Pāpode 24–M̧aaj 2: “Aorōk in Jetōb ko Rekanooj Ļap”

Katak im Bujen Ko 18

Elōn̄ wāween ko rooktak jān doon n̄an kajjieon̄ jon̄e aorōk in juon armej. Tōļan, jeļāļo̧kjeņ, m̧weie, im paotok in ānbwin remaron̄ aolep m̧ōttan ko n̄an etale doon—im kōj make. Bōtaab ilo māj ko mejān Anij, aorōk eo ad ealikkarļo̧k, im alikkar ilo Katak im Bujen Ko 18: “Keememej bwe aorōk in jetōb ko ekanooj ļap ilo mejān Anij” (eoon 10). M̧ool in eļem waan ej kōmeļeļeik eļap kōn ta eo Anij ekar kōm̧m̧ane im etke E ekar kōm̧m̧ane. Ekōjkan An kar katakin Josep Smith im Oliver Cowdery n̄an kajutak Kabun̄ eo an Jisōs Kraist ilo tōrein ad? (lale eoon 1–5). Kōnke aorōk in jetōb ekanooj ļap. Etke E ekar “jiron̄ aolep armej ijoko jabdewōt n̄an ukeļo̧k” im jilkinļo̧k Rijilōk ro n̄an kwaļo̧k ukweļo̧k? (eoon 9). Kōnke aorōk in jetōb ekanooj ļap. Im etke Jisōs Kraist ekar en̄taan “mej an kanniōk” im “metak an aolep armej”? (eoon 11). Kōnke aorōk in jetōb ekanooj ļap. Jekdo̧o̧ņ eļan̄n̄e juon iaan jetōb kein ej kāālet n̄an bōk menin letok eo an Rilo̧mo̧o̧r eo, E ej lan̄lōn̄, kōn “ewi jon̄an m̧ōņōņō eo an ilo armej eo ej ukeļo̧k” (eoon 13).

Ļōmnak ko n̄an Ekatak ilo M̧weeo im ilo Kabun̄ in

Katak im Bujen Ko 18:1–5

“Kalōk kabun̄ eo aō.”

Ilo jekjōn 18, Irooj ekar leļo̧k n̄an Oliver Cowdery naan in kōmeļeļe ko n̄an jipan̄ kalōk pedped eo an Kabun̄ eo an Jisōs Kraist. Ta eo kwoj kile kōn kapilōk eo E ekar leļo̧k—eļap tata ilo eoon 1–5? Kwomaron̄ ļōmņak ekōjkan an ejja kapilōk in wōt jerbal n̄an kwe ilo am̧ “kalōk” tōmak eo am̧ ilo Kraist. N̄an waanjon̄ok:

• Ta eo kwar “kōnaan jeļā” jān Irooj? (eoon 1).

• Ta meļeļe in n̄an kwe n̄an “pedped ioon men ko em̧ōj aer jeje”? (eoon 3). Ekōjkan an Jetōb kar “kwaļo̧k n̄an eok” bwe men kein rej m̧ool? (eoon 2; bar lale Katak im Bujen Ko 6:22–24).

• Ekōjkan am̧ kalōk mour eo am̧ ioon “pedped eo an gospel eo [an Rilo̧mo̧o̧r] im ejm̧aan eo [An]”? (eoon 5).

Kajjitōk kajjitōk ko. Katak im Bujen Ko ej juon menin kam̧ool bwe kajjitōk ko rej tōlļo̧k n̄an revelesōn. Ilo am̧ ekkatak jeje ko rekwojarjar, je kajjitōk ko me ewōr ippam̧. Innām kejekļo̧kjeņ im jar n̄an pukōt uwaak ko.

Katak im Bujen Ko 18:10–13

“Aorōk in jetōb ko ekanooj ļap ilo mejān Anij.”

Ekōjkan ad ļōmņake aorōk eo an juon men? N̄an waanjon̄ak, etke juon aitōm ilo juon m̧ōn wia eļap an ļap wōņāān jān bar eo juon? Ilo ami riiti jekjōn 18 wiik in, eļap tata eoon 10–13, kwomaron̄ keidi ekōjkan an makijkij an armij kōmlet aorōk ippān ta eo ej kōm̧m̧an bwe juon jetōb en aorōk ilo māj ko mejān Anij. Ļōmņak in likūt etami n̄an bōk jikin naan ko “jetōb,” “jetōb ko,” im “aolep armej.” Ekōjkan an eoon kein jipan̄ juon eo ewōr an kajjitōk kōn aorōk eo an?

