“ວັນທີ 17–23 ເດືອນມີນາ: ‘ສະແຫວງຫາສິ່ງທີ່ເປັນຂອງໂລກທີ່ດີກວ່າ’: ຄຳສອນ ແລະ ພັນທະສັນຍາ 23–26,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 23–26,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 17–23 ເດືອນມີນາ: “ສະແຫວງຫາສິ່ງທີ່ເປັນຂອງໂລກທີ່ດີກວ່າ”

ຄຳສອນ ແລະ ພັນທະສັນຍາ 23–26

ສຳລັບຄົນສ່ວນໃຫຍ່, ການຮັບບັບຕິສະມາເປັນປະສົບການທີ່ຄາລະວະ ແລະ ສະຫງົບສຸກ. ເຖິງຢ່າງໃດກໍຕາມ, ການບັບຕິສະມາຂອງເອມມາ ສະມິດ ແລະ ຄົນອື່ນຖືກຂັດຂວາງໂດຍກຸ່ມອັນຕະພານທີ່ເຍາະເຍີ້ຍເຂົາເຈົ້າ, ຂົ່ມຂູ່ເຂົາເຈົ້າ, ແລະ ບັງຄັບໃຫ້ເຂົາເຈົ້າຫລົບໜີໄປ. ຕໍ່ມາ, ຂະນະທີ່ໂຈເຊັບກຳລັງຈະຢືນຢັນສະມາຊິກໃໝ່ຢູ່ນັ້ນ, ເພິ່ນໄດ້ຖືກຈັບກຸມຖານສ້າງຄວາມລຳຄານໃຫ້ແກ່ຊຸມຊົນດ້ວຍການເທດສະໜາຂອງເພິ່ນ. ໃນການຕໍ່ຕ້ານທັງໝົດນີ້, ເອມມາຈະພົບຄວາມໝັ້ນໃຈໄດ້ແນວໃດ ວ່ານາງກຳລັງເຮັດສິ່ງທີ່ຖືກຕ້ອງ? ສະຖານທີ່ດຽວກັນທີ່ເຮົາທຸກຄົນສາມາດຊອກຫາໄດ້—ຜ່ານທາງການເປີດເຜີຍຈາກພຣະຜູ້ເປັນເຈົ້າ. ພຣະອົງໄດ້ກ່າວກັບເອມມາກ່ຽວກັບ “ສິ່ງທີ່ເປັນຂອງ [ໂລກ] ທີ່ດີກວ່າ”—ອານາຈັກຂອງພຣະອົງ—ແລະ ບ່ອນຂອງນາງໃນນັ້ນ. ພຣະອົງໄດ້ບອກນາງບໍ່ໃຫ້ຢ້ານກົວ, ໃຫ້ “ລື້ນເລີງ ແລະ ປິຕິຍິນດີ,” ແລະ “ແນບສະໜິດຢູ່ກັບພັນທະສັນຍາ ຊຶ່ງ [ນາງ] ໄດ້ເຮັດ.” ແລະ ຄຳທີ່ໃຫ້ກຳລັງໃຈ ແລະ ໃຫ້ຄຳແນະນຳເຫລົ່ານີ້ແມ່ນ “ສຽງ [ຂອງພຣະອົງ] ເຖິງທຸກຄົນ” (ຄຳສອນ ແລະ ພັນທະສັນຍາ 25:9–10, 13, 16).

ເບິ່ງ Saints, 1:89–90, 94–97 ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 24

ພຣະຜູ້ຊ່ວຍໃຫ້ລອດສາມາດ “ຍົກ [ເຮົາ] ຂຶ້ນຈາກຄວາມທຸກທໍລະມານ [ຂອງເຮົາ].”

