Naangay ti Pagadalan dagiti Propeta iti daytoy a siled.

Agosto 11–17: “Mangbangonkayo … iti Balay ti Dios”

Doktrina ken Katulagan 88

Tunggal masansan, ikkannatayo ti Apo iti maysa a bassit a pannakaawat iti awan patinggana a “kinatan-ok ken kinabileg[na]” (Doktrina ken Katulagan 88:47) babaen kadagiti agtultuloy a paltiing. TiDoktrina ken Katulagan 88 ket maysa a kita ti paltiing— maipapan iti silaw ken dayag ken dagiti pagarian a mamagbalin kadagiti naindagaan a pakaseknantayo a kasla bassit no idilig. Uray no ditayo maawatan amin dayta, mabalin a mariknatayo nga ad-adu nga amang ti adda iti kinaagnanayon ngem iti naamiristayo. Siempre, saan nga ibinglay ti Apo dagitoy naindaklan a kinapudno tapno mangbutbuteng kadatayo wenno mangiparikna a bassittayo. Kinaagpaysona, inkarina, “Umayto ti aldaw inton matukodyo ti Dios” (bersikulo 49; nainayon ti panangyunay-unay). Nalabit nga iti dayta nagloriaan a gibus a nangbilinan ti Apo kadagiti Santona iti Kirtland a mangbukel iti Pagadalan dagiti Propeta. “Urnosenyo dagiti bagbagiyo,” kinunana. “Isaganayo amin a kasapulanyo; ken mangbangonkayo … iti balay ti Dios” (bersikulo 119). Ad-adda ngem iti sadino man a lugar, iti uneg ti nasantuan a balay ti Dios—ken kadagiti pagtaengantayo—a kabaelanna nga itag-ay ti parmatatayo iti labes ti mortal a lubong, “waknitanna ti rupana [kadatayo]”, ken isagananatayo tapno “maawat iti celestial a gloria” (dagiti bersikulo 68, 22).

Kitaen iti Saints, 1:64–66.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 88

Idiaya ni Jesucristo kaniak ti talna.

Sumagmamano laeng nga aldaw kalpasan ti pammallaag a ti gubat “agsaknapto kadagiti amin a pagilian” (Doktrina ken Katulagan 87:2), inted ti Apo ti paltiing nga inawagan ni Joseph Smith iti “bulong ti olibo,” a tradisional a simbolo ti talna (Doktrina ken Katulagan 88, paulo ti benneg; kitaen met iti Genesis 8:11). Iti unos ti panangadalyo iti benneg 88 daytoy a lawas, sapulenyo dagiti mensahe ti Apo ti kappia kadakayo.

Doktrina ken Katulagan 88:6–67

Aggapu ti silaw ken paglintegan ken ni Jesucristo.

Dagiti balikas a silaw ken paglintegan ket naulit iti namin-adu iti benneg 88. Markaan wenno isurat dagiti bersikulo a nakasarakanyo dagitoy a balikas kadagiti bersikulo 6–67, ket isuratyo no ania ti masursuroyo maipapan iti silaw ken paglintegan—ken maipapan ken ni Jesucristo. Ania ti mariknayo a nakaparegtaanyo nga aramiden tapno umawat iti silaw ken agbiag iti “paglintegan ni Cristo”? (bersikulo 21).

Kitaen met iti Isaias 60:19; Juan 1:1–9; 3 Nephi 15:9; Timothy J. Dyches, “Light Cleaveth unto Light,” Liahona, Mayo 2021, 112–15; Sharon Eubank, “Christ: The Light That Shines in Darkness,” Liahona, Mayo 2019, 73–76.

Linaon dagiti nasantuan a kasuratan ti paglintegan ni Cristo.

Doktrina ken Katulagan 88:62–64

“Umasidegkayo kaniak.”

Ania dagiti padas a nangipakita kadakayo a pudno dagiti kari kadagitoy a bersikulo? Ania ti sumaruno nga addangmo tapno “umasideg” ken ni Cristo? Ibilangyo ti panangaramid iti himno a “Nearer, My God, to Thee” (Hymns, no. 100) a paset ti panagadal ken panagdaydayawyo.

