« ថ្ងៃទី ១៨–២៤ ខែ សីហា ៖ ‹ គោលការណ៍ដោយសេចក្ដីសន្យា › ៖ គោលលទ្ធិ និងសេចក្តីសញ្ញា ៨៩–៩២ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ៨៩–៩២ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ថ្ងៃទី ១៨–២៤ ខែ សីហា ៖ « គោលការណ៍ដោយសេចក្ដីសន្យា »

គោលលទ្ធិ និងសេចក្តីសញ្ញា ៨៩–៩២

នៅក្នុងសាលានៃពួកព្យាការី ព្យាការី យ៉ូសែប ស្ម៊ីធ បានបង្រៀនពួកអែលឌើរនៃអ៊ីស្រាអែលអំពីការកសាងនគររបស់ព្រះនៅលើផែនដី ។ ពួកលោកបានពិភាក្សាអំពីសេចក្ដីពិតខាងវិញ្ញាណ បានអធិស្ឋានរួមគ្នា បានតមអាហារ និងរៀបចំខ្លួនទៅប្រកាសដំណឹងល្អ ។ ប៉ុន្ដែបរិយាកាសមួយហាក់ចម្លែកចំពោះយើងនាសព្វថ្ងៃនេះ ហើយវាហាក់មិនត្រឹមត្រូវចំពោះ អិមម៉ា ស្ម៊ីធ ផងដែរ ។ អំឡុងការប្រជុំ ពួកបុរសបានជក់បារី ហើយចុកថ្នាំ ដែលវាជារឿងធម្មតាសម្រាប់ពេលនោះ ប៉ុន្ដែវាប្រឡាក់កម្រាលឈើទៅជាពណ៌ខ្មៅ ហើយមានធុំក្លិនមិនល្អ ។ អិមម៉ាបានចែកចាយកង្វល់របស់នាងជាមួយយ៉ូសែប ហើយយ៉ូសែបបានទូលសូមដល់ព្រះអម្ចាស់ ។ ចម្លើយរបស់ទ្រង់គឺជាវិវរណៈដែលមិនត្រឹមតែពីការជក់បារី និងថ្នាំចុកប៉ុណ្ណោះទេ ។ វាបានផ្ដល់ឲ្យពួកបរិសុទ្ធ សម្រាប់គ្រប់ជំនាន់ដែលនឹងកើតមកនូវ « គោលការណ៍ដោយសេចក្ដីសន្យា »—ជាសេចក្ដីសន្យាដល់សុខភាពផ្លូវកាយ « ប្រាជ្ញា » និង « និងផលថ្លៃវិសេសនៃចំណេះវិជ្ជា » ( គោលលទ្ធិ និងសេចក្ដីសញ្ញា ៨៩:៣, ១៩ ) ។

សូមមើលផងដែរ ពួកបរិសុទ្ធ ទំព័រ ១:១៦៦–១៦៨ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

គោលលទ្ធិ និងសេចក្តីសញ្ញា ៨៩

ព្រះអម្ចាស់បានប្រទានពាក្យសម្តីនៃប្រាជ្ញាវាងវៃដើម្បីជួយខ្ញុំឲ្យមានសុខភាពល្អទាំងរូបកាយ និងខាងវិញ្ញាណ ។

នៅពេលពួកអែលឌើរក្នុងសាលានៃពួកព្យាការីបានឮ យ៉ូសែប ស្ម៊ីធ អានពាក្យសម្ដីនៃប្រាជ្ញាវាងវៃដំបូង ពួកគេបាន « បោះចោលបំពង់ និងដុំថ្នាំចុករបស់គេទៅក្នុងភ្លើង » ភ្លាម ( ពួកបរិសុទ្ធ ទំព័រ ១:១៦៨ ) ។ ពួកគេចង់បង្ហាញឆន្ទៈរបស់ពួកគេដើម្បីគោរពតាមព្រះអម្ចាស់ ។ ប្រហែលបងប្អូនបាន « បោះ » សារធាតុដែលពាក្យសម្ដីនៃប្រាជ្ញាវាងវៃបានព្រមានហាមឃាត់ចេញពីជីវិតរបស់បងប្អូនរួចហើយ ប៉ុន្ដែតើមានអ្វីផ្សេងទៀតដែលបងប្អូនអាចរៀនមកពីវិវរណៈនេះ ? សូមពិចារណាអំពីយោបល់ទាំងនេះ ៖

