“Mantswe a Tsosoloso: Emma Hale Smith,” Tlayang, Ntshalang Morago—Ya Legae le Kereke: Dithuto le Dikgolagano 2025 (2025)
“Emma Hale Smith,” Tlayang, Ntshalang Morago—Ya Legae le Kereke: 2025
Mantswe a Tsosoloso
Emma Hale Smith
Mafoko a Morena go Emma Smith a gatisitswe mo go Dithuto le Dikgolagano 25 a senotse ka fa A ikutlwileng ka teng ka ene le meneelo e a ka e dirang mo tirong ya Gagwe. Mme Emma o ne a ntse jang? Re itseng ka ga botho jwa gagwe, botsalano jwa gagwe, le dinonofo tsa gagwe? Tsela e nngwe ya go itse “mosadi yo o tlhophilweng” (Dithuto le Dikgolagano 25:3) ke go bala mafoko a batho ba ba neng ba mo itse.
Joseph Smith Jr., monna wa gagwe
“Ka go itumela mo go sa buegeng, le boipelo jo bogolo jo bo rurugisang mafatlha, fa ke mo tsaya ka seatla, bosigo joo, Emma wa me yo o rategang—ene yoo e neng e le mosadi wa me, le e leng mosadi wa bosha jwa me, yo o tlhophilweng ke pelo ya me. Go ne go le gontsi go sedimoga ga tlhaloganyo ya me fa ke akanya ka nakwana ditiragalo tse dintsi tse re biditsweng go di ralala. Matsapa, matshwenyego, kutlobotlhoko, le dipogisego, le boipelo le dikgomotso go tswa nako le nako di phatlaletse le ditsela tsa rona le go re segofatsa. Oo! Tlhaloganyo ya me e tletse ka dikgopolo tse di gakgamatsang ka nakwana. Gape o fano, le e leng ka boikanyego le thuso mo mathateng a re a itemogetseng, a sa tsikinyege, a tlhomame, le go sa tsewe ke phefo, a sa fetoge, Emma yo o pelontle.”
Lucy Mack Smith matsalaagwe
“E ne e le lekgarebe, mme, a na le dikeletso tsa tlholego, pelo ya gagwe yotlhe e ne e le go direla Morena, mme o ne a sa kgatlhegele sepe fa e se kereke le tiro ya boammaaruri. Sengwe le sengwe fela se diatla tsa gagwe di se dirang, o ne a se dira ka maatla mme o ne a sa botse potso ya bopelotshetlha ‘A ke tla amogela go feta ba bangwe? Fa bagolwane ba ne ba romelwa go rera, e ne e le wa ntlha go ithaopa ka tirelo ya gagwe go thusa go ba apesetsa loeto lwa bone, go sa kgathalesege matlhoko a gagwe.”
Joseph Smith Sr. rratsalaagwe
Tshegofatso ya bopatiriaka ya ga Emma, e builwe ke Joseph Smith Sr., yo a neng a direla jaaka Mopatiriaka wa Kereke:
“Emma, ngwetsi ya me, o segofaditse ke Modimo, ka boikanyego jwa gago le boammaaruri: o tla segofala le monna wa gago, le go itumela mo kgalalelong e e tla tlang mo go ene: Mowa wa gago o tlhokofaditswe ka ntlha ya boikepo jwa batho mo go batleng tshenyego ya mopati wa gago, mme mowa wa gago o ne o le mo thapelong ya go gololwa ga gagwe: ipele, gonne Morena Modimo o utlwile mekokotlelo ya gago.
“O hutsafaletse go thatafatsa dipelo ga ntlo ya ga rraago, mme o eletsa poloko ya bone. Morena o tla tlotla dilelo tsa gago, mme ka dikatlholo tsa gagwe o tla dira gore bangwe ba bone ba ipone diphoso mme baikwatlhaele dibe tsa bone, fela e tla nna ka pogisego gore ba bolokwe. O tla bona malatsi a mantsi; ee, Morena o tlaa go boloka go fitlhelela o kgotsofala, gonne o tla bona Morekolodi wa gago. Pelo ya gago e tla ipelela tiro e kgolo ya Morena, mme ga go ope yo o tla tsayang go ipela ga gago.
“O tla gakologelwa masaitsiweng a magolo a Modimo wa gago mo go go letleleleng go tsamaya le morwaake fa moengele a mo neela tlhokomelo ya pego ya Banefi. O bone khutsafalo e ntsi gonne Morena o tsere mo go wena bana ba bararo: mo go seo ga o tlhoke go bonwa molato, gonne o itse dikeletso tsa gago tse di itshekileng go tlamela lelwapa, gore leina la morwaake le segofadiwe. Mme jaanong, bona, Ke a go raya, gore jaana go bua Morena, fa o ka dumela, o tlaa segofala mo selong se le gore o tlaa tlisa bana ba bangwe, go boipelo le go kgotsofala ga mowa wa gago, le go itumela ga ditsala tsa gago.
“O tla segofadiwa ka go tlhaloganya, le go nna le thata go ruta bomme ba bangwe. Ruta lelwapa la tshiamo, le ba gago ba bannye tsela ya botshelo, mme baengele ba ba boitshepo ba tla go tlhokomela: mme o tla bolokwa mo bogosing jwa Modimo; le e leng jalo. Amene.”
Emma Smith le bana ba gagwe. Time to Laugh, by Liz Lemon Swindle