“M̧aaj 17–23: ‘Kappukōt Men ko an juon Laļ Em̧m̧anļo̧k”: Katak im Bujen Ko’: Katak im Bujen Ko 23–26,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Katak im Bujen Ko 23–26,” Itok, Ļoor Eō—N̄an M̧weeo im Kabun̄ in: 2025
M̧aaj 17–23: “Kappukōt Men ko an juon Laļ Em̧m̧anļo̧k”
Katak im Bujen Ko 23–26
N̄an elōn̄ armej, peptaij ej juon en̄jake in kautiej, aenōm̧m̧an. Peptaij eo an Emma Smith im ro jet, mekarta, rikōjdat ro raar kakure, ro raar kajirere kake er, kamijak er, im kipel er n̄an ko. Tokālik, ejja wōt ke Josep ekar jino kapen membōr ro rekāāl, kar kalbuuji kōn an kainepataik jukjukin pād eo kōn an kwaļo̧k naan. Ilo aolep jum̧ae in, ekōjkan an Emma kar maron̄ lo kam̧ool eo bwe ekar kōm̧m̧ane men eo ejim̧we? Ejja jikin eo wōt jemaron̄ aolep loe—kōn revelesōn jān Irooj. Ekar kōnono n̄an Emma kōn “men ko an juon [laļ] em̧m̧anļo̧k”—aelōn̄ in kiin̄ eo An—im jikin eo an ilo e. E ekar jiron̄ e n̄an jab mijak, n̄an “kotak būruōn [liin] im m̧ōņōņō,” im n̄an “eddāp n̄an bujen ko [liin] ekar kōm̧m̧ani.” Im naan in kōketak kein im kapilōk eo rej “Ainikiō n̄an aolep” (Katak im Bujen Ko 25:9–10, 13, 16).
Bar lale Armej ro Rekwojarjar, 1:89–90; 94–97.
Ļōmņak ko n̄an Ekkatak ilo M̧weeo im ilo Kabun̄ in
Rilo̧mo̧o̧r eo emaron̄ kotakļo̧k eō “jān en̄taan ko [aō].”
Revelesōn eo ilo Katak im Bujen Ko 24 kar letok n̄an “kōkajoorļo̧k, rōjan̄, im katakin” Josep im Oliver ilo juon iien mālijjon̄ (taitōļ eo an jekjōn eo; bar lale Armej ro Rekwojarjar, 1:94–96). Kappukōt naan ko ilo Katak im Bujen Ko 24 me kwoj en̄jake rekar kōkajoorļo̧k im kōketak er.
Ta eo eoon kein rej elmakote n̄an eok ekōjkan an Rilo̧mo̧o̧r eo jipan̄ eok kōn apan̄ ko am̧?
Meļeļe ko jān E ekar Kemour Elōn̄ Nan̄inmej ko Rooktak, jān J. Kirk Richards
Ewōr juon aō jerbal eaorōk n̄an kōm̧m̧ane ilo aelon̄ in kiin̄ eo an Anij.
Āinwōt kar an Emma Smith lale an Jepļaaktok eo mejaļļo̧k kōn ļeo pāleen, Josep Smith, liin emaron̄ kar ļōmņak ta jerbal eo an emaron̄ e in kar. Kappukōt uwaak ko Anij eaar liļo̧k ilo Katak im Bujen Ko 25. Kwoj ke elolo jabdewōt ilo jekjōn in me kwoj en̄jake ej “Ainikien n̄an [kwe]”? (eoon 16).
Bar lale “An Elect Lady” (pijaan alooj eo), Gospel Library eo; “Thou Art an Elect Lady,” ilo Revelations in Context,, 33–39; Joy D. Jones, “Juon Kūr eo Elukkuun Utiej,” Liaona,Māe 2020, 15–18.
"An Elect Lady"
(D&C 25:2-3) Video portraying events in the life of Emma Smith.
“Wōnm̧aanļo̧k wōt ilo jitōbōn ettā.”