សូមគិតពីវិវរណៈថាជា « គោលការណ៍ដោយសេចក្ដីសន្យា » ( ខទី ៣ )—ជាសេចក្ដីពិតដ៏យូរអង្វែងដែលដឹកនាំការសម្រេចចិត្ត ។ តើបងប្អូនរកឃើញគោលការណ៍អ្វីខ្លះ ដែលអាចដឹកនាំការសម្រេចចិត្តរបស់បងប្អូន ? តើពរជ័យអ្វីដែលព្រះអម្ចាស់បានសន្យា ? ( សូមមើល ខទី ១៨–២១ ) ។ តើទ្រង់បានបំពេញសេចក្តីសន្យាទាំងនោះនៅក្នុងជីវិតរបស់បងប្អូនដោយរបៀបណា ?
តើបងប្អូនបានឃើញគំរូអ្វីខ្លះនៃ « អំពើអាក្រក់ទាំងឡាយ និងផែនការទាំងឡាយដែលមាន … នៅក្នុងដួងចិត្តមនុស្ស ដែលរួមគំនិតប្រព្រឹត្តអំពើទុច្ចរិត » ? ទាក់ទងនឹងពាក្យសម្តីនៃប្រាជ្ញាវាងវៃ ( ខទី ៤ ) ។ បន្ថែមពីលើវិវរណៈនេះ តើព្រះអម្ចាស់បានប្រទានអ្វីខ្លះ ដើម្បីជួយបងប្អូនចៀសវាង ឬយកឈ្នះលើអំពើអាក្រក់ទាំងនេះ ?
តើវិវរណៈនេះបង្រៀនបងប្អូនអ្វីខ្លះអំពីព្រះអម្ចាស់ ? តើពាក្យសម្តីនៃប្រាជ្ញាវាងវៃទាក់ទងនឹង គោលលទ្ធិ និងសេចក្តីសញ្ញា ២៩:៣៤–៣៥ ដោយរបៀបណា ?
តើបងប្អូនត្រូវបានបំផុសឲ្យធ្វើអ្វីខ្លះ ដើម្បីថែរក្សារូបកាយរបស់បងប្អូនឲ្យបានកាន់តែប្រសើរ ?

បងប្អូនប្រហែលជាមានឱកាសពន្យល់អ្នកដទៃអំពីមូលហេតុដែលបងប្អូនរស់នៅតាមពាក្យសម្តីនៃប្រាជ្ញាវាងវៃ—ហើយបងប្អូនអាចនឹងមានឱកាសច្រើនទៀតនៅពេលអនាគត ។ សូមពិចារណាអំពីរបៀបដែលបងប្អូនអាចប្រើឱកាសទាំងនេះ ដើម្បីថ្លែងទីបន្ទាល់អំពីព្រះអង្គសង្គ្រោះ ភាពពិសិដ្ឋនៃរូបកាយរបស់យើង និងសេចក្តីពិតខាងវិញ្ញាណផ្សេងទៀត ។ សម្រាប់គំនិតបន្ថែម សូមមើល « រូបកាយរបស់អ្នកគឺពិសិដ្ឋ » ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ទំព័រ ២២–២៩ ។

សូមមើលផងដែរ កូរិនថូស ទី១ ៦:១៩–២០; ថូម៉ាស អេស ម៉នសុន « Principles and Promises » Liahona ខែ វិច្ឆិកា ឆ្នាំ ២០១៦ ទំព័រ ៧៨–៧៩; Topics and Questions « Word of Wisdom » នៅលើបណ្ណាល័យដំណឹងល្អ « The Word of Wisdom » នៅក្នុង Revelations in Context ទំព័រ ១៨៣–១៩១; « Addiction » « Physical Health » ជួយដល់ជីវិត នៅលើបណ្ណាល័យដំណឹងល្អ ។

