Hōho’a o te parau pāpa’i rima tumu o te Buka a Moromona

10–16 nō Fepuare : « ’Ia upo’oti’a ’oe »

Te Ha’api’ira’a Tumu ’e te mau Fafaura’a 10–11

’A nu’u noa ai te ’īritira’a o te Buka a Moromona, ’ua hiti mai te hō’ē uira’a : E aha tā Iosepha Semita ’e Oliver Cowdery e rave nō ni’a i teie mau ’api tei mo’e o te ’īritira’a ? Te tanora’a mau e ti’a ïa ’ia ’īriti-fa’ahou-hia te reira tuha’a, terā rā ’ua ’ite te Fatu i te mea ’aita e nehenehe ia rāua ’ia ’ite : Tē ’ōpua nei tō rāua mau ’enemi i te taui i te mau ta’o o teie mau ’api nō te fa’atupu i te fē’a’ara’a i ni’a i te ’ohipa fa’auruhia a Iosepha. E ’ōpuara’a tā te Atua nō te ’ape i te reira fifi ’e nō te fa’ahaere i te ’ohipa i mua. E rave rahi tauatini matahiti nā mua atu, ’ua fa’auru te Atua ia Nephi ’ia pāpa’i i te piti o te pāpa’a parau e tāpo’i ra i taua ā ārea taime ra « nō te hō’ē ’ōpuara’a pa’ari iāna ra » (1 Nephi 9:5).

’Ua nā ’ō atu te Fatu ia Iosepha, « ’ua hau a’e tō’u pa’ari i te ’aravihi o te diabolo » (Te Ha’api’ira’a Tumu ’e te mau Fafaura’a 10:43). E poro’i fa’aitoitora’a te reira i te hō’ē tau mai tō tātou nei, e tau e ha’apūai ai te ’enemi i tāna mau tauto’ora’a nō te ha’aparuparu i te fa’aro’o. Mai ia Iosepha, e ti’a ia tātou ’ia « ha’apa’o maita’i ’e ’a tāmau ā » i roto i te ’ohipa tā te Atua i pi’i ia tātou ’ia rave (’īrava 3). ’Ei reira tātou e ’ite ai ē, ’ua fa’aineine a’ena ’oia i te hō’ē rāve’a ’ia « ’ore roa ho’i [tātou] e noa’a i te mau ’ūputa nō hade ra » (’īrava 69).

Hi’o Te feiā mo’a, 1:51–61.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 10:1–33

« E ’ore roa [te Atua] e fa’ati’a ia Sātane ’ia fa’atupu i tāna ’ōpuara’a ’ino ».

E mea au nā Sātane ’ia mo’ehia ia tātou ē, tē vai ra ’oia—’aore rā ’ia ’ore tātou ’ia ’ite i tāna mau tāmatara’a nō te fa’auru ia tātou (hi’o 2 Nephi 28:22–23). Tē ha’apāpū nei rā te mau parau a te Fatu i roto Te Ha’api’ira’a Tumu ’e te mau Fafaura’a 10 ē, tē vai mau nei Sātane—’e tē pāto’i itoito nei ’oia i te ’ohipa a te Fatu. I roto te mau ’īrava 1–33, ’a ’ite mai e aha tā te Atua i ’ite nō ni’a i te mau tauto’ora’a a Sātane (hi’o ato’a te mau ’īrava 62–63). E nehenehe ato’a ’oe e ani i te Fatu ’ia tauturu mai ia ’oe ’ia ’ite nāhea Sātane i te fa’ahemara’a ia ’oe. ’A tai’o ai ’oe te tufa’a 10, ’a feruri nāhea te Fa’aora e nehenehe ai e tauturu ia ’oe ’ia pāto’i i te mau tauto’ora’a a Sātane.

Te Ha’api’ira’a Tumu ’e te mau Fafaura’a 10:34–52

« ’Ua hau a’e te pa’ari [o te Fatu] i te ’aravihi o te diabolo ».

’Aita ’o Nephi i ’ite nō te aha ’oia i fa’auruhia ai ’ia hāmani e piti pu’e parau nō tōna nūna’a. ’E ’aita Moromona i ’ite nō te aha ’oia i fa’auruhia ai e tu’u i te pu’e parau piti i roto i te mau papa’a ’auro. ’Ua ti’aturi rā nā peropheta to’opiti ē, e « ’ōpuara’a pa’ari » tā te Atua (1 Nephi 9:5 ; Te mau Parau a Moromona 1:7). I teie mahana, ’ua ’ite ïa tātou i te hō’ē tuha’a o te reira fā : Nō te mono i nā 116 ’api tei mo’e o te Buka a Moromona. I tō ’oe mana’o, e aha tā te Fatu e hina’aro ’ia ’apo mai ’oe nā roto mai i teie mau mea ato’a ? ’A feruri i teie uira’a ’a tai’o ai ’oe Te Ha’api’ira’a Tumu ’e te mau Fafaura’a 10:34–52. E nehenehe ato’a ’oe e tāpura mai i te mau parau mau tā ’oe i ha’api’i mai, nō ni’a i te Fatu nā roto mai i teie mau ’īrava. Nāhea teie mau parau mau i te fa’atupu mai i ni’a i tō ’oe aura’a ’e ’ōna ? E aha tā ’oe e fa’ahiahia nei i roto i te pa’ari ’e te ’ite-ātea-ra’a o te Fatu, i roto i te fa’aineinera’a nō te mo’era’a i nā 116 ’api ?

