Independence, Missouri, 1831, nā Al Rounds

2–8 nō Tiunu : « ’Ia rave ’ana’anatae i te ’ohipa maita’i »

Te Ha’api’ira’a Tumu ʼe te mau Fafaura’a 58–59

I te taime mātāmua ’a ’ite ai te mau peresibutero o te ’Ēkālesia i te vāhi ti’ara’a o te ’oire o Ziona—Independence, Missouri—e ’ere ïa i tā rātou i mana’o na. ’Ua mana’o te tahi pae ē, e ’ite rātou i te hō’ē ’oire ruperupe ’e te ’ohipa, ’e te hō’ē pupu feiā mo’a pūai. Terā rā, ’ua ’ite atu rātou i te hō’ē ’oire varavara te ta’ata, e ’ere mai te vāhi ta’ata tā rātou i mātau, e vāhi fa’aeahia rā nā te mau ta’ata rātere, ’eiaha rā nā te feiā mo’a. ’E ’ua ’ite a’era rātou ē, ’aita te Fatu i ani ia rātou ’ia haere noa mai i Ziona—’ua hina’aro rā ’oia ’ia patu rātou i te reira.

’Ia ’ore ana’e tā tātou mau tīa’ira’a ’ia tū’ati i ni’a i te ’ohipa mau, e nehenehe tātou e ha’amana’o i tā te Fatu i parau atu i te feiā mo’a i te matahiti 1831 : « ’Aore e ti’a ia ’outou i teie nei taime ’ia ’ite nā roto i tō ’outou mata tāhuti nei, i te ’ōpuara’a a tō ’outou Atua […] ’e te hanahana ho’i ’o tē tae mai i muri a’e i te mau ’ati rahi e rave rahi ra » (Te Ha’api’ira’a Tumu ʼe te mau Fafaura’a 58:3). ’Oia mau, ’ua ’ī te orara’a i te ’ati ’e tae noa atu i te ’ino, terā rā, e nehenehe tātou e « fa’atupu fa’arahi ho’i i te parauti’a ; tei roto ho’i ia [tātou] te mana » (’īrava 27–28).

Hi’o ato’a te Feiā Mo’a, 1:127–33.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 58:1–5 ; 59:23

« Nō te mea i muri mai i te mau ’ati rahi e rave rahi ra, e tae mai ai te mau ha’amaita’ira’a ».

’Ua ti’aturi pāpū te mau Feiā mo’a ē, i roto i tō rātou orara’a, e ruperupe mai Jackson County ’ei Ziona, ’ei vāhi ho’i i reira te feiā mo’a ato’a e ha’aputuputu ai. Terā rā, ’ua ’ī tō rātou taime i Jackson County i te ’ati. I roto i te tahi tau matahiti i muri mai, ’ua fa’ahepohia rātou ’ia fa’aru’e ’e ’ia « tīa’i ri’i […] nō te hō’ē tau poto noa nō te fa’aorara’a ia Ziona »(Te Ha’api’ira’a Tumu ’e te mau Fafaura’a 105:9).

E aha tā ’outou i ha’api’i mai nō ni’a i te ’ati ’aore rā te mau tāmatara’a i roto i te mau parau a te Fatu i roto i Te Ha’api’ira’a Tumu ’e te mau Fafaura’a 58:1–5 ? I tō ’outou mana’ora’a, nō te aha te tahi mau ha’amaita’ira’a e fa’ari’ihia ai i muri noa a’e i te ’ati ? E aha te mau ha’amaita’ira’a tā ’outou i fa’ari’i i muri a’e i te ’ati ?

E aha tā ’outou e ’apo mai nō roto mai i Te Ha’api’ira’a Tumu ’e te mau Fafaura’a 59:23 ’o tē hōro’a mai ia ’outou i te tīa’ira’a ?

Te Ha’api’ira’a Tumu ’e te mau Fafaura’a 58:26–29

E nehenehe tātou e « fa’atupu fa’arahi i te parauti’a » nō tō tātou « iho hina’aro ».

’Ei tuha’a nō tā ’outou tuatāpapara’a i teie mau ’īrava, e nehenehe ’outou e hāmani i te hō’ē tāpura nō te tahi mau mea tā ’outou e « ’ana’anatae » nei i te rave. E « ’ohipa maita’i » ānei te tā’āto’ara’a o rātou ? ’A feruri e aha tā ’outou e nehenehe e rave nō te « fa’atupu fa’arahi i te parauti’a »—’e ’a feruri i te ha’amau i te mau fā nō te rave i te reira.