រៀន និងបង្រៀនតាមរយៈគោលការណ៍ទាំងឡាយ ជាជាងបង្កើតបញ្ជីដែលត្រូវធ្វើ និងមិនត្រូវធ្វើ នោះយើងអាចរស់នៅតាមគោលការណ៍ទាំងឡាយ ដើម្បីអនុវត្តសិទ្ធិជ្រើសរើស និងសេចក្តីជំនឿរបស់យើងលើព្រះគ្រីស្ទ ។ ឧទាហរណ៍ សូមពិចារណាសំណួរដែលផ្អែកលើគោលការណ៍ទាំងនេះដែលទាក់ទងនឹងពាក្យសម្តីនៃប្រាជ្ញាវាងវៃ ៖ តើគោលការណ៍មួយណាដែលអាចផ្តល់ការលើកទឹកចិត្តដល់នរណាម្នាក់ដែលតស៊ូដើម្បីគោរពតាមពាក្យសម្តីនៃប្រាជ្ញាវាងវៃ ? តើគោលការណ៍ណាមួយដែលអាចលួងលោមយើង នៅពេលយើងមានបញ្ហាសុខភាព ថ្វីបើយើងរស់នៅតាមពាក្យសម្ដីនៃប្រាជ្ញាវាងវៃក្តី ?

ស្ត្រីម្នាក់កំពុងហាត់យូហ្គា — ព្រះវរបិតាសួគ៌ចង់ឲ្យយើងថែរក្សារូបកាយរបស់យើង

គោលលទ្ធិ និងសេចក្ដីសញ្ញា ៩០:១–១៧

គណៈប្រធានទីមួយកាន់ « កូនសោទាំងឡាយនៃនគរ » ។

នៅក្នុង កណ្ឌទី ៩០ ព្រះអម្ចាស់បានប្រទានការណែនាំអំពី « ការងារបម្រើ និងគណៈប្រធានទី១ » ( ខទី ១២ ) របស់ យ៉ូសែប ស្ម៊ីធ ស៊ីឌនី រិកដុន និង ហ្វ្រែឌើរិក ជី វិលលាម្ស—ជាក្រុមសមាជិកដែលយើងហៅនាពេលនេះថា គណៈប្រធានទីមួយ ។ តើបងប្អូនរៀនអ្វីខ្លះអំពីគណៈប្រធានទីមួយចេញពី ខទី ១–១៧ ? សូមពិចារណាពិនិត្យមើលសារលិខិតនាពេលថ្មីៗនេះមកពីសមាជិកក្នុងគណៈប្រធានទីមួយឡើងវិញ ។ តើពួកលោកធ្វើអ្វីខ្លះដើម្បី « តាំងឲ្យមានរបៀបរៀបរយនៅអស់ទាំងការងារនៃសាសនាចក្រ និងនគរនេះ » ? ( ខទី ១៦ ) ។ តើបងប្អូនអាចបង្ហាញថា ពួកលោកមិនមែនជា « ការឥតការ » ចំពោះបងប្អូនដោយរបៀបណា ? ( ខទី ៥ ) ។

សូមពិចារណាច្រៀង ឬអានពាក្យពេចន៍នៃបទ « ចូរមកស្ដាប់សំឡេងព្យាការី » ( ទំនុកតម្កើង ល.រ. ១២ ) ឬ ច្រៀងចម្រៀងផេ្សងទៀតអំពីពួកព្យាការីដែលទាក់ទងនឹងការបង្រៀននៅក្នុងខគម្ពីរទាំងនេះ ។ តើការបម្រើរបស់គណៈប្រធានទីមួយបានជួយបងប្អុនឲ្យស្គាល់ព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្តេច ?

