Fa’ata’ara’a maita’i nō roto mai Saints Move to Kirtland [Te feiā mo’a e fa’anu’u ra i Kirtland], nā Sam Lawlor

21–27 nō ’Ēperēra : « Mai te mea ’aita ’outou e riro ’ei hō’ē ra e ’ere ïa ’outou nā’u nei »

Te Ha’api’ira’a ’e te mau Fafaura’a 37–40

Nō te feiā mo’a mātāmua, ’ua hau atu te ’Ēkālesia i te hō’ē vāhi nō te fa’aro’o i te tahi mau porora’a i te sābati. E fa’a’ohipa te mau heheura’a i te mau parau mai te tumu, bāsileia, Ziona, ’e mea pinepine, ’ohipa. Nō te reira paha te ta’ata i ’umehia mai ai i te ’Ēkālesia tei fa’aho’i-fa’ahou-hia mai. Noa atu tō rātou here rahi i te ha’api’ira’a tumu, e rave rahi tei hina’aro ato’a i te hō’ē ’ohipa mo’a ’o tā rātou e nehenehe e pūpū atu i tō rātou orara’a. Noa atu rā te reira, e ’ere i te mea ’ōhie ’ia ha’apa’o i te fa’auera’a a te Fatu i te matahiti 1830, ’ia ha’aputuputu i Ohio. Nō te rahira’a, te aura’a o te reira te fa’auera’a ïa i te mau fare au maita’i nō te hō’ē ’ōti’a fenua mātau-’ore-hia (hi’o « Te mau reo o te fa’aho’i-fa’ahou-ra’a mai : Ha’aputuputura’a i Ohio »). I teie mahana, e nehenehe tātou e ’ite pāpū maita’i i te mea tā teie feiā mo’a e hi’o ra ma te mata o te fa’aro’o : E mau ha’amaita’ira’a rahi tā te Fatu nō rātou i Ohio.

Te tītaura’a ’ia ha’aputuputu i Ohio ’ua mā’iri ïa e rā ’ē te tau, i teienei rā, tē ’āmui fa’ahou nei te feiā mo’a ’ati a’e i te hō’ē ā tumu : e « fa’atupu ia Ziona » (Te Ha’api’ira’a Tumu ’e te mau Fafaura’a 39:13). Mai teie feiā mo’a mātāmua, ’ua anihia ia tātou e fa’aru’e i « te mau mea nō teie nei ao » (Te Ha’api’ira’a Tumu ’e te mau Fafaura’a 40:2) ’e ’ia ti’aturi i te parau fafau a te Fatu : « E fāri’i ïa ’oe … te ha’amaita’ira’a rahi mai tei ’ore i ’itea ia ’oe na » (Te Ha’api’ira’a Tumu ’e te mau Fafaura’a 39:10).

Hi’o ato’a Te feiā mo’a, 1:109–11.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 37–38

E ha’aputuputu te Atua ia tātou nō te ha’amaita’i ia tātou.

’Ua ti’a i te mau melo o te ’Ēkālesia i Fayette, New York, ’ia rave i te mau tūsia fifi mau nō te fa’anu’u atu i Ohio (hau atu i te 400 Km te ātea) i roto i te tau to’eto’e nō te matahiti 1831. ’A tai’o ai ’oe i te fa’auera’a a te Fatu i roto Te Ha’api’ira’a Tumu ’e te mau Fafaura’a 37:3–4, e nehenehe ’oe e feruri i te mau tūsia tā te Fatu i ani ia ’oe. I muri iho, ’a ’imi maita’i ai ’oe Te Ha’api’ira’a Tumu ’e te mau Fafaura’a 38:1–33, ’a ’imi mai i te mau parau mau nō ni’a i te Fa’aora ’o tē hōro’a nei ia ’oe te fa’aro’o e tītauhia nō te pe’e i tāna parau a’o. E aha tā ’oe i ’apo mai nā roto mai i te mau ’īrava 11–33 nō ni’a i te mau ha’amaita’ira’a o te ha’aputuputura’a ’ei pipi nā Iesu Mesia ?

Te Ha’api’ira’a Tumu ’e te mau Fafaura’a 38:22

« ’A fa’aro’o mai i tō’u nei reo ’e ’a pe’e mai iā’u nei ».

