« Te mau reo nō te fa’aho’i-fa’ahou-ra’a-hia mai : Emma Hale Smith », Mai, pe’e mai—nō te ’utuāfare ’e te fare purera’a : Te Ha’api’ira’a Tumu ’e te mau Fafaura’a 2025 (2025)
« Emma Hale Smith », Mai, pe’e mai—nō te ’utuāfare ’e te fare purera’a : 2025
Te mau reo nō te fa’aho’i-fa’ahou-ra’a-hia mai
Emma Hale Smith
’Ua pāpa’ihia te mau parau a te Fatu ia Emma Smith i roto Te Ha’api’ira’a Tumu ’e te mau Fafaura’a 25 e heheu nei i te mana’o o te Fatu nō ni’a iāna ’e te mau turura’a tāna e nehenehe e hōpoi mai i roto i tāna ’ohipa. Mai te aha rā te huru o Emma ? E aha tā tātou i ’ite nō ni’a i tōna huru, i tōna mau aura’a, i tōna mau pūai ? Hō’ē rāve’a nō te ha’amātau i teie « vahine mā’itihia » (Te Ha’api’ira’a Tumu ’e te mau Fafaura’a 25:3), ’o te tai’ora’a ïa i te mau parau a te ta’ata tei mātau maita’i tōna huru.
Iosepha Semita tamaiti, tāna tāne fa’aipoipo
« ’Aita e fa’aaura’a tō’u ’oao’a rahi, te fa’a’īra’a te mau pōpoura’a i tō’u ’ōuma, i tō’u ravera’a mai i terā ra pō, te rima ’o tā’u Emma here iti—’o ’oia tei riro mai tā’u vahine, taua vahine ra o tō’u ’āpīra’a ; ’e tei mā’itihia e tō’u māfatu. E rave rahi ’ōtu’itu’ira’a o tō’u ferurira’a ’ia ha’amana’o ana’e au i te hō’ē taime, i te rahira’a mau tupura’a ’ohipa ’o tā māua i pi’ihia e fa’aruru. Te mau rohirohi, ’e te mau ’ohipa pūai, te mau ’oto, ’e te mau māuiui, ’e te mau ’oa’oa, ’e te mau tāmāhanahanara’a i terā taime ’e terā taime tei ha’apararehia i ni’a i tō māua ’ē’a ’e tei fa’ahei i tā māua mau ’ohipa. ’Auē ïa ē ! Rerura’a mana’o e fa’a’ī ra i tō’u ferurira’a i teie taime. Tei i’ō nei ā ’oia, i roto ato’a i te hitura’a o te tāmatara’a, Emma te ’ōtohe ’ore, te pāpū ’e te ’āueue ’ore, te taui ’ore ’e te here ».
Lucy Mack Smith, tōna metua vahine ho’ovai
« E mea ’āpī ïa ’oia, ’e e huru mau nōna te hia’ai ’ia manuia, tei roto tōna ’ā’au ato’a i te ’ohipa a te Fatu, ’e ’aita atu tōna ’ana’anataera’a maoti rā te ’ēkālesia ’e te tumu o te parau mau. Te mau mea ato’a tā tōna rima e nehenehe e rave, e nā reira ’oia ma tōna pūai ma te ’ore e ui i te uira’a nounou ‘e fa’ana’o rahi atu ā ānei au i te tahi ’ē’ ? Mai te mea e tonohia te mau peresibutero nō te poro, ’o ’oia te ta’ata mātāmua nō te pūpū atu i tāna tāvinira’a nō te tauturu ia rātou ’ia ’ahuhia nō tō rātou tere, noa atu tōna iho mau ’erera’a ».
Joseph Smith metua, tōna metua tāne ho’ovai
Te ha’amaita’ira’a patereāreha ’o Emma, tei fa’ahitihia e Joseph Smith metua, tei riro ’ei patereāreha nō te ’Ēkālesia :
« Emma, tā’u hunō’a vahine ē, ’ua ha’amata’ihia ’oe e te Fatu, nō tō ’oe ha’apa’o maita’i ’e nō tō ’oe parau mau : E ha’amaita’ihia ’oe ’e tae noa atu i tā ’oe tāne, ’e e ’oa’oa ’oe i te hanahana e tae mai i ni’a iāna : ’Ua ha’amāuiuihia tō ’oe vairua nō te ’ino o te ta’ata i te ’imira’a i te ha’amou i tō ’oe ’āpiti, ’e ’ua ’umehia tō ’oe vairua ato’a i roto i te pure ’ia ora mai ’oia : ’A ’oa’oa, inaha ’ua fa’aro’o tō Atua i tā ’oe ti’aorora’a.
« ’Ua ’oto ’oe nō te ’eta’eta o te ’ā’au o te ’utuāfare o tō metua tāne ; ’e ’ua hina’aro ’oe i tō rātou fa’aorara’a. E fa’atura mai te Fatu nō tā ’oe tūorora’a, ’e nā roto i tāna mau ha’avāra’a e fa’a’ite ’oia i te hō’ē pae o rātou i tō rātou ma’ama’a ’e e tātarahapa rātou i tā rātou mau hara ; mea nā roto ra i te ’ati rātou e ora mai ai. E ’ite ’oe i te mau mahana e rave rahi ; ’oia mau, e fa’aherehere te Fatu ia ’oe ē tae roa e māha ai ’oe, inaha e ’ite ’oe i tō Tāra’ehara. E ’oa’oa tō ’oe māfatu i te ’ohipa rahi a te Fatu, ’aita roa e ta’ata e ’īriti ’ē atu i tō ’oe ’oa’oa nā roto mai ia ’oe.
« E ha’amana’o noa ’oe i te fa’aha’eha’ara’a rahi a tō ’oe Atua i te fa’ati’ara’a ia ’oe ’ia ’āpe’e atu i tā’u tamaiti, ’a hōro’a mai ai te melahi iāna te pāpa’a parau a te mau ’āti Nephi. ’Ua ’ite ’oe e rave rahi otora’a nō te mea ’ua rave atu te Fatu e toru o tā ’oe mau tamari’i : ’Aita ’oe i fa’ahapahia nō te reira, inaha ’ua ’ite ’oia i tō ’oe hina’aro tāfetafeta ’ore e ha’amau i te hō’ē ’utuāfare, ’ia ha’amaita’ihia te i’oa o tā’u tamaiti. ’E teienei, inaha, tē parau nei au ia ’oe, ’oia mau tē parau nei te Fatu, mai te mea e ti’aturi ’oe, e ha’amaita’i-fa’ahou-hia ’oe i teie nei mea ’e e fānau mai ’oe i te tahi atu mau tamari’i, i te ’oa’oa ’e i te māuruuru o tō ’oe vairua, ’e i te ’oa’oa o tō ’oe mau hoa.
« E ha’amaita’ihia ’oe i te māramarama, ’e e mau ’oe i te mana nō te ha’api’i i te tahi atu mau vahine. ’A ha’api’i i tō ’oe ’utuāfare i te parauti’a, ’e i tō mau tamari’i ri’i i te ’ē’a nō te ora, ’e e hi’o mai te mau melahi mo’a ia ’oe : ’e e fa’aorahia ’oe i roto i te bāsileia o te Atua ; ’o teie ïa. ’Āmene ».
Emma Smith ’e tāna mau tamari’i. Time to Laugh [Taime ’ata’atara’a], nā Liz Lemon Swindle