23–29 nō Tiunu : « Hau roa […] i te mau tao’a o te ao tā’āto’a nei »

Te Ha’api’ira’a Tumu ʼe te mau Fafaura’a 67–70

Mai te matahiti 1828 tae atu i te matahiti 1831, ’ua fāri’i te peropheta ’o Iosepha Semita e rave rahi heheura’a nō ’ō mai i te Fatu ra, tae noa atu i te a’ora’a atuara’a nō te ta’ata hō’ē, te mau arata’ira’a nō te fa’atere i te ’Ēkālesia, te mau ’ōrama nō te mau mahana hope’a nei, ’e e rave rahi fa’aurura’a parau ti’a nō te ao mure ore. Terā rā, e rave rahi feiā mo’a tei ore ā i tai’o i te reira. ’Aita ā te mau heheura’a i nene’ihia atura, ’e te tahi mau ’api e vai ra, ’ua pāpa’i-rima-noa-hia i ni’a i te mau ’api parau tāta’itahi ’o tei ’ōperehia i rotopū i te mau melo ’e ’ua hōpoi-haere-hia e te mau misiōnare.

I muri iho, i te ’āva’e Novema 1831, ’ua fa’atupu ’o Iosepha i te hō’ē ’āpo’ora’a nā te feiā fa’atere o te ’Ēkālesia nō te paraparau nō ni’a i te nene’ira’a i te mau heheura’a. I muri a’e i te tītaura’a i te hina’aro o te Fatu, ’ua fa’ata’a teie mau ti’a fa’atere i te mau fa’anahora’a nō te pūhara i te Buka o te mau Fa’auera’a—e ve’a nō Te Ha’api’ira’a Tumu ’e te mau Fafaura’a i teie mahana. ’Aita i maoro roa, e nehenehe te mau ta’ata ato’a e tai’o nōna iho i te parau nā te Atua tei heheuhia mai nā roto i te hō’ē peropheta ora, e fa’a’itera’a pāpū ē, « ’ua hōro’a-fa’ahou-hia mai te mau tāviri o te mau parau ’aro o te bāsileia o tō tātou Fa’aora i te ta’ata nei. » Nō teie mau tumu ’e nō te tahi atu ā mau tumu e rave rahi, e nehenehe te feiā mo’a nō terā tau ’e nō teie tau, e fa’ariro i teie mau heheura’a ’ei heheura’a e « mea faufa’a […] te mau tao’a rahi nō te ao ato’a nei » (Te Ha’api’ira’a Tumu ʼe te mau Fafaura’a 70, upo’o tufa’a).

Hi’o te Feiā Mo’a, 1:140–43.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 67:1–9 ; 68:3–6

Tē parau nei te mau tāvini o te Fatu i tōna hina’aro ’ia fa’auruhia rātou e te Vārua Maita’i.

Mai te huru ra ē, e fa’aotira’a ’ōhie te fa’aotira’a ’ia piahia te mau heheura’a tei fāri’ihia e Iosepha Semita, terā rā, ’aita te tahi mau ti’a fa’atere mātāmua o te ’Ēkālesia i feruri ē, e ere i te mana’o maita’i te reira. Te tahi māna’ona’ora’a nō ni’a ïa i te mau hapehape i roto i te reo i fa’a’ohipahia e Iosepha Semita nō te pāpa’i i te mau heheura’a. ’Ua tae mai te heheura’a i roto i te tufa’a 67 ’ei pāhonora’a i taua māna’ona’ora’a ra. E aha tā ’outou i ha’api’i nō ni’a mai i te mau peropheta ’e te heheura’a i roto i te mau ’īrava 1–9 ? E aha te tahi atu ā mau mana’o i noa’a mai ia ’outou i roto i te 68:3–6 ?

Nāhea ’oe i te ’itera’a ē, e parau mau te mau heheura’a tā te Atua e hōro’a nei i tāna mau tāvini ? E nehenehe ato’a ’outou e feruri i te mau ’ohipa i tupu ’a ’ite ai ’outou ē tē paraparau mai nei te Fatu ia ’outou nā roto i te hō’ē o tāna mau tāvini (hi’o Te Ha’api’ira’a Tumu ’e te mau Fafaura’a 68:4). I nāhea ’outou i te putapūra’a i te « fa’aurura’ahia e te Vārua Maita’i » (’īrava 3) ’ia parau i te tahi mea ? ’Ua nāhea te Fatu i te « ti’a[ra’a] i pīha’i iho ia ’oe » ? (’īrava 6).