Nāhea ’oe ’ia fa’ariro ia Iesu Mesia ’ei « hōro’a ture » nō ’oe ? Nāhea te pe’era’a i tāna mau ture i te fa’ariro ia ’oe ’ei « feiā ti’amā » ?

Hi’o ato’a 2 Nephi 2:26–27.

Te Ha’api’ira’a Tumu ’e te mau Fafaura’a 38:30

Mai te mea ’ua ineine au, ’aita ïa vau e mata’u.

I tei hea taime ’oe ’a tāmata ai i te parau tumu tā te Fatu i heheu mai i roto Te Ha’api’ira’a Tumu ’e te mau Fafaura’a 38:30: « Mai te mea rā ’ua vai ineine noa ’outou ’aita ïa ’outou e mata’u » ? ’A ’imi maita’i ai ’oe te tuha’a 38, ’a hi’o maita’i nāhea te Fatu i te fa’aineine i tōna feiā mo’a ’ia ti’a ia rātou ’ia fa’aruru i te ananahi ma te itoito. Nāhea ’oia e hina’aro ai ’ia fa’aineine ’oe nō te mau tāmatara’a ’ia ti’a ia ’oe ’ia ’ore e mata’u ?

Hi’o ato’a David A. Bednar, « E tāmata tātou ia rātou i reira », Liahona, Novema 2020, 8–11.

Te Ha’api’ira’a Tumu ’e te mau Fafaura’a 38:24–27

Tē hina’aro nei te Atua ia tātou ’ia « riro ’ei hō’ē ».

Te feia mo’a tei ha’aputuputu mai i Ohio, ’ua haere mai nā te mau huru orara’a rau. Mai te reira ato’a paha nō te mau ta’ata i roto i tā ’oe pāroita. ’Ua fa’aue rā te Fatu i tōna mau ta’ata ’ia « riro ’ei hō’ē » (’īrava 27). Nāhea tātou ’ia fa’atupu i teie huru hō’ēra’a ? E aha te mau mana’o e puta mai i roto i te ferurira’a ’a tai’o ai ’oe Te Ha’api’ira’a Tumu ’e te mau Fafaura’a 38:24–27 ? Nō te aha e ti’a ia tātou ’ia vai hō’ē nō te riro ’ei nūna’a nō te Atua ?

E nehenehe ato’a te tai’ora’a i teie mau ’īrava e fa’auru ia ’oe ’ia feruri i tō ’oe mau aura’a—’ei hi’ora’a, ’e te mau melo o te ’utuāfare, te mau melo o te pāroita, ’e te mau melo o te pupu ’aore rā o te piha ha’api’ira’a. E aha te mea e tāpe’a ia ’oe ’ia vai hō’ē i roto i te Mesia ? Nāhea te Fa’aora e nehenehe ai e tauturu ia ’oe ’ia « riro ’ei hō’ē » ? E nehenehe te mau vidéo « A Friend to All » ’aore rā « Love in Our Hearts » (Gospel Library) e tauturu ia ’oe e pāhono i teie mau uira’a. E nehenehe ato’a ’outou e ’ite i te tahi mau mana’o ’āpī i roto i te parau poro’i a Elder Dale G. Renlund « E fa’a’ore te hau o te Mesia i te au ’ore », Liahona, Novema 2021, 83–85.

A Friend to All

Elder Ulisses Soares talks of the need for kindness and acceptance.

Love in Our Hearts

Sister Christina B. Franco discusses the importance of inclusion and respect.

Nāhea ’oe e nehenehe ai e tauturu i teie mau pupu ’ia vai hō’ē atu ā ? ’Ei hi’ora’a, ’a feruri i te hāpono ’aore rā i te pāpa’i i te hō’ē poro’i hāmani maita’i i te mau melo o tā ’oe pupu, piha ha’api’ira’a ’aore rā o te ’utuāfare. ’O vai tei fa’auruhia ia ’oe e fa’atoro atu i te rima ?

E aha te mea e fa’auru nei ia ’oe i roto i te hi’ora’a maita’i o te Fa’aora i roto te Ephesia 2:14, 18–22 ; 2 Nephi 26:24–28 ?

Hi’o ato’a Quentin L. Cook, « Ma te ’ā’au au-tahi-maite-hia i te parauti’a ’e te tāhō’ē », Liahona, Novema 2020, 18–21 ; « ’A here ’outou mai tā’u i here », Te mau Hīmene, N°190 ; Topics and Questions [Mau tumu parau ’e mau uira’a], « Belonging in the Church of Jesus Christ [Te rirora’a ’ei melo nō te ’Ēkālesia a Iesu Mesia] », Vaira’a buka ’evanelia.