Erkein jet iaan eoon ko me rej kwaļo̧k kōn aorōk eo an juon jetōb: Luk 15:1–10; Jon 3:16–17; 2 Nipai 26:24–28; Moses 1:39. Pedped ioon eoon kein, ekōjkan am̧ naaj ba ilo tukadu in wāween an Anij en̄jake kōn kwe? Kwomaron̄ barāinwōt etale ennaan eo an Būreejtōn Dieter F. Uchtdorf’ “You Matter to Him” (Liahona, Nob. 2011, 19–22) n̄an pukōt naan ko im eoon ko me rejipan̄ eok jeļā kōn aorōk eo am̧ n̄an Anij.

Ekōjkan an Anij kwaļo̧k bwe kwe kwoj aorōk Ippān? Ekōjkan an menin jelet wāween am̧ en̄jake kōn kwe make im ro jet?

Bar lale Joy D. Jones, “Aorōk jān jabdewōt Jon̄ok,” Liahona, Nob. 2017, 13–15; Unin Kōnono ko im Kajjitōk ko, “Children of God [Ajri ro Nejin Anij],” Gospel Library eo.

Katak im Bujen Ko 18:11–16

Irooj ej m̧ōņōņō n̄e ij ukweļo̧k.

Kile ikutkut in an naan ko ukeļo̧k im ukeļo̧k (repentance) jerbal ilo aolepān Katak im Bujen Ko 18. Kejekļo̧kjeņ kōn ta eo kwoj katak jān naan kein kajjojo iien rej jerbal. Ļōmņak eļap tata kōn eoon 11–16. Ekōjkan an eoon kein jelet wāween am̧ en̄jake kōn ukweļo̧k—ukweļo̧k eo am̧ make im eddo eo n̄an karuwaineneik armej ro jet n̄an ukweļo̧k im em̧m̧anļo̧k? En̄in ej juon wāween n̄an je ta eo kwoj katak: Kōllaajraki wāween ko kwoj kadedeļo̧k jāntōj eo “Ukweļo̧k ej .”

Bar lale Alma 36:18–21; Unin Tōl eo an Jeje Ko Rekwōjarjar, “Ukeļo̧k,” Gospel Library eo; Dale G. Renlund, “Ukweļo̧k: Juon Kālōt eo Ekamōņōņō,” Liahona, Nob. 2016, 121–24.

Kōmeļeļe ko jān Nejin Eo Ejerwan, jān Clark Kelley Price

Katak im Bujen Ko 18:14–16

Lan̄lōn̄ ej itok jān jipan̄ ro jet itok n̄an Kraist.

Ilo ami riiti eoon 14–16, kejekļo̧kjeņ kōn ta meļeļe in n̄an “kwaļo̧k ukeļo̧k”—im etke ej bōktok kain lan̄lōn̄ in. Ta jet iaan wāween ko kom̧ kar lo n̄an jipan̄ ro jet itok n̄an Rilo̧mo̧o̧r eo im bōk jeorļo̧k bōd? Ekōjkan an kar ro jet kōm̧m̧ane mej jab in n̄an kwe?

Bar lale Craig C. Christensen, “Ejjeļo̧k Jabdewōt Eaiboojojļo̧k im Tōn̄al Āinwōt kar M̧ōņōņō eo Aō,” Liaona, Māe 2023, 45–47.

Katak im Bujen Ko 18:34–36

Imaron̄ ron̄ ainikien Irooj ilo jeje ko rekwojarjar.

Eļan̄n̄e juon ekar kajjitōkin eok elmen ainikien Irooj, ta eo kwon kar ba? Ļōmņak kōn kajjitōk in ilo am̧ riiti Katak im Bujen Ko 18:34–36. Ta eo kom̧ kar katak kōn ainikien Irooj jān riiti Katak im Bujen Ko? Ta eo kwomaron̄ kōm̧m̧ane n̄an ron̄ Ainikien ilo an alikkarļo̧k?

As I Search the Holy Scriptures,” Hymns, nō. 277

N̄an ļōmņak ko reļļapļo̧k, lale ennaan eo an allōn̄ in an Liaona eo im N̄an Kōkajoorļo̧k Jodikdik ro māākjiin ko.