ການເປີດເຜີຍໃນ ຄຳສອນ ແລະ ພັນທະສັນຍາ 24 ໄດ້ຖືກມອບໃຫ້ເພື່ອ “ເພີ່ມຄວາມເຂັ້ມແຂງ, ໃຫ້ກຳລັງໃຈ, ແລະ ໃຫ້ຄຳແນະນຳ” ແກ່ໂຈເຊັບ ສະມິດ ແລະ ອໍລີເວີ ຄາວເດີຣີ ລະຫວ່າງເວລາຂອງການທົດລອງ (ຫົວຂໍ້ພາກ; ເບິ່ງ Saints, 1:94–96 ນຳອີກ). ໃຫ້ຊອກຫາຂໍ້ຄວາມຢູ່ໃນ ຄຳສອນ ແລະ ພັນທະສັນຍາ 24 ທີ່ທ່ານຮູ້ສຶກຈະໃຫ້ຄວາມເຂັ້ມແຂງ ແລະ ໃຫ້ກຳລັງໃຈແກ່ເຂົາເຈົ້າ.

ຂໍ້ພຣະຄຳພີດັ່ງຕໍ່ໄປນີ້ ແນະນຳຫຍັງແດ່ກ່ຽວກັບວິທີທີ່ພຣະຜູ້ຊ່ວຍໃຫ້ລອດຊ່ວຍທ່ານກັບຄວາມທ້າທາຍຂອງທ່ານແນວໃດ?

ຄຳສອນ ແລະ ພັນທະສັນຍາ 24:1–3

ຄຳສອນ ແລະ ພັນທະສັນຍາ 24:8

ຄຳສອນ ແລະ ພັນທະສັນຍາ 121:7–8

ເອຊາຢາ 40:28–31

ໂມໄຊຢາ 24:14–15

ພຣະຄຣິດກຳລັງປິ່ນປົວຊາຍຄົນໜຶ່ງ — ລາຍລະອຽດຈາກ He Healed Many of Diverse Diseases [ພຣະອົງໄດ້ປິ່ນປົວພະຍາດຕ່າງໆ], ໂດຍ ເຈ ເຄີກ ຣິເຈີດສ໌

ຄຳສອນ ແລະ ພັນທະສັນຍາ 25

ເຮົາມີບົດບາດອັນສຳຄັນທີ່ຈະສະແດງໃນອານາຈັກຂອງພຣະເຈົ້າ.

ຂະນະທີ່ເອມມາ ສະມິດ ເບິ່ງການຟື້ນຟູໄດ້ເກີດຂຶ້ນ ຜ່ານທາງສາມີຂອງນາງ, ໂຈເຊັບ ສະມິດ, ນາງອາດສົງໄສວ່າ ບົດບາດຂອງນາງຄືຫຍັງ. ໃຫ້ຊອກຫາຄຳຕອບທີ່ພຣະເຈົ້າໄດ້ໃຫ້ໄວ້ ຢູ່ໃນ ຄຳສອນ ແລະ ພັນທະສັນຍາ 25. ທ່ານພົບສິ່ງໃດບໍໃນພາກນີ້ທີ່ທ່ານຮູ້ສຶກວ່າເປັນ “ສຽງ [ຂອງພຣະອົງ] ເຖິງ [ທ່ານ]”? (ຂໍ້ທີ 16).

ເບິ່ງວິດີໂອ “An Elect Lady” (ChurchofJesusChrist.org); “Thou Art an Elect Lady,” Revelations in Context, 33–39; Joy D. Jones, “An Especially Noble Calling,” Ensign ຫລື Liahona, May 2020, 15–18 ນຳອີກ.

"An Elect Lady"
(D&C 25:2-3) Video portraying events in the life of Emma Smith.

ຄຳສອນ ແລະ ພັນທະສັນຍາ 25:5, 14

“ດຳເນີນໃນວິນຍານແຫ່ງຄວາມອ່ອນໂຍນຕໍ່ໄປ.”

