17–23 nō Māti : « ’A ’imi i te mau mea nō te hō’ē ao maita’i a’e »

Te Ha’api’ira’a Tumu ʼe te mau Fafaura’a 23–26

Nō te rahira’a o te mau ta’ata, te bāpetizora’a o te hō’ē ïa ’itera’a tura ’e te hau. Teie rā, ’ua ha’afifihia te bāpetizora’a o Emma Smith ’e o vetahi ’ē e te hō’ē pupu ta’ata tei fa’ao’ō’o ia rātou, tei fa’ari’ari’a ’e tei fa’ahepo ia rātou ’ia horo ’ē. I muri a’e, tē haere ra Iosepha e ha’amau i te mau melo ’āpī, ’ua tāpe’ahia ’oia nō te fa’atūrorira’a i te huira’atira i tāna porora’a. I roto i teie mau pāto’ira’a ato’a, nāhea Emma e nehenehe ai e ’ite pāpū ē, tē rave nei ’oia i te ’ohipa ti’a ? I te hō’ē ā vāhi tātou pā’āto’a e nehenehe ai e ’ite mai i te reira—nā roto mai i te heheura’a a te Fatu. ’Ua parau ’oia ia Emma nō ni’a i « te mau mea nō te ao maita’i a’e »—tōna bāsileia—’e tō Emma pārahira’a i roto. ’Ua parau ’oia ia Emma ’eiaha e mata’u, ’ia « poupou [tōna] ’ā’au ’e ’a ’oa’oa », ’e ’ia « ha’apa’o i te mau fafaura’a [tāna] i fafau ». ’E teie mau parau fa’aitoitora’a ’e te a’o ’o tōna ïa « reo i te mau ta’ata ato’a » (Te Ha’api’ira’a Tumu ’e te mau Fafaura’a 25:9–10, 13, 16).

Hi’o ato’a Te feiā mo’a, 1:89–90, 94–97.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 24

E ti’a i te Fa’aora ’ia fa’ateitei iā’u « i ni’a mai roto mai i [tō’u] mau pe’ape’a ».

’Ua hōro’ahia mai te heheura’a i roto Te Ha’api’ira’a Tumu ʼe te mau Fafaura’a 24 « nō te ha’apūai, nō te fa’aitoito, ’e nō te ha’api’i » ia Iosepha Semita ’e ia Oliver Cowdery i roto i te hō’ē tau tāmatara’a (tuha’a upo’o parau ; hi’o ato’a Te feiā mo’a, 1:94–96). ’A ’imi mai te mau ta’o i roto Te Ha’api’ira’a Tumu ’e te mau Fafaura’a 24 ’o tā ’oe e mana’o ra, ’ua riro ’ei ha’apūaira’a ’e ’ei fa’aitoitora’a nō rāua.

E aha tā te mau pāpa’ira’a mo’a i muri nei e parau nei ia ’oe, e nāhea te Fa’aora i te tauturu ia ’oe ’e tō ’oe mau tāmatara’a ?

Te Ha’api’ira’a Tumu ’e te mau Fafaura’a 24:1–3

Te Ha’api’ira’a Tumu ’e te mau Fafaura’a 24:8

Te Ha’api’ira’a Tumu ’e te mau Fafaura’a 121:7–8

Isaia 40:28–31

Mosia 24:14–15

Fa’ata’ara’a maita’i nō roto mai He Healed Many of Diverse Diseases [’Ua fa’aora ’oia e rave rahi ma’i], nā J. Kirk Richards

Te Ha’api’ira’a Tumu ʼe te mau Fafaura’a 25

E ti’ara’a faufa’a rahi tō’u e ’ohipa i roto i te bāsileia o te Atua.

’A hi’o ai Emma Smith i te fa’aho’i-fa’ahou-ra’a mai e tupu ra nā roto mai i tāna tāne fa’aipoipo, ’o Iosepha Semita, ’ua uiui paha ’oia e aha ra tōna ti’ara’a i roto i te reira. ’A ’imi mai i te mau pāhonora’a ’o tā te Fatu i hōro’a mai i roto Te Ha’api’ira’a Tumu ’e te mau Fafaura’a 25. Tē ’ite mai ra ānei ’oe i te hō’ē mea i roto i teie tuha’a i tō ’oe mana’o, ’o tōna ïa « reo [nō ’oe] » ? (’īrava 16).

Hi’o ato’a Joy D. Jones, « E pi’ira’a teitei ta’a ’ē mau », Liahona, Mē 2020, 15–18.

"An Elect Lady"

(D&C 25:2-3) Video portraying events in the life of Emma Smith.

Te Ha’api’ira’a Tumu ʼe te mau Fafaura’a 25:5, 14

« ’A tāmau noa i te vārua ha’eha’a [marū] ».

