Mayo 19–25: “Kana nga Gikan sa Dios Mao ang Kahayag”

Doktrina ug mga Pakigsaad 49–50

Ang Manluluwas mao ang atong “maayo nga magbalantay” (Doktrina ug mga Pakigsaad 50:44). Nasayod Siya nga usahay ang karnero maglatagaw ug ang kamingawan adunay daghang peligro. Mao nga Siya mahigugmaong mogiya kanato ngadto sa kaseguroan sa Iyang doktrina. Siya mogiya kanato palayo sa mga kakuyaw sama sa “dili tinuod nga mga espiritu, nga nangadto sa nagkalain-lain nga dapit sa yuta, ug naglimbong sa kalibotan” (Doktrina ug mga Pakigsaad 50:2). Ang pagsunod Kaniya kanunayng nagpasabot nga pagsalikway sa dili husto nga mga ideya o mga tradisyon. Mao kini ang nahitabo ni Leman Copley ug sa uban didto sa Ohio. Sila midawat sa gipahiuli nga ebanghelyo apan mipabilin gihapon sa pipila ka gituohan nga dili husto. Diha sa Doktrina ug mga Pakigsaad 49, ang Ginoo mipadayag og mga kamatuoran nga mikorehir sa mga gituohan kaniadto ni Leman mahitungod sa mga hilisgotan sama sa kaminyoon ug sa Ikaduhang Pag-anhi sa Manluluwas. Ug sa dihang ang mga kinabig didto sa Ohio “midawat … sa mga espiritu nga [sila] wala makasabot,” gitudloan sila sa Ginoo kon unsaon pag-ila sa tinuod nga mga manipestasyon sa Espiritu (Doktrina ug mga Pakigsaad 50:15). Ang Maayong Magbalantay mapailobon kanato, Iyang “gagmay nga mga bata” kinsa “kinahanglan motubo diha sa grasya ug diha sa kamatuoran” (Doktrina ug mga Pakigsaad 50:40).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 49; 50:24

Gusto ni Jesukristo nga ako mohangop sa mga kamatuoran sa Iyang ebanghelyo.

Sa wala pa mopasakop sa Simbahan, si Leman Copley nahimo nang kabahin sa usa ka relihiyosong grupo nga nailhan isip United Society of Believers in Christ’s Second Appearing, nga nailhan usab nga Shakers. Human makaistorya si Leman, si Joseph Smith nangayo og katin-awan gikan sa Ginoo mahitungod sa pipila ka pagtulun-an sa Shakers. Ang Ginoo mitubag pinaagi sa pagpadayag diha sa seksiyon 49. Pipila sa mga gituohan sa Shakers gihisgotan diha sa ulohan sa seksiyon.

Unsa ang gitudlo sa Ginoo diha sa seksiyon 49 aron korehian ang mga gituohan sa Shakers? Unsa ang ebidensya dinhi niini nga pagpadayag bahin sa Iyang gugma ug pagpakabana sa mga tawo nga wala makabaton sa kahingpitan sa Iyang kamatuoran? Sa unsang paagi nga ikaw makatabang nila uban sa gugma ug pagpakabana?

Unsa ang nakapadayeg nimo mahitungod sa obserbasyon sa Ginoo diha sa bersikulo 2? Mahimo nimo kining itandi ngadto sa unsay mahitabo kon ikaw motan-aw lamang sa gamayng bahin sa usa ka salida, motan-aw sa usa ka piraso sa puzzle, o maminaw sa usa ka habig sa panaglalis. Sa unsang paagi nga ang pasidaan sa Ginoo may kalabotan ngadto sa Doktrina ug mga Pakigsaad 50:24? Ikonsiderar kon unsay imong buhaton aron makadawat og dugang nga kahayag gikan sa Ginoo.

Tan-awa usab sa “Leman Copley and the Shakers,” diha sa Revelations in Context, 117–21.

Doktrina ug mga Pakigsaad 49:15–17

Ang kaminyoon tali sa lalaki ug babaye mahinungdanon sa plano sa Dios.

Agi og paningkamot aron mapahuyang ang plano sa Langitnong Amahan, si Satanas nagtinguha sa pagmugna og kalibog bahin sa kaminyoon. Ang Ginoo, sa laing bahin, nagpadayon sa pagpadayag sa kamatuoran mahitungod sa kaminyoon pinaagi sa Iyang mga propeta. Makita nimo ang pipila ka kamatuoran niini diha sa Doktrina ug mga Pakigsaad 49:15–17; Genesis 2:20–24; 1 Mga Taga-Corinto 11:11; ug “Ang Pamilya: Usa ka Pamahayag ngadto sa Kalibotan.” Paghimo og lista sa mga kamatuoran nga imong makit-an. Ngano nga ang kaminyoon importante man kaayo sa plano sa Dios?

