Sa faia le Aoga a Perofeta i le potu lenei.

11–17 Aokuso: ‟Faatulaga … o se Fale o le Atua”

Mataupu Faavae ma Feagaiga 88

E masani lava, ona tuu mai ia i tatou e le Alii sina vaaiga itiiti o le le gata mai o Lona “mamalu ma [Lona] mana” (Mataupu Faavae ma Feagaiga 88:47) e ala i faaaliga ofoofogia. O leMataupu Faavae ma Feagaiga 88 o se tasi o faaaliga faapena—e faatatau i le malamalama ma le mamalu ma malo, lea e foliga mai ai mea faalelalolagi ua tatou popole i ai e le taua, pe a faatusatusa i ai. E tusa lava pe le mafai ona tatou malamalama uma i ai, e mafai lava ona tatou lagonaina e sili atu i le faavavau nai lo o le mea ua tatou iloaina. Ioe, sa le’i faasoa mai e le Alii nei mealilo maoa’e ina ia faafefe ai i tatou pe ina ia tatou manatu ai o i tatou e matuā faatauvaa lava. O le mea moni, na Ia folafola mai, “E oo mai le aso o le a malamalama ai i le Atua” (fuaiupu 49; na faaopoopo i ai le faamamafa). Atonu o lena taunuuga mamalu na faapea ai ona poloaiina e le Alii ia Lana Au Paia i Katelani ia faia se Aoga a Perofeta. Sa fetalai mai o Ia, “Ia outou faatulaga tatau outou lava.” “Ia saunia mea manaomia uma; ma faatu … se fale o le Atua” (fuaiupu 119). E sili atu nai lo o se isi lava nofoaga, o totonu lava o le maota paia o le Atua—ma totonu o o tatou fale—e mafai ai ona Ia sii a’e ai la tatou vaaiga i tua atu o le lalolagi faaletino, “afe ese e ia le veli mai ona fofoga ia te [i tatou],” ma saunia i tatou ia “gafatia se mamalu selesitila” (fuaiupu 68, 22).

Tagai i le Au Paia, 1:164–66.

Manatu mo le Aoaoina i le Aiga ma i le Lotu

Mataupu Faavae ma Feagaiga 88

Ua ofo mai e Iesu Keriso ia te a’u le filemu.

E na o ni nai aso talu ona uma le lapataiga faapea o taua o le a ‟sasaa mai i luga o atunuu uma” (Mataupu Faavae ma Feagaiga 87:2), ae tuuina mai e le Alii se faaaliga faapea na ta’ua e Iosefa Samita o se ‟lau olive,” o se faatusa masani lea o le filemu (Mataupu Faavae ma Feagaiga 88, faaulutala o le vaega; tagai foi i le Kenese 8:11). I lau suesuega atoa o le vaega 88 i lenei vaiaso, vaavaai mo sāvali o le filemu a le Alii ia te oe.

Mataupu Faavae ma Feagaiga 88:6–67

O le malamalama ma le tulafono e sau mai ia Iesu Keriso.

O upu malamalama ma le tulafono ua ta’ua faafia i le tele o taimi i le vaega e 88. Faailoga pe maitau fuaiupu e te maua ai nei upu i fuaiupu 6–67, ma tusi i lalo mea ua e aoaoina e uiga i le malamalama ma le tulafono—ma e uiga ia Iesu Keriso. O le a se mea ua musuia oe e fai ia maua ai le malamalama ma ola ai i le ‟tulafono a Keriso”? (fuaiupu 21).

Tagai foi i le Isaia 60:19; Ioane 1:1–9; 3 Nifae 15:9; Timothy J. Dyches, ‟O Le Malamalama e Pipii i le Malamalama,” Liahona, Me 2021, 112–15; Sharon Eubank, ‟Keriso: O Le Malamalama e Susulu i le Pogisa,” Liahona, Me 2019, 73–76.

O loo i ai i tusitusiga paia le tulafono a Keriso.

Mataupu Faavae ma Feagaiga 88:62–64

“Faalatalata mai ia te a’u.”