E fa’auru-ato’a-hia paha ’oe ’ia mā’imi mai i te mau tāpa’o nō tōna pa’ari ’e tōna ’ite-ātea-ra’a i roto i tō ’oe orara’a. ’A tai’o i te mau ’ā’amu i roto i te a’ora’a a Elder Ronald A. Rasband « ’Ei ’ōpuara’a hanahana »—e nehenehe te reira e hōro’a ma ia ’oe i te mau hi’ora’a (Liahona, Novema 2017, 55–57). ’A feruri i te pāpa’i i te reira ’a tae māru noa mai ai te reira ia ’oe ra. Mea nāhea tō te Fatu ’ohipara’a i roto i tō ’oe orara’a ? ’Ei hi’ora’a, e aha « te mau mea tei tupu noa mai » tāna i fa’aineine ? E aha te mau niu tāna i ha’amau nō tō ’oe mau ha’amaita’ira’a ? E aha te taime ’a arata’i ai ’oia ia ’oe nō te aupuru i te hō’ē ta’ata i roto i te ’ati ?

Hi’o ato’a Roma 8:28 ; Te Ha’api’ira’a ’e te mau Fafaura’a 90:24 ; Topics and Questions [Mau tumu parau ’e mau uira’a], « Plan of Salvation [Fa’anahora’a nō te fa’aorara’a] » Vaira’a buka ’evanelia.

Fa’ata’ara’a maita’i nō roto mai Mormon Abridging the Plates [Moromona e ha’apoto ra i te mau pāpa’a parau], nā Tom Lovell

Te Ha’api’ira’a Tumu ’e te mau Fafaura’a 11

« ’A ti’aturi i [te] Vārua [o te Fatu] ».

’Ua hia’ai mau te tua’ana o Iosepha ’o Hyrum ’ia ’ite i te hina’aro o te Fatu nōna, nō reira ’ua ani atu ’oia ia Iosepha ’ia ’imi mai i te hō’ē heheura’a nōna. ’Ua ’oa’oa te peropheta i te rave i te reira, terā rā hō’ē poro’i o teie heheura’a (Te Ha’api’ira’a Tumu ’e te mau Fafaura’a 11) ’oia ho’i e ti’a ato’a ia Hyrum e ’imi mai i te heheura’a nōna iho. ’E ’oia ato’a nō « te feiā mana’o ti’a ato’a, ’e ’o tei māo’a i tā rātou mauha’a ’ō’oti ’ia ’ō’oti ra » (’īrava 27). ’A tai’o ai ’oe te tufa’a 11, e aha tā tē Fatu e ha’api’i ra ia ’oe nō ni’a i te heheura’a o te ta’ata iho ? E aha te tū’atira’a ’e te mea tāna i ha’api’i ia Oliver Cowdery i roto i te mau tufa’a 6–9 ? E aha te tahi atu mau poro’i tāna nō ’oe ?

Hi’o ato’a « Nā te Vārua mo’a e arata’i », Te mau Hīmene, N°75.

’A ani i te mau pīahi ’ia ui i te mau uira’a. E arata’i pinepine te mau uira’a i te heheura’a. Mai te mea tē ha’api’i ra ’oe i tō ’oe ’utuāfare ’aore rā i te hō’ē piha ha’api’ira’a a te ’Ēkālesia, ’a fa’aitoito ia rātou ’ia ui i te mau uira’a, ’e ’a tauturu ia rātou ’ia ’ite mai i te mau pāhonora’a i roto i te mau pāpa’ira’a mo’a. ’Ei hi’ora’a, mai te peu e uira’a tā rātou nō ni’a i te heheura’a o te ta’ata iho, ’a hi’o ’āmui i te mau pāhonora’a i roto Te Ha’api’ira’a Tumu ’e te mau Fafaura’a 11:12–14.

Te Ha’api’ira’a Tumu ’e te mau Fafaura’a 11:15–26

’A ’imi ai au ’ia « noa’a [tā te Atua] parau », e fāri’i au i tōna Vārua ’e tōna mana.

’Oia ato’a nā mua a’e i te ’īritira’ahia te Buka a Moromona, ’ua hina’aro mau Hyrum Smith e tauturu i te ’ohipa nō te fa’aho’i-fa’ahou-ra’a mai. ’A tai’o ai ’oe te pāhonora’a a te Fatu i tōna mau hina’aro, ’a feruri e aha te aura’a nō ’oe ’ia « noa’a [tā te Atua] parau » (’īrava 21). Nāhea te noa’ara’a i te parau a te Atua i te tauturu ia ’oe ’ia tāvini iāna ma te mana ?

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 10:5

’A pure tāmau ai au, e fāri’i au i te pūai nō ’ō mai i te Atua ra.