Si Elder Ulisses Soares mitudlo nga “ang gipahiuli nga ebanghelyo ni Jesukristo namahayag sa baroganan bahin sa hingpit nga panag-uban tali sa babaye ug lalaki, sa mortal nga kinabuhi ug sa kahangtoran” (“Diha sa Panag-uban sa Ginoo,” Liahona, Nob. 2022, 42). Mahimo nimong tun-an ang iyang mensahe, nga mangita sa mga baroganan “nga makapalig-on sa panag-uban tali sa lalaki ug babaye.” Sa unsang paagi nimo magamit kini nga mga baroganan sa imong kinabuhi? Kon ang usa ka tawo sa laing tinuohan mangutana nimo kon ngano nga ang kaminyoon importante, unsaon nimo sa pagtubag? Nganong mapasalamaton man ka alang niini nga panabot?

Tan-awa usab sa Mga Hilisgotan ug mga Pangutana [Topics and Questions], “Kaminyoon [Marriage],” “Family,” Librarya sa Ebanghelyo [Gospel Library]; David A. Bednar, “Ang Kaminyoon Mahinungdanon sa Iyang Mahangtorong Plano,” Liahona, Hunyo 2006, 83–84; “Renaissance of Marriage” (bidyo), Librarya sa Ebanghelyo.

Renaissance of Marriage

Hear what President Eyring says we all must do to have a renaissance of happy marriages and productive families.

Magmahimong sensitibo ngadto sa mga kahimtang sa indibidwal. Samtang ang malipayon nga kaminyoon ug kinabuhi sa pamilya mao ang sulundon diha sa ebanghelyo ni Jesukristo, dili ang tanan nato makatagamtan niini samtang anaa pa sa mortalidad. Sa paghisgot niini nga hilisgotan, pagmabination ngadto sa lainlaing mga kahimtang sa indibidwal ug pamilya, ilabi na sa mga tawo nga “naghulat nga mapailobon sa Ginoo” alang sa mahangtoron nga mga saad nga matuman (tan-awa sa Doktrina ug mga Pakigsaad 98:1–3).

Doktrina ug mga Pakigsaad 50

Ang mga pagtulun-an sa Dios makapanalipod kanako gikan sa mga pagpanglingla ni Satanas.

Ang bag-o nga mga miyembro sa Simbahan didto sa Ohio matinguhaon nga makadawat sa espirituhanon nga mga manipestasyon nga gisaad diha sa mga kasulatan. Si Satanas, hinuon, matinguhaon sa paglingla kanila. Kon ikaw gihangyo sa pagtabang niini nga mga miyembro aron makasabot kon unsaon sa pag-ila sa tinuod nga mga manipestasyon sa Espiritu Santo, unsa nga mga baroganan diha sa Doktrina ug mga Pakigsaad 50 ang imong ipakigbahin? (tan-awa ilabi na sa mga bersikulo 22–25, 29–34, 40–46). Sa unsang paagi nga ang Manluluwas mitabang nimo nga masayod sa kalainan tali sa kamatuoran ug sayop?

Tan-awa usab sa 1 Mga Taga-Corinto 14:1–28; 2 Timoteo 3:13–17.

Doktrina ug mga Pakigsaad 50:13–24

Ang mga magtutudlo ug mga tigkat-on dungan nga malig-on pinaagi sa Espiritu.

Ang pagsunod sa ebanghelyo ni Jesukristo mohatag og daghang oportunidad nga mahimong mga magtutudlo ug mga tigkat-on, diha sa balay ug sa Simbahan. Usa ka paagi nga imong matun-an ang Doktrina ug mga Pakigsaad 50:13–24 mao ang pagdrowing og hulagway sa usa ka magtutudlo ug sa usa ka tigkat-on. Tupad sa matag usa niini, paghimo og lista sa mga pulong ug hugpong sa mga pulong gikan niini nga mga bersikulo nga nagtudlo nimo og butang mahitungod sa pagkat-on ug pagtudlo sa ebanghelyo. Kanus-a ka nakabaton og mga kasinatian nga nagtudlo nimo sa kaimportante sa Espiritu diha sa pagkat-on ug pagtudlo? Ikonsiderar kon unsay imong mahimo sa pagpalambo sa imong mga paningkamot isip usa ka tigkat-on ug magtutudlo sa ebanghelyo.

Doktrina ug mga Pakigsaad 50:23–25

“Kana nga gikan sa Dios mao ang kahayag.”

