Detalye manipud iti Ti Pannakaisubli ti Melchizedek Priesthood, ni Liz Lemon Swindle

Hulio 28–Agosto 3: “Ti Bileg ti Kinadios”

Doktrina ken Katulagan 84

Manipud pay idi naisubli ti priesthood idi 1829, naparaburan dagiti immuna a Santo babaen ti sagrado a bileg ti Apo. Nabuniagan, nakumpirmaan, ken naawaganda nga agserbi babaen ti turay ti priesthood, kas met laeng kadatayo iti agdama. Ngem ti kaadda ti pannakagun-od iti bileg ti priesthood ket saan a kapadpada ti naan-anay a pannakaawat iti daytoy, ket ad-adu pay ti kayat ti Dios a maawatan dagiti Santona—nangnangruna iti sumangbay a pannakaisubli dagiti ordinansa ti templo. Ti 1832 a paltiing iti priesthood, itan ti Doktrina ken Katulagan 84, nangpadakkel iti pannirigan dagiti Santo maipapan no ania a talaga ti priesthood. Ket maaramidna iti isu met laeng para kadatayo iti agdama. Ngamin, adu ti masursuro maipapan iti nadiosan a bileg nga iggemna “ti tulbek ti pannakaammo iti Dios,” a mangiparangarang iti “bileg ti kinadios,” ket tapno mangisagana kadatayo a “makakita iti rupa ti Dios, nga isu ti Ama, ken agbiag” (dagiti bersikulo 19–22).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 84:17–32

Adda pannakagun-odko iti bileg ken dagiti bendision ti priesthood ti Dios.

No panunotenyo ti balikas a priesthood, ania ti sumrek iti panunotyo? Kasano a mangimpluensia ti bileg ti Dios iti biagyo?

Kalpasan ti panangutobyo kadagitoy a saludsod, mabalinyo nga adalen ti Doktrina ken Katulagan 84:17–32, a mangsapsapul no ania ti kayat ti Dios a maammuanyo maipanggep iti bileg ti priesthood-na. Ibilang no kasano a mausaryo dagitoy a bersikulo a mangiladawan iti priesthood ken dagiti panggepna iti maysa a tao.

Maysa a banag a masarakanyonto ket babaen kadagiti ordinansa ti priesthood “maiparangarang ti bileg ti kinadios” (kitaen kadagiti bersikulo 19–21). Nalabit a mabalinyo nga ilista dagiti ordinansa ti priesthood a nakairamananyo (ti listaan iti Sapasap a Handbook, 18.1, 18.2, ket makatulong). Kasano a dagitoy nga ordinansa—ken dagiti nainaig a katulagan—ket nangyeg iti bileg ti Dios iti biagyo? Ania koma ti kayarigan ti biagyo no awan dagitoy?

Insuro ni Presidente Russel M. Nelson: “Tunggal babai ken lalaki a makitulag iti Dios ken agtungpal kadagita a katulagan, ken maikari a makiraman kadagiti ordinansa ti priesthood, ket direkta a magun-odna ti bileg ti Dios” (“Spiritual Treasures,” Liahona, Nob. 2019, 77). Ibilangyo ti panagadal iti mensahe ni Presidente Nelson, a mangsapsapul kadagiti wagas a mabalinyo a “magun-od ti bileg ti Mangisalakan iti biag[yo].”

Kitaen met iti Doktrina ken Katulagan 25:10, 13, 15; 121:34–37, 41–46; Topics and Questions, “Priesthood,” “Joseph Smith’s Teachings about Priesthood, Temples, and Women,” Gospel Library; Sapasap a Handbook, 3.6, Gospel Library.

Doktrina ken Katulagan 84:31–44

Magun-od ti priesthood nga addaan iti sapata ken katulagan.

