“21–27 abril: “Wi ink’a’ junajex, moko wehex ta”: Tzolʼlebʼ ut Sumwank 37–40,” Kim, Taaqehin—Choq’ re li ochoch ut li iglees: Li Tzol’leb’ ut Sumwank 2025 (2025)
“Tzolʼlebʼ ut Sumwank 37–40,” Kim, Taaqehin—Choq’ re li ochoch ut li iglees: 2025
Jalam-uuch re Eb’ laj santil paab’anel neke’q’axon toj Kirtland, xb’aan laj Sam Lawlor
21–27 abril: “Wi ink’a’ junajex, moko wehex ta”
Tzolʼlebʼ ut Sumwank 37–40
Choq’ reheb’ li xb’eenil aj santil paab’anel, li Iglees maawa’ yal jun na’ajej re rab’inkil li jultikanb’il aatin sa’ domingo. Sa’eb’ li k’utb’esinb’il na’leb’ neke’oksiman aatin jo’ xb’aan, awa’b’ejihom, Sion, ut, chi kok’ aj xsa’, k’anjel. Maare xb’aan a’an naq ke’raj ok naab’al reheb’ li komon sa’ xtiklajik chaq li Iglees k’ojob’anb’il wi’chik. Us ta neke’xra li tzol’leb’, ke’raj ajwi’ jun k’anjel sant li ke’ru wi’ chixq’axtesinkil xyu’ameb’. Ut toj chi jo’kan, ch’a’aj choq’ reheb’ xpaab’ankil lix taqlahom li Qaawa’ sa’ 1830 re xch’utub’ankileb’ rib’ aran Ohio. Choq’ reheb’ naab’al a’an naraj naxye xkanab’ankil li chaab’il ochoch re xik’ sa’ jun nub’aal ink’a’ nawb’il ru (chi’ilmanq “Eb’ li xyaab’ kuxej re li k’ojob’ank wi’chik: Li ch’utlaak sa’ Ohio”). Sa’ li kutan a’in naru naqil chi saqen ru li k’a’ru ka’ajwi’ ke’ru chirilb’al laj santil paab’anel a’an rik’in rilob’aal li paab’aal: naq wankeb’ ninqi osob’tesink li tixk’e li Qaawa’ reheb’ aran Ohio.
Ak najter chik numenaq li ajom re ch’utlaak aran Ohio, a’b’an eb’ laj santil paab’anel sa’ li kutan a’in toj neke’xjunaji ajwi’ rib’ sa’ jun chi na’leb’: re “xk’eeb’al chi k’utmank Sion” (Tzol’leb’ ut Sumwank 39:13). Jo’eb’ laj santil paab’anel sa’ xtiklajik chaq li Iglees, laa’o nokob’oqe’ chixkanab’ankil “li nachal wi’ xk’a’uxl li ruchich’och’” (Tzol’leb’ ut Sumwank 40:2) xb’aan naq noko’oyb’enin rik’in lix yeechi’ihom li Qaawa’: “Taak’ul … jun osob’tesink k’a’jo’ xnimal, jo’ li maajun wa aanawom” (Tzol’leb’ ut Sumwank 39:10).
Chi’ilmanq ajwi’ Santos, 1:111–113.
Li na’leb’ re tzolok sa’ li ochoch ut sa’ li iglees
Li Dios nokoxch’utub’ re qosob’tesinkil.
Eb’ li komon re li Iglees aran Fayette, Nueva York, ke’mayejan chi nim re xik aran Ohio (numenaq 400 kiloom xnajtil) sa’ li hab’alq’e sa’ 1831. Naq tattzoloq chirix lix taqlahom li Qaawa’ sa’ Tzol’leb’ ut Sumwank 37:3–4, naru nakatk’oxlak chirix li mayej naxpatz’ li Qaawa’ aawe. Chirix a’an, naq taawil Tzol’leb’ ut Sumwank 38:1–33, sik’eb’ li yaal chirix li Kolonel li te’xk’e aapaab’aal re xtaaqenkil lix na’leb’ a’an. K’a’ru nakatzol sa’eb’ li raqal 11–33 chirix li rosob’tesihom li ch’utlaak jo’ aj taaqenel re li Jesukristo?
“Ab’ihomaq lix yaab’ inkux ut taaqehomaqin.”
K’a’ru taab’aanu re xk’eeb’al li Jesukristo jo’ “aj k’ehol chaq’rab’” chawu? Chan ru naq rik’in xtaaqenkileb’ lix chaq’rab’ nakatwan jo’ “jun ach’ab’anb’il tenamit”?
Chi’ilmanq ajwi’ 2 Nefi 2:26–27.
Wi kawresinb’ilin, tento naq ink’a’ tinxuwaq.