Samtang mamalandong ka sa mga pulong sa Manluluwas diha sa Doktrina ug mga Pakigsaad 50:23–25, hunahunaa kon sa unsang paagi nga imong nadawat ang kahayag sa Dios diha sa imong kinabuhi ug sa unsang paagi nga imong “[na]papahawa ang kangitngit”. Pananglitan, sa unsang paagi nga kini nga mga bersikulo mogiya sa imong mga pagpili kon unsaon nimo sa paggamit ang imong panahon? unsa nga kalingawan o media ang angayng tinguhaon? unsa nga mga panagsultihanay ang angayng apilan? Unsa ang uban pang mga desisyon nga kini nga mga bersikulo makatabang nimo? Ang usa ka himno sama sa “Ang Dios Kahayag Ko” (Mga Himno, nu. 46) tingali makadasig og dugang nga mga hunahuna.

Tan-awa usab sa “Magkinabuhi sa kahayag sa Dios,” Alang sa Kalig-on sa mga Kabatan-onan: Usa ka Giya sa Paghimo og mga Pagpili, 16–21.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Leman Copley

• Mga Gasa sa Espiritu

• Relihiyusong Tinuohan sa Panahon ni Joseph Smith

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 49:12–14

Makasunod ako ni Jesukristo.

• Sa pagtudlo sa imong mga anak sa mga baroganan niini nga mga bersikulo, mahimo ka nga mag-andam og upat ka papel nga adunay mga tunob sa tiil ug upat ka hulagway nga nagrepresentar sa hugot nga pagtuo kang Jesukristo, paghinulsol, bunyag, ug pagdawat sa Espiritu Santo (tan-awa ang mga hulagway diha sa pahina sa kalihokan niining semanaha). Ang imong mga anak mahimong mobutang sa mga tunob sa tiil diha sa salog uban sa mga hulagway tupad niini. Dayon papulipulihon sila sa paglakaw ibabaw sa mga tunob sa tiil samtang magbasa ka sa Doktrina ug mga Pakigsaad 49:12–14. Tabangi sila nga makasabot nga kon kita mobuhat sa mga butang niini nga mga hulagway, kita nagsunod ni Jesukristo.

• Mahimo usab nimong dapiton ang imong mga anak sa pagtandi sa Doktrina ug mga Pakigsaad 49:12–14 ngadto sa Mga Buhat 2:38 ug ngadto sa ikaupat nga artikulo sa hugot nga pagtuo. Unsa nga mga pagkasusama ang ilang makit-an? Ngano nga kini nga mga kamatuoran importante?

Doktrina ug mga Pakigsaad 49:15–17

Ang kaminyoon tali sa lalaki ug babaye mahinungdanon sa plano sa Dios.

• Sa pagpaila niini nga mga bersikulo, mahimo nimong ipasabot nga ang Shakers usa ka relihiyoso nga grupo nga nagtuo nga ang mga tawo kinahanglang dili magminyo (tan-awa sa ulohan sa seksiyon sa Doktrina ug mga Pakigsaad 49). Dapita ang imong mga anak sa pagpangita sa mga butang nga gitudlo sa Ginoo mahitungod sa kaminyoon diha Doktrina ug mga Pakigsaad 49:15–17. Unsa ang ipasabot niini nga “ang kaminyoon gi-orden sa Dios”? Tingali mahimo ninyong basahon og dungan ang unang tulo ka parapo sa “Ang Pamilya: Usa ka Pamahayag ngadto sa Kalibotan.” Dayon hisgoti kon ngano nga ang kaminyoon ug ang pamilya importante sa Langitnong Amahan.

Doktrina ug mga Pakigsaad 50:23–25

“Kana nga gikan sa Dios mao ang kahayag.”

• Sa pagpaila sa Doktrina ug mga Pakigsaad 50:23–25, sultihi ang imong mga bata mahitungod sa kalainan tali sa kahayag ug sa kangitngit. Nganong nagkinahanglan kita og kahayag? Mahimo ninyong basahon og dungan ang unang parapo sa “Magkinabuhi sa kahayag sa Dios” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (pahina 17) ingon man usab ang Doktrina ug mga Pakigsaad 50:23–25. Hisgoti ang mahitungod sa mga paagi nga atong madawat ang kahayag sa Dios ug ang mga paagi nga atong mapapahawa ang kangitngit. Dayon mahimong kantahon ninyong tanan ang usa ka awit mahitungod sa espirituhanong kahayag, sama sa “Dan-ag” (Songbook sa mga Bata, 96).

Doktrina ug mga Pakigsaad 50:40–46

Si Jesukristo mao ang akong Maayong Magbalantay.

• Human sa pagbasa og dungan sa Doktrina ug mga Pakigsaad 50:40–46, mahimo nimong ipakita ang hulagway sa Manluluwas nga anaa sa kataposan niini nga latid ug mangutana og sama niini: Unsa ang bation sa usa ka magbalantay mahitungod sa Iyang mga karnero? Sa unsang paagi nga ang Manluluwas sama sa usa ka magbalantay ngari kanato?

Alang sa dugang nga mga ideya, tan-awa sa isyu karong bulana sa Higala nga magasin.

Gentle Shepherd [Maaghop nga Magbalantay], ni Yongsung Kim