គោលលទ្ធិ និងសេចក្ដីសញ្ញា ៩០:២៤

« គ្រប់ការណ៍ទាំងអស់ផ្សំគ្នាសម្រាប់សេចក្ដីល្អដល់ [ ខ្ញុំ ] » ។

សូមជញ្ជឹងគិតអំពីបទពិសោធន៍នានា ដែលបងប្អូនបានមានដែលថ្លែងទីបន្ទាល់អំពីសេចក្ដីសន្យារបស់ព្រះអម្ចាស់នៅក្នុង គោលលទ្ធិ និង សេចក្តីសញ្ញា ៩០:២៤ ។ សូមពិចារណាធ្វើការកត់ត្រាបទពិសោធន៍របស់បងប្អូន ហើយចែកចាយវាជាមួយនឹងសមាជិកគ្រួសារ ឬមនុស្សជាទីស្រឡាញ់—ប្រហែលជានរណាម្នាក់ត្រូវការការអះអាងជាថ្មី ឬការលើកទឹកចិត្តនេះ ។ ប្រសិនបើបងប្អូននៅកំពុងរង់ចាំពរជ័យជាក់លាក់មួយចំនួន សូមជញ្ជឹងគិតអំពីអ្វីដែលបងប្អូនអាចធ្វើបានដើម្បីបន្ដស្មោះត្រង់ កាលបងប្អូនរង់ចាំមើលរបៀបដែល « គ្រប់ការណ៍ទាំងអស់ផ្សំគ្នាសម្រាប់សេចក្ដីល្អដល់បងប្អូន » ។

គោលលទ្ធិ និងសេចក្តីសញ្ញា ៩០:២៨–៣១

តើនរណាជា វីអែណា ចាកស៍ ?

វីអែណា ចាកស៍ បានកើតនៅថ្ងៃទី ១០ ខែ មិថុនា ឆ្នាំ ១៧៨៧ ក្នុងរដ្ឋម៉ាសាឈូសេត ។ ជាស្ដ្រីដ៏មានសេចក្ដីជំនឿម្នាក់ ដែលមានទ្រព្យហិរញ្ញវត្ថុច្រើនគួរសម នាងវីអែណាបានជួបនឹងពួកអ្នកផ្សព្វផ្សាយសាសនាដំបូងក្នុងឆ្នាំ ១៨៣១ ។ ក្រោយពីទទួលបានសាក្សីខាងវិញ្ញាណថា សារលិខិតរបស់ពួកគេគឺពិត នោះនាងបានធ្វើដំណើរទៅជួបនឹងព្យាការីនៅទីក្រុងខឺតឡង់ រដ្ឋអូហៃអូ ជាកន្លែងដែលនាងបានទទួលបុណ្យជ្រមុជទឹក ។

នាងវីអែណាំបានគោរពតាមការប្រឹក្សារបស់ព្រះអម្ចាស់ដល់នាងនៅក្នុង គោលលទ្ធិ និងសេចក្ដីសញ្ញា ៩០:២៨–៣១ ។ ការថ្វាយរបស់នាងដល់ព្រះអម្ចាស់រួមមានការបរិច្ចាគ ដែលនាងបានធ្វើពីមុននៅទីក្រុងខឺតឡង់ ធ្វើឡើងនៅក្នុងពេលដ៏សំខាន់សម្រាប់សាសនាចក្រ នៅពេលថ្នាក់ដឹកនាំព្យាយាមទិញដី ដែលព្រះវិហារបរិសុទ្ធខឺតឡង់នឹងត្រូវកសាង ។ នាងវីអែណាបាន « មានចិត្តស្មោះត្រង់ ហើយមិនខ្ជិលច្រអូស » ពេញមួយជីវិតរបស់នាង ហើយនៅទីបញ្ចប់អាច « បានរស់នៅដោយសេចក្ដីសុខសាន្ត » ( ខទី ៣១ ) នៅក្នុងជ្រលងភ្នំសលត៍ លេក ជាកន្លែងដែលនាងបានស្លាប់នៅអាយុ ៩៦ ឆ្នាំ ។

