27 nō Tēnuare–2 nō Fepuare : « E haere tā’u ’ohipa i mua »

Te Ha’api’ira’a Tumu ʼe te mau Fafaura’a 3–5

I roto i tōna mau matahiti mātāmua ’ei peropheta nā te Fatu, ’aita Iosepha Semita i ta’a atu ra i te tā’āto’ara’a o te « ’ohipa māere » tei pi’ihia iāna e rave. Terā rā hō’ē mea ’o tā tāna mau ’itera’a mātāmua i ha’api’i iāna, ’oia ho’i, nō te fa’atupu i te ’ohipa a te Atua, e ti’a i tōna mata ’ia « rōtahi i te hanahana o te Atua » (Te Ha’api’ira’a Tumu ’e te mau Fafaura’a 4:1, 5). ’Ei hi’ora’a, mai te mea e a’o atu te Fatu iāna ’ia rave i te hō’ē mea ’aita ’oia i pāpū e hina’aro ānei ’oia e rave, e ti’a iāna e pe’e i te a’o a te Fatu. ’E noa atu « e rave rahi heheura’a [tāna], ’e […] te mana nō te rave e rave rahi ’ohipa rarahi », mai te mea e tae mai te mana’o iāna ē, e mea faufa’a a’e te mea tāna i hina’aro i te hina’aro o te Atua, « ’ua ti’a roa iāna ’ia hi’a » (Te Ha’api’ira’a Tumu ’e te mau Fafaura’a 3:4). ’Ua ha’api’i mai rā Iosepha i te tahi atu ’ohipa faufa’a roa ato’a nō ni’a i te fa’atupura’a i te ’ohipa a te Atua : « Tē vai nei tō te Atua aroha », ’e mai te mea e tātarahapa mau Iosepha, « ’ua mā’iti-noa-hia ā » ’oia (’īrava 10). Inaha ho’i te ’ohipa a te Atua e ’ohipa ïa nō te fa’aorara’a. ’E e ’ore taua ’ohipa rā « ’ia fa’a’orehia » (’īrava 1).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 3:1–16

E nehenehe au e ti’aturi i te Atua.

I te ha’amatara’a o te tāvinira’a a Iosepha Semita, e mea fifi roa nō te ’ite mai i te mau hoa maita’i—te mau hoa ihoā rā mai ia Martin Harris, hō’ē ta’ata fa’aturahia, te manuia maita’i, tei rave i te mau fa’atusiara’a rahi nō te pāturu i te ’ohipa a Iosepha. Nō reira, i te anira’a Martin i te parau fa’ati’a nō te fa’a’ite i nā 116 ’api mātāmua tei ’īritihia o te Buka a Moromona i tāna vahine, ’ua hina’aro roa Iosepha e fa’atura i tāna anira’a, noa atu te fa’aarara’a a te Fatu nō te pāto’i i te reira. Te ’ati rahi, ’ua mo’e te mau ’api tei hōro’ahia ia Martin, ’e ’ua fa’ahapa-’eta’eta-hia Iosepha ’e ’o Martin e te Fatu (hi’o Te feiā mo’a, 1:51–53).

’A tai’o ai ’oe Te Ha’api’ira’a Tumu ’e te mau Fafaura’a 3:1–15, ’a feruri e aha tā te Fatu e hina’aro ’ia ha’api’i mai ’oe nā roto mai i tō rāua ’itera’a. ’Ei hi’ora’a, e aha tā ’oe i ’apo mai nō ni’a :

• Te ’ohipa a te Atua ? (hi’o mau ’īrava 1–3, 16).

• Te mau hope’ara’a nō te mata’ura’a i te ta’ata ’eiaha rā i te ti’aturira’a i te Atua ? (hi’o mau ’īrava 4–8).

• Te mau ha’amaita’ira’a e tae mai nā roto i te vai ha’apa’o-maita’i-ra’a (hi’o ’īrava 8).

• Te huru ’a fa’atītī’aifaro ai te Fatu ’e te fa’aitoitora’a ia Iosepha ? (hi’o mau ’īrava 9–16).

