“ວັນທີ 24 ເດືອນກຸມພາ–ວັນທີ 2 ເດືອນມີນາ, ‘ຄຸນຄ່າຂອງຈິດວິນຍານແມ່ນຍິ່ງໃຫຍ່’: ຄຳສອນ ແລະ ພັນທະສັນຍາ 18,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 18,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 24 ເດືອນກຸມພາ–ວັນທີ 2 ເດືອນມີນາ: “ຄຸນຄ່າຂອງຈິດວິນຍານແມ່ນຍິ່ງໃຫຍ່”

ຄຳສອນ ແລະ ພັນທະສັນຍາ 18

ມີຫລາຍວິທີໃນການພະຍາຍາມວັດແທກຄຸນຄ່າຂອງຄົນຄົນໜຶ່ງ. ພອນສະຫວັນ, ການສຶກສາ, ຄວາມຮັ່ງມີ, ແລະ ຮູບລັກສະນະພາຍນອກ ທຸກຢ່າງນີ້ສາມາດມີຜົນກະທົບຕໍ່ວິທີທີ່ເຮົາປະເມີນກັນແລະກັນ—ແລະ ຕົວເຮົາເອງ. ແຕ່ໃນສາຍພຣະເນດຂອງພຣະເຈົ້າແລ້ວ, ຄຸນຄ່າຂອງເຮົາເປັນເລື່ອງທີ່ລຽບງ່າຍກວ່ານັ້ນຫລາຍ, ແລະ ມັນໄດ້ມີກ່າວໄວ້ຢ່າງຊັດເຈນໃນ ຄຳສອນ ແລະ ພັນທະສັນຍາ 18: “ຈົ່ງຈື່ຈຳໄວ້ວ່າ ຄຸນຄ່າຂອງຈິດວິນຍານແມ່ນຍິ່ງໃຫຍ່ໃນສາຍພຣະເນດຂອງພຣະເຈົ້າ” (ຂໍ້ທີ 10). ຄວາມຈິງທີ່ລຽບງ່າຍນີ້ ອະທິບາຍຢ່າງຫລວງຫລາຍກ່ຽວກັບສິ່ງທີ່ພຣະເຈົ້າກະທຳ ແລະ ເປັນຫຍັງພຣະເຈົ້າຈຶ່ງກະທຳເຊັ່ນນັ້ນ. ເປັນຫຍັງພຣະອົງຈຶ່ງສັ່ງໃຫ້ໂຈເຊັບ ສະມິດ ແລະ ອໍລີເວີ ຄາວເດີຣີ ສ້າງຕັ້ງສາດສະໜາຈັກຂອງພຣະເຢຊູຄຣິດໃນສະໄໝຂອງເຮົາ? (ເບິ່ງ ຂໍ້ທີ 1–5). ເພາະຄຸນຄ່າຂອງຈິດວິນຍານແມ່ນຍິ່ງໃຫຍ່. ເປັນຫຍັງພຣະອົງຈຶ່ງ “ບັນຊາມະນຸດທັງປວງໃນທຸກບ່ອນໃຫ້ກັບໃຈ” ແລະ ສົ່ງບັນດາອັກຄະສາວົກຂອງພຣະອົງໃຫ້ສັ່ງສອນເລື່ອງການກັບໃຈ? (ຂໍ້ທີ 9). ເພາະຄຸນຄ່າຂອງຈິດວິນຍານແມ່ນຍິ່ງໃຫຍ່. ແລະ ເປັນຫຍັງພຣະເຢຊູຄຣິດຈຶ່ງໄດ້ຮັບທຸກທໍລະມານກັບ “ຄວາມຕາຍໃນເນື້ອໜັງ” ແລະ “ຄວາມເຈັບປວດຂອງມະນຸດທັງປວງ”? (ຂໍ້ທີ 11). ເພາະຄຸນຄ່າຂອງຈິດວິນຍານແມ່ນຍິ່ງໃຫຍ່. ຖ້າແມ່ນແຕ່ໜຶ່ງໃນຈິດວິນຍານເຫລົ່ານີ້ເລືອກທີ່ຈະຍອມຮັບຂອງຂວັນຂອງພຣະຜູ້ຊ່ວຍໃຫ້ລອດກໍຕາມ, ພຣະອົງກໍປິຕິຍິນດີ, ເພາະ “ຄວາມຊື່ນຊົມຂອງພຣະອົງນັ້ນຈະຍິ່ງໃຫຍ່ພຽງໃດນຳຈິດວິນຍານທີ່ກັບໃຈ” (ຂໍ້ທີ 13).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 18:1–5

