« ថ្ងៃទី ២៨ ខែ កក្កដា–ថ្ងៃទី ៣ ខែ សីហា ៖ ‹ អំណាចនៃព្រះ › ៖ គោលលទ្ធិ និងសេចក្តីសញ្ញា ៨៤ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )
« គោលលទ្ធិ និងសេចក្តីសញ្ញា ៨៤ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥
សេចក្តីលម្អិតមកពី The Restoration of the Melchizedek Priesthood [ ការស្តារបព្វជិតភាពម៉ិលគីស្សាដែកឡើងវិញ ] ដោយ លីស្ស លីម៉ូន ស្វីនឌល
ថ្ងៃទី ២៨ ខែ កក្កដា–ថ្ងៃទី ៣ ខែ សីហា ៖ « អំណាចនៃព្រះ »
គោលលទ្ធិ និងសេចក្តីសញ្ញា ៨៤
ចាប់តាំងពីបព្វជិតភាពត្រូវបានស្ដារឡើងវិញមកនៅក្នុងឆ្នាំ ១៨២៩ ពួកបរិសុទ្ធថ្ងៃចុងក្រោយសម័យដើមមានពរតាមរយៈអំណាចដ៏ពិសិដ្ឋរបស់ព្រះអម្ចាស់ ។ ពួកគេបានជ្រមុជទឹក ទទួលពិធីបញ្ជាក់ និងបានហៅឲ្យបម្រើដោយសិទ្ធិអំណាចបព្វជិតភាព គឺដូចគ្នានឹងយើងសព្វថ្ងៃនេះដែរ ។ ប៉ុន្ដែការមានអំណាចបព្វជិតភាពមិនមែនជារឿងដូចគ្នានឹងការយល់ពីវាទាំងស្រុងនោះទេ ហើយព្រះមានអ្វីបន្ថែមច្រើនទៀត ដែលទ្រង់សព្វព្រះទ័យឲ្យពួកបរិសុទ្ធរបស់ទ្រង់យល់—ជាពិសេសអំពីការស្ដារពិធីបរិសុទ្ធក្នុងព្រះវិហារបរិសុទ្ធឡើងវិញដែលនឹងកើតឡើង ។ វិវរណៈឆ្នាំ ១៨៣២ ស្ដីពីបព្វជិតភាព ឥឡូវនេះគឺ គោលលទ្ធិ និងសេចក្ដីសញ្ញា ៨៤ បានពង្រីកចក្ខុវិស័យរបស់ពួកបរិសុទ្ធអំពីអ្វីជាបព្វជិតភាពឲ្យពិតប្រាកដ ។ ហើយវាអាចធ្វើបានដូចគ្នាចំពោះយើងនាសព្វថ្ងៃដែរ ។ លើសពីនេះទៅទៀតនៅ មានអ្វីជាច្រើនដែលត្រូវរៀនអំពីអំណាចដ៏ទេវភាពដែលកាន់ « កូនសោនៃចំណេះវិជ្ជាពីព្រះ » ដែលបើកបង្ហាញពី « អំណាចនៃព្រះ » ហើយដែលរៀបចំយើងឲ្យ « មើលឃើញព្រះភក្ត្រនៃព្រះ គឺព្រះវរបិតា ហើយមានព្រះជន្មរស់ » ( ខទី ១៩–២២ ) ។
គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ
គោលលទ្ធិ និងសេចក្ដីសញ្ញា ៨៤:១៧–៣២
ខ្ញុំមានអំណាចបព្វជិតភាពរបស់ព្រះ និងពរជ័យ ។
នៅពេលបងប្អូនគិតអំពីពាក្យ បព្វជិតភាព តើគិតដល់អ្វី ? តើអំណាចបព្វជិតភាពរបស់ព្រះមានឥទ្ធិពលលើជីវិតរបស់បងប្អូនយ៉ាងដូចម្ដេច ?
