“Ainikien Jepļaaktok eo: Emma Hale Smith,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Emma Hale Smith,” Itok, Ļoor Eō—N̄an M̧weeo im Kabun̄ in: 2025
Ainikien Jepļaaktok eo
Emma Hale Smith
Naan ko an Irooj n̄an Emma Smith kar jei ilo Katak im Bujen Ko 25 rej kwaļo̧k ekōjkan An kar en̄jake kōn e im jipan̄ ko eaar maron̄ kōm̧m̧ani n̄an jerbal eo An. Bōtaab ekōjkan kar Emma? Ta eo jejeļā kōn m̧wilin, kadkad ko an, kajoor ko an? Juon wāween n̄an jeļā kōn “kōrā in kāālet” in (Katak im Bujen Ko 25:3) ej n̄an riiti naan ko an armej ro me raar jeļā kajjien.
Josep Smith Jr., ļeo pāleen
“Kōn lo̧udin̄din̄ eo epen kōnono kake, iaar en̄jake obrak kōn lan̄lōn̄, ke kar jibwe eō kōn pein, ilo bon̄ōn eo, aō Emma jitōn bōro—ekar lio pāleō eo, em̧ool lio pāleō jāņ ke iaar likao; im armej eo me eļap tata aō iakwe. Ekar lōn̄ aō ļōmņak ko ke iaar kōļmenļo̧kjeņ ium̧win jidik iien kōn elōn̄ en̄jake ko kōm kar aikuj dibuki. Kam̧ōkm̧ōk ko, im jerbal ko reppen im aitok, būrom̧ōj ko, im en̄taan ko, im lan̄lōn̄ ko im kallim̧ur ko jān iien n̄an iien raar waļo̧k ilo aolepān mour ko am im kar kōjeraam̧m̧an mour ko am. O! kōļmenļo̧kjeņ eo an ekar obrak kōn ļōmņak ko rem̧m̧an. Bar juon alen liin epād ijin, jekdo̧o̧n men̄e raar jelm̧ae apan̄ im jorrāān raar m̧ool wōt im rie doon, Emma ekar jab ebbweer, kar dim wōt, im kijin̄en̄e wōt, jab oktak, iakwe.”
Lucy Mack Smith, lio jinen ļeo pāleen
“Ke liin ekar dik, im, kōn ikdeelel, liin eaar kōm̧aatļo̧k an n̄an jerbal eo an Irooj, im kar lukkuun kallim̧ur n̄an kabun̄ in im un eo an m̧ool eo. Jabdewōt men pein emaron̄ in loe n̄an kōm̧m̧ane, eaar kōm̧m̧ane kōn an maron̄ im kar jab ļōmņak kōn e make ‘Enaaj ke ļapļo̧k aō jeraam̧m̧an jān bar jabdewōt?’ Eļan̄n̄e elder ro kar jilkinļo̧k er n̄an kwaļo̧k, ekar e eo m̧oktata n̄an baļintier n̄an jipan̄ ilo kōpooj nuknuk ko aer ilo iaļ eo aer, jekdo̧o̧n ta mālijjon̄ ko raar jelm̧ai.”
Josep Smith Sr., eo jemen ļeo pāleen
Kōjeraam̧m̧an in petriak eo an Emma, kar kwaļo̧k jān Josep Smith Sr. eo eaar jerbal āinwōt petriak eo an Kabun̄ in:
“Emma, lio nejū-pāleen ļeo nejū, kwoj jeram̧m̧an jān Irooj, kōn am̧ tiljek im m̧ool: kwonaaj jeraam̧m̧an ippān ļeo pāleem̧, im lan̄lōn̄ ilo aiboojoj eo me enaaj itok ioon: Jetōb eo am̧ ekar en̄taan kōn wōt nana eo an armej n̄an pukōt n̄an kakkure ļeo m̧ōttam̧, im aolepān am̧ ekar ilo jar kōn deeor eo an: lem̧ōņōņō, bwe Irooj am̧ Anij em̧ōj an ron̄ kajjitōk eo am̧.
“Kwar būrom̧ōj kōn pen in bōro an baam̧ļe eo an jemam̧, im kwar jan̄ in iuwade kōn lo̧mo̧o̧r eo aer. Irooj enaaj kautiej kajjitōk ko am̧, im kōn ekajet ko an enaaj kōm̧m̧an bwe jet iaer ren lo likjab eo aer im ukweļo̧k jān jerawiwi ko aer; bōtaab enaaj kōn kaen̄taanan bwe renaaj lo̧mo̧o̧r. Kwonaaj lo elōn̄ raan ko; aaet, Irooj enaaj kōjparok eok m̧ae iien eo ebun̄ būruwōm̧, bwe kwonaaj lo am̧ Ripinmuur. Būruwōm̧ enaaj lan̄lōn̄ ilo jerbal eo eļap an Irooj, im ejjeļo̧k juon naaj bōk am̧ lan̄lōn̄ jān eok.
“Kwonaaj indeeo keememej kautiej eo eļap an am Anij ilo kōtļo̧k am̧ ļoror ļeo nejū ke enjeļ eo eaar liļo̧k ļo̧o̧k eo an riNipai ro n̄an kōjparok eo an. Kwar lo eļap būrom̧ōj kōnke Irooj eaar bōk jān kwe jilu nejūm̧ ajri: ilo menin ejjab kwe n̄an kar jekpen ņae, bwe ejeļā ikdeelel ko am̧ rerreo n̄an karūttoļo̧k juon baam̧le, bwe etan ļeo nejū emaron̄ in kar jeraam̧m̧an. Im kiiō, lo, ij ba n̄an eok, bwe Irooj ej ba, eļan̄n̄e kwonaaj tōmak, kwonaaj jeraam̧m̧an ilo men in im kwonaaj bōktok ajri ro jet, n̄an lan̄lōn̄ eo im bun̄ bōro eo an am̧ jetōb, im n̄an lem̧ōņōņō kōn ro jeram̧.
“Kwonaaj jeraam̧m̧an kōn meļeļe, im wōr am̧ kajoor n̄an katakin kōrā ro jet. Katakin baam̧le eo am̧ jim̧we, im ro nejūm̧ reddik wāween mour, im enjeļ ro rekwojarjar naaj mije eok: im kwonaaj lo̧mo̧o̧r ilo aelōn̄ in kiin̄ eo an Anij, em̧ool āindein. Amen.”
Emma Smith ippān ajri ro nejin. Iien Ettōn̄, jān Liz Lemon Swindle