“ສ້າງສາດສະໜາຈັກຂອງເຮົາຂຶ້ນ.”

ໃນ ພາກທີ 18, ພຣະຜູ້ເປັນເຈົ້າໄດ້ມອບການຊີ້ນຳໃຫ້ອໍລີເວີ ຄາວເດີຣີ ເພື່ອຊ່ວຍວາງຮາກຖານຂອງສາດສະໜາຈັກຂອງພຣະເຢຊູຄຣິດ. ທ່ານສັງເກດເຫັນຫຍັງແດ່ກ່ຽວກັບຄຳແນະນຳທີ່ພຣະອົງໄດ້ມອບໃຫ້—ໂດຍສະເພາະໃນ ຂໍ້ທີ 1–5? ທ່ານອາດພິຈາລະນາວ່າ ຄຳແນະນຳດຽວກັນນີ້ ໃຊ້ກັບທ່ານຂະນະທີ່ທ່ານ “ສ້າງ” ສັດທາຂອງທ່ານໃນພຣະຄຣິດແນວໃດ. ຍົກຕົວຢ່າງ:

ທ່ານ “ມີຄວາມປາດຖະໜາຢາກຮູ້” ສິ່ງໃດຈາກພຣະເຈົ້າ? (ຂໍ້ທີ 1).
ການ “ໄວ້ວາງໃຈເລື່ອງທີ່ຖືກຂຽນໄວ້” ໝາຍຄວາມວ່າຫຍັງສຳລັບທ່ານ? (ຂໍ້ທີ 3). ພຣະວິນຍານ “ໄດ້ສະແດງໃຫ້ປະຈັກແກ່ [ທ່ານ]” ວ່າສິ່ງເຫລົ່ານີ້ເປັນຄວາມຈິງແນວໃດ? (ຂໍ້ທີ 2; ເບິ່ງ ຄຳສອນ ແລະ ພັນທະສັນຍາ 6:22–24 ນຳອີກ).
ທ່ານຈະສ້າງຊີວິດຂອງທ່ານເທິງ “ຮາກຖານຂອງພຣະກິດຕິຄຸນ [ຂອງພຣະຜູ້ຊ່ວຍໃຫ້ລອດ] ແລະ ດານຫີນ [ຂອງພຣະອົງ]” ໄດ້ແນວໃດ? (ຂໍ້ທີ 5).

ຖາມຄຳຖາມ. ຄຳສອນ ແລະ ພັນທະສັນຍາ ເປັນຫລັກຖານວ່າ ຄຳຖາມນຳພາໄປສູ່ການເປີດເຜີຍ. ຂະນະທີ່ທ່ານສຶກສາພຣະຄຳພີ, ໃຫ້ບັນທຶກຄຳຖາມທີ່ທ່ານມີ. ແລ້ວໃຫ້ໄຕ່ຕອງ ແລະ ອະທິຖານ ເພື່ອສະແຫວງຫາຄຳຕອບ.

ຄຳສອນ ແລະ ພັນທະສັນຍາ 18:10–13

“ຄຸນຄ່າຂອງຈິດວິນຍານແມ່ນຍິ່ງໃຫຍ່ໃນສາຍພຣະເນດຂອງພຣະເຈົ້າ.”

