“M̧aaj 3–9, ‘Ekkatak jān Eō,’ Katak im Bujen Ko 19,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Katak im Bujen Ko 19,” Itok, Ļoor Eō—N̄an M̧weeo im Kabun̄ in: Katak im Bujen Ko: 2025
Kōmeļeļe ko jān Iaļ in Gethsemane, Steve McGinty
M̧aaj 3–9: “Ekkatak kōn Eō”
Katak im Bujen Ko 19
Ekar bōk iiō bwe Martin im Lucy Harris ren bōk juon iaan jikin kallib ko rem̧m̧an tata ilo Palmyra, New York. Ak ilo 1829 ekar alikkar bwe Bok in Mormon emaron̄ būriin eļan̄n̄e Martin enaaj wia kake jikin kallip eo an bwe en maron̄ kōļļā wōņeen an būriin. Martin ekar wōr an naan in kam̧ool kōn Bok in Mormon, ak Lucy ekar jab. Eļan̄n̄e Martin en kar wōnm̧aanļo̧k wōt kōn mortage eo im Bok in Mormon eo eban kar em̧m̧an wiaiki, enaaj kar luuji jikin kallib eo an, kōm̧m̧an bwe m̧are eo an en kar pād ilo kauwōtata, im kakkure paotok eo an ilo jukjuk in pād eo. Men̄e jekjek ko ad reoktak jān ko an Martin, ilo juon iien ak bar juon jej jelm̧ae kajjitōk ko reppen āinwōt ko eaar iooni: Ta aorōk eo an gospel eo an Jisōs Kraist n̄an n̄a? Ta eo me ikōņaan kaarmejete n̄an jipan̄ kalōk aelōn̄ in kiin̄ eo an Anij? Āliktata Martin Harris ekar jokāālet bwe enaaj kar wia kake jikin kallib eo an bwe kape ko 5,000 im̧aan tata an Bok in Mormon ren maron̄ kar būriin. Bōtaab jekdo̧o̧n kaarmejete in—im jabdewōt kaarmejete jemaron̄ kōm̧m̧ane—ej dik wōt keidi n̄an kaarmejete eo an Jisōs Kraist, “eļap tata jān aolep” (Katak im Bujen Ko 19:18), eo ekar to̧o̧r bōtōktōkin n̄an lo̧mo̧o̧ren eo ej ukweļo̧k.
N̄an elōn̄ļo̧k meļeļe kōn diwōjtok eo an Bok in Mormon, lale Armej ro Rekwojarjar, 1:76–84.
Ļōmnak ko n̄an Ekkatak ilo M̧weeo im ilo Kabun̄ in
“N̄a, Anij, ejjeļo̧k jem̧ļo̧kū.”
Josep Smith ekar kōmeļeļeik revelesōn jab in ilo jekjōn 19 ej “juon kien … n̄an Martin Harris, kar leļo̧k jān E eo Ejjeļo̧k Jem̧ļo̧kin” (section heading eo). Pukōt jikin ko ilo eoon 1–12 ijo Irooj ej kōmejajaik paotok indeeo eo An ie. Etke kwoj ļōmņak ekar aorōk n̄an Martin Harris n̄an jeļā menin kōn Irooj? Etke eaorōk bwe kwōn jeļā kake?
Etke kwoj ļōmņak Jisōs Kraist kar ņaetan “jinoin im jem̧ļo̧kin”? (eoon 1).
Jisōs Kraist ekar en̄taan bwe in maron̄ ukweļo̧k im itok n̄an E.
Kallim̧ur Ekāāl ej kōmeļeļeik en̄taan eo an Rilo̧mo̧o̧r ilo Getsemane jān kōļmenļo̧kjeņ eo an armej ro me raar lale. Ilo Katak im Bujen Ko 19:15–20, Jisōs Kraist ekar ba kōn en̄taan eo An jān kōļmenļo̧kjeņ eo An make. Ilo ami riiti bwebwenato in ekwojarjar, kappukōt ekōjkan an Rilo̧mo̧o̧r eo kar kōmeļeļeik en̄taan eo An. Ļōmņak kōn kajjojo naan ak jentōj ej katakin eok. Etke Rilo̧mo̧o̧r ekar kōņaan bwe en en̄taan? Kom̧ lo elōn̄ļo̧k ilo Jon 15:13; Mosaia 3:7; Alma 7:11–12; Katak im Bujen Ko 18:10–13.