Hou ’a nene’ihia ai te buka nō te mau fa’auera’a, e rave rahi feiā fa’atere o te ’Ēkālesia tei tārima i te tahi fa’a’itera’a ē, e parau mau te mau heheura’a i roto i te buka. Nō te māta’ita’i i te hōho’a nō tō rātou ’itera’a pāpū, ’a hi’o « Testimony, circa 2 November 1831 », Revelation Book 1, 121, josephsmithpapers.org.

Te Ha’api’ira’a Tumu ’e te mau Fafaura’a 67:10–14

« ’A tamau noa i te fa’aoroma’i. »

Nāhea te pohehae, te mata’u, ’e te te’ote’o i te tāpe’a i tō tātou ha’afātatara’a i te Fatu ? Nāhea tātou i te upo’oti’a i ni’a i te « ta’ata nātura » ’e ’aore rā « ferurira’a pae tino » ’ia nehenehe ia tātou ’ia « hi’o [iāna] ’e ’ia ’ite ē [’o ’oia] » ? (’īrava 12 ; hi’o ato’a Mosia 3:19). E aha tā ’outou i ’ite ra i roto i teie mau ’īrava tēi fa’auru ia tātou ’ia « tāmau noa i te fa’a’oroma’i ē tae noa atu i te taime [tātou] e maita’i roa ai » ? (’īrava 13).

Te Ha’api’ira’a Tumu ’e te mau Fafaura’a 68:25–31

E nehenehe au e patu i tā’u niu i ni’a ia Iesu Mesia.

Tē fa’ahiti ta’a ’ē nei te mau parau a te Fatu i roto i Te Ha’api’ira’a Tumu ’e te mau Fafaura’a 68:25–31 i te mau metua noa atu ē, e metua ānei ’e ’aore rā ’aita, e nehenehe ’outou e fa’a’ohipa i tāna a’ora’a nō te ha’atumu i tō ’outou ’utuāfare i ni’a i te ha’api’ira’a tumu a Iesu Mesia. Teie i raro nei te tahi mau parau tumu tā te Fatu i parau e ti’a ’ia ha’api’ihia i roto i te ’utuāfare. ’A feruri e nāhea ’outou e fa’ariro i teie tufa’a tāta’itahi ’ei tuha’a nō te niu o te tahi fare tei ha’atumuhia i ni’a i te Mesia—te fare tā ’outou e ora nei i teienei ’e ’aore rā tō ’outou fare i muri mai. E nehenehe te mau rāve’a ’e te mau uira’a i hōro’ahia mai e tauturu.

• Te tātarahapara’a : Tuatāpapa i te Alama 36:17–20, ’e ’a hi’o nāhea ’o Alama i te ha’amaita’ira’ahia i te hō’ē taime faufa’a rahi nō te mea ’ua ha’api’i tōna metua tāne iāna nō ni’a i te misiōni tāra’ehara a te Fa’aora. Nāhea ’outou e tauturu ai i te fa’aurura’a i tō ’outou ’utuāfare ’ia fāriu i ni’a ia Iesu Mesia ’e ’ia tātarahapa ? (hi’o ato’a 2 Nephi 25:26).

• Fa’aro’o i roto te Mesia : ’A tai’o i nā mana’o e pae a te peretiteni Russell M. Nelson nō te fa’atupura’a i te fa’aro’o i roto i te « ’Ua ti’afa’ahou te Mesia ; e fa’anu’u te fa’aro’o iāna ra i te mau mou’a » (Liahona, Mē 2021, 103). ’A feruri nāhea teie mau mana’o e nehenehe ai e fa’atupu i te hō’ē ta’ere fa’aro’o i roto i tō ’outou ’utuāfare.