ເຮົາຈະກຳນົດຄຸນຄ່າຂອງບາງສິ່ງໄດ້ແນວໃດ? ຍົກຕົວຢ່າງ, ເປັນຫຍັງສິ່ງໜຶ່ງຢູ່ຕະຫລາດຈຶ່ງແພງກວ່າອີກສິ່ງໜຶ່ງ? ຂະນະທີ່ທ່ານອ່ານ ພາກທີ 18 ອາທິດນີ້, ໂດຍສະເພາະ ຂໍ້ທີ 10–13, ທ່ານອາດປຽບທຽບຄວາມແຕກຕ່າງຂອງວິທີທີ່ຄົນມັກຈະກຳນົດຄ່າ ກັບສິ່ງທີ່ເຮັດໃຫ້ຈິດວິນຍານດວງໜຶ່ງມີຄ່າໃນສາຍພຣະເນດຂອງພຣະເຈົ້າ. ໃຫ້ພິຈາລະນາທີ່ຈະປ່ຽນເອົາຊື່ຂອງທ່ານໃສ່ແທນຄຳວ່າ “ຈິດວິນຍານ,” ແລະ “ມະນຸດທັງປວງ.” ຂໍ້ເຫລົ່ານີ້ສາມາດຊ່ວຍບາງຄົນທີ່ສົງໄສຄຸນຄ່າຂອງຕົນເອງໄດ້ແນວໃດ?

ຕໍ່ໄປນີ້ ແມ່ນຂໍ້ຄວາມອື່ນໆອີກບາງຂໍ້ທີ່ສິດສອນກ່ຽວກັບຄຸນຄ່າຂອງຈິດວິນຍານດວງໜຶ່ງ: ລູກາ 15:1–10; ໂຢຮັນ 3:16–17; 2 ນີໄຟ 26:24–28; ໂມເຊ 1:39. ອີງຕາມຂໍ້ພຣະຄຳພີເຫລົ່ານີ້, ທ່ານຈະສະຫລຸບຄວາມຮູ້ສຶກຂອງພຣະເຈົ້າທີ່ມີຕໍ່ທ່ານວ່າແນວໃດ? ທ່ານອາດຄົ້ນຄວ້າຂ່າວສານຂອງປະທານດີເດີ ແອັຟ ອຸກດອບ “You Matter to Him” (Liahona, Nov. 2011, 19–22) ນຳອີກ ເພື່ອຊອກຫາຄຳ ແລະ ວະລີທີ່ຈະຊ່ວຍໃຫ້ທ່ານຮູ້ກ່ຽວກັບຄຸນຄ່າຂອງທ່ານຕໍ່ພຣະເຈົ້າ.

ພຣະເຈົ້າສະແດງໃຫ້ທ່ານເຫັນວ່າ ທ່ານມີຄຸນຄ່າຢ່າງໃຫຍ່ຫລວງຕໍ່ພຣະອົງແນວໃດ? ສິ່ງນີ້ມີຜົນກະທົບຕໍ່ຄວາມຮູ້ສຶກຂອງທ່ານທີ່ມີຕໍ່ຕົວທ່ານເອງ ແລະ ຕໍ່ຄົນອື່ນແນວໃດ?

ເບິ່ງ Joy D. Jones, “Value beyond Measure,” Liahona, Nov. 2017, 13–15; Topics and Questions, “Children of God,” ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 18:11–16

ພຣະຜູ້ເປັນເຈົ້າປິຕິຍິນດີເມື່ອເຮົາກັບໃຈ.

