“Mmaeɛ bio ne Nne: Emma Hale Smith” Bra, Di M’akyi—De ma Efie ne Asɔre: Nkyerɛkyerɛ ne Apam 2025 (2025)
“Emma Hale Smith,” Bra, Di M’akyi—De ma Efie ne Asɔre: 2025
Mmaeɛ bio no Nne
Emma Hale Smith
Awurade nsɛm a ɔde maa Emma Smith a wɔtwerɛ too hɔ wɔ Nkyerɛkyerɛ ne Apam 25 da atenka a Ɔnyaa wɔ ne ho ne deɛ ɔbɛtumi ayɛ wɔ N’adwuma mu adi. Na sɛn na na Emma teɛ? Deɛn na yɛnim fa ne nipaban, n’abusuabɔ, ne n’ahoɔden ho? Ɔkwan baako a yɛbɛfa so ahunu saa “ɔbaa a wɔayi no yi” (Nkyerɛkyerɛ ne Apam 25:3) ne sɛ yɛbɛkenkan nkorɔfoɔ a na wɔnim no ankasa no nsɛm.
Ne kunu, Joseph Smith Jr.
“Wɔ anigyeɛ a wɔntumi nka ho asɛm, ne ahurusie ahodoɔ a ahonhon wɔ me kokom, berɛ a mesɔɔ ne nsa, saa anadwo no, me dɔ Emma—ɔno a ɔyɛ me yere, mpo me mmɔfra mu yere; ne m’akoma so adeɛ. Bebree na na ɛsan woso wɔ m’adwene mu berɛ a medwenee tebea ahodoɔ a na wɔafrɛ yɛn ama yɛafa mu no ho wɔ berɛ tiawa bi mu. Ɔbrɛ, ne adwumaden, ne awerɛhoɔ, ne amanehunu, ne anigyeɛ ne awerɛkyekyesɛm a ɛtɔ da a na ɛpete wɔ yɛn akwan mu no hyɛɛ yɛn nkuran. O! adwennwene afrafra a ɛhyɛɛ m’adwene mu saa berɛ no. Bio ɔwɔ ha, mpo wɔ amanehunu a ɛtɔ so nson mu, ɔnsuro, pintinn, na ɔnhinhim, ɔnsesa, ɔwɔ ɔdɔ Emma.”
Lucy Mack Smith, n’ase baa
“Na ɔsua, na, ɔyɛ pɛadeɛahununi no, na n’akoma nyinaa wɔ Awurade adwuma so, a n’ani nnye biribiara ho gye sɛ asɔre ne nokorɛdie ho. Adeɛ biara a ne nsa sɔɔ mu sɛ ɔbɛyɛ no, ɔde n’ahoɔden nyinaa yɛeɛ a wammisa pɛsɛmenkomenya asɛmmisa ‘Me nko ara na mɛnya so mfasoɔ anaa?’ Sɛ wɔsoma elderfoɔ sɛ wɔnkɔka asɛmpa no a, ɔne obi a ɔbɛdi kan atu ne ho asi hɔ asom aboa wɔ akwantuo no ntaadehyɛ mu, na ma nneɛma a ɔno ankasa hia nyɛ deɛ ɛbɛyɛ.”
Joseph Smith Sr., n’ase barima
Emma agya panin nhyira no, Joseph Smith Sr. a na ɔresom sɛ Agya panin ma Asɔre no na ɔde maa no:
“Emma, m’ase babaa, Awurade ahyira wo, wɔ wo nkorɛdie ne nokorɛ ho: wɔbɛhyira wo ne wo kunu, na woadi ahurusie wɔ animuonyam a ɛbɛba ne so mu: Wo kra akɔ amanehunu mu esiane nnipa bɔnefoɔ a wɔhwehwɛ sɛ wɔsɛe wo hokani nti, na wɔatwe wo kra nyinaa akɔ mpaebɔ mu ama ne gyeɛ: di ahurusie, na Awurade wo Nyankopɔn atie wo sufrɛ.
“Woadi awerɛhoɔ wɔ wo papa fiefoɔ akoma den nti, na woahwehwɛ wɔn nkwagyeɛ. Awurade bɛnya obuo ama wo su, na wɔ n’atɛmmuo mu ɔbɛma wɔn mu bi ahunu wɔn nkwaseasɛm na wɔasakyera afiri wɔn bɔne mu; mmom ɛbɛfa amanehunu so na wɔbɛgye wɔn. Wobɛhunu nna bebree; aane, Awurade bɛhwɛ wo so kɔsi sɛ wobo bɛtɔ, na wobɛhunu wo Dimafoɔ. W’akoma ani bɛgye wɔ Awurade adwuma kɛseɛ no mu, na obiara rennye w’anigyeɛ no mfiri wo nsa mu.
“Daa wobɛkae Onyankopɔn ahobrɛaseɛ kɛseɛ no a ɔmaa ho kwan sɛ wobɛka ne babarima ho berɛ a ɔsoro bɔfoɔ de Nephifoɔ twerɛtohɔ maa no sɛ ɔnhwɛ so no. Woahunu amane bebree ɛfiri sɛ Awurade agye wo mma baasa afiri wo nsa mu: wɔ yei mu no mmua wo ho fɔ, na ɔnim ɔpɛ kann a wode bɛtete abusua, sɛdeɛ me babarima din bɛyɛ nhyira. Na hwɛ, meka kyerɛ wo, sɛdeɛ Awurade seɛ no, sɛ wobɛgye adi a, wɔbɛhyira wo wɔ saa adeɛ yi mu na wobɛwo nkwadaa afoforɔ, ama wo kra anigyeɛ ne ɔmeeɛ, ne wo nnamfonom anigyeɛ.
“Wɔbɛhyira wo wɔ nteaseɛ mu, na wobɛnya tumi akyerɛkyerɛ wo bɔbea. Kyerɛ w’abusua teneneeyɛ, ne wo deɛ nkumaa no abrabɔ akwan, na ɔsoro abɔfoɔ kronkron no bɛhwɛ wo so: na wɔbɛgye wo wɔ Onyankopɔn ahemman mu; mpo saa. Amen.”
Emma Smith ne ne mma. Sereɛ Berɛ, ɛfiri Liz Lemon Swindle hɔ