Nō te aha te Fatu i hina’aro ai ’ia rave tātou i « te mau ’ohipa e rave rahi nā roto i tō [tātou] iho hina’aro » ? E aha te hope’ara’a ’āhani ’outou i « fa’ahepohia i te mau mea ato’a »? E aha ana’e atu ā tā 2 Nephi 2:27 i hōro’a mai i tō ’outou hāro’aro’ara’a nō ni’a i teie parau tumu ?

Hi’o ato’a Dale G. Renlund, « E mā’iti na ’outou i teie nei mahana », Liahona, Novema 2018, 104.

Te Ha’api’ira’a Tumu ’e te mau Fafaura’a 58:42–43

E fa’a’ore te Fatu i tā’u mau hara ’a tātarahapa ai au.

Te fafaura’a a te Fatu i roto i Te Ha’api’ira’a Tumu ’e te mau Fafaura’a 58:42 e mea fa’auru mau te fa’a’orera’a hope roa i te hapa a te feiā e tātarahapa, noa atu ā e ui-ato’a-hia te tahi mau uira’a : E aha te aura’a ’ia tātarahapa ? Nāhea vau i te ’ite ē ’ua tātarahapa vau ? ’Aua’a a’e rā, ’ua tāmau te Fatu i te parau : « Nā roto i teie nei mea e ’ite ai ’outou… » (’īrava 43).

Teie fa’ahou ā te tahi mau uira’a tē ui noa nei te mau ta’ata nō ni’a i te tātarahapara’a. E aha tā te Vārua e ha’api’i mai nei ia ’outou ’a tuatāpapa ai ’outou i te mau mātēria i hōro’ahia mai i raro nei ?

Nāhea te fā’ira’a i tā’u mau hara i te tauturu iā’u ’ia tātarahapa ? Hi’o Salamo 32:1–5 ; Maseli 28:13 ; Mosia 27:34–37 ; Alama 39:12–13.

Tē tāmata nei au i te fa’aru’e i tā’u mau hara, terā rā, tē tāmau noa nei au i te rave i te mau hapehape. E mea mana noa ānei tā’u tātarahapara’a ? Hi’o Bradley R. Wilcox, « Te ti’a-mā-ra’a e ’ere i te hape-’ore-ra’a », Liahona, Novema 2021, 61–67.

Daily Restoration

Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.

Nāhea vau e pāpū ai ē, ’ua fa’a’ore mai te Fa’aora i tā’u mau hara ? Hi’o Tad R. Callister, « Te tāra’ehara a Iesu Mesia », Liahona, Mē 2019, 85–87, te tuha’a iho ā rā tei pi’ihia « 2. Hara ».

E ’ite mai ’outou i te tahi atu ā mau mana’o i roto i te « Uira’a ’e pāhonora’a » nō ni’a i te tātarahapara’a i roto i te Nō te pūai o te feiā ’āpī : E arata’i nō te rave i te mau mā’itira’a (’api 8–9).

Hi’o ato’a Topics and Questions, « Tātarahapa », Vaira’a buka ’evanelia.

Te Ha’api’ira’a Tumu ’e te mau Fafaura’a 59

O vai ’o Polly Knight ?

Polly Knight ’e tāna tāne, ’o Joseph Knight Sr., te tahi te reira o te feiā fa’aro’o mātāmua i roto i te pi’ira’a tohu o Iosepha Semita. ’Ua pāturu pāpū ’o Polly ’e ’o Joseph i te peropheta i roto i te ’ohipa ’īritira’a o te Buka a Moromona. ’Ua fa’aru’e te ’utuāfare Knight i Colesville, New York, nō te ha’aputuputu ’e te Feiā mo’a i Ohio, ’e i muri a’e, ’ua fa’auehia rātou ’ia haere i te mata’eina’a nō Jackson, Missouri. ’A rātere ai rātou, ’ua ha’amata te ea ’o Polly i te ’ino, terā rā, e hina’aro pāpū tōna ’ia ’ite ia Ziona hou ’oia ’a pohe ai. Tau mahana noa tōna taera’a i Missouri, pohe atu ra ’oia (hi’o Feiā Mo’a, 1:127–28, 132–33). ’Ua fa’ari’ihiaTe Ha’api’ira’a Tumu ʼe te mau Fafaura’a 59 i te mahana o tōna pohera’a, ’e mai te huru ra ē, tē fa’ahiti ta’a ’ē rā te ’īrava 1 ’e te 2 nōna.

