Chikamu chakabva kuGethsemane’s Path [Nzira yeGetsemane], naSteve McGinty

Kurume 3–9 “Dzidzai neZvangu”

Dzidziso neZvibvumirano 19

Zvakatorera Martin naLucy Harris makore mazhinji kutenga rimwe ramapurazi akanakisisa muPalmyra, New York. Asi muna 1829 zvakava pachena kuti Bhuku raMormoni raikwanisa kushambadzwa chete kana Martin aitora chikwereti nokusungira purazi rake kuitira kuti vagobhadhara mudhindi. Martin akanga ane uchapupu hweBhuku raMormoni, asi Lucy akanga asina. Kana Martin aienderera mberi akawana chikwereti ichocho uye Bhuku raMormoni rikasatengwa zvakanaka, aizorashikirwa nepurazi rake, zvoisa muchato wake umunjodzi, uye zvokanganisa mbiri yake munzanga. Kunyangwe zvazvo mamiriro ezvinhu edu akasiyana neaMartin, pane imwe nguva tose tinotarisana nemibvunzo yakaoma seiyo yaakatarisana nayo: Vhangeri raJesu Kristu rakakosha zvakadii kwandiri? Chii chandinoda kuzvipira kuitira kubatsira kuvaka umambo hwaMwari? Martin Harris pokupedzisira akasarudza kuti aizotora chikwereti papurazi rake kuitira kuti makopi 5 000 ekutanga eBhuku raMormoni akwanise kudhindwa. Asi kunyangwe kuzvipira uku—uye kupi zvako kuzvipira kwatingaita—kudiki kana koenzaniswa nekuzvipira kwaJesu Kristu, “kukurusa kupfuura zvose” (Dzidziso neZvibvumirano 19:18), uyo akabuda ropa kubva mumaburi ose eganda kuti aponese vanotendeuka.

­

Mazano eKudzidza Kumba uye kuChechi

Dzidziso neZvibvumirano 19:1–12

“Ini, Mwari, handina mugumo”

Joseph Smith akatsanangura kuti zvakazarurwa zviri muchikamu 19 “murairo … kuna Martin Harris, wakapuwa naiye ari Wokusingaperi” (musoro wenyaya wechikamu). Tsvaka nzvimbo mundima 1–12 umo Ishe mavanosimbisa hunhu hwokusingaperi Hwavo. Sei uchifunga kuti zvaiva zvakakosha kuti Martin Harris azive izvi pamusoro paIshe? Sei zvakakosha kuti iwe uzvizive?

Unofunga kuti sei Jesu Kristu achidaidzwa kunzi “mavambo nemagumo,”? (ndima 1).

Dzidziso neZvibvumirano 19:15–20

Jesu Kristu akatambura kuitira kuti ndigokwanisa kutendeuka uye ndigouya kwaAari.

Testamente Itsva inotsanangura kutambura kweMuponesi muGethsemane kubva kumaonero evanhu avo vakazviona. MuDzidziso neZvibvumirano 19:15–20, Jesu Kristu akataura pamusoro pekutambura Kwake mumaonero Ake pachake. Apo paunoverenga rondedzero inoera iyi yake pachake, tsvaka matsananguriro akaita Muponesi kutambura Kwake. Funga pamusoro peizvo zvaunodzidziswa neshoko roga roga kana nendevo yoga yoga. Sei Muponesi akanga achida kutambura? Unokwanisa kuwana zvimwe zvakawanda muna Johane 15:13; Mosaya 3:7; Aruma 7:11–12; Dzidziso neZvibvumirano 18:10–13.

Manzwiro aunawo apo paunonzvera kutambura kweMuponesi angangokurudzira mibvunzo yakaita seiyi: Sei Muponesi aifanira kutamburira zvivi zvangu? Sei ndichifanira kutendeuka kuti ndigamuchire maropafadzo akazara ekuzvipira Kwake? ­ Apo paunonzvera, manzwiro api anouya mupfungwa dzako? Funga kunyora pasi manzwiro ako pamusoro paJesu Kristu nekuzvipira Kwake kuitira iwe.

Sechikamu chekunzvera nekunamata kwako, unogona kutsvaka rwiyo rwaunokwanisa kuteerera kana kuimba urwo rwunoratidza kutenda kwako kuMuponesi nokuda kwekutambura Kwake muchinzvimbo chako. ­

Chii chaunonzwa kuti Baba Vokudenga naJesu Kristu vangada kuti uite semugumisiro weizvo zvawakanzwa nekunzvera?

Topics and Questions, “Atonement of Jesus Christ [Rudzikinuro rwaJesu Kristu],” “Rutendeuko,” Gospel Library.

The Savior Suffers in Gethsemane

Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57

Dzidziso neZvibvumirano 19:23

Runyararo runouya kubva mukudzidza nezva Jesu Kristu uye nokuMutevera.

Funga pamusoro pokukoka kweMuponesi kwokuti “Dzidzai nezvangu.” Chii chaunodzidza pamusoro paJesu Kristu muDzidziso neZvibvumirano 19? Nyora pasi pfungwa dzako, uye wofungisisa kuti zvokwadi izvi pamusoro peMuponesi zvinokubatsira sei kuwana runyararo. Zvinorevei kwauri “kufamba muunyoro hweMweya [Wake]”?

