Jānwōde 27–Pāpode 2: “Jerbal eo Aō Enaaj Wōnm̧aanļo̧k”

Katak im Bujen Ko 3–5

Ilo iiō ko jinoin āinwōt rikanaan an Irooj, Josep Smith ejjan̄in kar jeļā aolep men kōn “juon jerbal ekabwilōn̄lōn̄” me em̧ōj kūr e n̄an kōm̧m̧ane. Bōtaab juon men en̄jake ko an jinoin raar katakin e ekar bwe n̄an kōm̧m̧ane jerbal eo an Anij, mejān ej aikuj “erreļo̧k eo wōt n̄an aiboojoj eo an Anij” (Katak im Bujen ko 4:1, 5). N̄an waanjon̄ak, eļan̄n̄e Irooj ekar kapilōk e n̄an kōm̧m̧ane juon men ekar jab jeļā ekar kōņaan kōm̧m̧ane, ekar aikuj in ļoor kapilōk eo an Irooj. Im men̄e ekar wōr ippān “elōn̄ revelesōn ko, im … kajoor n̄an kōm̧m̧ane elōn̄ jerbal ko reļļap,” eļan̄n̄e akilaan enaaj kar aorōk ippān make ijjeļo̧kin ankilaan Anij, e “eaikuj wōtlo̧k” (Katak im Bujen ko 3:4). Ak Josep ekar ekkatak bar juon men me ebar aorōk ilo kōm̧m̧ane jerbal eo an Anij: “Anij e tūriam̧o,” im eļan̄n̄e Josep ekar lukkuun m̧ool ilo an ukweļo̧k, naaj kar baj “kāālet wōt” e (eoon 10). Jerbal eo an Anij ej, jekdoon aolep men ko, juon jerbal in lo̧mo̧o̧r. Im jerbal in “ejamin likjab” (eoon 1).

Ļōmnak ko n̄an Ekkatak ilo M̧weeo im ilo Kabun̄ in

Katak im Bujen Ko 131:1–16

Imaron̄ lōke Anij.

Jinoin ilo iien kwaļo̧k naan eo an Josep Smith, ro m̧ōttan rem̧m̧an ekar pen aer loļo̧k—eļaptata ro m̧ōttan āinwōt Martin Harris, juon eo kautieje, juon em̧m̧aan eo ebun̄bun̄ me ekar kōm̧m̧ane kaarmejete ko reļļap n̄an rie jerbal eo an Josep. Kōn menin ke Martin kar kajjitōk kōn mālim eo n̄an kwaļo̧k peij ko 116 m̧oktata an Bok in Mormon raar ukok n̄an lio pāleen, Josep ekar kōņaan kautiej kajjitōk eo an, jekdo̧o̧n n̄e Irooj ekar kakkōl ņae. Kabūrom̧ōjm̧ōj eo, peij ko raar jako ke raar pād ilo kōjparok eo an Martin, im Josep im Martin raar bōk kauwe eļap jān Irooj (lale Armej ro Rekwojarjar,, 1:51–53

Ilo ami riiti Katak im Bujen Ko 3:1–15, kejekļo̧kjeņ kōn ta eo Irooj ej kōņaan bwe komin katak jān en̄jake eo aer. N̄an waanjon̄ak, ta eo kom̧ij katak kōn:

• Jerbal an Anij? (lale eoon 1–6).

• Jekjek ko n̄an mijak armej ijello̧kin lōke Anij? (lale eoon 4–8).

• Kōjeraam̧m̧an ko me rej itok jān tiljek wōt? (lale eoon 8)

• Wāween eo Irooj ekar jim̧or kajim̧we im kōketak Josep? (lale eoon 9–16).

Ilo ennaan eo an “Which Way Do You Face?,” Elder Lynn G. Robbins ej letok elōn̄ waanjon̄ak ko an jeje ko rekwojarar kōn armej ro me raar mijak Anij im armej ro raar ron̄jake kipel eo an jān ro jet (Liaona, Nob. 2014, 9–11). Ļōmņak in riiti waanjon̄ak ko ilo jeje ko rekwojarjar ekar kōnono kaki. Ta eo kwoj katak jān bwebwenato kein? Ta en̄jake ko ekar wōr ippam̧ ijo kwar lōke Irooj ke kwar jelm̧ae kipel eo n̄an kōm̧m̧ane juon men eoktak? Ta kar tōprak in jerbal ko am̧?