I roto i tāna a’ora’a « E aha tā ’oe e fa’aruru nei ? », tē hōroa nei Elder Lynn G. Robbins e rave rahi hi’ora’a o te pāpa’ira’a mo’a nō te mau ta’ata tei mata’u i te Atua ’e te mau ta’ata tei topa i roto te fa’ahepora’a a vetahi ’ē (Liahona, Novema 2014, 9–11). ’A feruri i te tai’ora’a i teie mau hi’ora’a i roto i te mau pāpa’ira’a mo’a ’o tāna i fa’ahiti. E aha tā ’oe i ’apo mai nā roto mai i teie mau pu’e parau ? E aha te mau ’ohipa tā ’oe i ora mai ’a ti’aturi ai ’oe i te Fatu, ’a fa’aruru ai ’oe i te fa’ahepora’a ’ia rave i te tahi ’ohipa ta’a ’ē ? E aha te mau fa’ahope’ara’a o tā ’oe mau ’ohipa ?

Hi’o ato’a Dale G. Renlund, « E ’ōpuara’a nō te heheura’a a te ta’ata ’ōtahi », Liahona, Novema 2022, 16–19; « Auē te aroha rahi », Te mau Hīmene, N°63.

Te Ha’api’ira’a Tumu ’e te mau Fafaura’a 4

E tavini au i te Atua ma tō’u ’ā’au ato’a, ma tō’u pūai ato’a, ma tō’u mana’o, ’e ma tō’u itoito.

Pinepine te tuha’a 4 i te fa’a’ohipahia nō te mau misiōnare rave tāmau. Nō reira, e mea fa’ahiahia ’ia ’ite ē, ’ua hōro’ahia teie heheura’a ia Joseph Smith metua, tei ’ore i pi’ihia i roto te misiōni, ’ua vai noa rā te « hina’aro ’ia tāvini i te Atua » (’īrava 3).

Hō’ē rāve’a nō te tai’o i teie tuha’a ’o te ferurira’a ïa i te reira, mai te hō’ē fa’ata’ara’a ’ohipa nō te hō’ē ta’ata tei hina’aro e tauturu i te ’ohipa a te Fatu. E aha tā te Fatu e ’imi nei ? E aha te mau maita’i tāna i pūpū mai ?

E aha tā ’oe i ’apo mai nō ni’a i te tāvinira’a i te Fatu nā roto mai i teie heheura’a ?

’Ua pi’i te peresideni Russell M. Nelson te ha’aputuputura’a o ’Īsera’ela « te tītaura’a rahi roa a’e, te tumu rahi roa a’e ’e te ’ohipa rahi roa a’e i ni’a i te fenua nei » (« Hope of Israel [Ô vaillants guerriers d’Israël] » [veillée mondiale pour les jeunes, 3 nō Tiunu 2018], Bibilothèque de l’évangile). E aha tā ’oe i ’ite mai i roto i tāna a’ora’a ’o tē fa’auru ia ’oe ’ia ’āmui mai i roto i teie ohipa ?

Te feiā ato’a e hina’aro e tāvini i te Atua, ’ua pi’ihia rātou i roto i te ’ohipa.

Te Ha’api’ira’a Tumu ’e te mau Fafaura’a 5

Nā roto i te Vārua Maita’i, e nehenehe au e fāri’i i te hō’ē ’itera’a pāpū nō te Buka a Moromona.

I te ’āva’e Māti 1829, ’ua tu’u atu te vahine a Martin Harris, ’o Lucy, i te hō’ē horora’a i mua i te tiripuna, ma te paraura’a ’ua ha’avare Iosepha Semita i te ta’ata ma te fa’ahuara’a i te ’īriti i te mau ’api auro (hi’o Te feiā mo’a, 1:56–58). Nō reira, ’ua ani atu Martin ia Iosepha i te tahi atu mau fa’a’itera’a ē, tē vai mau ra te mau ’api ’auro. E heheura’a Te Ha’api’ira’a Tumu ’e te mau Fafaura’a 5 ’ei pāhonora’a i te anira’a a Martin. E aha tā ’oe i ’apo mai nā roto mai i teie tuha’a nō ni’a i te mau mea i muri nei :

• Te mea tā te Fatu i parau e tupu mau iho ā, mai te peu e fa’a’itehia te mau ’api ’auro i te mata o te ao nei, (hi’o Te Ha’api’ira’a Tumu ’e te mau Fafaura’a 5:7). Nō te aha ’oe e mana’o ai ’o te reira iho ā ?

