“Agosto 18–24: ‘Pagbatayan nga addaan iti Kari’: Doktrina ken Katulagan 89–92,” Umaykayo, Sumurot Kaniak—Para iti Pagtaengan ken Simbaan: Doktrina ken Katulagan 2025 (2025)
“Doktrina ken Katulagan 89–92,” Umaykayo, Sumurot Kaniak—Para iti Pagtaengan ken Simbaan: 2025
Agosto 18–24: “Pagbatayan nga addaan iti Kari”
Doktrina ken Katulagan 89–92
Iti Pagadalan dagiti Propeta, insuro ni Propeta Joseph Smith kadagiti elder ti Israel maipapan iti panangbangon iti pagarian ti Dios iti daga. Napaglilinnawaganda dagiti naespirituan a kinapudno, sangkamaysada a nagkararag, nagayuno, ken nagsagana a mangikasaba iti ebanghelio. Ngem adda maysa a banag maipapan iti aglawlaw a mabalin a kasla di gagangay kadatayo iti agdama, ken kasla saan met a nasayaat para ken ni Emma Smith idi. Kabayatan dagiti miting, nagsigarilio dagiti lallaki ken nagmuskadada iti tabako, a saan a gagangay idi a panawen, ngem namansaanna dagiti suelo a kayo iti nangisit ken naaddaan iti nakaro nga angot iti angin. Imbaga ni Emma dagiti pakaseknanna ken ni Joseph, ket nagsaludsod ni Joseph iti Apo. Sinungbatanna iti paltiing a nangnangruna pay ngem iti asuk ken mansa ti tabako. Daytoy ti nangted kadagiti Santo, para kadagiti umay a kaputotan, iti “pagbatayan nga addaan iti kari”—dagiti kari ti pisikal a salun-at, “sirib,” ken “dakkel a kinabaknang iti pannakaammo” (Doktrina ken Katulagan 89:3, 19).
Kitaen met iti Saints, 1:166–68.
Dagiti Kapanunotan iti Panagsursuro iti Pagtaengan ken iti Simbaan
Inikkannak ti Apo iti Nainsiriban a Balikas a mangtulong kaniak nga agbalin a nasalun-at iti bagi ken espiritu.
Idi damo a mangngegan dagiti panglakayen ni Joseph Smith a nangbasa iti Nainsiriban a Balikas iti Pagadalan dagiti Propeta, dinagdagusda nga “impatayok dagiti suakoda ken impuruakda dagiti tulalo a muskada a tabako iti apuy” (Saints, 1:168). Kinayatda nga ipakita ti kinatallugodda nga agtungpal iti Apo. Nalabit napadasanyon ti “nangipatayok” manipud iti biagyo kadagiti sustansia a maikontra iti imballaag ti Nainsiriban a Balikas, ngem ania pay ti masursuroyo manipud iti daytoy a paltiing? Ibilangyo dagitoy a kapanunotan:
-
Panunoten maipapan iti paltiing a kas maysa a “pagbatayan nga addaan iti kari” (bersikulo 3)—panagibtur kadagiti kinapudno a mangiwanwan iti panagaramid iti pangngeddeng. Ania dagiti pagbatayan ti masarakanyo a mabalin a mangiwanwan kadagiti pangngeddengyo? Ania dagiti bendision nga ikari ti Apo? (kitaen kadagiti bersikulo 18–21). Kasano nga impatungpalna dagitoy a kari iti biagyo?
-
Ania dagiti pagarigan a nakitayon kadagiti “dakes ken panggep …iti puspuso dagiti agkukunsabo a tao” a mainaig iti Nainsiriban a Balikas? (bersikulo 4). Mainayon iti daytoy a paltiing, ania ti inted ti Apo a tumulong kadakayo a mangliklik wenno mangparmek kadagitoy a kinadakes?
-
Ania iti isuro kadakayo daytoy a paltiing maipapan iti Apo? Kasano a mainaig ti Nainsiriban a Balikas iti Doktrina ken Katulagan 29:34–35?
-
Ania ti naiparikna kadakayo nga aramidenyo a nasaysayaat a panangaywan iti bagiyo?
Mabalin a naaddaankayo kadagiti gundaway a mangilawlawag kadagiti dadduma no apay nga agbibiagkayo iti Nainsiriban a Balikas—ken mabalin nga ad-adu ti gundawayyo iti masanguanan. Ibilang no kasano a mausaryo dagitoy a gundaway a mangpaneknek iti Mangisalakan, ti kinasagrado dagiti bagitayo, ken dadduma pay a naespirituan a kinapudno. Para kadagiti kapanunotan, kitaen iti “Sagrado ti bagiyo,” Para iti Pigsa dagiti Agtutubo: Maysa a Pangiwanwan iti Panagpili, 22–29.