ໃຫ້ສັງເກດວ່າ ຄຳເຊັ່ນ ກັບໃຈ ແລະ ການກັບໃຈ ໄດ້ຖືກໃຊ້ເລື້ອຍປານໃດຕະຫລອດທົ່ວ ຄຳສອນ ແລະ ພັນທະສັນຍາ 18. ໃຫ້ໄຕ່ຕອງສິ່ງທີ່ທ່ານຮຽນຮູ້ຈາກຄຳເຫລົ່ານີ້ ແຕ່ລະເທື່ອທີ່ມັນຖືກໃຊ້. ໃຫ້ພິຈາລະນາ ໂດຍສະເພາະ ຂໍ້ທີ 11–16. ຂໍ້ເຫລົ່ານີ້ມີຜົນກະທົບຕໍ່ຄວາມຮູ້ສຶກຂອງທ່ານກ່ຽວກັບການກັບໃຈ—ການກັບໃຈຂອງທ່ານເອງ ແລະ ໜ້າທີ່ ໃນການເຊື້ອເຊີນຄົນອື່ນໃຫ້ກັບໃຈແນວໃດ? ຕໍ່ໄປນີ້ແມ່ນວິທີໜຶ່ງໃນການບັນທຶກສິ່ງທີ່ທ່ານຮຽນຮູ້: ຂຽນຫລາຍໆວິທີທີ່ທ່ານຈະຕື່ມໃສ່ປະໂຫຍກທີ່ວ່າ “ການກັບໃຈແມ່ນ .”

ເບິ່ງ ແອວມາ 36:18–21; ຄູ່ມືພຣະຄຳພີ, “ການກັບໃຈ,” ຫ້ອງສະໝຸດພຣະກິດຕິຄຸນ; Dale G. Renlund, “Repentance: A Joyful Choice,” Liahona, Nov. 2016, 121–24.

ພໍ່ກອດລູກ — ລາຍລະອຽດຈາກ The Prodigal Son [ລູກຊາຍທີ່ເສຍ], ໂດຍ ຄະລາກ ແຄວລີ ພຣາຍສ໌

ຄຳສອນ ແລະ ພັນທະສັນຍາ 18:14–16

ຄວາມຊື່ນຊົມມາຈາກການຊ່ວຍຄົນອື່ນໃຫ້ມາຫາພຣະຄຣິດ.

ຂະນະທີ່ທ່ານອ່ານ ຂໍ້ທີ 14–16, ໃຫ້ໄຕ່ຕອງຄວາມໝາຍຂອງການ “ປ່າວປະກາດການກັບໃຈ”—ແລະ ເຫດຜົນທີ່ມັນນຳຄວາມຊື່ນຊົມເຊັ່ນນັ້ນມາໃຫ້. ມີວິທີໃດອີກແດ່ທີ່ທ່ານໄດ້ພົບວ່າ ມັນຊ່ວຍຄົນອື່ນໃຫ້ເຂົ້າມາຫາພຣະຜູ້ຊ່ວຍໃຫ້ລອດ ແລະ ຮັບການໃຫ້ອະໄພ? ຄົນອື່ນເຄີຍເຮັດສິ່ງນັ້ນເພື່ອທ່ານແນວໃດ?

ເບິ່ງ Craig C. Christensen, “There Can Be Nothing So Exquisite and Sweet as Was My Joy,” Liahona, May 2023, 45–47 ນຳອີກ.

ຄຳສອນ ແລະ ພັນທະສັນຍາ 18:34–36

ເຮົາສາມາດໄດ້ຍິນສຸລະສຽງຂອງພຣະຜູ້ເປັນເຈົ້າໃນພຣະຄຳພີໄດ້.

ຖ້າຫາກມີຄົນຖາມທ່ານວ່າ ສຸລະສຽງຂອງພຣະຜູ້ເປັນເຈົ້າເປັນແບບໃດ, ທ່ານຈະວ່າແນວໃດ? ໃຫ້ຄິດກ່ຽວກັບຄຳຖາມຂໍ້ນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 18:34–36. ທ່ານໄດ້ຮຽນຮູ້ຫຍັງແດ່ກ່ຽວກັບສຸລະສຽງຂອງພຣະຜູ້ເປັນເຈົ້າ ຈາກການອ່ານຄຳສອນ ແລະ ພັນທະສັນຍາ? ທ່ານສາມາດເຮັດຫຍັງໄດ້ແດ່ ເພື່ອຈະໄດ້ຍິນສຸລະສຽງຂອງພຣະອົງຢ່າງແຈ່ມແຈ້ງຫລາຍກວ່າເກົ່າ?

