24 nō Fepuare–2 nō Māti : « E faufa’a rahi tō te mau vārua ta’ata »

Te Ha’api’ira’a Tumu ’e te mau Fafaura’a 18

E rave rahi rāve’a ta’a ’ē nō te tāmata i te fāito i te faufa’a o te hō’ē ta’ata. E nehenehe te tārēni, te ha’api’ira’a, te tao’a rahi, ’e te huru pae tino o te ta’ata e fa’atupu i ni’a i te tā’āto’ara’a i te huru tātou e ha’afaufa’a ai i te tahi ’e te tahi—’e ia tātou iho. I te mata rā o te Atua, tō tātou faufa’a e parau ’ōhie rahi roa atu ïa, ’e ’ua fa’ata’a-pāpū-hia te reira i roto Te Ha’api’ira’a Tumu ’e te mau Fafaura’a 18 : « ’A ha’amana’o na ē e faufa’a rahi tō te mau vārua ta’ata i mua i te aro o te Atua » (’īrava 10). Tē fa’ata’a nei teie parau mau ’ōhie i te tuha’a rahi i te mea tā te Atua e rave nei ’e nō te aha ’oia e nā reira ai. Nō te aha ’oia i ha’api’i ai ia Iosepha Semita ’e ia Oliver Cowdery ’ia ha’amau i te ’Ēkālesia a Iesu Mesia i tō tātou nei ’anotau ? (hi’o te mau ’īrava 1–5). Nō te mea e mea faufa’a rahi te mau vārua ta’ata. Nō te aha ’oia i « fa’aue ai i te mau ta’ata ato’a i te mau vāhi ato’a ’ia tātarahapa » ’e i tono ai i te mau ’āpōsetolo nō te poro i te tātarahapa ? (’īrava 9). Nō te mea e mea faufa’a rahi te mau vārua ta’ata. ’E nō te aha Iesu Mesia i māuiui ai « i te pohe o te tino » ’e « te mamae rahi nō te mau ta’ata ato’a » ? (’īrava 11). Nō te mea e mea faufa’a rahi te mau vārua ta’ata. Mai te mea e mā’iti te hō’ē o teie mau vārua ’ia fāri’i i te hōro’a a te Fa’aora, tē ’oa’oa nei ’oia, nō « te rahi o tōna ’oa’oa i te vārua ta’ata ’ia tātarahapa ra » (’īrava 13).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 18:1–5

« ’A fa’ati’a mai i tā’u ’ēkālesia ».

I roto te tuha’a 18, ’ua hōro’a te Fatu ia Oliver Cowdery te mau arata’ira’a nō te tauturu i te ha’amaura’a i te niu o te ’Ēkālesia a Iesu Mesia. E aha tā ’oe e ’ite ra nō ni’a i te parau a’o tāna i hōro’a—i roto iho ā rā te mau ’īrava 1–5 ? E nehenehe ’oe e feruri e nāhea teie ā parau a’o e tano ai nō ’oe ’a « patu ai » ’oe i tō ’oe fa’aro’o i te Mesia. ’Ei hi’ora’a :

• E aha tā ’oe i « hina’aro ’ia ’ite » nō roto atu i te Fatu ? (’īrava 1).

• E aha te aura’a nō ’oe « ’ia ti’aturi i te mau mea i pāpa’ihia ra » ? (’īrava 3). Nāhea tō te Vārua « fa’a’itera’a ia ’oe » ē, e parau mau teie mau mea ? (’īrava 2 ; hi’o ato’a Te Ha’api’ira’a Tumu ’e te mau Fafaura’a 6:22–24).

• Nāhea ’oe ’ia patu i tō ’oe orara’a i ni’a i « te niu o te ’evanelia a te [Fa’aora] ’e [tōna] papa » ? (’īrava 5).