ວະລີທີ່ວ່າ “ວິນຍານແຫ່ງຄວາມອ່ອນໂຍນ” ໝາຍຄວາມວ່າແນວໃດຕໍ່ທ່ານ? ໃຫ້ພິຈາລະນາຄົ້ນຄວ້າ ພາກທີ 25 ສຳລັບຂໍ້ຄວາມ ແລະ ວະລີທີ່ຊ່ວຍໃຫ້ທ່ານເຂົ້າໃຈວ່າ ການເປັນຄົນອ່ອນໂຍນໝາຍຄວາມວ່າແນວໃດ. ຂ່າວສານຂອງແອວເດີ ເດວິດ ເອ ແບ໊ດນາ “Meek and Lowly of Heart” ກໍສາມາດຊ່ວຍໄດ້ເຊັ່ນກັນ (Liahona, May 2018, 30–33). ພຣະເຢຊູຄຣິດເປັນຕົວຢ່າງຂອງຄວາມອ່ອນໂຍນຕໍ່ທ່ານແນວໃດ? (ເບິ່ງ ມັດທາຍ 11:28–30). ຄິດກ່ຽວກັບສິ່ງຕ່າງໆໃນຊີວິດຂອງທ່ານ ທີ່ທ່ານສາມາດເຮັດ “ໃນວິນຍານແຫ່ງຄວາມອ່ອນໂຍນ.”

ຄຳສອນ ແລະ ພັນທະສັນຍາ 25:10, 13

“ປ່ອຍວາງສິ່ງທີ່ເປັນຂອງໂລກນີ້, ແລະ ສະແຫວງຫາສິ່ງທີ່ດີກວ່າ.”

ຂະນະທີ່ທ່ານໄຕ່ຕອງຄຳແນະນຳຂອງພຣະຜູ້ເປັນເຈົ້າໃນ ຄຳສອນ ແລະ ພັນທະສັນຍາ 25:10, ມັນອາດຊ່ວຍໄດ້ຫລາຍຖ້າຈະເຮັດລາຍການຂອງ “ສິ່ງທີ່ເປັນຂອງໂລກນີ້” ທີ່ພຣະອົງຢາກໃຫ້ທ່ານ “ປ່ອຍວາງ.” ແລ້ວທ່ານສາມາດເຮັດລາຍການຂອງ “ສິ່ງທີ່ເປັນຂອງ [ໂລກ] ທີ່ດີກວ່າ” ທີ່ພຣະອົງຢາກໃຫ້ທ່ານສະແຫວງຫາ. ທ່ານອາດຈະເລືອກຢ່າງໜ້ອຍສິ່ງໜຶ່ງຈາກລາຍການທຳອິດທີ່ຈະປ່ອຍວາງ ແລະ ສິ່ງໜຶ່ງຈາກລາຍການທີສອງທີ່ທ່ານຈະສະແຫວງຫາ.

ປະທານຣະໂຊ ເອັມ ແນວສັນ ໄດ້ໃຫ້ຄຳແນະນຳ ແລະ ຄຳສັນຍາກ່ຽວກັບ “[ການ] ປ່ອຍວາງຫລາຍສິ່ງທີ່ເປັນຂອງໂລກນີ້.” ໃຫ້ຊອກຫາມັນຢູ່ໃນໜ້າທີ 77 ຂອງຂ່າວສານນີ້ “Spiritual Treasures” (Liahona, Nov. 2019). ທ່ານຈະເຮັດຕາມຄຳແນະນຳຂອງເພິ່ນແນວໃດ?

ຂະນະທີ່ທ່ານອ່ານ ຂໍ້ທີ 13, ໃຫ້ຄິດກ່ຽວກັບພັນທະສັນຍາທີ່ທ່ານໄດ້ເຮັດກັບພຣະບິດາເທິງສະຫວັນ ແລະ ພຣະເຢຊູຄຣິດ. ຄຳວ່າ “ແນບສະໜິດຢູ່ກັບ” ພັນທະສັນຍາເຫລົ່ານີ້ໝາຍຄວາມວ່າແນວໃດ? ພັນທະສັນຍາຂອງທ່ານຊ່ວຍໃຫ້ທ່ານ “ປ່ອຍວາງສິ່ງທີ່ເປັນຂອງໂລກນີ້, ແລະ ສະແຫວງຫາສິ່ງທີ່ດີກວ່າ” ແນວໃດ?