Ta meļeļe in naan eo “wōnm̧aanļo̧k wōt ilo jitōbōn ettā” n̄an eok? Ļōmņak in lin̄ūri jekjōn 25 kōn naan ko im eoon ko me rej jipan̄ eok meļeļe ta meļeļe in ettā. Ennaan eo an Elder David A. Bednar “Ineem̧m̧an im Ettā Bōro” maron̄ barāinwōt jipan̄ (Liaona, Māe 2018, 30–33). Ekōjkan an Jisōs Kraist juon waanjon̄ak an ettā n̄an eok? (lale Matu 11:28–30). Ļōmņak kōn men ko ilo mour eo am̧ kwomaron̄ kōm̧m̧ani “ilo jitōbōn ettā.”
“Likūtļo̧k men ko an laļ in, im kappukot men ko rem̧m̧anļo̧k.”
Ilo am̧ kejekļo̧kjeņ kōn kapilōk eo an Irooj ilo Katak im Bujen Ko 25:10, emaron̄ jipan̄ n̄an kōm̧m̧ane juon laajrak in “men ko an laļ in” E ekōņaan bwe kwon “likūtļo̧k.” Innām kwomaron̄ kōm̧m̧ane juon laajrak in “men ko an [an laļ] em̧m̧anļo̧k” E ekōņaan bwe kwon kappukoti. Kwomaron̄ kāālet diktata juon iaan men ko jān laajrak eo kein kajuon me kwonaaj likūtļo̧k im juon jān laajrak eo kein karuo me kwonaaj kappukōte.
Būreejtōn Russell M. Nelson ekar letok kapilōk im kallim̧ur ko kōn “[likūt] iturajet elōn̄ men ko an laļ in.” Kappukōte ilo peij 77 in ennaan eo an “Mennin Aorōk ko ilo Jetōb” (Liaona, Nob. 2019). Ekōjkan am̧ naaj ļoor kapilōk in an?
Ilo ami riiti eoon 13, ļōmņak kōn bujen ko kwar kōm̧m̧ani ippān Jemedwōj Ilan̄ im Jisōs Kraist. Ta meļeļe in “eddāp n̄an” bujen kein? Ekōjkan an bujen ko am̧ jipan̄ eok “likūtļo̧k men ko an laļ in, im kappukot men ko rem̧m̧anļo̧k”?
Erkein jet iaan eoon ko jet me remaron̄ jipan̄ eok kile ikōtaan “men ko an laļ in” im “men ko rem̧m̧anļo̧k”: Matu 6:19, 21, 25–34; Luk 10:39–42; 2 Nipai 9:51.
Bar lale Unin Kōnono ko im Kajjitōk ko, “Sacrifice,” Gospel Library eo.
Kajjitōk bwe ren kwaļo̧k. Eļan̄n̄e kwoj katakin ro jet kōn ekōjkan “likūtļo̧k men ko an laļ in,” ļōmņak kōn wāween ko n̄an karuwaineneik er n̄an kwaļo̧k ta eo rej kōm̧m̧ane n̄an ļoor kapilōk in. Jemaron̄ bōk kajoor im kōketak eļap jān ron̄jake kōļmenļo̧kjeņ ko an ro jet im en̄jake ko.
Irooj ej m̧ōņōņō ilo aō “al an bōro.”
Ta jet iaan “al [ko] an bōro” am̧—al eo me ej kwaļo̧k en̄jake ko am̧ kōn Jemedwōj Ilan̄ im Jisōs Kraist? Ļōmņak in al ak ron̄jake jejjo iaer. Ta eo ej kōn al kein me rej kōm̧m̧an bwe ren ainjuon n̄an kwe?
Kwomaron̄ barāinwōt kejekļo̧kjeņ kōn al in jar kein āinwōt juon jar. Ta eo al ko rekwojarjar im jar rej eier wōt juon ie? Ekōjkan an kar al ko rekwojarjar “uwaak kōn juon kōjeraam̧m̧an”?
Bar lale “Oh, What Songs of the Heart,” Hymns, nō. 286.
“Men otemjej renaaj kōm̧m̧an jān bōro wōt juon ilo kabun̄ in.”