E ui i te mau uira’a. Tē ha’apāpū nei Te Ha’api’ira’a Tumu ’e te mau Fafaura’a ē, e arata’i atu te mau uira’a i te heheura’a. ’A ’imi maita’i ai ’oe i te mau pāpa’ira’a mo’a, ’a pāpa’i i te mau uira’a tā ’oe e uiui nei. I muri iho, ’a feruri hōhonu ’e ’a pure nō te ’imi mai i te mau pāhonora’a.

Te Ha’api’ira’a Tumu ’e te mau Fafaura’a 18:10–13

« E faufa’a rahi tō te mau vārua ta’ata i tō te Atua hi’ora’a mai ».

Nāhea tātou i te fa’ata’a i te faufa’a o te hō’ē mea ? ’Ei hi’ora’a, nō te aha te hō’ē tauiha’a i te mātete i te mea moni a’e i te tahi atu tauiha’a ? ’A tai’o ai ’oe te tuha’a 18 i teie hepetoma, te mau ’īrava 10–13 iho ā rā, e nehenehe ’oe e fa’aau e nāhea te mau ta’ata e fa’ata’a pinepine ai i te faufa’a ’e te mea e ha’afaufa’a nei i te hō’ē vārua ta’ata i te hi’ora’a o te Atua. ’A feruri i te mono i tō ’oe i’oa i te vāhi o te mau ta’o « ta’ata », « te mau vārua », ’e « te mau ta’ata ato’a ». Nāhea teie mau ’īrava e nehenehe ai e tauturu i te hō’ē ta’ata e uiui nei nō ni’a i tōna faufa’a ?

Teie te tahi mau ’īrava ’o tē ha’api’i nei nō ni’a i te faufa’a o te hō’ē vārua : Luka 15:1–10 ; Ioane 3:16–17 ; 2 Nephi 26:24–28 ; Mose 1:39. ’Ia au i teie mau ’īrava, nāhea ’oe ’ia ha’apoto mai i te mea tā te Atua e mana’o nei nō ni’a ia ’oe ? E nehenehe ato’a ’oe e ’imi i roto i te poro’i a te peresideni Dieter F. Uchtdorf « E mea faufa’a ’outou nōna » (Liahona, Novema 2011, 19–22), nō te ’ite mai i te mau ta’o ’e te mau pereota ’o tē tauturu ia ’oe ’ia ’ite i tō ’oe faufa’a i te hi’ora’a o te Atua.

Nāhea te Atua i te fa’a’ite mai ia ’oe e mea faufa’a rahi ’oe nōna ? E aha tā te reira e fa’atupu mai i te huru ’a hi’o ai ’oe ia ’oe iho ’e ia vetahi ’ē ?

Hi’o ato’a Joy D. Jones, « Faufa’a fāito ’ore », Liahona, Novema 2017, 13–15 ; Topics and Questions [Mau tumu parau ’e te mau uira’a], « Children of God [Te mau tamari’i a te Atua] », Vaira’a buka ’evanelia.

Te Ha’api’ira’a Tumu ’e te mau Fafaura’a 18:11–16

E ’oa’oa te Fatu ’ia tātarahapa ana’e tātou.

’A hi’o i te pinepinera’a o te mau ta’o mai te tātarahapa ’e te tātarahapara’a e fa’a’ohipahia i roto Te Ha’api’ira’a Tumu ’e te mau Fafaura’a 18. ’A feruri e aha te ha’api’ira’a tā ’oe i ’apo mai nā roto mai i teie mau parau i te mau taime ato’a e fa’a’ohipahia ai te reira. ’A feruri ta’a ’ē te mau ’īrava 11–16. Nāhea teie mau ’īrava i te fa’atupu mai i ni’a i te mea tā ’oe e putapū nei nō ni’a i te tātarahapara’a—tō ’oe iho tātarahapara’a ’e te hōpoi’a ’ia ani ia vetahi ’ē ’ia tātarahapa ’e ’ia maita’i atu ā ? Teie te hō’ē rāve’a nō te pāpa’i i te mea tā ’oe i ha’api’i mai : ’a tāpura i te mau rāve’a e rave rahi nō te fa’ahope i te pereota « Te tātarahapara’a ’o  »

Hi’o ato’a Alama 36:18–21 ; Dale G. Renlund, « Te tātarahapa : Hō’ē mā’itira’a ’oa’oa », Liahona, Novema 2016, 121–24.