ຕໍ່ໄປນີ້ແມ່ນຂໍ້ພຣະຄຳພີອື່ນໆບາງຂໍ້ ທີ່ອາດຈະຊ່ວຍໃຫ້ທ່ານແຍກແຍະລະຫວ່າງ “ສິ່ງທີ່ເປັນຂອງໂລກນີ້” ແລະ “ສິ່ງທີ່ດີກວ່າ” ໄດ້: ມັດທາຍ 6:19, 21, 25–34; ລູກາ 10:39–42; 2 ນີໄຟ 9:51.

ເບິ່ງ Topics and Questions, “Sacrifice,” ຫ້ອງສະໝຸດພຣະກິດຕິຄຸນ ນຳອີກ.

ເຊື້ອເຊີນການແບ່ງປັນ. ຖ້າຫາກທ່ານກຳລັງສິດສອນຄົນອື່ນກ່ຽວກັບວິທີ “ປ່ອຍວາງສິ່ງທີ່ເປັນຂອງໂລກນີ້,” ໃຫ້ພິຈາລະນາວິທີເຊື້ອເຊີນໃຫ້ເຂົາເຈົ້າແບ່ງປັນສິ່ງທີ່ເຂົາເຈົ້າກຳລັງເຮັດເພື່ອເຮັດຕາມຄຳແນະນຳນີ້. ເຮົາສາມາດດຶງເອົາຄວາມເຂັ້ມແຂງ ແລະ ຄວາມກ້າຫານຈາກການໄດ້ຍິນຄວາມຮູ້ແຈ້ງ ແລະ ປະສົບການຂອງກັນແລະກັນ.

ຄຳສອນ ແລະ ພັນທະສັນຍາ 25:11–12

ພຣະຜູ້ເປັນເຈົ້າຊື່ນຊົມໃນ “ເພງຈາກໃຈ” ຂອງເຮົາ.

“ເພງຈາກໃຈ” ຂອງທ່ານມີເພງໃດແດ່—ເພງທີ່ສະແດງເຖິງຄວາມຮູ້ສຶກຂອງທ່ານກ່ຽວກັບພຣະບິດາເທິງສະຫວັນ ຫລື ພຣະເຢຊູຄຣິດ? ໃຫ້ພິຈາລະນາທີ່ຈະຮ້ອງເພງ ຫລື ຟັງສອງສາມເພງ. ແມ່ນຫຍັງທີ່ເຮັດໃຫ້ເພງເຫລົ່ານີ້ມີຄວາມພິເສດຕໍ່ທ່ານ?

ທ່ານອາດຈະຢາກໄຕ່ຕອງວ່າ ເພງສວດເຫລົ່ານີ້ເປັນຄືກັນກັບຄຳອະທິຖານແນວໃດ. ເພງສັກສິດ ແລະ ຄຳອະທິຖານມີຫຍັງທີ່ຄືກັນ? ເພງສັກສິດໄດ້ເປັນ “ຄຳຕອບດ້ວຍພອນ” ແນວໃດ?

ເບິ່ງ “Oh, What Songs of the Heart,” Hymns, no. 286 ນຳອີກ.

ຄຳສອນ ແລະ ພັນທະສັນຍາ 26:2

“ທຸກສິ່ງຈະຕ້ອງຖືກເຮັດໄປຕາມການເຫັນຊອບດ້ວຍກັນໃນສາດສະໜາຈັກ.”

