Detalye halin sa The Restoration of the Melchizedek Priesthood [Ang Pananumbalik sang Melchizedek Priesthood], ni Liz Lemon Swindle

Hulyo 28–Agosto 3: “Ang Gahum sang Pagkadiosnon”

Doktrina kag mga Kasugtanan 84

Halin sang ginpanumbalik ang priesthood sang 1829, ginbugayan ang nauna nga mga Santos paagi sa sagrado nga gahum sang Ginuo. Ginbunyagan sila, ginkumpirma, kag gintawag nga magserbisyo paagi sa awtoridad sang priesthood, pareho sa aton sa karon. Pero ang pagtigayon nga makagamit sang gahum sang priesthood lain nga bagay sa lubos nga pag-intiendi sini, kag madamo pa ang gusto sang Dios nga maintiendihan sang Iya mga Santos—ilabi na gid sa nagahilapit sadto nga pagpanumbalik sang mga ordinansa sang templo. Ang 1832 nga rebelasyon parte sa priesthood, nga karon amo na ang Doktrina kag mga Kasugtanan 84, nagpasangkad sang panan-awon sang mga Santos parte sa kon ano gid bala ang priesthood. Kag mahimo man ini sa aton sa karon. Kon pamensaron gid, kadamo pa sang dapat matun-an parte sa diosnon nga gahum nga nagakapot “sang yabi sang ihibalo parte sa Dios,” nga nagapakita paagi sa “gahum sang pagkadiosnon,” kag nagahanda sa aton nga “makakita sang nawong sang Dios, sa pagkamatuod sang Amay, kag mabuhi” (mga bersikulo 19–22).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 84:17–32

Malab-ot ko ang gahum kag mga bugay sang priesthood sang Dios.

Kon hunahunaon mo ang tinaga nga priesthood, ano ang nagasulod sa imo kaisipan? Paano nagaimpluwensya ang gahum sang priesthood sang Dios sa imo kabuhi?

Pagkatapos nga binagbinagon ining mga pamangkot, pwede mo tun-an ang Doktrina kag mga Kasugtanan 84:17–32, nga ginapangita kon ano ang gusto sang Dios nga mahibal-an mo parte sa Iya gahum sang priesthood. Pamensara kon paano mo gamiton ining mga bersikulo para ilarawan ang priesthood kag ang mga katuyuan sini sa isa ka tawo.

Isa nga makita mo amo nga paagi sa mga ordinansa sang priesthood “ang gahum sang pagkadiosnon ginapakita” (tan-awa sa mga bersikulo 19–21). Basi pwede mo ilista ang mga ordinansa sang priesthood nga imo naentrahan (makabulig ang mga listahan sa Libro sang Pangkabilogan nga Pagsulundan, 18.1, 18.2). Paano gindala sining mga ordinansa—kag sang kaangot nga mga kasugtanan—ang gahum sang Dios sa imo kabuhi? Ano ayhan ang imo kabuhi kon wala ini?

Gintudlo ni Pangulong Russell M. Nelson, “Ang kada babayi kag kada lalaki nga nagahimo sang kasugtanan sa Dios kag nagatuman sining mga kasugtanan, kag nagapartisipar nga takos sa mga ordinansa sang priesthood, may direkta nga kinamatarong sa gahum sang Dios” (“Espirituhanon nga mga Manggad,” Liahona, Nob. 2019, 77). Pamensara nga tun-an ang mensahe ni Pangulong Nelson, nga ginapangita ang mga paagi nga imo “batunon ang gahum sang Manluluwas sa [imo] kabuhi.”

Tan-awa man sa Doktrina kag mga Kasugtanan 25:10, 13, 15; 121:34–37, 41–46; Libro sang Pangkabilogan nga Pagsulundan, 3.6, Librarya sang Ebanghelyo.

Doktrina kag mga Kasugtanan 84:31–44

Ang priesthood mabaton nga may upod nga panumpa kag kasugtanan.