Bar lale Dale G. Renlund, “Juon Ekkarōk in Jerbal kōn Revelesōn an Juon Make,” Liaona, Nob. 2022, 16–19; “The Contributions of Martin Harris [Jipan̄ ko an Martin Harris],” ilo Revelations in Context (2016), 1–9; Unin Kōnono ko im Kajjitōk ko, “Seeking Truth and Avoiding Deception ,” Gospel Library eo; “How Gentle God’s Commands,” Hymns, nō. 125.

Katak im Bujen Ko 4

Imaron̄ jerbal n̄an Anij kōn aolepān būruō, maron̄, ļōmņak, im kajoor.

Jekjōn 4 ej emakijkij an jerbal n̄an mijenede ro rej jerbal aolep raan. Mekarta, ekaitoktok limo n̄an jeļā bwe revelesōn in kar leļo̧k n̄an Josep Smith Sr., eo me ejjan̄in kar kūr e n̄an juon mijen ak ekar wōr an “ikdeleel n̄an jerbal n̄an Anij” (eoon 3).

Juon wāween n̄an riiti jekjōn in ej n̄an pijiakļo̧k āinwōt juon kōmeļeļe in jerbal n̄an juon eo me ej kōņaan jipan̄ ilo jerbal eo an Irooj. Ta eo Irooj ej kappukōte? Ta kōjeraam̧m̧an ko E ekar litok?

Ta eo kwoj katak kōn jerbal n̄an Irooj jān revelesōn in?

Būreejtōn Russell M. Nelson ekar kūr n̄an aiintok Israel “idajon̄jon̄ eo eļap tata, jerbal eo eļap tata, im jerbal eo eļap tata ioon laļ in” (“Hope of Israel” [worldwide youth devotional, June 3, 2018], Gospel Library). Ta eo kwoj loe ilo ennaan in an me ej im̧we eok n̄an bōk kuņan ilo jerbal in?

Aolep ro me ewōr juon aer ikdeelel n̄an jerbal n̄an Anij ej kūr n̄an jerbal eo.

Katak im Bujen ko 5

Kōn Jetōb Kwojarjar, Imaron̄ bōk juon naan in kam̧ool kōn Bok in Mormon.

Ilo M̧aaj 1829 eo, lio pāleen Martin Harris, Lucy, ekar kōm̧m̧ane juon abūņōņō ilo jikin ekajet eo bwe Josep Smith ekar m̧oņe armej ro kōn etan ke ekar ukōt pileij gold ko (lale Armej ro Rekwojarjar, 1:56–58). Kōn menin Martin ekar kajjitōk kōn elōn̄ļo̧k kein kam̧ool bwe pileij gold ko raar lukkuun m̧ool. Katak im Bujen Ko 5 ej juon revelesōn n̄an uwaake kajjitōk eo an Martin. Ta eo kwoj katak jān jekjōn in kōn men kein:

• Ta eo Irooj ej ba enaaj kar waļo̧k eļan̄n̄e pileij gold ko raar waļo̧k n̄an an laļ in n̄an loe (lale Katak im Bujen Ko 5:7). Etke kwoj ļōmņak en̄in ej jekjek eo?

• Eddo eo an rikam̧ool ro ilo jerbal eo an Irooj (lale eoon ko 11–15; bar lale 2 Korint 13:1).

• Ekōjkan bōk juon naan in kam̧ool kōn Bok in Mormon n̄an kwe make (lale eoon 16, 24; bar lale Moronai 10:3–5).

Katak im Bujen Ko 5:1–10

Jisōs Kraist ekar letok n̄an kōj An naan kōn Josep Smith.

Ta eo Katak im Bujen Ko 5:1–10 ej katakin eok kōn jerbal eo an Josep Smith ilo tōre in ad—im ilo mour eo am̧? (Bar lale 2 Nipai 3:6–24).

N̄an ļōmņak ko reļļapļo̧k, lale ennaan eo an allōn̄ in an Liaona eo im N̄an Kōkajoorļo̧k Jodikdik ro māākjiin ko.

Ļōmņak ko n̄an Katakin Ajri ro

Katak im Bujen Ko 3:5–10; 5:21–22

Imaron̄ kālet jim̧we eo n̄e ro jet rej kajjieon̄ bwe in kōm̧m̧an bōd.

• N̄an jino juon iien ekōnono kōn katak n̄an lōke Jemedwōj Ilan̄, kwomaron̄ kōņaan etale bwebwenato eo kōn peij ko raar jako (lale Bwebwenato ko an Katak im Bujen Ko, 18–21). Innām kwomaron̄ kōm̧m̧ane juon ikkure (role play) ippān ajri ro nejūm̧ kōn jekjek ko remaron̄ in kapo ie n̄an kōm̧m̧ane juon men rejeļā ejjab jim̧we. Ta naan ko ak eoon ko ilo Katak im Bujen Ko 3:5–8; 5:21–22 emaron̄ jipan̄ er ilo jekjek kein?