Doktrina ken Katulagan 88:67–76

Makapagbalinak a nadalus babaen ti Pannubbot ni Jesucristo.

Ti bilin ti Apo a “pasantuenyo ti bagbagiyo” ket makita iti mamindua iti benneg 88 (dagiti bersikulo 68, 74). Ania iti panagkunayo ti kaipapanan daytoy a ragup ti balikas? Mabalinyo nga irebyu ti sumagmamano kadagiti binatog iti baba ti “Pannakapasanto” iti Pangiwanwan iti Nasantuan a Kasuratan (Gospel Library). Kasano nga agbalintayo a napasanto? Bay-an a daytoy a saludsod ti mangiwanwan iti panagadalyo iti Doktrina ken Katulagan 88:67–76, ken isuratyo dagiti ania man a naespirituan a pannakaammo ken pannakaawat a magun-odyo.

Doktrina ken Katulagan 88:77–80, 118–26

“Agadalkayo, uray pay ti panagadal ken kasta met ti pammati.”

Imbaga ti Apo kadagiti Santo a mangipasdek iti maysa a “pagadalan dagiti propeta” idiay Kirtland (Doktrina ken Katulagan 88:137). Kaaduan dagiti instruksion iti benneg 88 ti nangisuro kadakuada no kasano nga aramiden daytoy. Makatulong pay daytoy nga instruksion a “mangipasdek iti … balay a pagadalan” (bersikulo 119) iti bukodyo a biag. Kinapudnona, mabalinyo a sapulen kadagiti bersikulo 77–80 ken 118–26 kas dagiti blueprint a “mang-remodel iti pagtaenganyo [wenno biagyo] nga agbalin a sentro ti pagadalan iti ebanghelio” ken “santuario ti pammati” (Russell M. Nelson, “Becoming Exemplary Latter-day Saints,” Liahona, Nob. 2018, 113). Mabalin a makapainteres ti mangiladawan no ania ti mabalin a langa ti personal a “remodel-yo”, agraman dagiti ragup ti balikas manipud kadagitoy a bersikulo a mariknayo a nasken a yaplikaryo.

Mabalin pay a makatulong no sukisoken dagitoy a saludsod: Apay a napateg iti Apo ti panagsursuro ken edukasion? Ania ti kayatna nga adalek? Kasano ti kayatna a panagsursurok? Sapulen dagiti sungbat kadagitoy a saludsod kadagiti bersikulo 77–80 ken iti “Wayawayaannakayo ti kinapudno” (Para iti Pigsa dagiti Agtutubo: Maysa a Pangiwanwan iti Panagpili, 30–33).

Ania iti panagkunayo a kaipapanan ti agsursuro babaen “iti panagadal ken kasta met iti pammati”? (bersikulo 118). Ania dagiti nalawag a pannakaammo ken pannakaawat a magun-odyo manipud iti mensahe ni Elder Mathias Held “Seeking Knowledge by the Spirit”? (Liahona, Mayo 2019, 31–33).

Kitaen met iti Topics and Questions, “Seeking Truth and Avoiding Deception,” Gospel Library; “A School and an Endowment,” iti Revelations in Context, 174–82.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 88:33

Ikkannak ti Nailangitan nga Ama kadagiti nasayaat a sagut.

• Mabalinyo a rugian ti panaglilinnawag maipapan iti Doktrina ken Katulagan 88:33 babaen iti panangidawat kadagiti annakyo nga agsarita maipapan kadagiti sagut a naited kadakuada—agpada kadagiti inawatda a siraragsak ken dadduma pay a saanda nga inawat. Nalabit a mabalinda a yakem nga umaw-awatda iti sagut nga addaan iti rag-o. Kalpasanna mabalinyo a pagsasaritaan maipapan kadagiti sagut nga ited kadatayo ti Nailangitan nga Ama (kas iti sagut ti Espiritu Santo). Kasano nga awatentayo dagitoy a sagut nga addaan iti rag-o?

Doktrina ken Katulagan 88:63

No sapulek ti Mangisalakan, masarakakto.