ວະລີທີ່ວ່າ “ການເຫັນຊອບດ້ວຍກັນ” ໃນຂໍ້ນີ້ໝາຍເຖິງການຍົກມື ເພື່ອສະແດງການສະໜັບສະໜູນບຸກຄົນທີ່ໄດ້ຮັບການເອີ້ນ ຫລື ການແຕ່ງຕັ້ງສູ່ຖານະປະໂລຫິດ. ທ່ານຈະອະທິບາຍໃຫ້ຜູ້ມາຢ້ຽມຢາມການປະຊຸມຂອງສາດສະໜາຈັກຟັງວ່າ ເມື່ອເຮົາສະໜັບສະໜູນບາງຄົນໝາຍຄວາມວ່າແນວໃດ? ທ່ານພົບຄຳຕອບໃດແດ່ຢູ່ໃນຂ່າວສານຂອງປະທານເຮັນຣີ ບີ ໄອຣິງ “The Power of Sustaining Faith”? (Liahona, May 2019, 58–60).

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 24:1, 8

ພຣະຜູ້ຊ່ວຍໃຫ້ລອດສາມາດ “ຍົກ [ເຮົາ] ຂຶ້ນຈາກຄວາມທຸກທໍລະມານ [ຂອງເຮົາ].”

ເພື່ອຮຽນຮູ້ກ່ຽວກັບຄວາມທຸກທໍລະມານ ຫລື ຄວາມທ້າທາຍບາງຢ່າງຂອງໂຈເຊັບ ສະມິດ ແລະ ໄພ່ພົນລຸ້ນທຳອິດໄດ້ປະເຊີນ, ທ່ານສາມາດທົບທວນ “ບົດທີ 11: ຫລາຍຄົນເຂົ້າຮ່ວມສາດສະໜາຈັກ,” ໃນ ເລື່ອງຄຳສອນ ແລະ ພັນທະສັນຍາ, 46–47, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ ນຳອີກ. ແລ້ວທ່ານ ແລະ ລູກໆຂອງທ່ານສາມາດຄົ້ນພົບສິ່ງທີ່ພຣະຜູ້ເປັນເຈົ້າໄດ້ກ່າວກັບໂຈເຊັບ ກ່ຽວກັບຄວາມທຸກທໍລະມານຂອງເພິ່ນໃນ ຄຳສອນ ແລະ ພັນທະສັນຍາ 24:1, 8. ພວກທ່ານກໍສາມາດແບ່ງປັນນຳກັນອີກ ເຖິງວິທີທີ່ພຣະຜູ້ເປັນເຈົ້າຊ່ວຍພວກທ່ານລະຫວ່າງເວລາທີ່ຍາກລຳບາກແນວໃດ.

1:52
Chapter 11: More People Join the Church: April–June 1830
ເພື່ອຮຽນຮູ້ຄວາມໝາຍຂອງການເປັນຄົນ “ອົດທົນກັບຄວາມທຸກທໍລະມານ [ຂອງເຮົາ],” ທ່ານ ແລະ ລູກໆຂອງທ່ານສາມາດສ້າງການທົດລອງໃນວິດີໂອ “Continue in Patience” (ຫ້ອງສະໝຸດພຣະກິດຕິຄຸນ) ຄືນໃໝ່. ຄຳສອນ ແລະ ພັນທະສັນຍາ 24:8 ສິດສອນເຮົາຫຍັງແດ່ກ່ຽວກັບຄວາມອົດທົນ? ພຣະຜູ້ຊ່ວຍໃຫ້ລອດເຮັດໃຫ້ເຮົາຮູ້ວ່າພຣະອົງ “ຢູ່ນຳ [ເຮົາ]” ລະຫວ່າງທີ່ເຮົາມີຄວາມທຸກທໍລະມານແນວໃດ?

2:41
Continue in Patience
Patience requires that we obey God's commandments and faithfully wait for His will to be fulfilled.