E aha te aura’a nō ’oe « te vārua ha’eha’a [marū] » ? ’A feruri e mā’imi i roto te tuha’a 25 i te mau ta’o ’e te mau pereota ’o tē tauturu ia ’oe ’ia hāro’aro’a e aha te aura’a ’ia vai ha’eha’a, [marū]. E nehenehe ato’a te parau poro’i a Elder David A. Bednar « ’O te ha’eha’a ’e te marū te ’ā’au » e tauturu (Liahona, Mē 2018, 30–33). Nāhea Iesu Mesia e riro ai ’ei hi’ora’a nō te ha’eha’a ’e te marū nō ’oe ? (hi’o Mataio 11:28–30). ’A feruri i te mau mea i roto i tō ’oe orara’a o tā ’oe e nehenehe e rave « nā roto i te vārua ha’eha’a [māru] ».

Te Ha’api’ira’a Tumu ’e te mau Fafaura’a 25:10, 13

« ’Ia ha’apae ’oe i te mau mea nō teie nei ao, ’e ’ia tītau ho’i i te mau mea nō te ao maita’i a’e ».

’A feruri ai ’oe i te parau a’o a te Fatu i roto Te Ha’api’ira’a Tumu ’e te mau Fafaura’a 25:10, e riro te reira ’ei tauturu ’ia hāmani i te hō’ē tāpura nō « te mau mea nō teie nei ao » tāna e hina’aro nei ia « ha’apa’e » ’oe. I muri iho e nehenehe ’oe e hāmani i te hō’ē tāpura nō te « mau mea nō te hō’ē ao maita’i a’e » tāna e hina’aro nei ’ia ’imi ’oe. E nehenehe ’oe e mā’iti hō’ē a’e mea i roto i te tāpura mātāmua ’o tā ’oe e ha’apae ’e hō’ē mea i roto i te tāpura piti ’o tā ’oe e ’imi.

’Ua hōro’a mai te peresideni Russell M. Nelson i te parau a’o ’e te mau parau fafau nō ni’a i te « [tu’ura’a] i te hiti e rave rahi mea o teie nei ao ». ’A ’imi i te reira i te ’api 77 o tāna parau poro’i « Te mau tao’a pae vārua » (Liahona, Novema 2019). Nāhea ’oe ’ia pe’e i tāna parau a’o ?

’A tai’o ai ’oe te ’īrava 13, ’a feruri i te mau fafaura’a tā ’oe i rave i mua i te Metua i te ao ra ’e ia Iesu Mesia. E aha te aura’a ’ia « ha’apa’o » i teie mau fafaura’a ? Nāhea tā ’oe mau fafaura’a i te tauturu ia ’oe ’ia « ha’apae […] i te mau mea nō teie nei ao, ’e ’ia tītau ho’i i te mau mea nō te hō’ē ao maita’i a’e » ?

Teie te tahi atu mau pāpa’ira’a mo’a ’o tē nehenehe e tauturu ia ’oe ’ia fa’ata’a i rotopū i « te mau mea nō teie nei ao » ’e « te mau mea nō te hō’ē ao maita’i a’e » : Mataio 6:19, 21, 25–34 ; Luka 10:39–42 ; 2 Nephi 9:51.

Tītau i te mana’o. Mai te mea tē ha’api’i ra ’oe ia vetahi ’ē e nāhea ’ia « ha’apae i te mau mea o te ao nei », ’a feruri i te mau rāve’a nō te ani atu ia rātou ’ia fa’a’ite mai e aha tā rātou e rave nei nō te pe’e i teie parau a’o. E nehenehe tātou e huti mai e rave rahi pūai ’e te itoito ma te fa’aro’ora’a i te mau mana’o ’e te mau ’itera’a o te tahi ’e te tahi.

Te Ha’api’ira’a Tumu ’e te mau Fafaura’a 25:11–12

E ’oa’oa te Fatu i tā’u « hīmene o te ’ā’au ».

E aha te tahi o tā ’oe mau « hīmene o te ’ā’au »—te mau hīmene e fa’a’ite nei i tō ’oe mau nino’a mana’o nō te Metua i te ao ra ’e ’o Iesu Mesia ? ’A feruri e hīmene ’aore rā e fa’aro’o i te tahi o te reira. E aha te mea tei fa’ariro i teie mau hīmene ’ei mea ta’a ’ē nō ’oe ?

E nehenehe ato’a ’oe e feruri e nāhea teie mau hīmene e riro ai mai te hō’ē pure. E aha te tū’atira’a e vai ra i roto i te pehe mo’a ’e te pure ? Nāhea tā ’oe mau hīmene mo’a i te « pāhonohia mai nā roto i te hō’ē ha’amaita’ira’a » ?

Hi’o ato’a « Oh, what songs of the heart », Hymns, N° 286.

Te Ha’api’ira’a Tumu ’e te mau Fafaura’a 26:2

« ’E e ravehia te mau mea ato’a i roto i te ’ēkālesia nā roto i tō te mau melo fāri’i-tāhō’ē-ra’a i te reira ».