Addaan ti sapata ken katulagan ti priesthood (kitaen iti Doktrina ken Katulagan 84:31–44) iti naisangsangayan a panangaramat para kadagiti annak a lallaki ti Nailangitan nga Ama a maordenan iti saad [office] ti priesthood, ngem adu kadagiti naikari a bendision kadagitoy a bersikulo ti sidadaan a magun-od ti amin nga annak ti Dios. Ania dagitoy a kari, ken ania ti idawat ti Dios nga aramidentayo tapno umawat kadagitoy?

Insuro ni Elder Paul B. Pieper: “Makaay-ayo a ti sapata ken katulagan ti priesthood [kitaen iti Doktrina ken Katulagan 84:31–44[, usaren ti Apo dagiti verbo a gun-oden ken awaten. Saanna nga usaren ti verbo nga ordenan. Iti templo a gun-oden ken awaten dagiti lallaki ken babbai—nga aggigiddan—dagiti bendision ken bileg ti agpada nga Aaronic ken Melchizedek Priesthood” (“Revealed Realities of Mortality,” Ensign, Ene. 2016, 21).

Bayat ti panangbasayo iti Doktrina ken Katulagan 84:31–44, utobenyo no ania ti kayat a sawen ti “gun-oden” ken “awaten” ti priesthood. Kasano a maigiddiat daytoy iti pannakaorden iti saad ti priesthood? Ania pay ti yawis kadakayo ti Apo a mangawat kadagitoy a bersikulo? Kasano nga ar-aramidenyo dayta?

Ania ti masarakanyo a mangparegta kadakayo tapno ad-adda nga agbalinkayo a napudno iti panangawat iti Mangisalakan, ti Amana, dagiti katulonganna, ken ti bileg ti priesthoodna?

Kitaen met iti Doktrina ken Katulagan 121:36–46.

Doktrina ken Katulagan 84:43–61

Ti panagbiag babaen ti balikas ti Dios ket mangisangbay iti silaw ken kinapudno iti biagko.

Ania dagiti kinapudno a masarakanyo iti Doktrina ken Katulagan 84:43–61 a mangtulong kadakayo a makaawat no apay a kasapulan ti agtultuloy a panagadal iti balikas ti Dios? Kitaen ti panaggidiat ti lawag ken sipnget kadagitoy a bersikulo; kasano ti “panangipasnekyo a dumngeg kadagiti balikas ti agnanayon a biag” ket nangyeg iti silaw, kinapudno, ken “ti Espiritu ni Jesucristo” iti biagyo? (dagiti bersikulo 43,45).

Kitaen met iti 2 Nephi 32:3.

Idilig dagiti pagbatayan ti ebanghelio kadagiti pamiliar a banag. Makapanunotka kadi iti maysa nga analohia a mangipakita kadagiti kinapudno kadagiti bersikulo 43–44? Kas pagarigan, kasano ti panangsurot kadagiti amin nga addang iti maysa a resipe a kas iti panagbiag “babaen ti tunggal balikas … ti Dios”?

“Napasnek a dumngeg kadagiti balikas ti agnanayon a biag.”

Doktrina ken Katulagan 84:62–91

Kaduaennakto ti Apo no addaak iti serbisiona.

Bayat ti panagbasayo kadagitoy a bersikulo, mabalinyo nga ilasin dagiti wagas a nagkunaan ti Apo a suportaranna dagiti katulonganna. Kasano a mayaplikar dagitoy a kari iti aramid nga indawatna nga aramidenyo? Kas pagarigan, kasano a naipatungpal dagiti kari iti bersikulo 88 iti biagyo?

Doktrina ken Katulagan 84:106–110

Makaited tulong ti tunggal maysa iti aramid ti Dios.

Ania ti masursuroyo manipud kadagitoy a bersikulo maipanggep iti no kasano nga ipatungpal ti Apo ti aramidna? Ania ti balakad ken dagiti bendision a masarakanyo? Mabalinyo pay a panunoten no kasano a “napabilegkayo iti amin a kinaemma” gapu ta nagserbikayo iti maysa a “napigsa iti Espiritu,” agraman dagiti kameng iti pamiliayo.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 84:4–5

Tulongannak dagiti ordinansa iti templo nga agsagana a makipagnaed manen iti Nailangitan nga Ama.

