“Ainikein ko an Jepļaaktok eo: Rikam̧ool ro an Bok in Mormon,” Itok, Ļoor Eō—N̄an M̧weo im Kabun̄ eo: Katak im Bujen Ko 2025 (2025)
“Rikam̧ool ro an Bok in Mormon,” Itok, Ļoor Eō—N̄an M̧weo im Kabun̄ eo: Katak im Bujen Ko 2025
Ainikien ko an Jepļaaktok eo
Rikam̧ool ro an Bok in Mormon
Enjeļ Moronai eaar kwaļo̧k pileij kooļ ko n̄an Josep Smith, Oliver Cowdery, David Whitmer, im Martin Harris ilo wōjke ko epaake m̧weo im̧ōn Whitmer ro ilo Fayette, New York. Ro jinen im jemen Josep raar loļo̧k Whitmer ro ilo iien eo. Lucy Mack Smith, jinen Josep, eaar kōmeļeļeik kilaan eo en̄jake in ekabwilōn̄lōn̄ eaar jelet rikam̧ool ro:
“Ekar ikōtaan jilu im emān awa. Mrs. Whitmer im Mr. Komro Smit kar jijet ilo juon ruum̧ in kiki. Iaar jijet turin jikin kiki eo. Ke Josep eaar deļo̧n̄tok, eaar oļo̧kļo̧k iturū. ‘Baba! Mama!’ eaar ba. ‘Kom̧ro ejjab jeļā ewi jon̄an aō m̧ōņōņō. Irooj eaar kōm̧m̧an bwe pileij ko ren kwaļo̧ki n̄an bar jilu ijello̧kū, ro raar barāinwōt lo juon enjeļ im naaj aikuj in kam̧ool n̄an m̧ool eo kōn ta eo iaar ba. Bwe rejeļā kōn er make bwe iaar jab kajjieon̄ m̧oņe armej ro. Im ij en̄jake āinwōt men̄e iaar deoor jān juon eddo ekamijak, eo eaar enan̄in kar kanooj ļap n̄an eō n̄an niknik kake. Bōtaab renaaj kiiō aikuj in bōk jidik in, im ekam̧ōņōņōik aō bwe ejako aō make iaō ilo laļ in.’ Innām̧ Martin Harris eaar deļo̧n̄tok. Eaar āinwōt enan̄in lutōkļo̧k kōn tōrjān jon̄an lan̄lōn̄. Innām eaar kam̧ool kōn ta eo eaar loe im ron̄, āinwōt bar ro jet raar, Oliver im David. Naan in kam̧ool eo aer eaar juon wōt meļeļe in me epād ie ilo Bok in Mormon. …
“Eļap tata Martin Harris eaar āinwōt elukkuun jab maron̄ kōmeļeļeik en̄jake ko an ilo naan. Eaar ba, ‘Em̧ōj kiiō aō lo juon enjeļ jān Lan̄ eo eaar ilo m̧ool kam̧ool kōn m̧ool eo an aolep men ko iaar ron̄ ikkijien ļo̧o̧k eo, im māj ko meja raar lo e. Iaar barāinwōt lo pileij ko im kar jibwi kōn pā ko peiū im maron̄ kam̧ool kōn ejja kōn wōt n̄an aolepān laļ in. Bōtaab em̧ōj aō kar bōk kōn n̄a make juon kam̧ool bwe naan ko rejjab maron̄ kwaļo̧ki, bwe ejjeļo̧k lo emaron̄ kōmeļeļeik, im ij m̧ōņōņō Anij ilo m̧ool eo an jetōb eo aō bwe eaar kōn jouj kāālet n̄an kōm̧m̧an bwe in, em̧ool n̄a, juon rikam̧ool an jerbal eo an eļap im ej karōke [ilo] etan ajri ro nejin armej.’ Oliver im David raar barāinwōt kobaļo̧k ippān ilo kōkwojarjar nōbar Anij kōn em̧m̧an im tūriam̧o eo an. Kōm kar bar jepļakļo̧k n̄an ijo jikim [n̄an Palmyra, New York,] raan eo tok juon ippān juon kumi em̧ōņōņō, elan̄lōn̄.”
Oliver Cowdery, David Whitmer, im Martin Harris
Lucy Mack Smith eaar barāinwōt pād ke Rikam̧ool ro Ruwalitōk raar bar ro̧o̧lļo̧k jān en̄jake eo aer:
“Ālkin an rikam̧ool rein kar ro̧o̧ltok n̄an m̧weo, enjeļ eo eaar bar juon alen kwaļo̧k e n̄an Josep; ilo iien eo Josep eaar kōro̧o̧lļo̧k pileij ko n̄an pein. Ilo joteen eo kōm kar kōm̧m̧ane juon kweilo̧k, ilo eo aolep rikam̧ool ro raar kwaļo̧k naan in kam̧ool eo n̄an m̧ool ko āinwōt kar kwaļo̧k itulōn̄; im aolepān baam̧le eo am, em̧ool n̄an Don Carlos [Smith], eo eaar 14 wōt iiō dettan, kar kam̧ool kōn m̧ool eo an tōre in iien bōk eddo eo ilo raan ko āliktata—bwe eaar ilo iien eo lukkuun in bōk jikin.”
Jerbal in m̧akūtkūt eo an Josep Smith im Rikam̧ool ro Ruwalitōk
Ilo kakobaba n̄an Rikam̧ool ro Jilu im Rikam̧ool ro Ruwalitōk, Mary Whitmer, jinen David Whitmer, ekar barāinwōt jeraam̧m̧an n̄an erom juon rikam̧ool an piliej gold ko. Enjeļ Moronai eaar kwaļo̧ki n̄an liin ānwōt juon kile kaarmejete ko an ekar kōm̧m̧ani ke Josep, Emma, im Oliver raar jokwe ilo m̧weo im̧ōn. “Kwar lukkuun tiljek im niknik ilo jerbal ko am̧,,” Moronai ekar jiron̄ liin. “Ejim̧we, kōn menin, bwe kwoj aikuj bōk juon kam̧ool bw tōmak eo am̧ en maron̄ kōkajoor.”