Te pereota « fāri’i-tāhō’ē-ra’a » i roto i teie ’īrava e fa’ata’a ra nō te ’āfa’ira’a i te rima i ni’a, nō te fa’a’ite ē tē pāturu nei ’e tē turu nei tātou i te hō’ē ta’ata e fāri’i ra i te hō’ē pi’ira’a ’aore rā, i te hō’ē fa’atōro’ara’a i roto i te autahu’ara’a. Nāhea ’oe ’ia fa’ata’a atu i te hō’ē rātere i roto i te hō’ē purera’a a te ’Ēkālesia, i te aura’a ’ia pāturu ana’e tātou i te hō’ē ta’ata ? E aha te mau pāhonora’a tā ’oe i ’ite mai i roto i te parau poro’i a te peresideni Henry B. Eyring « Te mana o te fa’aro’o pāturu » ? (Liahona, Mē 2019, 58–60).

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 24:1, 8

E nehenehe te Fa’aora e fa’ateitei iā’u « i ni’a mai roto mai i [tō’u] ra mau ’ati ».

• Nō te ha’api’i mai nō ni’a i te tahi o te mau ’ati ’aore rā te mau tāmatara’a tā Iosepha Semita ’e te feiā mo’a mātāmua i fa’aruru, e nehenehe ’outou e hi’o fa’ahou i te « Pene 11 : E rave rahi atu ā mau ta’ata tei tomo mai i roto i te ’Ēkālesia », i roto Te mau ’ā’amu nō roto mai i Te Ha’api’ira’a Tumu ’e te mau Fafaura’a, 46–47. I muri iho e nehenehe ’outou ’e tā ’outou mau tamari’i e ’ite mai, e aha tā te Fatu i parau ia Iosepha nō ni’a i tōna mau ’ati i roto Te Ha’api’ira’a Tumu ’e te mau Fafaura’a 24:1, 8. E nehenehe ato’a ’outou e fa’a’ite i te tahi ’e te tahi, nāhea te Fatu i te tauturu ia ’outou i roto i te mau taime fifi.

  Chapter 11: More People Join the Church: April–June 1830

• E aha tā Te Ha’api’ira’a Tumu ’e te mau Fafaura’a 24:8 e ha’api’i nei ia tātou nō ni’a i te fa’a’oroma’i ? Nāhea te Fa’aora i te fa’a’ite mai ia tātou ē, « tei pīha’i iho ’oia [ia tātou] » i roto i tō tātou mau ’ati ?

  Continue in Patience

  Patience requires that we obey God's commandments and faithfully wait for His will to be fulfilled.

Te Ha’api’ira’a Tumu ’e te mau Fafaura’a 25:11–12

’Ua here Iesu i « te hīmene o te ’ā’au ».

• I muri a’e i te tai’ora’a Te Ha’api’ira’a Tumu ’e te mau Fafaura’a 25:12, e nehenehe ’outou e parau i te tahi ’e te tahi, nō ni’a i tā ’outou hīmene au roa a’e ’aore rā te hīmene a te ’Ēkālesia—tā ’outou « hīmene o te ’ā’au »—’e e hīmene ’āmui mai i te reira. ’A fa’a’ite i te tahi ’e te tahi nō te aha ’outou i here ai i teie mau hīmene. Nō te aha te Fatu e ’oa’oa ai ’ia hīmene ana’e tātou i teie mau hīmene ? Nāhea tā tātou hīmenera’a e riro ai mai « te hō’ē pure [iāna] » ?

Te Ha’api’ira’a Tumu ’e te mau Fafaura’a 25:13, 15

E hōpoi mai tā’u mau fafaura’a ’e te Metua i te ao ra i te ’oa’oa iā’u.

• Nō te māramarama e aha te aura’a ’ia « ha’apa’o i te mau fafaura’a » (Te Ha’api’ira’a Tumu ’e te mau Fafaura’a 25:13), e nehenehe tā ’outou mau tamari’i, te hō’ē i muri mai i te hō’ē, e tāpe’a maite i te hō’ē ’ohipa ma te pūai e ti’a ai ’iāna. I muri iho e nehenehe ’outou ’e tā ’outou mau tamari’i e paraparau nāhea ’outou ’ia « ’ha’apa’o » ’aore rā ’ia tāpe’a maite i tā ’outou mau fafaura’a. Mai te mea e hina’arohia, ’a hi’o fa’ahou ’e tā ’outou mau tamari’i i te mau fafaura’a tā tātou e rave nei (hi’o Mosia 18:8–10 ; Te Ha’api’ira’a Tumu ’e te mau Fafaura’a 20:37 ; ’e te ’api fa’a’ana’anataera’a nō teie hepetoma).

• Nō te hōro’a i tā ’outou mau tamari’i te heitupura’a o Te Ha’api’ira’a Tumu ’e te mau Fafaura’a 25:13, e nehenehe ’outou e ha’apāpū ē ’o te mea ïa tā te Fatu i parau ia Emma Smith i muri ri’i noa mai i tōna bāpetizora’a. Nō te aha e parau a’o maita’i te reira nō te hō’ē ta’ata tei bāpetizo-’āpī-hia ?

Nō te tahi atu mau mana’o, ’a hi’o te ve’a Hoa nō teie ’āva’e.

Emma’s Hymns [Te mau hīmene a Emma], nā Liz Lemon Swindle