­

Peace in Christ

Dzidziso neZvibvumirano 19:26–41

Maropafadzo aMwari makurusa kupfuura upfumi hwepasi.

Bhuku raMormoni harina kutengwa zvakanaka muPalmyra. Semugumisiro, Martin Harris akapedzisira atengesa chikamu chikuru chepurazi rake kuti abhadhare chikwereti kumudhindi (ona “The Contributions of Martin Harris,” muRevelations in Context, 7–8). Fungisisa kuzvipira kwaMartin—uye maropafadzo awakatambira nokuda kwakwo—apo paunoverenga Dzidziso neZvibvumirano 19:26–41. Ungangofungawo pamusoro pezvawakakumbirwa naIshe kuzvipira. Chii chaunowana mundima idzi chinokukurudzira kuzvipira “nekufara” uye “nemufaro”? (onawo ndima 15–20).

Chikamu chakabva kuMartin Harris Farm [Purazi raMartin Harris], naAl Rounds

­

Mazano eKudzidzisa Vana

Dzidziso neZvibvumirano 19:16–19

Jesu Kristu akanditamburira.

• Unokwanisa kubatsira vana vako kunzwa ruremekedzo neruvongo kuMuponesi nekuverenga pamwechete Dzidziso neZvibvumirano 19:16–19 kana “Chitsauko 51: Jesu Anotambura muBindu reGetsemane,” muNyaya dzeTestamente Itsva, 129–32. Funga kumbomira kuti uite chokwadi chokuti vana vako vanonzwisisa uye kuti vataure manzwiro avo. Somuenzaniso, mundima 16, ndezvipi “zvinhu izvi” izvo Jesu zvaakatitamburira? (ona Mosaya 3:7; Aruma 7:11–12). Tinodzidzei kubva kutsananguro Yake yokutambura Kwake? Tingataridza sei ruvongo rwedu kune izvo zvaAkatiitira?

Chapter 51: Jesus Suffers in the Garden of Gethsemane

Batsira vana kudzidza kubva mumagwaro matsvene. Vamwe vana vanoomerwa nekuverenga magwaro. Kunangisa pfungwa pandima kana ndevo imwechete kunogona kuvabatsira.

• Iwe nevana vako munokwanisa kutarisa muNziyo neDzevana Vadiki kuti muwane dzimbo dzinokubatsira kutaura manzwiro enyu pamusoro paJesu Kristu (ona minongedzo yemisoro yenyaya mubhuku iri).

Dzidziso neZvibvumirano 19:18–19, 24

Jesu Kristu akateerera Baba Vokudenga, kunyangwe apo pazvaiva zvakaoma.

• Kutamburira zvivi zvedu kwakanga kwakaoma zvikuru, asi Jesu Kristu aida kuzviita kuti ateerere Baba Vake uye kuratidza rudoRwake kwaVari uye kwatiri. Munokwanisa kutarisa pamwechete pamufananidzo waJesu Kristu achitambura muGetsemane (seiyo iri muchidzidzo chino) uye wokumbira vana vako kuti vakuudze zvavanoziva pamusoro pezviri kuitika mumufananidzo wacho. Munogona kuverenga pamwechete Dzidziso neZvibvumirano 19:18–19, 24 kuitira kusimbisa kuti kutamburira zvivi zvedu ndicho chaiva chinhu chakaomesesa icho chati chamboitwa naani zvake, asi nokuda kwekuti Jesu aida Baba Vake nesu, Akateerera kuchido chaMwari (onawo Mosaya 3:7). Zvinhu zvipi zvakaoma izvo Mwari zvavanotikumbira kuti tiite? Tinokwanisa kuwana sei ushingi hwekuVateerera?

Dzidziso neZvibvumirano 19:23

“Dzidzai kubva kwandiri, uye muteerere kumashoko angu.”

• Unokwanisa kubatsira vana vako kufunga nezvezviito zviri nyore zvinofambirana nendevo dziri muDzidziso neZvibvumirano 19:23. Verenga ndima yacho kakawanda apo pavanenge vachiita zviito zvacho. Ndedzipi dzimwe nzira dzatingadzidza nadzo nezvaKristu uye nekuteerera kumashoko Ake?

Dzidziso neZvibvumirano 19:38

Maropafadzo aMwari makurusa kupfuura upfumi hwepasi.

• Iwe nevana vako munokwanisa kutora mijana yekubata Bhuku raMormoni uye nekugovera zvamunoda pamusoro paro. Taura muchidimbu pamusoro pekuzvipira kwaMartin Harris kuitira kuti Bhuku raMormoni rikwanise kudhindwa. Ishe vakati chii kuna Martin muDzidziso neZvibvumirano 19:38 icho chingava chakamubatsira kuti ave akatendeka uye ateerere? Batsira vana vako kufunga nezvechimwe chinhu chavanokwanisa kuzvipira kuti vateerere Mwari kana kubatsira mubasa Ravo.

  Chapter 7: Witnesses See the Gold Plates: 1829–1830

­.

Christ Praying in the Garden of Gethsemane [Kristu Achinamata muBindu reGetsemani], naHermann Clementz