O a ni aafiaga ua faaali atu ai ia te oe e moni folafolaga o loo i nei fuaiupu? O le a le isi au laasaga e ‟faalatalata atu ai” ia Keriso? Mafaufau e fai le viiga “Ta Felata’i Nei, le Atua ma Oe” (Viiga, nu. 59) o se vaega o lau suesuega ma le tapuaiga.

Mataupu Faavae ma Feagaiga 88:67–76

E mafai ona ou mama e ala i le Togiola a Iesu Keriso.

E faalua ona faaali mai le poloaiga a le Alii ia “faapaia outou lava” i le Vaega 88 (fuaiupu 68, 74). O le a sou manatu i le uiga o lenei fuaitau? E mafai ona e iloiloina nisi o fuaitau i lalo o le ‟Faapaiaga” i le Taiala i Tusitusiga Paia (Gospel Library). E faapefea ona faapaiaina i tatou? Avea lenei fesili e taiala ai lau suesuega o le Mataupu Faavae ma Feagaiga 88:67–76, ma tusifaamaumau soo se malamalamaaga faaleagaga e te maua.

Mataupu Faavae ma Feagaiga 88:77–80, 118–26

“Saili i le aoaoina, e ala lava lea i le suesue ma le faatuatua foi.”

Na ta’u atu e le Alii i le Au Paia e faatu se ‟aoga a perofeta” i Katelani (Mataupu Faavae ma Feagaiga 88:137). O le tele o faatonuga i le vaega 88 na aoaoina ai i latou i le ala e fai ai. O lenei faatonuga e mafai foi ona fesoasoani ia te oe e ‟faatuina … o se fale o le aoaoga” (fuaiupu 119) i lou lava olaga. O le mea moni, e mafai ona e vaai i fuaiupu 77–80 ma le 118–26 o ni mamanu e ‟toe faafou ai lou aiga [po o lou olaga] i se totonugalemu o le aoaoina o le talalelei” ma ‟se malutaga o le faatuatua” (Russell M. Nelson, “Avea ma Faataitaiga o ni Au Paia o Aso e Gata Ai,” Liahona, Nov. 2018, 113). Atonu e manaia le tusi o le ata pe faapefea ou foliga ‟toefaamamafa” patino, e aofia ai fasifuaitau mai nei fuaiupu e te lagona e tatau ona e faaaogaina.

E mafai foi ona fesoasoani le suesue i fesili nei: Aisea e taua ai le aoaoina ma le a’otauina i le Alii? O le a se mea e finagalo o Ia ia ou suesueina?” E faapefea ona finagalo o Ia ia ou a’oa’o?” Vaavaai mo tali i nei fesili i fuaiupu 77–80 ma i le ‟O le a tuusa’oloto oe e le upumoni” (Mo le Malosi o le Autalavou: O Se Taiala mo le Faia o Filifiliga, 30–33).

O le a sou manatu i le uiga o le aoao “i le suesue ma le faatuatua foi” (fuaiupu 118). O a ni malamalamaaga ua e maua mai le sāvali a Elder Mathias Held ‟Saili le Malamalama e ala i le Agaga”? Liahona, Me 2019, 31–33).

Tagai foi Autu ma Fesili, ‟Seeking Truth and Avoiding Deception,” Gospel Library; ‟A School and an Endowment,” i le Revelations in Context, 174–82.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Feterika G. Viliamu

• Aoga a Perofeta

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 88:33

Ua tuuina mai e le Tama Faalelagi ia meaalofa lelei.

• E mafai ona e amataina se talanoaga e faatatau i le Mataupu Faavae ma Feagaiga 88:33 e ala i le fai atu i lau fanau e talanoa e uiga i meaalofa ua tuuina mai ia i latou—meaalofa na latou taliaina ma le fiafia ma meaalofa latou te le’i fiafia i ai. Atonu e mafai ona latou faatinoina le mauaina o se meaalofa ma le olioli. Ona mafai lea ona e talanoa e uiga i meaalofa e tuuina mai e le Tama Faalelagi ia i tatou (e pei o le meaalofa o le Agaga Paia). E faapefea ona tatou mauaina nei meaalofa ma le olioli?