ຄຳສອນ ແລະ ພັນທະສັນຍາ 25:11–12

ພຣະເຢຊູມັກ “ເພງຈາກໃຈ.”

ຫລັງຈາກທີ່ອ່ານ ຄຳສອນ ແລະ ພັນທະສັນຍາ 25:12, ພວກທ່ານສາມາດບອກກັນແລະກັນກ່ຽວກັບເພງສວດ ຫລື ເພງຂອງສາດສະໜາຈັກທີ່ໂປດປານຂອງພວກທ່ານ—“ເພງຈາກໃຈ” ຂອງພວກທ່ານ—ແລະ ຮ້ອງເພງນຳກັນ. ແບ່ງປັນນຳກັນແລະກັນວ່າ ເປັນຫຍັງພວກທ່ານຈຶ່ງມັກເພງເຫລົ່ານີ້. ເປັນຫຍັງພຣະຜູ້ເປັນເຈົ້າຈຶ່ງມີຄວາມສຸກເມື່ອເຮົາຮ້ອງເພງເຫລົ່ານີ້? ການຮ້ອງເພງຂອງເຮົາຄືກັນກັບ “ຄຳອະທິຖານຫາ [ພຣະອົງ]” ແນວໃດ?

ຄຳສອນ ແລະ ພັນທະສັນຍາ 25:13, 15

ພັນທະສັນຍາຂອງເຮົາກັບພຣະບິດາເທິງສະຫວັນນຳຄວາມຊື່ນຊົມມາໃຫ້ເຮົາ.

ເພື່ອທີ່ຈະເຂົ້າໃຈຄວາມໝາຍຂອງການ “ແນບສະໜິດຢູ່ກັບພັນທະສັນຍາ” (ຄຳສອນ ແລະ ພັນທະສັນຍາ 25:13), ລູກໆຂອງທ່ານສາມາດປ່ຽນຜຽນກັນຈັບບາງສິ່ງໄວ້ແໜ້ນໆເທົ່າທີ່ພວກເຂົາຈະສາມາດເຮັດໄດ້. ແລ້ວທ່ານ ແລະ ລູກໆຂອງທ່ານສາມາດເວົ້າລົມກ່ຽວກັບວ່າພວກທ່ານ “ແນບສະໜິດ” ຫລື ຍຶດໝັ້ນຢູ່ກັບພັນທະສັນຍາຂອງພວກທ່ານແນວໃດ. ຖ້າຕ້ອງການ, ໃຫ້ທົບທວນກັບລູກໆຂອງທ່ານກ່ຽວກັບພັນທະສັນຍາທີ່ພວກທ່ານໄດ້ເຮັດ (ເບິ່ງ ໂມໄຊຢາ 18:8–10; ຄຳສອນ ແລະ ພັນທະສັນຍາ 20:37; ແລະ ໜ້າກິດຈະກຳຂອງອາທິດນີ້).
ເພື່ອໃຫ້ລູກໆຂອງທ່ານຮູ້ເຖິງສະພາບການສຳລັບ ຄຳສອນ ແລະ ພັນທະສັນຍາ 25:13, ທ່ານອາດຊີ້ໃຫ້ເຫັນວ່າ ນີ້ຄືສິ່ງທີ່ພຣະຜູ້ເປັນເຈົ້າໄດ້ບອກເອມມາ ສະມິດ ບໍ່ດົນຫລັງຈາກການບັບຕິສະມາຂອງນາງ. ເປັນຫຍັງສິ່ງນີ້ຈຶ່ງເປັນຄຳແນະນຳທີ່ດີສຳລັບຄົນທີ່ຫາກໍໄດ້ຮັບບັບຕິສະມາ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ເອມມາກຳລັງສຶກສາພຣະຄຳພີ — Emma’s Hymns [ເພງສວດຂອງເອມມາ], ໂດຍ ລີສ໌ ລີມັນ ສະວິນໂດ