Fa’ata’ara’a maita’i nō roto mai The Prodigal Son [Te tamaiti pūhura], nā Clark Kelley Price

Te Ha’api’ira’a Tumu ’e te mau Fafaura’a 18:14–16

E tae mai te ’oa’oa nā roto i te tauturura’a ia vetahi ’ē ’ia haere mai i te Mesia ra.

’A tai’o ai ’oe te mau ’īrava 14–16, ’a feruri e aha te aura’a « ’ia ti’aoro i te tātarahapa »—’e nō te aha e hōpoi mai te reira i te ’oa’oa. E aha te tahi mau rāve’a tā ’oe i ’ite mai nō te tauturu ia vetahi ’ē ’ia haere mai i te Fa’aora ra ’e ’ia fāri’i i te fa’a’orera’a hara ? Nāhea te tahi mau ta’ata i te ravera’a i te reira nō ’oe ?

Hi’o ato’a Craig C. Christensen, « ’Aore roa ho’i e mea nehenehe ’e te maita’i mai tō’u ra ’oa’oa », Liahona, Mē 2023, 45–47.

Te Ha’api’ira’a Tumu ’e te mau Fafaura’a 18:34–36

E nehenehe au e fa’aro’o i te reo o te Fatu i roto i te mau pāpa’ira’a mo’a.

’Āhani e ani mai te hō’ē ta’ata ia ’oe, mai te aha te reo o te Fatu, e aha tā ’oe e pāhono atu ? ’A feruri i teie uira’a ’a tai’o ai ’oe Te Ha’api’ira’a Tumu ’e te mau Fafaura’a 18:34–36. E aha tā ’oe i ’apo mai nō ni’a i te reo o te Fatu i te tai’ora’a i Te Ha’api’ira’a Tumu ’e te mau Fafaura’a ? E aha tā ’oe e nehenehe e rave nō te fa’aro’o pāpū atu ā i tōna reo ?

Hi’o ato’a « ’Ia tai’o vau i te parau mo’a », Te mau Hīmene, N°169.

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 18:10–13

E faufa’a rahi tō tātou tāta’itahi nō te Atua.

• ’A tai’o ai ’outou ’e tā ’outou mau tamari’i Te Ha’api’ira’a Tumu ’e te mau Fafaura’a 18:10–13, ’a feruri i te mono i te mau i’oa o te tahi ’e te tahi i te vāhi o te mau ta’o « ta’ata », « te mau vārua », ’e « te mau ta’ata ato’a ». I muri iho, e nehenehe ’outou e paraparau nāhea teie mau ’īrava i te tauturu ia tātou ’ia hāro’aro’a e aha tā te Metua i te ao ra e putapū nei nō tātou tāta’itahi.

• E nehenehe ato’a ’outou e ui i tā ’outou mau tamari’i nō ni’a i te mau mea tā te ta’ata e fa’ariro nei ’ei mea faufa’a. ’Aore rā e nehenehe ’outou e fa’a’ite ia rātou i te hō’ē mea faufa’a rahi nō ’outou. Nāhea tātou ’ia rave i te mau mea faufa’a rahi nō tātou ? I muri iho, ’a vaiiho ia rātou ’ia hi’o ia rātou iho i roto i te hō’ē hi’o, te tahi i muri mai i te tahi. ’A nā reira ai rātou, ’a parau i te tamari’i tāta’itahi e tamari’i ’oia nā te Atua ’e e mea faufa’a rahi ’oia. Nāhea tātou e nehenehe ai e fa’a’ite ia vetahi ’ē, « e mea faufa’a rahi tō rātou vārua » i tā tātou hi’ora’a ?