Kitaen met iti 1 Taga Corinto 6:19–20; Thomas S. Monson, “Principles and Promises,” Liahona, Nob. 2016, 78–79; Topics and Questions, “Word of Wisdom,” Gospel Library; “The Word of Wisdom,” iti Revelations in Context, 183–91; “Addiction,” “Physical Health,” Life Help, Gospel Library.
Principles and Promises
President Monson testifies of the blessings that come as we obey the Word of Wisdom.
Agsursuro ken mangisuro babaen kadagiti pagbatayan. Imbes a panangparnuay kadagiti listaan dagiti aramiden ken saan nga aramiden, mabalintayo ti agbiag babaen kadagiti pagbatayan a mangaramat iti kinawayatayo nga agpili ken pammati ken ni Cristo. Kas pagarigan, ibilang dagiti saludsod a maibatay iti pagbatayan a kas kadagitoy maipanggep iti Nainsiriban a Balikas: Ania kadagiti pagbatayan ti makaipaay iti pammaregta iti maysa a tao a mangikarkarigatan nga agtulnog iti Nainsiriban a Balikas? Ania dagiti pagbatayan a makaliwliwa kaniak no addaanak kadagiti problema iti salun-at iti baet ti panagbiagko iti Nainsiriban a Balikas?
Kayat ti Nailangitan nga Ama nga aywanantayo dagiti bagitayo.
Doktrina ken Katulagan 90:1–17
Ti Umuna a Panguluen ti agiggem “kadagiti tulbek ti pagarian.”
Iti benneg 90, nangted ti Apo kadagiti pangiturong maipapan “ti panagserbi ken panguluen” (bersikulo 12) da Joseph Smith, Sidney Rigdon, ken Frederick G. Williams—dagiti miembro nga awagantayo ita iti Umuna a Panguluen. Ania ti masursuroyo maipapan iti Umuna a Panguluen manipud kadagiti bersikulo 1–17? Ibilang ti panangrebyu kadagiti kallabes a mensahe manipud kadagiti miembro ti Umuna a Panguluen. Ania ti aramidenda a “mangurnos kadagiti amin nga aramid daytoy a simbaan ken pagarian”? (bersikulo 16). Kasano a maipakitayo a saan a “tagtagilag-anen a banag” dagita kadakayo? (bersikulo 5).
Ibilang ti panagkanta wenno panangbasa kadagiti balikas ti “Come, Listen to a Prophet’s Voice” (Hymns, no. 21) wenno sabali pay a kanta maipapan kadagiti propeta a mainaig kadagiti pannursuro kadagitoy a bersikulo. Kasano a natulongannakayo ti panagserbi ti Umuna a Panguluen a mangam-ammo iti Nailangitan nga Ama ken ni Jesucristo?
“Agkaykaysa ti amin a banag para iti pagimbaga[k].”
Utobenyo ti ania man kadagiti padasyo nga agpaneknek iti kari ti Apo iti Doktrina ken Katulagan 90:24. Ibilangyo ti panangisurat kadagiti padasyo ken panangibinglay kadagitoy iti maysa a miembro ti pamilia wenno maysa nga ipatpateg—mabalin a maysa nga agkasapulan iti kinatalged wenno pammaregta. No adda dagiti bendision nga ur-urayenyo pay laeng, utobenyo no ania ti maaramidyo tapno agtalinaed a napudno bayat ti panagur-urayyo a mangkita no kasano nga “agkaykaysa ti amin a banag para iti pagimbaganyo.”
Doktrina ken Katulagan 90:28–31
Asino ni Vienna Jaques?
Nayanak ni Vienna Jaques idi Hunio 10, 1787, iti Massachusetts. Maysa a babai nga addaan iti pammati nga aduan iti pamataudan iti kuarta, immuna a naam-ammo ni Vienna dagiti misionario idi 1831. Kalpasan a nagun-odna ti maysa a naespirituan a saksi a pudno ti mensaheda, nagbaniaga tapno makipagkita iti Propeta iti Kirtland, Ohio, a nagbuniaganna.
Nagtulnog ni Vienna iti balakad ti Apo kenkuana iti Doktrina ken Katulagan 90:28–31. Ti panagkonsagrarna iti Apo, agraman dagititi immun-una a donasion nga intedna iti Kirtland, ket dimteng iti napateg a panawen iti Simbaan, idi ikarkarigatan a gumatang dagiti lider iti daga a pakabangonanto ti Templo ti Kirtland. Ni Vienna ket “napudno, ken saan a … sadut” iti unos ti panagbiagna ken agingga a kinabaelanna ti “agbiag a sitatalna” (bersikulo 31) iti Salt Lake Valley, a nakatayanna iti edad a 96.