ເບິ່ງ “As I Search the Holy Scriptures,” Hymns, no. 277 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 18:10–13

ເຮົາແຕ່ລະຄົນມີຄຸນຄ່າຢ່າງຫລວງຫລາຍຕໍ່ພຣະເຈົ້າ.

ຂະນະທີ່ທ່ານ ແລະ ລູກໆຂອງທ່ານອ່ານ ຄຳສອນ ແລະ ພັນທະສັນຍາ 18:10–13, ໃຫ້ພິຈາລະນາທີ່ຈະປ່ຽນເອົາຊື່ຂອງກັນແລະກັນໃສ່ແທນຄຳວ່າ “ຈິດວິນຍານ,” ແລະ “ມະນຸດທັງປວງ.” ແລ້ວທ່ານກໍສາມາດເວົ້າກ່ຽວກັບວິທີທີ່ຂໍ້ເຫລົ່ານີ້ຊ່ວຍໃຫ້ເຮົາເຂົ້າໃຈວ່າ ພຣະບິດາເທິງສະຫວັນຮູ້ສຶກກ່ຽວກັບເຮົາແຕ່ລະຄົນແນວໃດ.
ທ່ານຍັງສາມາດຖາມລູກໆຂອງທ່ານກ່ຽວກັບສິ່ງທີ່ຜູ້ຄົນຖືວ່າມີຄ່າ. ຫລື ທ່ານອາດເອົາບາງຢ່າງທີ່ມີຄ່າສຳລັບທ່ານໃຫ້ພວກເຂົາເບິ່ງ. ເຮົາປະຕິບັດຕໍ່ສິ່ງທີ່ມີຄ່າສຳລັບເຮົາແນວໃດ? ແລ້ວໃຫ້ພວກເຂົາປ່ຽນຜຽນກັນແນມເບິ່ງແວ່ນແຍງ. ຂະນະທີ່ພວກເຂົາເຮັດເຊັ່ນນັ້ນ, ໃຫ້ບອກລູກແຕ່ລະຄົນວ່າ ເຂົາເປັນລູກຂອງພຣະເຈົ້າ ແລະ ເຂົາມີຄຸນຄ່າຢ່າງຫລວງຫລາຍ. ເຮົາຈະສາມາດສະແດງໃຫ້ຄົນອື່ນເຫັນວ່າ “ຄຸນຄ່າຂອງຈິດວິນຍານ [ຂອງພວກເຂົາ] ແມ່ນຍິ່ງໃຫຍ່” ໃນສາຍຕາຂອງເຮົາໄດ້ແນວໃດ?
ເພື່ອເນັ້ນວ່າ ທຸກຄົນແມ່ນມີຄຸນຄ່າຢ່າງຫລວງຫລາຍຕໍ່ພຣະບິດາເທິງສະຫວັນ, ລູກໆຂອງທ່ານສາມາດເບິ່ງຮູບພາບທີ່ຢູ່ທ້າຍໂຄງຮ່າງນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 18:10–13. ການຮ້ອງເພງເຊັ່ນ “ເຮົາເປັນລູກຂອງພຣະເຈົ້າ” (ເພງສວດ ແລະ ເພງຂອງເດັກນ້ອຍ, 64) ນຳກັນ ສາມາດຊ່ວຍຢືນຢັນປະເດັນນີ້ໄດ້.

ພຣະຄຣິດກຳລັງກອດເດັກນ້ອຍ — ລາຍລະອຽດຈາກ Worth of a Soul [ຄຸນຄ່າຂອງຈິດວິນຍານ], ໂດຍ ລີສ໌ ລີມັນ ສະວິນໂດ

ຄຳສອນ ແລະ ພັນທະສັນຍາ 18:13–16

ການແບ່ງປັນພຣະກິດຕິຄຸນນຳຄວາມຊື່ນຊົມອັນຍິ່ງໃຫຍ່ມາໃຫ້.

