̄ kwaļo̧k gospel eo. Ta meļeļe in n̄an “bōk” naan an Anij? Ekōjkan ad kōm̧m̧ane menin? Ekōjkan ad “kaorōk” naan eo an Anij ilo būruōd? Bōlen ajri ro nejūm̧ remaron̄ kōm̧m̧an-kōl kōn kwaļo̧k juon men kōn Jisōs Kraist ak Bok in Mormon n̄an ro jet.

N̄an ļōmņak ko Reļļapļo̧k, lale ennaan eo an allōn̄ in an Jera.

Josep im Hyrum Smith, jān Ken Corbett