• Bāpetizora’a : Hi’o fa’ahou i te fafaura’a nō te bāpetizora’a mai tei fa’ata’ahia i roto i te Mosia 18:8–10, 13. Nāhea tā ’outou mau tauto’ora’a nō te ha’apa’o i teie fafaura’a, e ha’apūai ai i tō ’outou ’utuāfare ?

• Te hōro’a o te Vārua Maita’i : Tuatāpapa i te mau tītaura’a manihini i roto i te mau ’api 17–19 nō Nō te pūai o te feiā ’āpī : E arata’i nō te rave i te mau mā’itira’a. E aha tei fa’auruhia ia ’outou ’ia rave nō te tītau manihini i te fa’aurura’a a te Vārua Maita’i i roto i tō ’oe ’utuāfare ?

• Pure : E aha tā ’outou i ’apo mai nō ni’a i te mana nō te pure i roto i te utuāfare i roto i te « A’ora’a nō te aroha » ? (Chants pour les enfants, 50–51). E aha te mau ha’amaita’ira’a tā te Fa’aora i fafau i roto i te 3 Nephi 18:15–21 ?

• Te tahi atu mau parau tumu tei ’itehia e ’outou i roto i Te Ha’api’ira’a Tumu ’e te mau Fafaura’a 68:25–31 :

E aha te a’ora’a tā ’outou e hōro’a i te vetahi ’aita te mau melo o te ’utuāfare e pāturu nei i tā rātou mau tauto’ora’a nō te patu i te fa’aro’o i te Mesia ?

Hi’o ato’a « Te ’Utuāfare : E Poro’i i tō te Ao nei », Vaira’a buka ’evanelia ; Topics and Questions, « Parenting [Metuara’a] », Vaira’a buka ’evanelia ; Dieter F. Uchtdorf, « ’O Iesu Mesia te pūai o te mau metua », Liahona, Mē 2023, 55–59.

Te Ha’api’ira’a Tumu ’e te mau Fafaura’a 98:1

E tauturu te mau hoa « parauti’a ’e te ha’apa’o maita’i » iā’u ’ia pe’e ia Iesu Mesia.

I tō ’oe mana’o, nō te aha « te pa’ari i roto i [te Fatu] » nō vetahi « parauti’a ’e te ha’apa’o maita’i » nō te ’āpe’e ia Oliver Cowdery i ni’a i te ’ohipa i fa’auehia mai i roto i teie ’īrava ? Nāhea teie parau tumu i te tano ’ia ’outou ?

Tauturu i te mau pīahi ’ia fa’aitoito te tahi i te tahi. ’Ua riro te tino tāta’itahi i roto i tā ’outou piha ’e ’aore rā ’utuāfare ’ei puna rahi nō te ’itera’a pāpū, te mau mana’o, ’e te mau ’itera’a i te orara’a i te ’evanelia. ’A ani ia rātou ’ia fa’a’ite i tō rātou mana’o ’e ’ia fa’aitoito te tahi i te tahi.

Te Ha’api’ira’a Tumu ’e te mau Fafaura’a 70:1–4

E hōpoi’a nō’u te mau heheura’a tā te Fatu i hōro’a mai.

’Ua hōro’a te Fatu i te tahi mau peresibutero i te hōpoi’a ’ia hi’opo’a māite i te nene’ira’a o te mau heheura’a. Noa atu ē, ’aita tātou i fāri’i i te reira hōpoi’a pāpū maita’i, e aha tā tātou arata’ira’a ’e ’aore rā ’ei ti’a’au « ’i ni’a i te mau heheura’a ’e te mau fa’auera’a ho’i » ? (’īrava 3).

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 67

Tē ha’api’i mai nei Te Ha’api’ira’a Tumu ’e te mau Fafaura’a nō ni’a ia Iesu Mesia.

• ’A parau i tā ’outou mau tamari’i e mea nāhea te mau heheura’a a Iosepha Semita i te nene’ira’ahia i roto i te hō’ē buka (hi’o « Pene 23 : Te Parau Ha’api’ira’a ’e te Mau Parau Fafau [i teienei Te Ha’api’ira’a Tumu ’e te mau Fafaura’a] », i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 90–92, ’e ’aore rā, te video i roto i te Vaira’a buka ’evanelia). E tauturu ia rātou ’ia ha’amana’o i te tahi mau mea tā ’outou i ’apo mai nō ni’a ia Iesu Mesia nā roto mai i Te Ha’api’ira’a Tumu ’e te mau Fafaura’a i teie matahiti. E nehenehe ato’a ’outou e fa’a’ite i te tahi ’e i te tahi i te mau ’īrava au-roa-hia e ’outou nō roto i Te Ha’api’ira’a Tumu ’e te mau Fafaura’a.