Te Ha’api’ira’a tumu ’e te mau Fafaura’a 38:39 ; 39:40

Tē hina’aro nei te Metua i te ao ra e hōro’a iā’u te mau tao’a o te tau mure ’ore.

I tō ’oe mana’o, e aha te ta’a-’ē-ra’a i rotopū i « te mau tao’a rahi o te ao nei » ’e « te mau tao’a nō te tau mure ’ore » ? (Te Ha’api’ira’a Tumu ’e te mau Fafaura’a 38:39). E aha te mau ’itera’a tei ha’api’i ia ’oe ’ia ha’afaufa’a i te mau tao’a rahi nō te tau mure ’ore ?

’A tāpe’a i te reira i roto te ferurira’a, ’a tai’o ai ’oe nō ni’a ia James Covel i roto te mau tuha’a 39–40 (’oia ato’a te mau ’ā’amu i roto i te mau upo’o parau o te mau tuha’a). ’A feruri nāhea tōna ’itera’a e tū’ati ai i tō ’oe iho. ’Ei hi’ora’a, ’a feruri i te mau taime ’ua « ti’a [tō ’oe] ’ā’au […] i mua [i te Atua] » (Te Ha’api’ira’a Tumu ’e te mau Fafaura’a 40:1). Nāhea ’oe i te ha’amaita’ihia nō tō ’oe ha’apa’o maita’i ? ’A feruri ato’a e aha « te mau mea nō teie nei ao » tā ’oe e fa’aruru nei. Nāhea te reira i te tāpe’a ia ’oe ’ia fāri’i i te parau a te Atua « ma te ’oa’oa » ? (Te Ha’api’ira’a tumu ’e te mau Fafaura’a 39:9 ; 40:2). E aha tā ’oe i ’ite mai i roto i teie mau tuha’a ’o tē fa’aitoito ia ’oe ’ia ha’apa’o tāmau noa i te Atua ?

Hi’o ato’a Mataio 13:3–23.

Fa’a’ohipara’a i te mau pāpa’ira’a mo’a i roto i tō ’oe orara’a. « Hō’ē rāve’a nō te tauturu i te mau pīahi ’ia hi’o i te tanora’a mau o [te mau pāpa’ira’a mo’a], ’o te uira’a ïa i te mau uira’a mai teie ‘Nāhea te reira e nehenehe ai e tauturu ia ’oe i mua i te hō’ē ’ohipa ’o tā ’oe e ora nei i teienei ?’ ‘Nō te aha e mea faufa’a ia ’oe ’ia ’ite i te reira ?’ ‘E aha te ta’a-’ē-ra’a tā te reira e fa’atupu i roto i tō ’oe orara’a ?’ » (Ha’api’ira’a mai tā te Fa’aora, 25). Te mau uira’a i roto i teie ’ohipara’a nō ni’a Te Ha’api’ira’a Tumu ’e te mau Fafaura’a 39–40 ’o te tahi atu ïa mau hi’ora’a o te mau uira’a, ’o tē nehenehe e tauturu ia tātou ’ia fa’a’ohipa i teie mau heheura’a i roto i tō tātou orara’a.

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 37 ; 38:31– 33

E ha’aputuputu te Atua ia tātou nō te ha’amaita’i ia tātou.

• E nehenehe te hōho’a fenua ’e te ’api fa’a’ana’anataera’a i te pae hope’a o teie arata’i e tauturu i tā ’outou mau tamari’i ’ia hāro’aro’a, e aha tā te Atua i fa’aue i roto Te Ha’api’ira’a Tumu ’e te mau Fafaura’a 37:3. Penei a’e e nehenehe ’outou e tauturu ia rātou ’ia ’ite mai i te mau vāhi i fa’ahitihia i roto i teie mau heheura’a. E nehenehe ato’a ’outou e tauturu ia rātou ’ia ’ite mai i te hō’ē pereota nō roto mai Te Ha’api’ira’a Tumu ’e te mau Fafaura’a 38:31–33 ’o tē fa’ata’a nei, nō te aha te Atua e hina’aro ai i tōna mau ta’ata ’ia ha’aputuputu ’āmui.