• Naglaon tiDoktrina ken Katulagan 88:63 kadagiti pannignay a balikas (action words) a mabalin a mangparegta iti sumagmamano a naragsak nga aktibidad a mangallukoy kadagiti annakyo nga agkalikagum a makadenna ti Apo iti biagda. Kas pagarigan, makapagpanunotkayo ken dagiti annakyo kadi iti maysa nga ay-ayam a pagsaritaan ti ragup ti balikas a “sapulendak a sireregta ket masapulandakto ” (mainayon ti panangyunay-unay) wenno “agtuktokkayo ket malukatankayto”?

Kasapulan dagiti ubbing ti panagdumaduma. “Kaaduan kadagiti ubbing ti kasayaatan a makasursuro no mairaman ti adu a panagrikna. Mangsapul kadagiti wagas a pakatulongan dagiti ubbing a mangusar kadagiti panagriknada iti panagkita, panagdengngeg, ken panagsagid kabayatan ti panagsursuroda. Iti sumagmamano a situasion, mabalinyo a sapulen dagiti wagas a mairaman dagiti panagriknada iti panagangot ken panagraman!” (Panangisuro iti Wagas ti Mangisalakan, 32).

• Tapno mayunay-unay ti awis ti Mangisalakan nga “umasideg kaniak,” mabalinyo a kiddawen iti maysa nga ubing a mangiggem iti ladawan ni Jesus (kas iti ladawan iti ungto daytoy a balabala) iti maysa a bangir ti siled bayat ti panagtakder dagiti dadduma nga ubbing iti sabali a bangir. Bayat ti panangpanunot dagiti annakyo kadagiti banag a mabalinda nga aramiden tapno ad-adda nga umasidegda iti Mangisalakan, mabalinda ti agaddang nga agturong iti ladawan, ken mabalin ti agaddang ti ubing a mangig-iggem iti ladawan nga agturong kadagiti dadduma pay nga ubbing. Ibagayo kadagiti annakyo maipapan iti no kasano nga umasidegkayo iti Mangisalakan ken no kasano nga umasideg Isuna kadakayo. Mabalinyo pay ti makipagkansion kadakuada iti kanta maipapan iti daytoy a topiko, kas iti “I Feel My Savior’s Love” (Children’s Songbook, 74–75).

Doktrina ken Katulagan 88:77–80, 118

Kayat ti Nailangitan nga Ama nga agsursuroak.

• Idawat kadagiti annakyo a mangibaga kenka ti maipapan iti masursuroda iti pagadalan wenno Primary. Mabalinyo pay nga ibinglay ti sumagmamano a banag a masursuroyo. Kalpasanna, mabalinyo nga ipakita kadagiti annakyo dagiti balikas nga ania, apay, ken kasano. Tulongan ida a mangsukisok iti Doktrina ken Katulagan 88:77–79 tapno ammuen no ania ti kayat ti Apo a sursuruentayo. Kalpasanna aggigiddan a sapulen iti bersikulo 80 tapno ammuen no apay a kayatna nga agsursurotayo ken iti bersikulo 118 tapno ammuen no kasano ti nasken a panagsursurotayo.

“Agadalkayo …ti panagadal ken kasta met ti pammati.”

Doktrina ken Katulagan 88:119

Mabalin a nasantuan ti pagtaengantayo a kas iti templo.

• Bayat ti panangibasayo iti Doktrina ken Katulagan 88:119 kadagiti annakyo, mabalinda ti agaramid iti torre ti templo babaen kadagiti takiagda tunggal mangngeganda ti balikas a “balay.” Ilawlawag a kayat ti Nailangitan nga Ama a mangipasdek ni Joseph Smith ken dagiti Santo ti maysa a templo, wenno maysa a “balay ti Dios.”

• Mabalinyo a kiddawen kadagiti annakyo a mangpili iti pito a balikas a mangiladawan iti pagtaenganda. Kalpasanna tulongan ida a mangsapul, iti Doktrina ken Katulagan 88:119, iti pito a balikas nga us-usaren ti Apo a mangiladawan iti balayna. Kasano a maaramidtayo ti pagtaengantayo a maysa a “balay ti Dios”?

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Saan nga Agbuteng, ni Michael Malm