• Tapno matulonganyo dagiti annakyo a mangpadpadaan iti ipapan iti templo, mabalinmo ti mangparnuay iti maysa a puzzle manipud iti ladawan ti maysa a templo. Iti likud ti tunggal pedaso, mabalinyo nga isurat ti maysa a banag nga ar-aramidentayo iti templo, kas iti pannakabuniag para kadagiti kapuonan, pannakailantip kadagiti pamiliatayo, ken pannakitulag iti Dios. Basaenyo ti Doktrina ken Katulagan 84:4-5 a kadua dagiti annakyo, ket kiddawen kadakuada a dumngeg no ania ti imbilin ti Apo kadagiti Santo a bangonenda. Bayat ti panangbukelyo ken dagiti annakyo iti puzzle a sangkamaysa, ibinglayyo iti tunggal maysa dagiti banag a mabalintayo nga aramiden tapno agsagana a sumrek iti templo.

Doktrina ken Katulagan 84:19–22

Maawatko ti bileg ti Nailangitan nga Ama babaen kadagiti ordinansa ti priesthood.

• Tapno matulongan dagiti annakyo a makaawat no ania ti ordinansa, ibilangyo ti panangkita kadagiti ladawan ti sumagmamano nga ordinansa ti priesthood a kadua ida, kas iti Libro ti Arte ti Ebanghelio, num.103–8, wenno ti panid ti aktibidaditi daytoy a lawas. Idawat kadakuada a mangiladawan no ania ti mapaspasamak iti tunggal ladawan. Kalpasanna aggigiddankayo a mangbasa iti Doktrina ken Katulagan 84:19–22. Apay a kayat ti Nailangitan nga Ama nga awatentayo dagitoy nga ordinansa? Ibagayo kadagiti annakyo no kasano a nariknayo ti bileg ti Dios gapu kadagiti ordinansa nga inawatyo ken katulagan nga inaramidyo. (Kitaen met iti “Priesthood Power, Authority, and Keys” iti appendix A wenno appendix B.)

Doktrina ken Katulagan 84:77

Gayyemnak ni Jesus bayat ti panangsurotko Kenkuana.

• Kalpasan ti panangbasayo iti Doktrina ken Katulagan 84:77 nga aggigiddan, saludsodenyo kadagiti annakyo maipapan iti no ania ti kayat a sawen ti agbalin a maysa a gayyem. Mabalinyo nga isarita maipapan kadagiti nasayaat a gagayyemyo. Kasano nga ipakita kadatayo ni Jesus a kayatna nga agbalintayo a gagayyemna? Kasano a maipakitatayo a kayattayo met dayta? Maysa a kanta kas iti “I’m Trying to Be like Jesus” (Children’s Songbook, 78–79) ti makatulong iti daytoy a saritaan.

Doktrina ken Katulagan 84:88

Tulongan ti Nailangitan nga Ama dagiti katulonganna.

• Mabalin a magustuan dagiti annakyo iti panagdengngeg maipapan no kasano a tinulongandakayo dagiti misionario, ti pamiliayo, wenno dagiti kapuonanyo a mangawat ti ebanghelio. Kalpasanna mabalinyo a basaen maipapan iti naisangsangayan a kari nga inaramid ti Apo kadagiti misionario iti Doktrina ken Katulagan 84:88. Mabalin a mapanunot dagiti annakyo dagiti tignay a maikuyog iti daytoy a bersikulo. Ibilangyo ti panangibinglay maipapan iti maysa a panawen idi agserserbikayo iti Apo ket nariknayo a kaduayo Isuna, kas iti nailadawan iti bersikulo 88. Mabalinyo pay a tulongan dagiti annakyo a mangpanunot kadagiti wagas a pakapagbalinanda a misionario itan. Paneknekanyo a tulongannatayo ti Nailangitan nga Ama a mangammo no ania ti isaotayo no pagsasaritaantayo kadagiti dadduma maipapan ken ni Jesucristo.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Templo iti Rome Italy