• Te ti’ara’a o te mau ’ite i roto i te ’ohipa a te Fatu (hi’o mau ’īrava 11–15 ; hi’o ato’a 2 Korinetia 13:1).

• Nāhea ’ia roa’a i te hō’ē ’itera’a pāpū nō te Buka a Moromona nō ’oe iho (hi’o mau ’īrava 16, 24 ; hi’o ato’a Moroni 10:3–5).

Te Ha’api’ira’a Tumu ’e te mau Fafaura’a 5:1–10

’Ua hōro’a mai Iesu Mesia ia tātou tāna parau nā roto mai ia Iosepha Semita.

E aha tā Te Ha’api’ira’a Tumu ’e te mau Fafaura’a 5:1–10 e ha’api’i nei ia ’oe, nō ni’a i te ti’ara’a o Iosepha Semita i tō tātou nei ’anotau—’e i roto i tō ’oe orara’a ? (Hi’o ato’a 2 Nephi 3:6–24.)

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 3:5–10 ; 5:21–22

E nehenehe au e mā’iti i te maita’i, ’a tāmata ai vetahi i te fa’arave iā’u i te ’ino.

• Nō te ha’amata i te hō’ē ’āparaura’a nō ni’a i te ha’api’ira’a mai ’ia ti’aturi i te Metua i te ao ra, e nehenehe ’outou e hi’o fa’ahou i te ’ā’amu o te mau ’api parau tei mo’e (hi’o Te mau ’ā’amu nō roto mai Te Ha’api’ira’a Tumu ’e te mau Fafaura’a, 18–21). E nehenehe ’outou e ha’uti teata ora ’e tā ’outou mau tamari’i, i te mau tupura’a ’ohipa i reira rātou e fa’ahemahia ai ’ia rave i te tahi mau ’ohipa tā rātou i ’ite e ’ere i te mea maita’i. E aha te mau ta’o ’aore rā te mau pereota i roto Te Ha’api’ira’a Tumu ’e te mau Fafaura’a 3:5–8 ; 5:21–22 e nehenehe e tauturu ia rātou i roto i teie mau tupura’a ’ohipa.

  Chapter 4: Martin Harris and the Lost Pages: 1827–1828

Te Ha’api’ira’a Tumu ’e te mau Fafaura’a 4

Tē ani nei te Fatu iā’u ʼia tauturu i tāna ’ohipa.

• I roto te mau ’īrava tāta’itahi o Te Ha’api’ira’a Tumu ’e te mau Fafaura’a 4, tē vai nei te mau parau mau faufa’a roa ’o te nehenehe e tauturu i tā ’outou mau tamari’i ’ia ha’api’i mai i te tāvini i te Atua. Teie te tahi mau mana’o nō te tauturu ia rātou ’ia ’ite mai i teie mau parau mau :

  • E nehenehe ’outou e tai’o ’āmui Te Ha’api’ira’a Tumu ’e te mau Fafaura’a 4:1, ’e ’a fa’a’ite atu i te mau hōho’a ’o tē fa’ata’a nei i te ’ohipa « māere » a te Atua i te mau mahana hope’a nei (mai te mau misiōnare, te mau hiero, ’e te Buka a Moromona).

  • E nehenehe tā ’outou mau tamari’i e feruri i te mau ravera’a ’aore rā, e pāpa’i te mau hōho’a ’o tē fa’a’ite ra i te parau, « ’ia tāvini iāna ma tō ’outou ’ā’au ato’a, ma tō ’outou pūai, ma tō ’outou mana’o ’e ma tō ’outou itoito » (Te Ha’api’ira’a Tumu ’e te mau Fafaura’a 4:2).