Ang panumpa kag kasugtanan sang priesthood (tan-awa sa Doktrina kag mga Kasugtanan 84:31–44) may pinasahi nga gamit para sa mga anak nga lalaki sang Amay nga Langitnon nga gin-ordin sa isa ka palangakuan sang priesthood, pero madamo sa ginpromisa nga mga bugay sa sining mga bersikulo ang para sa tanan nga anak sang Dios. Ano ining mga promisa, kag ano ang ginapangayo sang Dios sa aton para mabaton naton ini?

Si Elder Paul B. Pieper nagtudlo: “Talalupangdon nga sa panumpa kag kasugtanan sang pagkapari [tan-awa sa Doktrina kag mga Kasugtanan 84:31–44], gingamit sang Ginuo ang mga tinaga nga angkon kag baton. Wala Sia naggamit sang tinaga nga ordin. Sa sulod sang templo nga ang mga lalaki kag mga babayi—ululupod—nga nagaangkon kag nagabaton sang mga bugay kag gahum sang pareho Aaronic kag Melchizedek nga Priesthood” (“Revealed Realities of Mortality,” Ensign, Ene. 2016, 21).

Samtang ginatun-an mo ang Doktrina kag mga Kasugtanan 84:31–44, binagbinaga kon ano ayhan ang buot silingon sang “mag-angkon” kag “magbaton” sang priesthood. Ano ang kinalain sini sa pag-ordin sa palangakuan sang priesthood? Ano pa ang ginaagda sang Ginuo nga imo batunon sa sining mga bersikulo? Paano mo ina ginahimo?

Ano ang nakita mo nga nagainspirar sa imo nga mangin mas matinuohon sa pagbaton sang Manluluwas, sang Iya Amay, sang Iya mga alagad, kag sang gahum sang Iya priesthood?

Tan-awa man sa Doktrina kag mga Kasugtanan 121:36–46.

Doktrina kag mga Kasugtanan 84:43–61

Ang pagpangabuhi sang pulong sang Dios nagadala sang kasanag kag kamatuoran sa akon kabuhi.

Ano nga mga kamatuoran ang imo nakita sa Doktrina kag mga Kasugtanan 84:43–61 nga nagabulig sa imo nga makaintiendi kon ngaa kinahanglan mo nga sige-sigehon ang pagtuon sang pulong sang Dios? Tandai ang kinalain sang kasanag kag kadulom sa sining mga bersikulo; paano nagdala sang kasanag, kamatuoran, kag sang “Espiritu ni Jesucristo” sa imo kabuhi ang imo “pagpamati sing maayo sa mga pulong sang kabuhi nga wala’y katapusan” ? (mga bersikulo 43, 45).

Tan-awa man sa 2 Nefi 32:3.

Ikumparar ang mga prinsipyo sang ebanghelyo sa pamilyar nga mga butang. May madumduman ka bala nga paanggid nga magalarawan sang mga kamatuoran sa mga bersikulo 43–44? Halimbawa, paano ang pagpangabuhi sang “tagsa ka pulong … sang Dios” pareho sa pagsunod sang tanan nga proseso sa recipe ?

“Magpamati sing maayo sa mga pulong sang kabuhi nga wala’y katapusan.”

Doktrina kag mga Kasugtanan 84:62–91

Pagaupdan ako sang Ginuo kon ara ako sa pagserbisyo sa Iya.

Samtang ginabasa mo ining mga bersikulo, pwede mo pangitaon ang mga paagi nga ginsiling sang Ginuo nga Iya suportahan ang Iya mga alagad. Paano ayhan magamit ining mga promisa sa buluhaton nga ginapahimo Niya sa imo? Halimbawa, paano natuman ang mga promisa sa bersikulo 88 sa imo kabuhi?

Doktrina kag mga Kasugtanan 84:106–110

Ang tanan makabulig sa buluhaton sang Dios.

Ano ang imo matun-an sa sining mga bersikulo parte sa kon paano ginatuman sang Ginuo ang Iya buluhaton? Ano nga laygay kag mga bugay ang imo nakita? Pwede mo man hunahunaon kon paano ka “[napasanagan] sa bug-os nga kalulo” tungod nagserbisyo ka upod sa tawo nga “mabaskog sa Espiritu,” dala na ang mga tawo sa imo pamilya.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 84:4–5

Ang mga ordinansa sang templo nagabulig sa akon nga maghanda sa pagpuyo liwat upod sa Amay nga Langitnon.

