3–9 nō Fepuare : « ’O teie te Vārua o te heheura’a »

Te Ha’api’ira’a Tumu ʼe te mau Fafaura’a 6–9

I te tau ha’apohera’a rā’au nō te matahiti 1828, ’ua fāri’i te hō’ē ’orometua ha’api’i ’o Oliver Cowdery te i’oa i te ti’ara’a ’orometua ha’api’i i Manchester, New York, ’e ’ua fa’aea ’oia i roto i te ’utuāfare o Lucy ’e ’o Joseph Smith metua. ’Ua fa’aro’o Oliver i te parau nō tā rāua tamaiti ’o Iosepha ’e i tōna mau ’itera’a fa’ahiahia, ’e ’o Oliver tei fa’ariro iāna ’ei ta’ata ’imi i te parau mau, ’ua hina’aro e ’ite rahi atu ā. ’Ua fa’ata’a atu ’o Smith mā i te mau fārereira’a o te mau melahi, te mau pāpa’a parau tahito ’e te hōro’a nō te ’īritira’a nā roto i te mana o te Atua. ’Ua māere roa Oliver. E parau mau ānei te reira ? ’Ua hōro’a atu Lucy ’e ’o Joseph metua i te hō’ē parau a’o e tano nō te ta’ata e ’imi ra i te parau mau : e pure ’e e ani i te Fatu.

’Ua nā reira Oliver, ’e ’ua pāhono mai te Fatu, ma te paraura’a mai « hau i tō ’oe na ’ā’au » (Te Ha’api’ira’a Tumu ’e te mau Fafaura’a 6:23). ’Ua ’itehia mai ia Oliver ē, ’aita te heheura’a i fa’ata’a-noa-hia nō te mau peropheta mai ia Iosepha Semita. Nō te feiā ato’a ra tei hina’aro i te reira ’e ’o tē ’imi ’itoito nei i te reira. E rave rahi atu ā mea e ti’a ia Oliver e ’apo mai, ’ua nava’i rā te mea tāna i ’ite nō te tuha’a i muri mai. ’Ua ’ite ’oia tē rave nei te Fatu i te hō’ē ’ohipa faufa’a roa nā roto ia Iosepha Semita, ’e ’ua hina’aro Oliver ’ia riro ’ei tuha’a nō te reira.

Days of Harmony

Witness Oliver Cowdery’s experience as Joseph Smith’s scribe during the translation of the Book of Mormon.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 6 ; 8–9

E paraparau mai te Metua i te ao ra iā’u nā roto i te Vārua Maita’i.

I te tau fa’atupura’a rā’au nō te matahiti 1829, ’ua ti’a atu Oliver Cowdery ’ei ta’ata hōro’a nō te riro ’ei pāpa’i parau nō Iosepha Semita, ’a tāmau noa ai Iosepha i te ’īriti i te Buka a Moromona. ’Ua ’ana’anatae roa ’oia i te reira ’ohipa ’e ’ua uiui ’oia iāna iho, e nehenehe ānei iāna ’ia fāri’i ato’a i te heheura’a ’e te hōro’a nō te ’īritira’a. ’Aita rā tāna tāmatara’a mātāmua i tupu maita’i.

Mai te peu, ’ua fifi a’ena ’oe ’ia fāri’i ’aore rā ’ia māramarama i te heheura’a, penei a’e e nehenehe ’oe e fa’atano ia ’oe i te ’ohipa i tupu nō Oliver—’e ’ia ’apo mai nā roto mai i te reira. ’A tai’o ai ’oe Te Ha’api’ira’a ’e te mau Fafaura’a 6, 8, ’e te 9, ’a hi’o mai e aha tā te Fatu i ha’api’i ia Oliver nō ni’a i te heheura’a o te ta’ata hō’ē. ’Ei hi’ora’a :

• E aha tā Te Ha’api’ira’a Tumu ’e te mau Fafaura’a 6:5–7 ; 8:1 ; 9:7–8 e parau nei nō ni’a i te mea tā te Fatu e tītau nei ia ’oe, hou ’oia ’a heheu mai ai i tōna hina’aro ?