  • E nehenehe ’outou e hi’o ’āmui i te mau mauiha’a i fa’a’ohipahia nō te ha’a i roto i te fa’a’apu. Nāhea teie mau mauiha’a i te tauturu ia tātou ? I reira e nehenehe tā ’outou mau tamari’i e ’ite mai i roto Te Ha’api’ira’a Tumu ’e te mau Fafaura’a 4:5–6 te mau mea ’o tē riro ’ei mauiha’a nō te fa’atupu i te ’ohipa a te Atua.

  • E nehenehe te mau tamari’i pa’ari a’e e ’imi Te Ha’api’ira’a tumu ’e te mau Fafaura’a 4 rātou iho ’e e tāpura i te mau mea tā rātou i ’apo mai nō ni’a i te aura’a ’ia tāvini i te Atua.

  • E nehenehe ’outou e hīmene ’āmui i te hō’ē hīmene nō ni’a i te ’ohipa misiōnare, mai te « I Want to Be a Missionary Now [E hina’aro vau e haere i teienei i te misiōni] » (Children’s Songbook [Mau hīmene nā te mau tamari’i], N 168).

E nehenehe au e tauturu i te ’ohipa a te Atua ma te tāvinira’a ia vetahi ’ē.

Fa’atano i te mau fa’a’ana’anataera’a ’ia au i te mau tamari’i huma. E nehenehe te mau fa’atanora’a na’ina’i o te mau fa’a’ana’anataera’a e ha’apāpū ē, e rāve’a tō te ta’ata ato’a ’ia ha’api’i mai. ’Ei hi’ora’a, mai te mea e tītau te hō’ē fa’a’ana’anataera’a i te fa’a’itera’a i te hō’ē hōho’a, e nehenehe paha ïa ’outou e hīmene i te hō’ē hīmene nō te fa’aō mai i te mau tamari’i matapō.

Te Ha’api’ira’a Tumu ’e te mau Fafaura’a 5:1–7, 11, 16, 23–24

E nehenehe au e riro ’ei ’ite ē, e parau mau te Buka a Moromona.

• Nō te ha’api’i i tā ’outou mau tamari’i nō ni’a i te mau ’ite, e nehenehe ’outou e ani ’ia rātou ’ia feruri ē, ’ua parau mai te hō’ē hoa ia rātou ē, ’ua ’ite ’oia i te hō’ē mimi i te haerera’a nā ni’a i tōna nā ’āvae i mua. E ti’aturi ānei rātou i te reira ? Mai te mea, e parau ato’a mai te tahi atu hoa i te reira ā ’ohipa ? ’A tāu’aparau e aha te hō’ē « ’ite » ’e nō te aha e mea faufa’a te mau ’ite. I muri iho, e nehenehe ’outou e tauturu i tā ’outou mau tamari’i ’ia ’imi mai i roto Te Ha’api’ira’a Tumu ’e te mau Fafaura’a 5:1–3, 7, 11 te mau pāhonora’a i te mau uira’a mai teie :

  • E aha tā Martin Harris i hina’aro e ’ite ?

  • ’O vai tā Iosepha Semita e nehenehe e fa’a’ite atu i te mau ’api auro ?

  • Nō te aha te ’ite-mata-ra’a i te mau ’api auro e’ita iho ā te ta’ata e ti’aturi ē, e parau mau te Buka a Moromona ?

  • E aha tā tātou e rave nō te riro ’ei ’ite nō te Buka a Moromona ? (hi’o Te Ha’api’ira’a Tumu ’e te mau Fafaura’a 5:16 ; Moroni 10:3–5).

Nō te tahi atu mana’o, ’a hi’o te ve’a Hoa nō teie ’āva’e.

Devastating Weight of 116 Pages [Te ahoaho o nā ’api e 116], nā Kwani Povi Winder