Te mau reo o te fa’aho’i-fa’ahou-ra’a mai

Te mau ’ite o te Buka a Moromona

’Ua fa’a’ite te melahi Moroni i te mau ’api ’auro ia Iosepha Semita, Oliver Cowdery, David Whitmer ’e Martin Harris i roto i te uru rā’au tāpiri mai i te fare o Whitmer mā i Fayette, New York. ’Ua haere mai nā metua o Iosepha e fārerei ia Whitmer mā i reira taime. ’Ua fa’ata’a mai Lucy Mack Smith, te metua vahine o Iosepha, i te mea ’o tā teie ’itera’a temeio i fa’atupu i ni’a i te mau ’ite :

« Tei te ārea o te hora toru ’e te hora maha. Whitmer Vahine ’e Whitmer tāne. Tē pārahi ra Smith ’e ’o vau iho i roto i te hō’ē piha. ’Ua pārahi au i te hiti ro’i. I tomora’a mai Iosepha, fa’atopa mai ra ’oia iāna i pīha’i iho iā’u. Nā ’ō mai nei, ‘Pāpā ! Māmā !’ ‘’Aita e fa’aaura’a i tō’u ’oa’oa rahi nei. ’Ua fa’a’ite te Fatu i te mau ’api ’auro i e toru ta’ata ’ē atu iā’u, ’o tei ’ite ato’a i te hō’ē melahi ’e ’o tei tītauhia e fa’a’ite pāpū i te parau mau nō te mea tā’u i parau. Inaha ho’i, ’ua ’ite rātou iho ē, ’aita vau e ’imi nei i te ha’avare i te ta’ata. ’E e au ra ē ’ua māmā roa vau i te hō’ē hōpoi’a teimaha, tei riro fātata roa e mea toiaha roa ’ino nō’u ’ia amo. I teienei rā, tē amo nei rātou i te hō’ē tuha’a o te reira, ’e tē ’oa’oa nei tō’u vairua nō te reira, e ’ere ’o vau ana’e iho i roto i teie nei ao’. I muri iho, tomo mai nei Martin Harris. Fātata roa ’oia i te pāremo roa i te ’oa’oa rahi. ’Ua fa’a’ite pāpū mai ’oia i muri iho i te mea tāna i ’ite ’e i fa’aro’o, mai ia vetahi ato’a ’o Oliver ’e ’o David. Hō’ē ā faufa’ara’a tō rātou ’itera’a pāpū mai tei fa’a’itehia i roto i te Buka a Moromona […]

« E au rā tō Martin Harris iho, ’aita i nehenehe iāna e fa’ahiti i tōna mau nino’a mana’o ma te mau parau. ’Ua parau ’oia, ‘i teienei, ’ua ’ite au i te hō’ē melahi nō te ra’i mai ’o tei fa’a’ite pāpū mai i te parau mau o te mau mea ato’a ’o tā’u i fa’aro’o nō ni’a i te mau pāpa’a parau, ’e ’ua ’ite roa tō’u nā mata i te reira. ’Ua hi’o ato’a vau i te mau ’api ’e ’ua fāfā vau i te reira i tō’u nei rima ’e e ti’a roa iā’u ’ia fa’a’ite pāpū nō te reira i te ao ato’a nei. ’Ua fāri’i au nō’u iho i te hō’ē ’itera’a e’ita te mau parau e nehenehe e fa’ahitihia, e’ita te hō’ē reo e nehenehe e fa’ata’a mai, ’e tē ha’amaita’i nei au i te Atua ma te ateate o tō’u vairua i te fāri’ira’a ’ia riro vau, ’o vau nei, ’ei ’ite nō te faufa’a rahi o tāna ’ohipa ’e o tāna mau ’ōpuara’a nō te mau tamari’i a te ta’ata nei.’ ’Ua ’āmui ato’a mai Oliver ’e ’o David iāna nō te ’ārue fa’ahanahana i te Atua nō tōna maita’i ’e tōna aroha. ’Ua ho’i atu mātou i te fare [i Palmyra, New York,] i te mahana i muri iho ma te ’oa’oa ’e te pōpou ».

Oliver Cowdery, David Whitmer ’e Martin Harris

Tei reira ato’a Lucy Mack Smith i te taime ’a ho’i mai ai nā ’ite to’ova’u nā tō rātou ’itera’a :

« I te ho’ira’a mai teie mau ’ite i te fare, ’ua fā fa’ahou mai te melahi ia Iosepha ; i te reira iho taime, ’ua fa’aho’i atu Iosepha i te mau pāpa’a parau i roto i tōna rima. I taua pō ra, ’ua fa’atupu mātou i te hō’ē rurura’a, i reira te mau ’ite tā’āto’a i te fa’a’itera’a i tō rātou ’itera’a pāpū nō te mau ’ohipa i tupu tei fa’ahitihia i ni’a nei ; ’e ’ua fa’a’ite pāpū pauroa tō mātou ’utuāfare, ’e ’o Don Carlos [Smith] ato’a, e 14 noa tōna matahiti, nō te parau mau o te tau tu’ura’a o te mau mahana hope’a nei—tei ha’amātara-hope-hia i teienei ».

Nana’ora’a veo titōhia nō Iosepha Semita ’e nā ’ite to’ova’u

Hau atu i nā ’ite to’otoru ’e nā ’ite to’ova’u, ’ua fana’o ato’a Mary Whitmer, te metua vahine o David Whitmer, ’ia riro ’ei ’ite nō te mau ’api ’auro. ’Ua fa’a’ite atu te melahi Moroni i te reira iāna ’ei ha’amāuruurura’a nō te mau tusia tāna i rave, ’a ora ai Iosepha, Emma ’e ’o Oliver i tōna fare. « ’Ua riro ’oe ’ei vahine ha’apa’o maita’i ’e te itoito i roto i tā ’oe mau ’ohipa », ’ua parau Moroni iāna. « Nō reira, e mea tītauhia ’ia fāri’i ’oe i te hō’ē ’itera’a pāpū ’ia ti’a i tō ’oe fa’aro’o ’ia ha’apūaihia ».

Fa’ata’ara’a

1. Lucy Mack Semita, ’Ā’amu, 1844–1845, buka 8, 11 nā roto te buka 9, 1, josephsmithpapers.org ; ’ua fa’a’āpīhia te pāpa’ira’a reta rahi ’e te tomara’a.

2. Lucy Mack Semita, ’Ā’amu, 1845, 156–57, josephsmithpapers.org

3. I roto Te feiā mo’a, 1:70–71.