• E aha tā ’oe i ’apo mai nā roto mai Te Ha’api’ira’a Tumu ’e te mau Fafaura’a 6:14–17, 22–24 ; 8:2–3 ; 9:7–9, nō ni’a i te mau rāve’a ta’a ’ē e tupu ai te heheura’a ? Nāhea ’oe e ’ite mai ai i te reira ?

• E aha atu ā te mea tā ’oe i ’apo mai nō ni’a i te heheura’a i roto i teie mau tuha’a ?

E nehenehe te mau ’ohipa i tupu nō Oliver e ’āfa’i mai ia ’oe ’ia « feruri » i te mau taime ’a ’ite ai ’oe ē, tē paraparau mai ra te Fatu ia ’oe (Te Ha’api’ira’a Tumu’e te mau Fafaura’a 6:22). ’Ua pāpa’i a’ena ānei ’oe i tō ’oe mau mana’o ’aore rā mau nino’a mana’o nō ni’a i teie mau ’ohipa i tupu ? Mai te mea ’o te reira iho ā, ’a feruri e tai’o i te mea tā ’oe i pāpa’i. ’Aita ana’e, ’a rave i te tahi taime nō te pāpa’i i te mea tā ’oe e ha’amana’o ra. ’A feruri nāhea ’oe e nehenehe ai e tāmau noa i te huti mai i te pūai nā roto mai i teie mau ’itera’a. Nō te tahi atu mau mana’o, ’a hi’o te parau poro’i a Elder Neil L. Andersen « Te mau ha’amana’ora’a faufa’a pae vārua » (Liahona, Me 2020, 18–22).

E rave rahi feiā fa’atere o te ’Ēkālesia tei fa’a’ite mai i tō rātou mau ’itera’a nō te heheura’a i roto « Hear Him [’A fa’aro’o iāna] » video collection [ha’aputura’a video]. I muri mai i te māta’ita’ira’a i te hō’ē ’aore rā hau atu o teie mau video, e fa’auruhia paha ’oe ’ia pāpa’i i tō ’oe iho mau ’itera’a, ma te fa’a’itera’a e mea nāhea te Fatu i te paraparaura’a ia ’oe.

Te Ha’api’ira’a Tumu ’e te mau Fafaura’a 6:18–21, 29–37

’A hi’o i te Mesia i tō mau mana’o ato’a na.

’Ua ’ite te Fatu ē, e ’ite mai Iosepha Semita « i te mau fifi » i te mau matahiti i muri nei (Te Ha’api’ira’a Tumu ’e te mau Fafaura’a 6:18). ’Ua ’ite ato’a ’oia e aha te mau tāmatara’a i roto i tō ’oe ananahi. E aha tā ’oe i ’ite mai i roto i tāna mau a’o ia Iosepha ’e ia ’Oliver i roto Te Ha’api’ira’a Tumu ’e te mau Fafaura’a 6:18–21, 29–37, ’o tē tauturu ia ’oe ’ia ti’aturi iāna ?

I tō ’oe mana’o, e aha te aura’a « ’a hi’o [i te Mesia] i tō mau mana’o ato’a na » ? (’īrava 36). Nāhea ’oe i te rave i te reira ma te pāpū mau—i te mau taime maita’i ’e te « mau taime fifi » ? ’A feruri i teie aora’a a te peresideni Russell M. Nelson : « E mea itoito i te pae ferurira’a ’ia tūtava i te hi’o atu iāna i roto i te mau mana’o ato’a ’Ia nā reira ana’e tātou, e ma’ue ïa tō tātou mau fēʼaʼaraʼa ʼe tō tātou mau mataʼuraʼa » (« Faʼahaere mai te mana ’o Iesu Mesia i roto i tō tātou oraraʼa », Liahona, 41).

Hi’o ato’a Neil L. Andersen, « Tē mau nei tō’u ’ā’au i teie mana’o ia Iesu Mesia », Liahona, Mē 2023, 91–94.

Fa’ata’ara’a maita’i nō Behold My Hand [Teie tō’u rima], nā Jeffrey Ward

Te Ha’api’ira’a Tumu ’e te mau Fafaura’a 6:29–37

« ’Eiaha e mata’u i te rave i te ’ohipa maita’i ».