គោលលទ្ធិ និងសេចក្តីសញ្ញា ៩១

« ព្រះវិញ្ញាណបើកសម្តែងសេចក្ដីពិត » ។

យើងទាំងអស់គ្នាជួបប្រទះសារដែលមាន « រឿងដែលពិតជាច្រើន » ហើយ « រឿងជាច្រើនដែលមិនពិត » ( គោលលទ្ធិ និងសេចក្តីសញ្ញា ៩១:១–២ ) ។ តើដំបូន្មានអ្វីខ្លះដែលបងប្អូនរកឃើញនៅក្នុង កណ្ឌទី ៩១ ដែលវាអាចជួយបងប្អូនឲ្យយល់ដឹងអំពីសេចក្ដីពិតនៅក្នុងសារលិខិតដែលបងប្អូនជួបប្រទះ ? តើព្រះវិញ្ញាណបានជួយបងប្អូនឲ្យញែកដឹងអំពីសេចក្ដីពិត និងការខុសឆ្គងយ៉ាងដូចម្ដេច ?

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្តីសញ្ញា ៨៩

ពាក្យសម្ដីនៃប្រាជ្ញាវាងវៃជួយខ្ញុំមានរូបកាយ និងវិញ្ញាណដែលមានសុខភាពល្អ ។

ដើម្បីណែនាំ កណ្ឌទី ៨៩ ប្រហែលជាបងប្អូន និងកូនរបស់បងប្អូនអាចមើលរូបភាពព្រះវិហារបរិសុទ្ធ ឬច្រៀងចម្រៀងអំពីសុខភាពរាងកាយ ដូចជា « ព្រះបានប្រទានវិហារឲ្យខ្ញុំ » ( សៀវភៅចម្រៀងកុមារ ទំព័រ ៧៣ ) ដើម្បីបង្រៀនថា រូបកាយរបស់យើងប្រៀបដូចជាព្រះវិហារបរិសុទ្ធសម្រាប់វិញ្ញាណរបស់យើង ។ ជួយកូនៗរបស់បងប្អូនឲ្យអនុវត្តវិធីដែលពួកគេអាចថែទាំរាងកាយរបស់ពួកគេ ។
ដើម្បីរៀនអំពីបទបញ្ញត្តិរបស់ព្រះអម្ចាស់នៅក្នុង គោលលទ្ធិ និងសេចក្តីសញ្ញា ៨៩:១០–១៧ បងប្អូន និងកូនៗរបស់បងប្អូនអាចគូរ ឬមើលរូបភាពនូវអ្វីដែលល្អដែលយើងអាចទទួលទាន ឬធ្វើដើម្បីរក្សារាងកាយយើងឲ្យមានសុខភាពល្អ ( សូមមើលរូបភាព និង ទំព័រសកម្មភាព ដែលមាននៅចុងបញ្ចប់នៃមេរៀននេះ ) ។ តើព្រះអម្ចាស់បានព្រមានយើងមិនឲ្យប្រើអ្វី ? ហេតុអ្វីបានជាទ្រង់ចង់ឲ្យយើងថែរក្សារូបកាយរបស់យើង ?
អែលឌើរ ហ្គារី អ៉ី. ស្ទីវីនសិន បានទូន្មានដល់ពួកយុវវ័យឲ្យដាក់ផែនការជាមុននូវអ្វីដែលពួកគេនឹងធ្វើ នៅពេលដែលមានការល្បួងឲ្យប្រើសុរា ឬ គ្រឿងញៀន ។ លោកបានបង្រៀនថា « អ្នកនឹងឃើញថា ការល្បួងនឹងមានការគ្រប់គ្រងតិចតួចលើអ្នក ។ អ្នកនឹងធ្វើការសម្រេចចិត្តជាស្រេចថា ត្រូវប្រតិកម្មបែបណា ហើយអ្នកត្រូវធ្វើអ្វីខ្លះ ។ អ្នកនឹងមិនចាំបាច់ត្រូវសម្រេចចិត្តគ្រប់ពេលដែលអ្នកប្រឈមមុខទៅនឹងការល្បួងនោះទេ » ( « Your Priesthood Playbook » Liahona ខែ ឧសភា ឆ្នាំ ២០១៩ ទំព័រ ៤៨ ) ។ បន្ទាប់ពីអានជាមួយគ្នា គោលលទ្ធិ និងសេចក្តីសញ្ញា ៨៩:៤ និងសេចក្តីថ្លែងការណ៍របស់អែលឌើរ ស្ទីវ៉ែនសុន សូមប្រឹក្សាជាមួយកូនៗបងប្អូនអំពីរបៀបដែលពួកគេអាចសម្រេចចិត្តឥឡូវនេះ—អស់មួយជីវិត—ដើម្បីរស់នៅតាមព្រះបន្ទូលនៃប្រាជ្ញា ។ បងប្អូនក៏អាចសម្តែងអំពីរបៀបដែលពួកគេអាចឆ្លើយតបនឹងនរណាម្នាក់ ទោះបីជាមិត្តភក្តិ ឲ្យអ្វីមួយទៅពួកគេដែលអាចប្រឆាំងនឹងពាក្យសម្ដីនៃប្រាជ្ញាវាងវៃក្តី ។ តើព្រះអម្ចាស់ប្រទានពរយើងយ៉ាងណា ពេលយើងគោរពតាមពាក្យសម្តីនៃប្រាជ្ញាវាងវៃ ( សូមមើល ខទី ១៨–២១ ) ។