Te Ha’api’ira’a Tumu ’e te mau Fafaura’a 59:4–19

E ha’amaita’ira’a te mau fa’auera’a.

E aha te aura’a ’ia « fa’akoronahia […] i te mau fa’auera’a » ? (’īrava 4). ’A feruri nāhea te Fatu i te ha’amaita’i ia ’outou ’a tūtava ai ’outou i te ha’apa’o i te mau fa’auera’a tāta’itahi i roto i te mau ’īrava 5–19.

Fa’a’ite i te mea tā ’outou e ha’api’i mai nei. I te rahira’a o te taime, e nehenehe te mau mana’o pae vārua tā ’outou e fa’ari’i ’a tuatāpapa ai ’outou i te mau pāpa’ira’a mo’a e ha’apūai i te fa’aro’o o tō ’outou ’utuāfare, te mau hoa ’e te mau melo o te pāroita. ’A fa’a’ite ia rātou i tō ’outou mau ’itera’a, mau ’āehuehu ’e tō ’itera’a pāpū nō Iesu Mesia.

Te Ha’api’ira’a Tumu ’e te mau Fafaura’a 59:9–19

’Ua riro te sābati ’ei mahana nō te Fatu.

I muri a’e i te fafaura’a ’ia ha’amaita’i i te feiā mo’a i Ziona, « i te mau fa’auera’a fa’aiti-’ore-hia », ’ua hōro’a mai te Fatu i te mau ha’apāpūra’a ta’a ’ē i te hō’ē fa’auera’a ta’a ’ē : te fa’auera’a ’ia fa’atura i tōna « mahana mo’a » (Te Ha’api’ira’a Tumu ʼe te mau Fafaura’a 59:4, 9). ’A tuatāpapa ai ’outou i Te Ha’api’ira’a Tumu ʼe te mau Fafaura’a 59:9–19, ’a feruri nō te aha te fa’aturara’a i te sābati e riro ai ’ei ’ohipa faufa’a nō teie Feiā mo’a ’a tītau ai rātou ’ia patu ia Ziona. Nō te aha e mea faufa’a te reira nō ’outou ?

E nehenehe ato’a ’outou e ui ē, tē fa’a’ohipa rā ānei ’outou i te mahana sābati mai tā te Fatu i hina’aro. Nāhea te ha’amo’ara’a i te mahana sābati i te tauturu iā’u ’eiaha « ’ia vi’ivi’i i te mau mea nō teie nei ao » ? (’īrava 9). E aha tē ti’a ia ’outou ’ia rave nō te « ha’amori atu i tei Teitei Roa ra » ? (’īrava 10).

E nehenehe ato’a ’outou e ’ite ē, te fa’a’ohipa nei te Fatu i te mau ta’o mai te « ’oa’oa » « fa’a’oa’oa » ’e « māuruuru » nō te ha’api’i atu nō ni’a i te mahana Sābati. E aha te mea e fa’ariro nei i te Sābati ’ei mea ’oa’oa nō ’outou ? Nāhea ’outou ’ia fa’ata’a atu i te hō’ē ta’ata nō te aha ’outou e mā’iti ai e fa’atura i te mahana o te Fatu ?

E aha tā ’outou i ha’api’i mai nō roto i te hīmene ra « Hīmene ma te mārū » (Te mau hīmene, N°79) nō ni’a i te mau fā ’e te mau ha’amaita’ira’a o te Sābati ?

Hi’o ato’a Genese 2:2–3 ; Isaia 58:13–14 ; Russell M. Nelson, « Te Sābati e mahana hina’arohia », Liahona, Mē 2015, 129–32.

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 50:26–28

’Ua hōro’a mai te Metua i te ao ra iā’u i te mana nō te mā’iti.