Jo’q’e aawilom li na’leb’ kixk’utb’esi li Qaawa’ sa’ Tzol’leb’ ut Sumwank 38:30: “Wi kawresinb’ilex ink’a’ texxuwaq”? Naq taatzol li tasal 38, k’e reetal chan ru naq li Qaawa’ naxkawresiheb’ laj santil paab’anel re naq te’ruuq chirilb’al li chalel kutan rik’in kawil ch’oolej. Chan ru naraj a’an naq taakawresi aawib’ choq’ reheb’ li ch’a’ajkilal re naq ink’a’ tatxuwaq?
Chi’ilmanq ajwi’ David A. Bednar “Ut taqayaleb’ rix rik’in a’in,” Jolomil ch’utub’aj-ib’ re octubre 2020.
Li Dios naraj naq “junajaqo.”
Eb’ laj santil paab’anel li ke’xjunaji rib’ aran Ohio jalan jalanq chaq xwanjikeb’. Maare jo’kanaqeb’ ajwi’ li komon sa’ laa teep. A’b’an li Qaawa’ naxtaqla lix tenamit chi wank “chi junaj” (raqal 27). Chan ru naru nokowulak chi wank chi junaj? K’a’ru li na’leb’ neke’chal sa’ laa k’a’uxl naq nakawil Tzol’leb’ ut Sumwank 38:24–27? K’a’ut naq naqaj ru wank chi junaj re wank choq’ xtenamit li Dios?
Rilb’aleb’ li raqal a’in naru naxwaklesi aach’ool chi k’oxlak chirix laa sumwanjik—qayehaq, rik’ineb’ laa junkab’al, li komon sa’ laa teep, ut li komon sa’ laa molam malaj sa’ laa tzoleb’aal. K’a’ raj ru yoo chi ramok aawe chi wank sa’ junajil rik’in li Kristo? Chan ru naru nakatxtenq’a li Kolonel chi wank “chi junaj”? Eb’ li video “Un amigo de todos” malaj “Un buen samaritano” (Biblioteca del Evangelio) naru nakate’xtenq’a chixsumenkileb’ li patz’om a’in. Naru ajwi’ nakataw aana’leb’ sa’ li raatin li Elder Dale G. Renlund, “Li tuqtuukilal naxk’e li Kristo naxq’ax ru li xik’ ilok,” Jolomil ch’utub’aj-ib’ re octubre 2021.
A Friend to All
Elder Ulisses Soares talks of the need for kindness and acceptance.
Love in Our Hearts
Sister Christina B. Franco discusses the importance of inclusion and respect.
Chan ru naru nakatenq’aheb’ li ch’uut a’in chi wank chi junaj? Qayehaq, naru nakataqla malaj nakatz’iib’a junaq ch’ina hu re xk’utb’al laa rahom chiruheb’ li komon sa’ laa molam, laa tzoleb’aal, malaj laa junkab’al. Ani nakaweek’a naq us taataqla wi’ a’an?
K’a’ru naxtoch’ aach’ool sa’ lix k’utum li Kolonel sa’ Efesios 2:14, 18–22; 2 Nefi 26:24–28?
Chi’ilmanq ajwi’ Quentin L. Cook “Kemb’il sa’ komonil lix ch’ooleb’ rik’in junajil ut rik’in rahok,” Jolomil ch’utub’aj-ib’ re octubre 2020; “Li rahok cheribʼil eeribʼ,” Eb’ li B’ich, 201.
Tzol’leb’ ut Sumwank 38:39; 39–40
Li Yuwa’b’ej naraj xk’eeb’al we li b’ihomal re li junelik q’e kutan.
Sa’ laa waatin laa’at, k’a’ru xjalanil “lix b’ihomal li ruchich’och’” ut “li b’ihomal re junelik q’e kutan”? (Tzol’leb’ ut Sumwank 38:39). K’a’ru laa numsihom li neke’xk’ut chawu xk’eeb’al xloq’al li b’ihomal re li junelik q’e kutan?
Jultikaq aawe a’in naq taawil li seraq’ chirix laj James Covel sa’eb’ li tasal 39–40 (eb’ ajwi’ li esilal sa’eb’ li xtiklajik li tasal). K’oxla chan ru naq lix numsihom a’an naru nak’anjelak choq’ aawe laa’at. Qayehaq, k’oxlaheb’ li hoonal naq “tiik naq kiwan aach’ool chiru li Dios” (Tzol’leb’ ut Sumwank 40:1). Chan ru naq xat-osob’tesiik xb’aan xtiikilal aach’ool? Jultikaheb’ ajwi’ “xk’oxlankil li k’a’aq re ru re ruchich’och’” nakanumsi. Chan ru naru nakate’xram chixk’ulb’al li raatin li Dios “rik’in sahil ch’oolejil”? (Tzol’leb’ ut Sumwank 39:9; 40:2). K’a’ru nakataw sa’eb’ li tasal a’in li nakatxmusiq’a chi chaab’ilo’k sa’ ab’ink chiru li Dios?
Chi’ilmanq ajwi’ Mateo 13:3–23.