  Chapter 23: The Doctrine and Covenants: August–November 1831

• E nehenehe ato’a ’outou e fa’a’ite i tā ’outou mau tamari’i i te Bibilia, te Buka a Moromona, Te Ha’api’ira’a Tumu ’e te mau Fafaura’a, ’e te Poe Tao’a Rahi, ’e ’ia paraparau ’e ’o rātou nō ni’a i te huru o te ta’a-’ē-ra’a ’e tō rātou tū’atira’a (hi’o i te mau fa’ata’ara’a o teie mau buka i roto i te Arata’i nō te mau pāpa’ira’a mo’a). Nāhea tātou e ’ite ai ē, e parau mau te mau pāpa’ira’a mo’a ? E aha tā tātou e ha’api’i mai roto i Te Ha’api’ira’a Tumu ’e te mau Fafaura’a 67:4, 9 nō ni’a i te mau heheura’a tā te Fatu i hōro’a ia Iosepha Semita ra ?

Te Ha’api’ira’a Tumu ’e te mau Fafaura’a 68:25–31

E nehenehe au e bāpetizohia ’ia ti’a ana’e tō’u va’u matahiti.

• I roto i Te Ha’api’ira’a Tumu ’e te mau Fafaura’a 68:27, ’ua fa’a’ite mai te Fatu ē, e aha te matahiti e ti’a ai i te vetahi ’ia bāpetizohia. Tauturu i tā ’outou mau tamari’i ’ia ’ite e aha tāna i parau. Nō te aha ’o Iesu i hina’aro ai ’ia bāpetizohia tātou ? E nehenehe te tahi hīmene mai te « Baptême » (Chants pour les enfants, 54) e tauturu. Ma te fa’a’ohipa i te mau hōho’a ’e ’aore rā te mau ’īrava 25–31 (’e ’aore rā, to’opiti), e tauturu i tā ’outou mau tamari’i ’ia ’ite i te mau mea tā te Fatu e hina’aro i te mau tamari’i ’ia ’apo mai.

• E tai’o e tā ’outou mau tamari’i nō ni’a i te ’ohipa tā te Fatu i hōro’a ’ia Oliver Cowdery i roto i te upo’o tufa’a nō Te Ha’api’ira’a Tumu ’e te mau Fafaura’a 69. E aha te a’ora’a tā te Fatu i hōro’a mai i roto i te ’īrava 1 ? Nō te aha e mea faufa’a ’ia ti’a noa i pīha’i iho i te mau ta’ata « parauti’a ’e te ha’apa’o maita’i » ? Pēnei a’e e nehenehe tā ’outou mau tamari’i e parau nō ni’a i te hō’ē ta’ata tā rātou i mātau e « mea parauti’a ’e te ha’apa’o maita’i. » ’A hīmene ’āmui tātou i te tahi hīmene tei fa’aitoito i te mau tamari’i ’ia parauti’a ’e ’ia ha’apa’o maita’i rātou mai te Fa’aora te huru, mai « Jésus-Christ est mon modèle » (Chants pour les enfants, 40–41). Nāhea tātou e ha’apāpū ai ē, e mea parauti’a tātou ’e te ha’apa’o maita’i i te Fatu ? Nāhea ’oia e nehenehe ai e fa’a’ohipa ia tātou nō te ha’amaita’i ia vetahi ’ē ’ia parauti’a ana’e tātou ’e ’ia ha’apa’o maita’i ?

Nō te tahi atu ā mana’o, ’a hi’o i te ve’a Hoa nō teie ’āva’e.

’Ua nene’ihia te buka nō te mau fa’auera’a, te ’omura’a o Te Ha’api’ira’a Tumu ’e te mau Fafaura’a, i ni’a i te hō’ē mātini nene’i parau mai teie te huru.