“Ipakita ti Espiritu ti kinapudno.”
Maipasangotayo amin kadagiti mensahe a naglaon iti “adu a banag … a pudno” ken “adu a banag … a saan a pudno” (Doktrina ken Katulagan 91:1–2). Ania dagiti balakad a masarakanyo iti benneg 91 a makatulong kadakayo a mangilasin iti kinapudno kadagiti mensahe a pakaipasanguanyo? Kaano a natulongannakayo ti Espiritu a nangilasin iti kinapudno manipud iti biddut?
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Ti Nainsiriban a Balikas ti mangtulong kaniak nga agbalin a nasalun-at iti bagi ken espiritu.
-
Tapno mayam-ammo ti benneg 89, nalabit a mabalinyo ken dagiti annakyo ti mangkita iti ladawan ti templo wenno agkansion iti kanta maipapan iti pisikal a salun-at, kas iti “The Lord Gave Me a Temple” (Children’s Songbook, 153), tapno maisuro a kasla templo dagiti bagitayo para kadagiti espiritutayo. Awisenyo dagiti annakyo a mangpanunot kadagiti wagas a pakaaywananda kadagiti bagida.
-
Tapno maammuan dagiti bilin ti Apo iti Doktrina ken Katulagan 89:10–17, mangidrowingkayo ken dagiti annakyo wenno kumitakayo kadagiti ladawan dagiti nasayaat a banag a mabalintayo a kanen wenno aramiden tapno mapagtalinaedtayo a nasalun-at dagiti bagitayo (kitaen ti ladawan ken iti panid ti aktibidad iti ungto daytoy a balabala). Ania ti imballaag ti Apo a saantayo nga usaren? Apay a kayatna nga aywanantayo dagiti bagitayo?
-
Imbalakad ni Elder Gary E. Stevenson kadagiti agtutubo nga agplanoda iti nasaksakbay no ania ti aramidenda no masulisogda iti arak wennno droga. Insurona, “Maammuanyonto a ti sulisog ket bumassit ti kontrolna kadakayo. Nakapangeddengkayon no kasano a sanguenyonto ken no anianto ti aramidenyo. Saan a nasken a mangeddengkayo iti tunggal kanito” (“Your Priesthood Playbook,” Liahona, Mayo 2019, 48). Kalpasan ti aggigiddan a panagbasayo iti Doktrina ken Katulagan 89:4 ken ti palawag ni Elder Stevenson, balakadanyo dagiti annakyo maipapan iti no kasano a makaikeddengda itan—iti nabati pay a biagda—tapno agbiag iti Nainsiriban a Balikas. Mabalinyo a yakem no kasanoda nga agresponde no ti maysa a tao, uray pay maysa a gayyem, ti mangidiaya kadakuada iti maysa a banag a maibusor iti Nainsiriban a Balikas. Kasano a bendisionannatayo ti Apo no tungpalentayo ti Nainsiriban a Balikas? (kitaen kadagiti bersikulo 18–21).
Sagut manipud iti Dios dagiti bagitayo.
Ikkannatayo ti Dios kadagiti propeta tapno maiwanwan ken masalaknibantayo.
-
Mabalinyo a kitaen dagiti ladawan dagiti nagkauna a propeta wenno kansionenyo ti kanta a kas iti “Follow the Prophet” (Children’s Songbook, 110–11). Kasano a binendisionan ti Dios dagiti annakna babaen kadagiti propetana? Apay a nasken a dumngegtayo kadagiti propeta ti Dios? (kitaen iti Doktrina ken Katulagan 90:5). Kalpasanna mabalinyo ken dagiti annakyo ti mangkita iti ladawan ti sibibiag a propeta ket ibinglayyo ti sumagmamano a banag nga insuro wenno pinakdaarannatayo ti Apo babaen kenkuana. Kasano a masurottayo ti propeta?
Matulongannak ti Espiritu a mangammo no ania ti pudno.
-
Mabalinyo a gupgopen ti paulo ti benneg para iti Doktrina ken Katulagan 91 tapno matulongan dagiti annakyo a makaawat no apay a naited daytoy a paltiing. Mabalinda ngarud a panunoten dagiti lugar, kas iti media, a masarakantayo dagiti “adu a banag … a pudno” ken “adu a banag … a saan a pudno” (dagiti bersikulo 1–2). Ania ti isuro dagiti bersikulo 4–6 kadatayo maipapan iti Espiritu Santo? Kasano a tulongannatayo ti Espiritu Santo a mangammo no ania ti rumbeng?
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
“Nasayaat amin a bukel a para iti taraon ti tao; kasta met iti bunga ti ubas.”