• Para buligan ang imo kabataan nga malipayon nga magpaabot sa pagkadto sa templo, pwede ka maghimo sang puzzle halin sa litrato sang templo. Sa likod sang kada parte, pwede mo isulat ang aton ginahimo sa templo, pareho sang pagpabunyag para sa mga katigulangan, pagselyo sang aton mga pamilya, kag paghimo sang mga kasugtanan upod sa Dios. Basaha ang Doktrina kag mga Kasugtanan 84:4–5 upod sa imo kabataan, kag pangabaya sila nga pamatian kon ano ang ginsugo sang Ginuo nga ipatindog sang mga Santos. Samtang ginakay-o ninyo sang imo kabataan ang puzzle, iistorya sa kada isa ang pwede naton himuon para maghanda sa pagsulod sa templo.

Doktrina kag mga Kasugtanan 84:19–22

Mabaton ko ang gahum sang Amay nga Langitnon paagi sa mga ordinansa sang priesthood.

• Para buligan ang imo kabataan nga maintiendihan kon ano ang ordinansa, pamensara nga magpangita sang mga litrato sang pila ka ordinansa sang priesthood upod sa ila, pareho sang Libro sang mga Larawan nga Pang-ebanghelyo, no. 103–8, ukon sa pahina sang kahiwatan sini nga semana. Ipalaragway sa ila kon ano ang nagakatabo sa tagsa ka litrato. Dayon pwede ninyo basahon sing ululupod ang Doktrina kag mga Kasugtanan 84:19–22. Ngaa gusto sang Amay nga Langitnon nga mabaton naton ining mga ordinansa? Iistorya sa imo kabataan kon paano mo nabatyagan ang gahum sang Dios tungod sa mga ordinansa nga imo nabaton kag sa mga kasugtanan nga imo ginhimo. (Tan-awa man sa “Gahum, Awtoridad, kag mga Yabi sang Priesthood” sa appendix A ukon appendix B.)

Doktrina kag mga Kasugtanan 84:77

Abyan ako ni Jesus kon ginasunod ko Sia.

• Pagkatapos nga basahon sing ululupod ang Doktrina kag mga Kasugtanan 84:77, pamangkuta ang imo kabataan kon ano ang buot silingon sang mangin abyan. Pwede mo iistorya ang parte sa maayo mo nga mga abyan. Paano ginapakita ni Jesus sa aton nga gusto Niya kita nga mangin Iya mga abyan? Paano naton ipakita nga gusto man naton ina?

Doktrina kag mga Kasugtanan 84:88

Ginabuligan sang Amay nga Langitnon ang Iya mga alagad.

• Basi masadyahan ang imo kabataan sa pagpamati parte sa mga misyonero nga nagbulig sa imo, sa inyo pamilya, ukon sa imo mga katigulangan nga magbaton sang ebanghelyo. Dayon pwede ninyo basahon ang espesyal nga promisa nga ginhimo sang Ginuo sa mga misyonero sa Doktrina kag mga Kasugtanan 84:88. Basi pwede manumdom ang imo kabataan sang mga aksyon nga bagay sining bersikulo. Pamensara ang pag-istorya parte sa panahon nga nagaserbisyo ka sa Ginuo kag nabatyagan mo nga upod mo Sia, pareho sa ginlaragway sa bersikulo 88. Pwede mo man buligan ang imo kabataan nga magpanumdom sang mga paagi nga mangin mga misyonero sila subong. Magpamatuod nga ginabuligan kita sang Amay nga Langitnon nga mahibal-an kon ano ang aton ihambal kon mag-istorya kita sa iban parte kay Jesucristo.

Para sa dugang nga mga ideya, tan-awa sa isyu sang Abyan nga magasin sini nga bulan.

Templo sang Rome Italy