Ļōmņak ko n̄an Katakin Ajri ro

Katak im Bujen Ko 18:10–13

Kajjojo iaad eļap ad aorōk n̄an Anij.

• Ilo am im ajri ro nejūm̧ riiti Katak im Bujen Ko 18:10–13, ļōmņak in likūt etami n̄an bōk jikin naan ko “jetōb,” “jetōb ko,” im “aolep armej.” Innām kom̧ maron̄ kōnono ekōjkan an eoon kein jipan̄ kōj meļeļe ekōjkan an Jemedwōj Ilan̄ en̄jake kōn kōj kajjojo.

• Kwomaron̄ barāinwōt kajjitōk ippān ajri ro nejūm̧ kōn men ko me armej ro rej ļōmņak raorōk. Ak kwomaron̄ kwaļo̧k n̄an er juon men me eaorōk ippam. Ekōjkan ad kōm̧m̧an n̄an men ko me rej aorōk ippād? Innām kōtļo̧k bwe ren take doon lale juon kūlaaj. Ilo aer kōm̧m̧ane, jiron̄ kajjojo ajri bwe er rej juon nejin Anij im rej rekanooj aorōk. Ekōjkan ad maron̄ kwaļo̧k n̄an ro jet bwe “aorōk in jetōb ko [aer] ekanooj ļap” ilo mejād?

• N̄an kwaļo̧k bwe aolep armej ro rej kanooj aorōk n̄an Jemedwōj Ilan̄, ajri ro nejūm̧ remaron̄ lale juon pija ilo jem̧ļo̧kin unin tōl in ilo aer riiti Katak im Bujen Ko 18:10–13. Al ippān doon juon al āinwōt “Every Star Is Different” (Children’s Songbook, 142–43) maron̄ jipan̄ kakijin̄en̄eikļo̧k aorōk in.

Kōmeļeļe ko jān Aorōk in juon Jetōb, jān Liz Lemon Swindle

Katak im Bujen Ko 18:13–16

Jaketo-jaketak Gospel eo ebōktok eļap lan̄lōn̄.

• N̄an im̧we ajri ro nejūm̧ n̄an kwaļo̧k gospel eo an Jisōs Kraist, kwomaron̄ kōnono ippān doon kōn en̄jake ko ke kwar lo juon men me kwar kōņaan kwaļo̧ke ippān ro m̧ōttam̧ak baam̧le eo. Etke kwar kōņaan kwaļo̧ke, im ekōjkan an kar kwaļo̧ke kōm̧m̧an an em̧m̧an am̧ en̄jake? Innām̧ kom̧ maron̄ riiti Katak im Bujen Ko 18:13, 16. Ta eo ej bōktok lan̄lōn̄ an Irooj? Ta eo Ej ba enaaj bōktok n̄an kōj lan̄lōn̄? Kwe im ajri ro nejūm̧ maron̄ kōnono kōn jabdewōt en̄jake ko ekar wōr ippam̧ n̄an kwaļo̧k lan̄lōn̄ eo an gospel eo an Rilo̧mo̧o̧r.

• Juon al kōn kwaļo̧k gosepl eo, eo āinwōt“ “I Want to Be a Missionary Now” (Children’s Songbook, 168), maron̄ jipan̄ ajro ro nejūm̧ ļōmņak kōn wāween ko remaron̄ kwaļo̧k gospel eo.

Katak im Bujen Ko 18:34–36

Imaron̄ ron̄ ainikien Irooj ilo jeje ko rekwojarjar.

• Ajri ro nejūm̧ remaron̄ m̧ōņōņō in ikkure juon ikkure ijo rej kajjieon̄ kile ainikien armej ro rooktak jān doon, ko āinwōt ro uwaan baam̧le eo, ro m̧ōttāer, ak ritōl ro an Kabun̄ in. Ekōjkan ad kile ainikien doon? Ekōjkan ad kile ainikein Irooj? Kom̧ maron̄ riiti ippān doon Katak im Bujen Ko 18:34–36 n̄an ekōnono kōn kajjitōk in Kom̧ maron̄ barāinwōt kwaļo̧k ippān doon ekōjkan ami kar ron̄ ainikien Irooj ilo jeje ko rekwojarjar.

N̄an ļōmņak ko reļļapļo̧k, lale ennaan eo an allōn̄ in an Jera māākjin eo.

Aolep jetōb raorōk n̄an Anij.