• Nō te ha’apāpū e mea faufa’a rahi te mau ta’ata ato’a nō tō tātou Metua i te ao ra, e nehenehe tā ’outou mau tamari’i e hi’o i te hōho’a i te hope’a o teie arata’i ha’api’ira’a, ’a tai’o ai ’outou Te Ha’api’ira’a Tumu ’e te mau Fafaura’a 18:10–13. E hīmene ’āmui mai te hō’ē hīmene mai « Every Star Is Different [Mea ta’a ’ē te feti’a tāta’itahi] » (Children’s Songbook, 142–43) e tauturu i te ha’apūai i teie tumu parau.

Fa’ata’ara’a maita’i nō roto maiWorth of a Soul [Te faufa’a o te hō’ē vārua ta’ata], nā Liz Lemon Swindle

Te Ha’api’ira’a Tumu ’e te mau Fafaura’a 18:13–16

E hōpoi mai te fa’a’itera’a i te ’evanelia i te ’oa’oa rahi.

• Nō te fa’auru i tā ’outou mau tamari’i ’ia fa’a’ite i te ’evanelia a Iesu Mesia, e nehenehe ’outou e paraparau te tahi ’e te tahi nō ni’a i te mau ’itera’a, ’a ’itehia mai ai ia ’outou te hō’ē mea tā ’outou i hina’aro e fa’a’ite i tō ’outou mau hoa ’aore rā i tō ’outou ’utuāfare. Nō te aha ’outou i hina’aro ai e fa’a’ite atu i te reira, ’e e aha tā teie fa’a’itera’a i fa’atupu mai i ni’a ia ’outou ? I muri iho e nehenehe ’outou e tai’o Te Ha’api’ira’a Tumu ’e te mau Fafaura’a 18:13, 16. E aha te mea e hōpoi mai te ’oa’oa i te Fatu ? E aha tāna i parau ’o tē hōpoi mai ia tātou te ’oa’oa ? E nehenehe ’outou ’e tā ’outou mau tamari’i e paraparau nō ni’a i te mau ’ohipa i tupu nō ’outou, i te fa’a’itera’a i te ’oa’oa o te ’evanelia a te Fa’aora.

• E nehenehe te hō’ē hīmene nō ni’a i te fa’a’itera’a i te ’evanelia, mai te « Tīa’i au tā’u misiōni » (Buka hīmene nā te mau tamari’i, 91), e tauturu i tā ’outou mau tamari’i ’ia feruri i te mau rāve’a e nehenehe ai rātou e fa’a’ite i te ’evanelia.

Te Ha’api’ira’a Tumu ’e te mau Fafaura’a 18:34–36

E nehenehe au e fa’aro’o i te reo o te Fatu i roto i te mau pāpa’ira’a mo’a.

• E au paha tā ’outou mau tamari’i i te hō’ē ha’uti i reira rātou e tāmata ai i te ’imi i te reo o te mau ta’ata rau, mai te mau melo o te ’utuāfare, te mau hoa, ’aore rā te feiā fa’atere o te ’Ēkālesia. Nāhea tātou e ’ite ai i te reo o te tahi ’e te tahi ? Nāhea tātou e ’ite ai i te reo o te Fatu ? E nehenehe ’outou e tai’o ’āmui Te Ha’api’ira’a Tumu ’e te mau Fafaura’a 18:34–36 nō te ’āparau i teie uira’a. E nehenehe ato’a ’outou e fa’a’ite i te tahi ’e te tahi, nāhea ’outou i te fa’aro’ora’a i te reo o te Fatu i roto i te mau pāpa’ira’a mo’a.

Nō te tahi atu mau mana’o, ’a hi’o i te ve’a Hoa nō teie ’āva’e.

E mea faufa’a rahi te vārua tāta’itahi nō te Atua.