Mataupu Faavae ma Feagaiga 88:63

Afai ou te sailia le Faaola, o le a ou maua o Ia.

• O leMataupu Faavae ma Feagaiga 88:63 o loo i ai upu faatino e ono musuia ai nisi o gaoioiga mālie e uunaia ai lau fanau e saili le mafutaga a le Alii i o latou olaga. Mo se faataitaiga, e mafai e oe ma lau fanau ona mafaufau i se taaloga mo le talanoaina o le fasifuaitau “saili mai ia te a’u ma le filiga ma o le a outou maua ai a’u” (faaopoopo le faamamafa) po o le ‟tu’itu’i mai, ma o le a tatala”?

E manaomia e tamaiti ni mea eseese. “O le toatele o tamaiti e sili atu ona aoaoina pe a faaaofia ai faalogona eseese. Saili ni auala e fesoasoani i tamaiti e faaaoga ai o latou sane o le vaai, faalogo, ma le tago a o latou aoao. I nisi o tulaga, e te ono mafai foi ona sue ni auala e faaaofia ai o latou sane o le sogisogi ma le tofo!” (Aoao Atu i le Ala a le Faaola, 32).

• Ina ia faamamafa atu le valaaulia a le Faaola e “faalatalata mai ia te a’u,” e mafai ona e fai i se tamaitiiti se toatasi e uu se ata o Iesu (e pei o le ata i le faaiuga o lenei otootoga) i le tasi itu o le potu a’o tutu isi tamaiti i le isi itu. A o mafaufau lau fanau i mea e mafai ona latou faia e latalata atili atu ai i le Faaola, e mafai ona latou laa atu i le ata, ma o le tamaitiiti o loo uuina le ata e mafai ona laa atu i isi tamaiti. Talanoa ma lau fanau e uiga i le auala e te faalatalata atu ai i le Faaola ma le auala e faalatalata mai ai o Ia ia te oe. E mafai foi ona outou usuina faatasi ma i latou se pese e uiga i lenei autu, e pei o le “Le Alofa o Lo’u Faaola” (Tusipese a Tamaiti, 42).

Mataupu Faavae ma Feagaiga 88:77–80, 118

E finagalo le Tama Faalelagi ia ou aoao.

• Fai atu i lau fanau e ta’u atu ia te oe mea o loo latou aoaoina i le aoga po o le Peraimeri. E mafai foi ona e faasoa atu nisi o mea o loo e aoaoina. Ona mafai lea ona e faaali atu i lau fanau upu o le a, aisea, ma le pe faapefea. Fesoasoani ia i latou e suesue le Mataupu Faavae ma Feagaiga 88:77–79 e saili ai po o le a le mea e finagalo le Alii tatou te aoao i ai. Ona vaavaai faatasi lea i le fuaiupu 80 e iloa ai pe aisea e finagalo ai o Ia ia tatou aoao ma i le fuaiupu 118 e iloa ai pe faapefea ona tatou aoao.

“Saili i le aoaoina … i le suesue ma le faatuatua foi.”

Mataupu Faavae ma Feagaiga 88:119

E mafai ona paia lo tatou fale e pei o le malumalu.

• A o e faitauina le Mataupu Faavae ma Feagaiga 88:119 i lau fanau, e mafai ona latou faia se tumutumu o le malumalu i o latou lima i taimi uma latou te faalogo ai i le upu ‟fale.” Faamalamalama atu, na finagalo le Tama Faalelagi ia Iosefa Samita ma le Au Paia e fausia se malumalu, po o se “fale o le Atua.”

• E mafai ona e fai atu i lau fanau e filifili ni upu se fitu e faamatala ai lo latou fale. Ona fai atu lea ia i latou e faitau le Mataupu Faavae ma Feagaiga 88:119, ma saili upu e fitu o loo faaaoga e le Alii e faamatala ai Lona fale. E mafai faapefea ona tatou faia o tatou aiga o se “fale o le Atua”?

Mo nisi manatu, tagai i le lomiga o lenei masina o le mekasini o le Uo .

Aua Tou te Matatau, saunia e Michael Malm