• E nehenehe te tai’ora’a ’āmui i Te Ha’api’ira’a Tumu ’e te mau Fafaura’a 58:26–28 e hōro’a ia ’outou ’e i tā ’outou mau tamari’i i te hō’ē rāve’a nō te paraparau nō ni’a i te mana tā te Metua i te ao ra i hōro’a mai ia tātou nō te mā’iti ’ia rave i te maita’i. E nehenehe ’outou e parau i te tahi e te tahi nō ni’a i te mau mā’itira’a rau tā ’outou i rave ’e te ’ohipa i tupu i muri iho. Pēnei a’e e hina’aro tā ’outou mau tamari’i e pāpa’i i te hō’ē hōho’a nō tō rātou mau ’itera’a.

• E nehenehe ’outou e pāpa’i mā’itira’a i ni’a i te hō’ē pae ’api ’e i te tahi a’e pae hope’ara’a ’e fa’a’ohipa i teie ’api parau nō te fa’ahōho’a ē, e’ita tā tātou mau mā’itira’a ’e tō rātou mau hope’ara’a e fa’ata’a-’ē-hia. Pēnei a’e e nehenehe tā ’outou mau tamari’i e tāpura i te tahi mau mā’itira’a ’e ’ia oti e ’āparau nō ni’a i te mau fa’ahope’ara’a o te reira. I muri iho e nehenehe ’outou e tai’o ’āmui i Te Ha’api’ira’a Tumu ’e te mau Fafaura’a 58:27–28 ’e ’ia paraparau nō ni’a i te mau mā’itira’a tei « fa’atupu fa’arahi i te parauti’a » ’aore rā te mau fa’ahope’ara’a maita’i. Nāhea te Metua i te ao ra i te « [fa’a]utu’a maita’i » ’aore rā i te ha’amaita’i ia tātou ’a tūtava ai tātou i te rave i te maita’i ? (’īrava 28).

Te Ha’api’ira’a Tumu ’e te mau Fafaura’a 59:7, 18–21

« ’Ia ha’amāuruuru ’oe i te Fatu ra i te Atua nō te mau mea ato’a ra ».

• E nehenehe e tai’o i teie mau ’īrava ’a ori haere ai ’outou ’e tā ’outou mau tamari’i ’aore rā, ’a hi’o ai i te mau hōho’a o te nātura, ma te hi’o maita’i i te mau mea e « ha’amāuruuru i te mata ’e […] fa’a’oa’oa i te ’ā’au » (’īrava 18). E nehenehe ato’a ’outou e ’ite i te mau mea mai te reira i roto i te hō’ē hīmene mai « Mon Père céleste m’aime » (Chants pour les enfants, 16). ’Aore rā e nehenehe tā ’outou e ani i tā ’outou mau tamari’i ’ia pāpa’i i te mau hōho’a nō te mau mea tā rātou e māuruuru nei ’e ’ia vaiiho ia rātou ’ia parau mai ia ’outou i tā rātou mau hōho’a. Nāhea tātou e nehenehe ai e fa’a’ite i tō tātou maūruuru i te mau poietera’a a te Atua ?

’Ua poiete te Fatu e rave rahi mea nehenehe nō te hōro’a mai i te ’oa’oa ia tātou.

Te Ha’api’ira’a Tumu ’e te mau Fafaura’a 59:9–12

Te Sābati e mahana ïa nō te Fatu.

• E aha tā tātou e nehenehe e rave i te Sābati nō te ha’amori i te Fatu ’e nō te fa’ari’i mai i te ’oa’oa ? Tauturu i tā ’outou mau tamari’i ’ia ’imi i te mau mana’o i roto i Te Ha’api’ira’a Tumu ’e te mau Fafaura’a 59:9–12 ’e i ni’a i te ’api fa’a’ana’anataera’a nō teie hepetoma. Pēnei a’e e nehenehe rātou e ’imi i te mau hōho’a ’aore rā te mau tao’a nō te fa’ahōho’a i te mau mea tā rātou e rave i te Sābati (mai te mau hōho’a nō te ’ōro’a mo’a i roto i teie arata’i ha’api’ira’a). Nāhea teie mau mea i te tauturu ia tātou ’ia piri hau atu i te Metua i te ao ra ’e ia Iesu Mesia ?

Nō te tahi atu ā mana’o, ’a hi’o i te ve’a Hoa nō teie ’āva’e.

Fa’ahōho’ara’a nā Marti Major