ក្មេងៗកំពុងលេងនៅលើឆ្នេរសមុទ្រ — រូបកាយរបស់យើងគឺជាអំណោយមកពីព្រះ ។

គោលលទ្ធិ និងសេចក្ដីសញ្ញា ៩០:៥

ព្រះបានប្រទានព្យាការីដល់ខ្ញុំដើម្បីដឹកនាំ និងការពារខ្ញុំ ។

បងប្អូនអាចមើលរូបភាពរបស់ពួកព្យាការីពីបុរាណ ឬច្រៀងចម្រៀងដូចជាបទ « ធ្វើតាមព្យាការី » ( សៀវភៅចម្រៀងកុមារ ទំព័រ ៥៨–៥៩ ) ។ តើព្រះបានប្រទានពរដល់បុត្រាបុត្រីរបស់ទ្រង់តាមរយៈព្យាការីរបស់ទ្រង់ដោយរបៀបណា ? ហេតុអ្វីយើងគួរស្តាប់ព្យាការីរបស់ព្រះ ? ( សូមមើល គោលលទ្ធិ និងសេចក្តីសញ្ញា ៩០:៥ ) ។ បន្ទាប់មក បងប្អូន និងកូនៗរបស់បងប្អូនអាចមើលរូបភាពព្យាការីដែលមានជីវិត ហើយចែកចាយរឿងមួយចំនួនដែលព្រះអម្ចាស់បានបង្រៀន ឬព្រមានយើងតាមរយៈលោក ។ តើយើងអាចធ្វើតាមព្យាការីតាមរបៀបណា ?

គោលលទ្ធិ និងសេចក្តីសញ្ញា ៩១

ព្រះវិញ្ញាណអាចជួយខ្ញុំដឹងអំពីអ្វីដែលជាការពិត ។

បងប្អូនអាចសង្ខេបក្បាលកណ្ឌសម្រាប់ គោលលទ្ធិ និងសេចក្តីសញ្ញា ៩១ ដើម្បីជួយកូនៗរបស់បងប្អូនឲ្យយល់អំពីមូលហេតុដែលវិវរណៈនេះត្រូវបានផ្តល់ឲ្យ ។ បន្ទាប់មក ពួកគេអាចគិតពីកន្លែង ដូចជា នៅក្នុងប្រព័ន្ធផ្សព្វផ្សាយ ដែលយើងអាចរក « មានរឿងដែលពិតជាច្រើន » និង « មានរឿងជាច្រើនដែលមិនពិត » ( ខទី ១–២ ) ។ តើ ខទី ៤–៦ បង្រៀនយើងអ្វីខ្លះអំពីព្រះវិញ្ញាណបរិសុទ្ធ ? តើព្រះវិញ្ញាណបរិសុទ្ធជួយយើងដឹងអ្វីដែលត្រឹមត្រូវដោយរបៀបណា ?

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

ផ្លែឈើ — « គ្រប់ទាំងធញ្ញជាតិ គឺល្អសម្រាប់ទុកជាអាហារដល់មនុស្ស ព្រមទាំងផលពីដើមដែលវារ » ។