Te Ha’api’ira’a Tumu ’e te mau Fafaura’a 38:24–27

Tē hina’aro nei te Atua e « tāhō’ē » ia tātou.

• ’A tai’o ai ’outou Te Ha’api’ira’a Tumu ’e te mau Fafaura’a 38:24–25 ’e tā ’outou mau tamari’i, ’a paraparau e aha te aura’a ’ia fa’atura i tō ’outou taea’e ’aore rā tuahine mai ia ’outou iho (hi’o ato’a Mataio 7:12). E tauturu ia rātou ’ia fa’ahiti fa’ahou te ’īrava, ma te mono i « tōna ra taea’e » i te i’oa o te hō’ē ta’ata.

• Nō te ha’api’i i tā ’outou mau tamari’i i te aura’a « ’ia tāhō’ē » (Te Ha’api’ira’a Tumu ’e te mau Fafaura’a 38:27), e nehenehe ’outou e tauturu ia rātou ’ia pāpa’i hōho’a i te nūmera 1 rarahi maita’i, ’e e fa’anehenehe i te reira i te mau i’oa ’e te mau hōho’a pāpa’i ’aore rā mau hōho’a o te ta’ata tāta’itahi o tō ’outou ’utuāfare ’aore rā piha ha’api’ira’a. I pīha’i iho i te nūmera 1, e pāpa’i ’outou i te mau mea tā ’outou e rave nō te vai hō’ē noa.

• ’A feruri i te fa’a’ite atu i te hō’ē ha’api’ira’a tao’a ’o tē fa’ahōho’a nei, e mea nāhea te mau mea e nehenehe ai e ’āmuihia ’aore rā, e tāhō’ēhia nō te riro mai ’ei hō’ē, mai te mau ’apa’apara’a o te hō’ē tīfaifai ’aore rā, te mau ’āno’i nō te hāmani i te faraoa. E aha tā teie mau hi’ora’a e ha’api’i nei ia tātou nō ni’a i te rirora’a ’ei hō’ē ’ei nūna’a nō te Atua ?

Te Ha’api’ira’a Tumu ’e te mau Fafaura’a 38:30

Mai te mea ’ua ineine au, ’aita e ti’a iā’u ’ia mata’u.

• ’A tai’o ’āmui ai ’outou Te Ha’api’ira’a Tumu ’e te mau Fafaura’a 38:30, e nehenehe ’outou ’e tā ’outou mau tamari’i e ’āparau nō te mau ’ohipa i tupu ’aita i maoro a’enei tei tītauhia te fa’aineinera’a. I muri iho e nehenehe ’outou e ani i tā ’outou mau tamari’i i te mau mea tā te Metua i te ao ra e hina’aro nei ē ’ia fa’aineine tātou. E fa’a’ite i tā ’outou mau tamari’i i te hō’ē ’itera’a i reira te fa’aineinera’a i te tauturura’a ia ’outou ’eiaha e mata’u. E nehenehe ato’a ’outou e māta’ita’i ’āmui te vidéo « Men’s Hearts Shall Fail Them » (Gospel Library).

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Te Ha’api’ira’a Tumu ’e te mau Fafaura’a 39:6, 23

’Ua fāri’i au i te hōro’a o te Vārua Maita’i i te taime ’a ha’amauhia ai au.

• ’A feruri i te fa’a’ite atu i te hō’ē hōho’a nō te hō’ē ta’ata e ha’amauhia ra. E ani i tā ’outou mau tamari’i ’ia fa’ata’a mai e aha te mea e tupu ra i roto i te hōho’a. E nehenehe ato’a ’outou e ani ia rātou ’ia fa’atoro i ni’a i te hōho’a i te mau taime ato’a e fa’aro’o ai rātou i te mau ta’o Vārua Maita’i i roto Te Ha’api’ira’a Tumu ’e te mau Fafaura’a 39:6, 23 (’aore rā, i roto i te hō’ē hīmene mai te « Te Vārua Maita’i », Buka hīmene nā te mau tamari’i, 56). ’A fa’a’ite i te tahi ’e te tahi nāhea te hōro’a o te Vārua Maita’i i te ha’amaita’ira’a ia ’outou.

Nō te tahi atu mau mana’o, ’a hi’o i te ve’a Hoa nō teie ’āva’e.