  Chapter 4: Martin Harris and the Lost Pages: 1827–1828

Katak im Bujen Ko 4

Irooj ej karuwaineneik eō n̄an jipan̄ ilo jerbal eo An.

• Kajjojo eoon ilo Katak in Bujen Ko 4 epād ie m̧ool ko raorōk me remaron̄ jipan̄ ajri ro nejūm̧ katak kōn jerbal n̄an Anij. Erkein jet iaan ļōmņak ko n̄an jipan̄ er lo m̧ool kein:

  • Kom̧ maron̄ riiti ippān doon Katak im Bujek Ko 4:1 im kwaļo̧k pija ko me rej pijaikļo̧k jerbal eo an Anij ilo raan ko āliktata “ekabwilōn̄lōn̄” (ko āinwōt mijenede ro, tampeļ ko, im Bok in Mormon).

  • Ajri ro nejūm̧ remaron̄ ļōmņak kōn jerbal ko ak jin̄aik pija ko me rej pijaikļo̧k eoon eo “jerbal n̄an E kōn aolepān būruōmi, ami maron̄, ļōmņak im kajoor” (Katak im Bujen Ko 4:2).

  • Kom̧ maron̄ lale ippān doon kein jerbal ko me kōjerbali n̄an jerbal ilo juon meļaaj. Ekōjkan an kein jerbal kein jipan̄ kōj? Innām ajri ro nejūm̧ remaron̄ lo men ko ilo Katak im Bujen Ko 4:5–6 me rej āinwōt kein jerbal n̄an kōm̧m̧ane jerbal eo an Anij.

  • Ajri ro rōrūttoļo̧k remaron̄ lin̄ūri Katak im Bujen Ko 4 ippāer make im kōm̧m̧ane juon laajrak in men ko me rej katak kōn ta meļeļein jerbal n̄an Anij.

  • Kom̧ maron̄ al ippān doon juon al kōn jerbal in mijenede; eo āinwōt “I Want to Be a Missionary Now” (Children’s Songbook, 168).

Imaron̄ jipan̄ ilo jerbal eo an Anij kōn jerbal n̄an ro jet.

Ukukōt m̧akūtkūt ko n̄an ņae mejļan armej ro ewōr aer utam̧we ilo ānbwin. Oktak jiddik ko n̄an m̧akūtkūt ko remaron̄ kapen bwe ewōr an aolep juon iien em̧m̧an n̄an katak. N̄an waanjon̄ok, eļan̄n̄e juon m̧akūtkūt ej kipel kwaļo̧k juon pija, kom̧ maron̄ al juon al ijello̧kin n̄an kobaik armej ro ewōr utam̧we ko ilo lale.

Katak im Bujen Ko 5:1–7, 11, 16, 23–24

Imaron̄ juon rikam̧ool ke Bok in Mormon em̧ool.

• N̄an katakin ajri ro nejūm̧ kōn rikam̧ool ro, kwomaron̄ kajjitōk ippāer n̄an pijaikļo̧k an juon mōttaer jiron̄ er raar lo juon kuuj ej etetal kōn ne ko neer im̧aan. Renaaj ke tōmak? Ta eo eļan̄n̄e bar juon m̧ōttaer ekar ba ejja men eo wōt? Kōnono kōn ta eo juon “rikam̧ool” ej im etke rikam̧ool ro rej aorōk. Innām kom̧ kwomaron̄ jipan̄ ajri ro nejūm̧ lin̄ūri Katak im Bujen Ko 5:1–3, 7, 11 kōn uwaak ko n̄an kajjitōk ko āinwōt kein:

  • Ta eo Martin Harris ekar kōņaan jeļā?

  • Wōn Josep Smith emaron̄ kar kwaļo̧k pileij gold ko n̄an e?

  • Etke lo pileij ko emaron̄ jab kareel juon bwe Bok in Mormon eo ej m̧ool?

  • Ta eo jemaron̄ kōm̧m̧ane n̄an erom rikam̧ool ro an Bok inMormon? (lale Kata im Bujen Ko 5:16; Moronai 10:3–5).

Kōn ļōmņak ko reļļapļo̧k, lale bok eo an allōn̄ in an Jera māākjin eo.

Devastating Weight of 116 pages, jān Kwani Povi Winder