Nō te aha i te tahi taime e « mata’u [tātou] i te rave i te ’ohipa maita’i » ? (’īrava 33). E aha tā ’oe i ’ite mai i roto Te Ha’api’ira’a Tumu ’e te mau Fafaura’a 6:29–37 ’o tei fa’aitoito ia ’oe ’ia rave i te ’ohipa maita’i ? E feruri i te hīmene ’aore rā i te fa’aro’o i te tahi hīmene ’o tei fa’auru ia ’oe ’ia noa’a te itoito i roto i te Mesia, mai te hīmene « Ara mai tātou » (Te mau Hīmene, N°148).

Te Ha’api’ira’a Tumu ’e te mau Fafaura’a 6–7 ; 9:3, 7–14

« Mai te au i tō ’ōrua hina’aro iā’u e nā-reira-hia ïa ia ’ōrua ».

’A hi’o maita’i nā, e hia taime te ta’o « hina’aro » i te fāra’a mai i roto te mau tuha’a 6 ’e te 7. E aha te ha’api’ira’a tā ’oe i ’apo mai nā roto mai i teie mau tuha’a nō ni’a i te faufa’a rahi tā te Atua e tu’u mai i roto i tō ’oe mau hina’aro ? E ui ia ’oe iho i te uira’a a te Fatu i roto Te Ha’api’ira’a Tumu ’e te mau Fafaura’a 7:1 : « E aha tā ’oe i hina’aro ? »

Te hō’ē o te mau hina’aro parauti’a o Oliver Cowdery—nō te ’īriti ïa mai tā Iosepha Semita e rave ra—’aita i tupu. ’A tai’o ai ’oe Te Ha’api’ira’a Tumu ’e te mau Fafaura’a 9:3, 7–14, e aha te mau fa’auru’a’ī tā ’oe i fāri’i ’o te nehenehe e tauturu ia ’oe, ’ia ’ore ana’e tō ’oe mau hina’aro parauti’a e tupu i teienei ?

Hi’o ato’a Te Ha’api’ira’a Tumu ’e te mau Fafaura’a 11:8 ; Dallin H. Oaks, « Te hina’aro », Liahona, Mē 2011, 42–45.

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te mau tamari’i

Te Ha’api’ira’a Tumu ’e te mau Fafaura’a 6:5, 15–16, 22–23 ; 8:2 ; 9:7–9

E paraparau mai te Metua i te ao ra iā’u nā roto i te Vārua Maita’i.

• E nehenehe te mau parau mau tā Oliver Cowdery i ’apo mai nō ni’a i te heheura’a o te ta’ata iho e tauturu i tā ’outou mau tamari’i, ’ia fa’ananea i tō rātou ’aravihi ’ia ’ite i te Vārua Maita’i. E nehenehe ’outou e fa’a’ohipa te « Pene 5: Iosepha Semita ’e Oliver Cowdery » (i roto Te mau ’ā’amu nō roto mai i Te Ha’api’ira’a Tumu ’e te mau Fafaura’a, 22–25) nō te ha’api’i ia rātou nō ni’a ia Oliver ’e te mea tāna i ha’api’i mai. ’A fa’a’ite i te tahi ’e te tahi i tā ’outou mau tuha’a au roa a’e o te ’ā’amu. ’A nā reira ai ’outou, ’a fa’atumu i ni’a i te mau mea tā te Fatu i ha’api’i ia Oliver nō ni’a e mea nāhea i te fa’aro’o i te reo o te Atua, ’e e tai’o i te mau ’īrava faufa’a rahi, mai Te Ha’api’ira’a Tumu ’e te mau Fafaura’a 6:23 ’aore rā 9:7–9.

  Chapter 5: Joseph Smith and Oliver Cowdery: February–April 1829

  

  ’Ua ’apo mai Oliver Cowdery nō ni’a i te heheura’a, ’a tauturu ai ’oia ia Iosepha Semita ’ia ’īriti i te Buka a Moromona.