ເພື່ອດົນໃຈລູກໆຂອງທ່ານໃຫ້ແບ່ງປັນພຣະກິດຕິຄຸນຂອງພຣະເຢຊູຄຣິດ, ທ່ານສາມາດເວົ້າລົມກັນກ່ຽວກັບປະສົບການຕອນທີ່ທ່ານພົບບາງຢ່າງທີ່ທ່ານຢາກແບ່ງປັນກັບໝູ່ເພື່ອນ ຫລື ຄອບຄົວຂອງທ່ານ. ເປັນຫຍັງທ່ານຈຶ່ງຢາກແບ່ງປັນມັນ, ແລະ ການແບ່ງປັນມັນເຮັດໃຫ້ທ່ານຮູ້ສຶກແນວໃດ? ແລ້ວທ່ານກໍສາມາດອ່ານ ຄຳສອນ ແລະ ພັນທະສັນຍາ 18:13, 16. ແມ່ນຫຍັງທີ່ນຳຄວາມຊື່ນຊົມມາໃຫ້ພຣະຜູ້ເປັນເຈົ້າ? ພຣະອົງກ່າວວ່າແມ່ນຫຍັງຈະນຳຄວາມຊື່ນຊົມມາໃຫ້ເຮົາ? ທ່ານ ແລະ ລູກໆຂອງທ່ານສາມາດເວົ້າກ່ຽວກັບປະສົບການໃດກໍຕາມທີ່ພວກທ່ານໄດ້ມີ ໃນການແບ່ງປັນຄວາມຊື່ນຊົມຂອງພຣະກິດຕິຄຸນຂອງພຣະຜູ້ຊ່ວຍໃຫ້ລອດ.
ເພງກ່ຽວກັບການແບ່ງປັນພຣະກິດຕິຄຸນ, ເຊັ່ນ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50), ສາມາດຊ່ວຍໃຫ້ລູກໆຂອງທ່ານຄິດກ່ຽວກັບວິທີທີ່ພວກເຂົາສາມາດແບ່ງປັນພຣະກິດຕິຄຸນໄດ້.

ຄຳສອນ ແລະ ພັນທະສັນຍາ 18:34–36

ເຮົາສາມາດໄດ້ຍິນສຸລະສຽງຂອງພຣະຜູ້ເປັນເຈົ້າໃນພຣະຄຳພີໄດ້.

ລູກໆຂອງທ່ານອາດມ່ວນຊື່ນກັບເກມໜຶ່ງ ທີ່ພວກເຂົາພະຍາຍາມລະບຸສຽງຂອງຄົນທີ່ແຕກຕ່າງກັນ, ເຊັ່ນ ສະມາຊິກໃນຄອບຄົວ, ໝູ່ເພື່ອນ, ຫລື ຜູ້ນຳສາດສະໜາຈັກ. ເຮົາຈະຮູ້ຈັກສຽງຂອງກັນແລະກັນໄດ້ແນວໃດ? ເຮົາຈະຮູ້ຈັກສຸລະສຽງຂອງພຣະຜູ້ເປັນເຈົ້າໄດ້ແນວໃດ? ພວກທ່ານສາມາດອ່ານ ຄຳສອນ ແລະ ພັນທະສັນຍາ 18:34–36 ນຳກັນ ເພື່ອສົນທະນາກ່ຽວກັບຄຳຖາມນີ້. ພວກທ່ານຍັງສາມາດແບ່ງປັນນຳກັນກ່ຽວກັບວິທີທີ່ພວກທ່ານເຄີຍໄດ້ຍິນສຸລະສຽງຂອງພຣະຜູ້ເປັນເຈົ້າໃນພຣະຄຳພີນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພາບໃບໜ້າຕິດຕໍ່ກັນຂອງຜູ້ຄົນຈາກຫລາກຫລາຍວັດທະນະທຳ — ຈິດວິນຍານແຕ່ລະດວງແມ່ນມີຄ່າຕໍ່ພຣະເຈົ້າ.