បន្ទាប់ពីពិចារណាសំណួរទាំងនេះហើយ បងប្អូនអាចនឹងសិក្សា គោលលទ្ធិ និងសេចក្តីសញ្ញា ៨៤:១៧–៣២ ដោយរកមើលអ្វីដែលព្រះចង់ឲ្យបងប្អូនដឹងអំពីអំណាចបព្វជិតភាពរបស់ទ្រង់ ។ សូមពិចារណាអំពីរបៀបដែលបងប្អូនអាចប្រើខគម្ពីរទាំងនេះ ដើម្បីពិពណ៌នាអំពីបព្វជិតភាព និងគោលបំណងរបស់វាចំពោះនរណាម្នាក់ ។
រឿងមួយដែលបងប្អូននឹងរកឃើញ គឺតាមរយៈពិធីបរិសុទ្ធនៃបព្វជិតភាព « អំណាចនៃព្រះត្រូវបានសម្តែងឲ្យឃើញ » ( សូមមើល ខទី ១៩–២១ ) ។ ប្រហែលជាបងប្អូនអាចរាយបញ្ជីពិធីបរិសុទ្ធបព្វជិតភាព ដែលបងប្អូនបានចូលរួម ( បញ្ជីនៅក្នុង ក្បួនខ្នាតទូទៅ, ១៨.១, ១៨.២ អាចជួយបាន ) ។ តើពិធីបរិសុទ្ធទាំងនេះ—និងសេចក្ដីសញ្ញាដែលជាប់ទាក់ទង—បាននាំយកព្រះចេស្ដារបស់ព្រះមកដាក់ក្នុងជីវិតបងប្អូនដោយរបៀបណា ? តើជីវិតរបស់បងប្អូននឹងទៅជាយ៉ាងណាបើគ្មានវា ?
ប្រធាន ណិលសុន បានបានបង្រៀនថា « ស្ត្រី និងបុរសគ្រប់រូបដែលចុះសេចក្ដីសញ្ញាជាមួយព្រះ ហើយរក្សាសេចក្ដីសញ្ញាទាំងនោះ និងចូលរួមក្នុងពិធីបរិសុទ្ធបព្វជិតភាពដោយស័ក្ដិសម អាចទទួលព្រះចេស្ដារបស់ព្រះដោយផ្ទាល់ » ( « Spiritual Treasures » Liahona ខែ វិច្ឆិកា ឆ្នាំ ២០១៩ ទំព័រ ៧៧ ) ។ សូមពិចារណាសិក្សាសារលិខិតរបស់ប្រធាន ណិលសុន ដោយស្វែងរករបៀបដែលបងប្អូនអាច « ទាញយកព្រះចេស្ដារបស់ព្រះអង្គសង្គ្រោះមកដាក់ក្នុងជីវិត [ របស់បងប្អូន ] » ។
សូមមើលផងដែរ គោលលទ្ធិ និងសេចក្តីសញ្ញា ២៥:១០, ១៣, ១៥; ១២១:៣៤–៣៧, ៤១–៤៦; Topics and Questions « Priesthood » « Joseph Smith’s Teachings about Priesthood, Temples, and Women » នៅលើបណ្ណាល័យដំណឹងល្អ, ក្បួនខ្នាតទូទៅ, ៣.៦ នៅលើបណ្ណាល័យដំណឹងល្អ ។
គោលលទ្ធិ និងសេចក្ដីសញ្ញា ៨៤:៣១–៤៤
បព្វជិតភាពត្រូវបានទទួលដោយសម្បថ និងសេចក្តីសញ្ញា ។
សម្បថ និងសេចក្តីសញ្ញានៃបព្វជិតភាព ( សូមមើល គោលលទ្ធិ និងសេចក្តីសញ្ញា ៨៤:៣១–៤៤ ) អនុវត្តជាពិសេសសម្រាប់បុត្រារបស់ព្រះវរបិតាសួគ៌ ដែលត្រូវបានតែងតាំងនៅក្នុងតំណែងបព្វជិតភាព ប៉ុន្តែពរជ័យជាច្រើនដែលបានសន្យានៅក្នុងខគម្ពីរទាំងនេះមានសម្រាប់បុត្រាបុត្រីរបស់ព្រះទាំងអស់ ។ តើការសន្យាទាំងនេះមានអ្វីខ្លះ ហើយតើព្រះបង្គាប់ឲ្យយើងធ្វើអ្វីដើម្បីទទួលវា ?