• Nō te vauvau i teie ’īrava i tā ’outou mau tamari’i, e nehenehe ’outou e ui ia rātou i te mau mea tā rātou e rave « tāmau » nei. E aha tā te Fatu e parau nei e ti’a ia tātou ’ia rave tāmau noa i roto Te Ha’api’ira’a Tumu ’e te mau Fafaura’a 10:5 ? Nō te aha ’ua hina’aro ’oia ia tātou ’ia rave i te reira ?

• Nāhea ’outou i te tauturu i tā ’outou mau tamari’i ’ia ha’amana’o i te pure tāmau noa ? Penei a’e e nehenehe rātou e ha’aputu mai i te tahi mau ’ōfa’i na’ina’i mānina ’e e pēni i ni’a iho « Te Ha’api’ira’a Tumu ’e te mau Fafaura’a 10:5 » ’aore rā « ’A pure tāmau noa ». E nehenehe rātou e tu’u i tā rātou ’ōfa’i i te mau vāhi rau, i reira rātou e fa’aha’amana’ohia mai ai ’ia pure, i pīha’i iho ānei i tō rātou ro’i, i tā rātou mau buka ha’api’ira’a, ’aore rā i te vāhi e tāma’a ai rātou. ’Ia au i Te Ha’api’ira’a Tumu ’e te mau Fafaura’a 10:5, nāhea te Atua i te ha’amaita’i ia tātou ’ia pure ana’e tātou ? E nehenehe tā ’outou mau tamari’i e ’ite mai te mau pāhonora’a hau atu i roto i te hō’ē hīmene mai te « Te pure a te hō’ē tamari’i » (Buka hīmene nā te mau tamari’i, 6).

Te Ha’api’ira’a Tumu ’e te mau Fafaura’a 11:12–13

E arata’i te Vārua Maita’i iā’u ’ia rave i te ’ohipa maita’i.

• E nehenehe te mau tamari’i e ha’api’i mai ’ia ’ite ’ia paraparau ana’e mai te Vārua ia rātou. Nō te tauturu ia rātou, e nehenehe ’outou e huna i te hō’ē ’amapura [ampoule] ’aore rā i te hō’ē mōrī pata ’e te hō’ē hōho’a mata ’oa’oa i te hō’ē vāhi i roto i te piha ; i muri iho e ani i tā ’outou mau tamari’i ’ia ’imi mai i teie mau tao’a. ’A tai’o Te Ha’api’ira’a Tumu ’e te mau Fafaura’a 11:13, ’e ’a tauturu i tā ’outou mau tamari’i ’ia ’ite mai i te mau parau e tū’ati i te mau tao’a i ’itehia mai e rātou. E aha tā teie mau parau e ha’api’i nei nō ni’a e mea nāhea te Vārua Maita’i i te tauturu ia tātou ?

• E tauturu te fa’a’itera’a i tō ’outou iho mau ’itera’a pae vārua i tā ’outou mau tamari’i ’ia ’ite i te fa’aurura’a o te Vārua Maita’i i roto i tō rātou orara’a. ’A fa’a’ite ai ’outou, ’a ani ia rātou ’ia fa’a’ite ato’a mai i tō rātou mau ’itera’a. E nehenehe ato’a ’outou e tai’o ’āmui Te Ha’api’ira’a Tumu ’e te mau Fafaura’a 11:12–13, ma te ’imira’a e nāhea tātou e ’ite ai i te taime e arata’i ai te Vārua Maita’i ia tātou. ’A fa’a’ite pāpū ē, tē hina’aro nei te Metua i te ao ra e arata’i ia tātou nā roto i te Vārua Maita’i.

Te Ha’api’ira’a Tumu ’e te mau Fafaura’a 11:21, 26

Tē hina’aro nei au ’ia ’ite i te ’evanelia nō te tauturu ia vetahi ’ē ’ia ’ite mai i te parau mau.

• Mai ia Hyrum Smith, pāpū ē e rave rahi rāve’a nō tā ’outou mau tamari’i ’ia fa’a’ite atu i te ’evanelia ia vetahi ’ē. E nehenehe ’outou e tai’o ’āmui Te Ha’api’ira’a Tumu ’e te mau Fafaura’a 11:21, 26 ’e e ani i tā ’outou mau tamari’i ’ia ’ite mai, e aha tā te Fatu i parau ia Hyrum e ti’a iāna ’ia rave nō te ha’api’i i te ’evanelia. E aha te aura’a ’ia « noa’a » te parau a te Atua ? Nāhea tātou i te rave i te reira ? Nāhea tātou i te « ha’aputu noa ’ei faufa’a » i te parau a te Atua i roto i tō tātou ’ā’au ? E nehenehe paha tā ’outou mau tamari’i e ha’uti teata ta’ata ora, nō te fa’a’ite mai i te hō’ē mea nō ni’a ia Iesu Mesia ’aore rā te Buka a Moromona ’e vetahi ’ē.

Nō te tahi atu mau mana’o, ’a hi’o te ve’a Hoa nō teie ’āva’e.

Joseph and Hyrum Smith [Iosepha ’e Hyrum Smith], nā Ken Corbett