• E nehenehe ato’a ’outou e ani i tā ’outou mau tamari’i ’ia tāpe’a i tō rātou upo’o ’e tō rātou ’ōuma, ’a tai’o ai ’outou i te mau ta’o « ferurira’a » ’e « ’ā’au » i roto Te Ha’api’ira’a Tumu ’e te mau Fafaura’a 8:2 ’A parau i tā ’outou mau tamari’i, nā roto mai i tō ’outou mau ’itera’a, e aha tā te reira e fa’atupu mai ’ia paraparau ana’e mai te Vārua Maita’i i tō ’outou ferurira’a ’e i tō ’outou ’ā’au. ’A tauturu ia rātou ’ia ’ite i te mau pāhonora’a i te uira’a « Mea nāhea te Vārua Maita’i i te paraparau mai ia tātou ? » i roto i teie mau ’īrava : Te Ha’api’ira’a Tumu ’e te Fafaura’a 6:15–16, 22–23 ; 8:2 ; 9:7–9.

Fa’a’ohipa i te mau ’ā’amu. E tauturu te mau ’ā’amu i te mau tamari’i ’ia hāro’aro’a i te mau parau tumu o te ’evanelia, nō te mea tē fa’ata’a nei te reira e mea nāhea te tahi mau ta’ata i te orara’a i teie mau parau tumu. ’A ha’api’i ai ’outou, ’a ’ite mai i te mau rāve’a nō te fa’aō i te mau ’ā’amu—nō roto mai i te mau pāpa’ira’a mo’a, nō roto mai i te ’ā’amu o te ’Ēkālesia, ’aore rā, nō roto mai i tō ’outou iho orara’a—’o tē fa’ahōho’a ra i te mau parau tumu i roto i te mau pāpa’ira’a mo’a.

Te Ha’api’ira’a Tumu ’e te mau Fafaura’a 6:34

Maoti Iesu Mesia, e nehenehe au « ’eiaha e mata’u ».

• ’Ua parau te Fatu ia Iosepha ’e ia Oliver, « ’eiaha e mata’u, e te nana iti » (Te Ha’api’ira’a Tumu ’e te mau Fafaura’a 6:34). E nehenehe ’outou e ani i tā ’outou mau tamari’i ’ia fa’ahiti fa’ahou i taua pereota ra ’e ’outou ato’a e rave rau taime. E nehenehe ato’a rātou e fa’ahua ia rātou ’ia riro ’ei nana māmoe e māta’u ra. I te aha te mau māmoe e mata’u ai ? I muri iho e nehenehe ’outou ’e tā ’outou mau tamari’i e hi’o i te hō’ē hōho’a o te Fa’aora ’ei tīa’i māmoe (tē vai ra hō’ē i te hope’a o teie arata’i), ’e ’a fa’ata’a atu e mea nāhea ’oia i te mata arara’a i ni’a ia tātou mai te hō’ē tīa’i māmoe e mata ara ra i ni’a i tāna mau māmoe.

• E feruri i te ha’uti ’aore rā i te hīmene i te hō’ē hīmene nō ni’a i te ’itera’a mai i te itoito i roto te Mesia, mai te « Dare to Do Right [’A rave te maita’i] » (Children’s Songbook [Mau hīmene nā te mau tamari’i, N 243) ’aore rā « Ara mai tātou » (Te mau Hīmene, N 148). E aha tā te hīmene e ha’api’i nei nō ni’a, e nāhea te Fa’aora i te tauturu ia tātou ’eiaha e mata’u ?

Te Ha’api’ira’a Tumu ’e te mau Fafaura’a 6:36

E nehenehe au e hi’o atu ia Iesu Mesia i tō’u mau mana’o ato’a.

• ’Ia ’oti te tai’o-’āmui-ra’a Te Ha’api’ira’a Tumu ’e te mau Fafaura’a 6:36, e nehenehe ’outou ’e tā ’outou mau tamari’i e pāpa’i i te mau hōho’a nō te tauturu ia ’outou ’ia ha’amana’o noa i te « hi’o atu ia [Iesu Mesia] i tō mau mana’o ato’a ». ’A fa’a’ite atu i tā ’outou mau hōho’a pāpa’i i te tahi ’e te tahi, ’e ’a tauturu i tā ’outou mau tamari’i ’ia feruri i te mau vāhi e tu’u atu ’ia hi’o pinepine rātou i te reira.

Nō te tahi atu mana’o, ’a hi’o i te ve’a Hoa nō teie ’āva’e.

The Lord Is My Shepherd [’O te Fatu tō’u tīa’i], nā Yongsung Kim