អែលឌើរ ប៉ូល ប៊ី ផែបភើរ បានបង្រៀនថា ៖ « វាគួរឲ្យចាប់អារម្មណ៍ថា នៅក្នុងសម្បថ និងសេចក្ដីសញ្ញានៃបព្វជិតភាព [ សូមមើល គោលលទ្ធិ និងសេចក្ដីសញ្ញា ៨៤:៣១–៤៤ ] ព្រះអម្ចាស់ប្រើកិរិយាសព្ទ ទទួលបាន និង ទទួលយក ។ ទ្រង់ពុំប្រើកិរិយាសព្ទ តែងតាំង ទេ ។ វាគឺនៅក្នុងព្រះវិហារបរិសុទ្ធដែលបុរស និងស្ដ្រី—រួមគ្នា—ទទួលបានអំណាច និងទទួលពរជ័យនៃបព្វជិតភាពអើរ៉ុន និងទាំងម៉ិលគីស្សាដែក » ( « Revealed Realities of Mortality » Ensign ខែ មករា ឆ្នាំ ២០១៦ ទំព័រ ២១ ) ។
នៅពេលបងប្អូនសិក្សា គោលលទ្ធិ និងសេចក្តីសញ្ញា ៨៤:៣១–៤៤ សូមពិចារណាថាតើវាអាចមានន័យយ៉ាងណាដើម្បី « ទទួលបាន » និង « ទទួល » បព្វជិតភាព ។ តើការណ៍នេះខុសពីការតែងតាំងជាបព្វជិតភាពយ៉ាងដូចម្ដេច ? តើព្រះអម្ចាស់អញ្ជើញបងប្អូនឲ្យទទួលអ្វីទៀតនៅក្នុងខគម្ពីរទាំងនេះ ? តើបងប្អូនធ្វើយ៉ាងណា ?
តើបងប្អូនរកឃើញអ្វីខ្លះដែលបំផុសគំនិតបងប្អូនឲ្យកាន់តែស្មោះត្រង់ នៅក្នុងការទទួលយកព្រះអង្គសង្រ្គោះ ព្រះវរបិតារបស់ទ្រង់ អ្នកបម្រើរបស់ទ្រង់ និងអំណាចបព្វជិតភាពរបស់ទ្រង់ ?
សូមមើលផងដែរ គោលលទ្ធិ និងសេចក្តីសញ្ញា ១២១:៣៦–៤៦ ។
គោលលទ្ធិ និងសេចក្តីសញ្ញា ៨៤:៤៣–៦១
ការរស់នៅតាមព្រះបន្ទូលនៃព្រះ នាំមកនូវពន្លឺ និងសេចក្តីពិតមកក្នុងជីវិតរបស់ខ្ញុំ ។
តើបងប្អូនរកឃើញសេចក្ដីពិតអ្វីខ្លះនៅក្នុង គោលលទ្ធិ និងសេចក្តីសញ្ញា ៨៤:៤៣–៦១ ដែលជួយបងប្អូនឲ្យយល់អំពីមូលហេតុដែលបងប្អូនត្រូវសិក្សាបន្ទូលរបស់ព្រះឲ្យខ្ជាប់ខ្ជួន ? សូមកត់ត្រាភាពខុសគ្នារវាងពន្លឺ និងភាពងងឹតនៅក្នុងខគម្ពីរទាំងនេះ ហើយតើការ « ព្យាយាមស្ដាប់តាមព្រះបន្ទូលទាំងឡាយអំពីជីវិតដ៏នៅអស់កល្បជានិច្ច » នាំមកនូវពន្លឺ សេចក្ដីពិត និង « ព្រះវិញ្ញាណនៃព្រះយេស៊ូវគ្រីស្ទ » មកក្នុងជីវិតរបស់បងប្អូនដោយរបៀបណា ? ( ខទី ៤៣ ៤៥ ) ។
សូមមើល នីហ្វៃទី២ ៣២:៣ ។
សូមប្រៀបធៀបគោលការណ៍នៃដំណឹងល្អទៅនឹងអ្វីដែលធ្លាប់ស្គាល់ ។ តើបងប្អូនអាចគិតពីភាពស្រដៀងគ្នាដែលនឹងបង្ហាញការពិតនៅក្នុង ខទី ៤៣–៤៤ ដែរឬទេ ? ឧទាហរណ៍ តើការធ្វើតាមជំហានទាំងអស់នៅក្នុងរូបមន្តដូចជាការរស់នៅ « ដោយសារគ្រប់ទាំងព្រះបន្ទូល … ព្រះ » ?
« ព្យាយាមស្ដាប់តាមព្រះបន្ទូលទាំងឡាយអំពីជីវិតដ៏នៅអស់កល្បជានិច្ច » ។
គោលលទ្ធិ និងសេចក្ដីសញ្ញា ៨៤:៦២–៩១
ព្រះអម្ចាស់នឹងគង់ជាមួយខ្ញុំ នៅពេលខ្ញុំស្ថិតក្នុងការបម្រើដល់ទ្រង់ ។
កាលបងប្អូនអានខគម្ពីរទាំងនេះ បងប្អូនអាចរកឃើញរបៀបដែលព្រះអម្ចាស់បានមានព្រះបន្ទូលថា ទ្រង់នឹងគាំទ្រពួកអ្នកបម្រើរបស់ទ្រង់ ។ តើការសន្យាទាំងនេះអនុវត្តចំពោះកិច្ចការ ដែលទ្រង់បានសុំបងប្អូនឲ្យធ្វើដោយរបៀបណា ? ឧទាហរណ៍ តើការសន្យានៅក្នុង ខទី ៨៨ បានបំពេញនៅក្នុងជីវិតរបស់បងប្អូនដោយរបៀបណា ?