En̄jake ko ewōr ippāmi ilo ami ekkatak kōn en̄taan eo an Rilo̧mo̧o̧r emaron̄ ļōn̄aj kajjitōk ko āinwōt: Etke Rilo̧mo̧o̧r ekar aikuj in en̄taan kōn jerawiwi ko aō? Etke ij aikuj in ukweļo̧k n̄an bōk tarlep in kōjeraam̧m̧an ko an en̄taan eo An? Kwomaron̄ lo meļeļe ko kōn kajjitōk kein im ko jet ilo ennaan eo an Elder Ulisses Soares “Jisōs Kraist: Rikāājmour Jetōb eo Ad” (Liaona, Māe 2021, 82–84). Ilo am̧ ekkatak, ta im̧we ko rej itok n̄an ļōmņak eo am̧? Ļōmņak in je en̄jake ko am̧ kōn Jisōs Kraist im en̄taan eo An kōn eok.
Ejja m̧ōttan ekkatak eo am̧ im kabun̄jar, kwomaron̄ kajjitōk n̄an pukōt juon al me kom̧ maron̄ ron̄jake ak al kake me ej kwaļo̧k kam̧m̧oolol eo am̧ n̄an Rilo̧mo̧o̧r kōn en̄taan eo An ilo etam̧. “Ij Lokjenaō” (Al ko Al in Ajri, nō. 14) ej juon waanjon̄ak em̧m̧an.
Ta eo kwoj en̄jake Jemedwōj Ilan̄ im Jisōs Kraist renaaj kar ba kwon kōm̧m̧ane āinwōt juon tōprak in ta eo kwar en̄jake im ekkatak?
Bar lale “Jisōs Kraist enaaj jipan̄ kwe,” N̄an Kōkajoorļo̧k Jodikdik ro: Juon Unin Tōl n̄an Kōm̧m̧ani Kāālet ko (2022), 6–9; Unin Kōnono ko im Kajjitōk ko, “Atonement of Jesus Christ,” “Repentance,” Gospel Library; D. Todd Christofferson, “The Divine Gift of Repentance,” Liahona, Nov. 2011, 38–41; “Jesus Suffers in Gethsemane” (video), Gospel Library eo.
The Savior Suffers in Gethsemane
Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57
Aenōm̧m̧an ej itok jān katak kōn Jisōs Kraist im ļoor E.
Ļōmņak kōn kūr in an Rilo̧mo̧o̧r “Ekkatak kōn eō.” Ta eo kwōj katak kōn Jisōs Kraist ilo Katak im Bujen Ko 19? Je ļōmņak ko am̧, im kejekļo̧kjeņ kake ewi wāween an m̧ool kein kōn an Rilo̧mo̧o̧r jipan̄ eok lo aenōm̧m̧an. Ta meļeļein n̄an eok n̄an “etetal ilo ettā in Jetōb eo [An]”?
Bar lale Henry B. Eyring, “Pukōt Aenōm̧m̧an eo Am̧ Make,” Liaona, Māe 2023, 29–31; “Peace in Christ” (video), Gospel Library eo.
Peace in Christ
Kōjeraam̧m̧an ko an Anij reļapļo̧k jān mennin aorōk ko an laļ in.
Bok in Mormon ekar jab lukkuun em̧m̧an wia kake ilo Palmyra. Kōn menin, Martin Harris ekar wia kake juon m̧ōttan eļap in jikin kallib eo an n̄an kōļļāik m̧uri eo n̄an ribūriin eo (lale “The Contributions of Martin Harris,” ilo Revelations in Context, 7–8). Kejekļo̧kjeņ kōn kaarmejete eo an Martin—im kōjeraam̧m̧an ko kwar būki kōnke kōn menin—ilo ami riiti Katak im Bujen Ko 19:26–41. Kwomaron̄ bar ļōmņak kōn ta eo Irooj ekar kajjitōk ippam̧ n̄an kaarmejete. Ta eo kwōj loe ilo eoon kein me rej im̧we eok n̄an kōm̧m̧ane kaarmājete kein kōn “lan̄lōn̄” im “m̧ōņōņō”? (bar lale eoon 15–20).
Kōmeļeļe ko jān Jikin Kallib eo an Martin Harris, jān Al Rounds
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin ko.
Ļōmņak ko n̄an Katakin Ajri ro
Jisōs Kraist eaar en̄taan kōn eō.