Oksiheb’ li raatinul li loq’laj hu sa’ laa yu’am. “Re xtenq’ankileb’ laj tzolonel chixk’eeb’al reetal x’aajelil ru li [loq’laj hu], naru taapatz’ “Chan ru taxtenq’a a’in rik’in li k’a’ru yookat xnumsikil anajwan?” “K’a’ut naq nim xwankil li na’leb’ a’in choq’ aawe?” “Chan ru naq a’in taawanq xwankil sa’ laa yu’am?” (Li K‘utuk jo‘ li Kolonel, 23). Eb’ li patz’om a’in chirix Tzol’leb’ ut Sumwank 39–40 a’aneb’ reetalil li patz’om li naru nokohe’xtenq’a chiroksinkileb’ li k’utb’esinb’il na’leb’ a’in sa’ li qayu’am.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Tzol‘leb‘ ut Sumwank 37; 38:31–33
Li Dios nokoxch’utub’ re qosob’tesinkil.
-
Li reetalil li ch’och’ ut li perel re kok’ k’anjel sa’ xraqik li tusleb’ aatin a’in naru naxtenq’aheb’ laa kok’al chixtawb’al ru k’a’ru kixtaqla li Dios sa’ Tzol’leb’ ut Sumwank 37:3. Maare naru nakatenq’aheb’ chixtawb’aleb’ li na’ajej neke’yeeman sa’eb’ li k’utb’esinb’il na’leb’ a’in. Naru ajwi’ nakatenq’aheb’ chixtawb’al junaq ch’ol aatin sa’ Tzol’leb’ ut Sumwank 38:31–33 li tixch’olob’ k’a’ut naq li Dios naraj naq taach’utlaaq lix tenamit.
Li Dios naraj naq “junajaqo.”
-
Naq taawil Tzol’leb’ ut Sumwank 38:24–25 rik’ineb’ laa kok’al, aatinan chirix k’a’ru naraj naxye xraab’al laa was aawiitz’in jo’ naq nakara aawib’ laa’at (chi’ilmanq ajwi’ Mateo 7:12). Tenq’aheb’ chixka’sutinkil li raqal rik’in xjalb’al li “ras riitz’in” rik’in xk’ab’a’eb’ lix komoneb’.
-
Re xk’utb’al chiruheb’ laa kok’al k’a’ru naraj naxye wank “chi junaj” (Tzol’leb’ ut Sumwank 38:27), naru nakatenq’aheb’ chixyiib’ankil jun li ajl 1 chi nim ut chiru a’an taatz’iib’a xk’ab’a’eb’ malaj taayiib’ xjalam-uucheb’ li kristiaan sa’ laa junkab’al malaj laa tzoleb’aal. Chixk’atq li 1, naru nakatz’iib’a k’a’ru taab’aanu re wank chi junaj wi’chik.
-
Naru nakawotz junaq na’leb’ li tixk’utb’esi chan ru naq eb’ li k’a’aq re ru naru neke’ch’utub’aman malaj neke’junajiman re naq junaq ajwi’, jo’eb’ li setb’il t’ikr neke’yiib’aman wi’ li isb’ malaj li k’a’ru neke’oksiman re xyiib’ankil jun kaxlan wa. K’a’ru neke’xk’ut chiqu li eetalil a’in chirix chan ru wulak chi jun jo’ xtenamit li Dios?
Wi kawresinb’ilin, tento naq ink’a’ tinxuwaq.
-
Naq teeril Tzol’leb’ ut Sumwank 38:30, laa’at ut eb’ laa kok’al naru nekex’aatinak chirix lee numsihom li xraj ru naq teekawresi eerib’. Chirix a’an, naru nakapatz’ reheb’ laa kok’al k’a’ru aj-e naq li qaChoxahil Yuwa’ naraj naq taqakawresi qib’. Wotz rik’ineb’ laa kok’al junaq aanumsihom b’ar wi’ xb’aan naq kawresinb’ilat ink’a’ katxuwak. Naru ajwi’ nekeril li video “Los corazones de los hombres están desfalleciendo” (Biblioteca del Evangelio).
Men's Hearts Shall Fail Them
Elder Russell M. Nelson shares a personal story to give encouragement for when we feel "weak in the heart."
Nink’ul li maatan re li Santil Musiq’ej naq nikink’ojob’aak.
-
Naru nakak’ut xjalam-uuch junaq kristiaan li yoo chi k’ojob’aak. Patz’ reheb’ laa kok’al naq te’xch’olob’ k’a’ru yoo chi k’ulmank sa’ li jalam-uuch. Naru ajwi’ nakapatz’ reheb’ naq te’xk’ut li jalam-uuch rajlal sut naq te’rab’i li aatin Santil Musiq’ej sa’ Tzol’leb’ ut Sumwank 39:6, 23 (malaj sa’ junaq li b’ich jo’ “Li Santil Musiqʼej,” B’ichleb’aal choq’ reheb’ li Kok’al, 56). Wotzomaq cherib’il eerib’ chan ru naq nekex’osob’tesiik xb’aan li maatan re li Santil Musiq’ej.
Re xtawb’al xkomon chik li na’leb’, chi’ilmanq li hu Amigos re li po a’in.