គោលលទ្ធិ និងសេចក្ដីសញ្ញា ៨៤:១០៦–១១០
មនុស្សគ្រប់គ្នាអាចរួមចំណែកដល់កិច្ចការរបស់ព្រះ ។
តើបងប្អូនរៀនអ្វីខ្លះចេញពីខគម្ពីរទាំងនេះអំពីរបៀបដែលព្រះអម្ចាស់សម្រេចបានកិច្ចការរបស់ទ្រង់ ? តើដំបូន្មាន និងពរជ័យអ្វីខ្លះដែលបងប្អូនរកឃើញ ? បងប្អូនក៏អាចគិតអំពីរបៀបដែលបងប្អូនបាន « ស្អាងឡើងក្នុងភាពស្លូតបូតគ្រប់យ៉ាង » ដោយសារបងប្អូនបានបម្រើជាមួយនរណាម្នាក់ដែល « បានចម្រើនកំឡាំងខាងវិញ្ញាណជាខ្លាំងឡើង » រួមទាំងមនុស្សនៅក្នុងគ្រួសាររបស់បងប្អូនដែរ ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
គោលលទ្ធិ និងសេចក្តីសញ្ញា ៨៤:៤–៥
ពិធីបរិសុទ្ធនៃព្រះវិហារបរិសុទ្ធជួយយើងរៀបចំខ្លួនដើម្បីរស់នៅជាមួយព្រះវរបិតាសួគ៌ម្តងទៀត ។
-
ដើម្បីជួយកូនៗរបស់បងប្អូនទន្ទឹងរង់ចាំទៅព្រះវិហារបរិសុទ្ធ បងប្អូនអាចបង្កើតរូបផ្គុំចេញពីរូបភាពព្រះវិហារបរិសុទ្ធមួយ ។ នៅផ្នែកខាងក្រោយនៃបំណែកនីមួយៗ បងប្អូនអាចសរសេរអ្វីមួយដែលយើងធ្វើនៅក្នុងព្រះវិហារបរិសុទ្ធ ដូចជា ពិធីបុណ្យជ្រមុជទឹកសម្រាប់បុព្វការីជន ការផ្សារភ្ជាប់ជាមួយគ្រួសាររបស់យើង និងការចុះសេចក្តីសញ្ញាជាមួយព្រះ ។ សូមអាន គោលលទ្ធិ និងសេចក្តីសញ្ញា ៨៤:៤–៥ ជាមួយកូនៗរបស់បងប្អូន ហើយសូមឲ្យពួកគេស្តាប់អំពីអ្វីដែលព្រះអម្ចាស់បានដាក់បញ្ញត្តិឲ្យពួកបរិសុទ្ធសង់ឡើង ។ នៅពេលបងប្អូន និងកូនៗរបស់បងប្អូនផ្គុំរូបចូលគ្នា សូមចែកចាយគ្នាទៅវិញទៅមកនូវអ្វីដែលយើងអាចធ្វើដើម្បីរៀបចំខ្លួនចូលព្រះវិហារបរិសុទ្ធ ។
គោលលទ្ធិ និងសេចក្ដីសញ្ញា ៨៤:១៩–២២
ខ្ញុំអាចទទួលព្រះចេស្តារបស់ព្រះវរបិតាសួគ៌ តាមរយៈពិធីបរិសុទ្ធនៃបព្វជិតភាព ។
-
ដើម្បីជួយកូនៗរបស់បងប្អូនឲ្យយល់អំពីអ្វីដែលជាពិធីបរិសុទ្ធ សូមពិចារណាមើលរូបភាពនៃពិធីបរិសុទ្ធនៃបព្វជិតភាពជាច្រើនជាមួយពួកគេ ដូចជា សៀវភៅរូបភាពដំណឹងល្អ ល.