Naan in “bōro wōt juon” ilo eoon in ej kōnono kōn jerbal eo an kajutak peid n̄an kwaļo̧k bwe jej rejtake im rie juon armej me ej bōk juon kūr ak juon kain̄i an priesthood eo. Ekōjkan am̧ naaj kōmeļeļeik n̄an juon rilotok ilo juon kweilo̧k an Kabun̄ in ta meļeļe n̄e jej rejtake juon armej? Ta uwaak ko kwoj loi ilo ennaan eo an Būreejtōn Henry B. Eying “Kajoor eo ej Rie Tōmak”? Liaona, Māe 2019, 58–60).
N̄an ļōmņak ko reļļapļo̧k, lale ennaan eo an allōn̄ in an Liaona eo im N̄an Kōkajoorļo̧k Jodikdik ro māākjiin ko.
Ļōmņak ko n̄an Katakin Ajri ro
Rilo̧mo̧o̧r eo emaron̄ jipan̄ eō “jān en̄taan ko [aō].”
-
N̄an katak kōn jet iaan en̄taan ko ak apan̄ ko Josep Smith im Armej ro Rekwojarjar im̧aan tata raar jelm̧ai, kom̧ maron̄ etale “Jebta 11: More People Join the Church [Elōn̄ļo̧k Armej Rej Kobatok ilo Kabun̄ in],” ilo Bwebwenato ko jen Katak im Bujen Ko, 46–47, ak pija in alooj eo an ilo Gospel Library eo. Innām kwe im ajri ro nejūm̧ maron̄ lo ta eo Irooj ekar ba n̄an Josep kōn en̄taan ko an ilo Katak im Bujen Ko 24:1, 8. Kom̧ maron̄ barāinwōt kwaļo̧k n̄an doon ekōjkan an Irooj jipan̄ kom̧ ilo iien ko reppen.
1:52Chapter 11: More People Join the Church: April–June 1830
-
N̄an katak ta meļeļein “ineem̧m̧an ilo en̄taan ko [ad],” kwe im ajri ro nejūm̧ maron̄ bar kōm̧m̧ane ekkatak eo ilo pija in alooj eo “Continue in Patience” (Gospel Library). Ta eo Katak im Bujen Ko 24:8 ej katakin kōj kōn kijenmej? Ekōjkan an Rilo̧mo̧o̧r eo kōm̧m̧an bwe jen jeļā E ej “pād [ippād]” ilo en̄taan ko ad?
2:41Continue in Patience
Patience requires that we obey God's commandments and faithfully wait for His will to be fulfilled.
Jisōs ej iakwe “al ko an bōro.”
-
Ālkin riiti Katak im Bujen Ko 25:12, kom̧ maron̄ jiron̄ doon kōn al in jar eo em̧m̧an tata ippāmi ak al an Kabun̄ in—“al in bōro” eo ami—im al kaki ippān doon. Kwaļo̧k ippān doon etke kom̧ij iakwe al kein. Etke Irooj ej m̧ōņōņō n̄e jej al al kein? Ekōjkan an al eo ad āinwōt “juon jar n̄an [E]”?
Bujen ko Aō ippān Jemedwōj Ilan̄ ej bōktok n̄an eō lan̄lōn̄.
-
N̄an meļeļe ta meļeļe in n̄an “eddep n̄an bujen ko” (Katak im Bujen Ko 25:13), ajri ro nejūm̧ remaron̄ take doon lukkuun dāpij juon men jon̄an aer maron̄. Innām kwe im ajri ro nejūm̧ maron̄ kōnono kōn ekōjkan ami “eddep” ak dāpij bujen ko ami. Eļan̄n̄e emenin aikuj, etale ippān ajri ro nejūm̧ bujen ko jej kōm̧m̧ani (lale Mosaia 18:8–10; Katak im Bujen Ko 20:37; im peij in m̧akūtkūt eo an wiik in).
-
N̄an leļo̧k n̄an ajri ro nejūm̧ jekjek eo n̄an Katak im Bujen Ko 25:13, kwomaron̄ kalikkar bwe menin ej juon men eo Irooj ekar jiron̄ Emma Smith ālkin wōt an kar peptaij. Etke menin enaaj juon kapilōk em̧m̧an n̄an juon eo me ejkab peptaij?
N̄an ļōmņak ko reļļapļo̧k, lale ennaan eo an allōn̄ in an Jera māākjin eo.
Emma’s Hymns [Al ko an Emma], jān Liz Lemon Swindle