-
Kwomaron̄ jipan̄ ajri ro nejūm̧ en̄jake kautiej im kam̧m̧oolol kōn Rilo̧mo̧o̧r eo jān riit ippān doon Katak im Bujen Ko 19:16–19 ak “Jebta 51: Jisōs ej En̄taan ilo Jikin Kallib Getsemane,” ilo Bwebwenato ko jen Kallim̧ur Ekāāl, 129–32, ak pija in alooj eo an ilo Gospel Library eo. Ļōmņak in bōjrak n̄an kanooj lale bwe ajri ro nejūm̧ rej meļeļe im n̄an kōtļo̧k bwe ren kwaļo̧k en̄jake ko aer. N̄an waanjon̄ak, ilo eoon 16, ta “men kein” Jisōs ekar en̄taan kōn eō? (lale Mosaia 3:7; Alma 7:11–12). Ta eo jej ekkatak jān kōmeļeļe eo An kōn en̄taan eo An? Ekōjkan ad maron̄ kwaļo̧k ad kam̧m̧oolol kōn ta eo E ekar kōm̧m̧ane n̄an kōj?
Chapter 51: Jesus Suffers in the Garden of Gethsemane
Jipan̄ ajri ro katak jān jeje ko rekwojarjar. Jet ajri emaron̄ pen aer riit jeje ko rekwojarjar. Mije wōt juon eoon ak jet naan ko emaron̄ jipan̄ er.
-
Kwe im ajri ro nejūm̧ maron̄ kappukōt ilo Hymns ak Children’s Songbook kōn al ko me rej jipan̄ kwaļo̧k en̄jake ko ami kōn Jisōs Kraist (lale index in unin kōnono ilo bok kein).
Katak im Bujen Ko 19:18–19, 24
Jisōs Kraist Eaar pokake Jemedwōj Ilan̄, mekarta ekar pen.
-
En̄taan kōn jerawiwi ko ad ekar kanooj in pen, bōtaab Jisōs Kraist ekar m̧ōņōņō n̄an kōm̧m̧ane n̄an pokake Jemen im n̄an kwaļo̧k An iakwe n̄an E im n̄an kōj. Kwomaron̄ lale ippān doon ilo juon pija in an Jisōs Kraist en̄taan ilo Getsemane (āinwōt ko ilo unin tōl in) im kajjitōk ippān ajri ro nejūm̧ n̄an jiron̄ eok ta eo rejeļā kake ta eo ej waļo̧k ilo pija eo. Kom̧ maron̄ riiti ippān doon Katak im Bujen Ko 19:18–19, 24 n̄an kwaļo̧k bwe en̄taan eo kōn jerawiwi ko ad ekar men eo epen tata juon ekar kōm̧m̧ane, bōtaab kōnke Jisōs ekar iakwe Jemen im kōj, E ekar pokake ankilaan Anij (bar lale Mosaia 3:7). Ta men ko reppen Anij ej kajjitōk ippād n̄an kōm̧m̧ane? Ekōjkan ad maron̄ lo peran n̄an pokake E?
“Ekkatak jān eō, im ron̄jaki naan ko aō.”
-
Kwomaron̄ jipan̄ ajri ro nejūm̧ ļōmņak kōn jerbal ko reļem waan me rej m̧ōttanļo̧k naan ko ilo Katak im Bujen Ko 19:23. Riiti eoon eo jejjo alen ilo aer kōm̧m̧ani m̧akūtkūt ko. Ta jet iaan wāween ko jemaron̄ katak kōn Kraist im ron̄jake naan ko An?
Kōjeraam̧m̧an ko an Anij reļapļo̧k jān mennin aorōk ko an laļ in.
-
Kwe im ajri ro nejūm̧ maron̄ take doon jibwe juon kape in Bok in Mormon im kwaļo̧k ta eo em̧m̧an ippam̧ kake. Ilo tukadu in kōnono kōn kaarmejete eo an Martin Harris bwe Bok in Mormon en maron̄ kar būriin (lale Bwebwenato ko jen Katak im Bujen Ko, 33). Ta eo Irooj ekar ba n̄an Martin ilo Katak im Bujen Ko 19:38 me emaron̄ kar jipan̄ e tiljek im pokake? Jipan̄ ajri ro nejūm̧ ļōmņak kōn juon me remaron̄ kaarmejete n̄an pokake Anij ak jipan̄ ilo jerbal eo An.
2:7Chapter 7: Witnesses See the Gold Plates: 1829–1830
N̄an ļōmņak ko rellapļo̧k, lale ennaan eo an allōn̄ in an Jera māākjin eo.