រ. ១០៣–១០៨ ឬ ទំព័រសកម្មភាព ប្រចាំសប្តាហ៍នេះ ។ សូមសុំឲ្យពួកគេពិពណ៌នានូវអ្វីដែលកំពុងកើតឡើងនៅក្នុងរូបភាពនីមួយៗ ។ បន្ទាប់មកបងប្អូនអាចអានជាមួយគ្នា គោលលទ្ធិ និងសេចក្តីសញ្ញា ៨៤:១៩–២២ ។ ហេតុអ្វីព្រះវរបិតាសួគ៌សព្វព្រះទ័យឲ្យយើងទទួលពិធីបរិសុទ្ធទាំងនេះ ? សូមប្រាប់កូនៗរបស់បងប្អូនអំពីរបៀបដែលបងប្អូនមានអារម្មណ៍ថា មានអំណាចរបស់ព្រះ ដោយសារពិធីបរិសុទ្ធដែលបងប្អូនបានទទួល និងសេចក្តីសញ្ញាដែលបងប្អូនបានធ្វើ ។ ( សូមមើលផងដែរ « Priesthood Power, Authority, and Keys » នៅក្នុង ឧបសម្ព័ន្ធ ក ឬ ឧបសម្ព័ន្ធ ខ ) ។
គោលលទ្ធិ និងសេចក្ដីសញ្ញា ៨៤:៧៧
ខ្ញុំជាមិត្តភក្តិរបស់ព្រះយេស៊ូវ នៅពេលខ្ញុំធ្វើតាមទ្រង់ ។
-
បន្ទាប់ពីអាន គោលលទ្ធិ និងសេចក្តីសញ្ញា ៨៤:៧៧ ជាមួយគ្នា សូមសួរកូនៗរបស់បងប្អូនអំពីអត្ថន័យនៃការធ្វើជាមិត្ត ។ បងប្អូនអាចនិយាយអំពីមិត្តល្អដែលបងប្អូនមាន ។ តើព្រះយេស៊ូវបង្ហាញយើងថា ទ្រង់ចង់ឲ្យយើងធ្វើជាមិត្តរបស់ទ្រង់ដោយរបៀបណា ? តើយើងអាចបង្ហាញថា យើងចង់ធ្វើជាមិត្តដែរដោយរបៀបណា ? បទចម្រៀងដូចជាបទ « ខ្ញុំព្យាយាមក្លាយដូចព្រះយេស៊ូវ » ( សៀវភៅចម្រៀងកុមារ ទំព័រ ៤០–៤១ ) អាចជួយនៅក្នុងការសន្ទនានេះបាន ។
គោលលទ្ធិ និងសេចក្ដីសញ្ញា ៨៤:៨៨
ព្រះវរបិតាសួគ៌ជួយពួកអ្នកបម្រើរបស់ទ្រង់ ។
-
កូនៗរបស់បងប្អូនអាចរីករាយនឹងការឮអំពីរបៀបដែលពួកអ្នកផ្សព្វផ្សាយសាសនាបានជួយបងប្អូន ក្រុមគ្រួសាររបស់បងប្អូន ឬបុព្វការីជនរបស់បងប្អូនទទួលដំណឹងល្អ ។ បន្ទាប់មក បងប្អូនអាចអានអំពីការសន្យាពិសេសមួយដែលព្រះអម្ចាស់បានធ្វើចំពោះពួកអ្នកផ្សព្វផ្សាយសាសនានៅក្នុង គោលលទ្ធិ និងសេចក្តីសញ្ញា ៨៤:៨៨ ។ ប្រហែលជាកូនៗរបស់បងប្អូនអាចគិតពីសកម្មភាពដែលទាក់ទងនឹងខគម្ពីរនេះ ។ សូមពិចារណាចែកចាយពីគ្រានៅពេលដែលបងប្អូនបានកំពុងបម្រើព្រះអម្ចាស់ ហើយបានទទួលអារម្មណ៍ថា ទ្រង់គង់នៅជាមួយបងប្អូន ដូចដែលបានពិពណ៌នានៅក្នុង ខទី ៨៨ ។ បងប្អូនក៏អាចជួយកូនៗរបស់បងប្អូនឲ្យគិតអំពីរបៀបនានាដែលពួកគេអាចក្លាយជាអ្នកផ្សព្វផ្សាយសាសនានាពេលឥឡូវនេះផងដែរ ។ សូមថ្លែងទីបន្ទាល់ថា ព្រះវរបិតាសួគ៌ជួយយើងដឹងអំពីអ្វីដែលត្រូវនិយាយ នៅពេលយើងនិយាយជាមួយអ្នកដទៃអំពីព្រះយេស៊ូវគ្រីស្ទ ។
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
ព្រះវិហារបរិសុទ្ធ រ៉ូម អ៊ីតាលី