18–24 Aokuso: ‟O Se Mataupu Faavae faatasi ai ma se Folafolaga”

Mataupu Faavae ma Feagaiga 89–92

I le Aoga a Perofeta, na aoao atu e le Perofeta o Iosefa Samita le au toeaina o Isaraelu e uiga i le fausiaina o le malo o le Atua i le lalolagi. Sa latou talanoaina upu moni faaleagaga, tatalo faatasi, anapopogi, ma saunia e talai atu le talalelei. Peitai sa i ai se mea i le siosiomaga lea sa foliga mai e ese lava ia i tatou i aso nei, ma sa le’i foliga sa’o foi ia Ema Samita ia. I taimi o fonotaga, sa ūla ma lamu ai e alii ia tapaa, lea sa le o se mea faapea sa le masani ai i lena vaitaimi, ae sa pisipisia uliuli ai fola laupapa ma tuua ai se manogi malosi i le ea. Sa faasoa atu e Ema ona atugaluga ia Iosefa, ma sa fesili atu Iosefa i le Alii. O Lana tali mai o se faaaliga lea sa oo mamao i tua atu o asu ma pisipisia o tapaa. Sa tuuina mai ai i le Au Paia, mo augatupulaga i le lumanai, “se mataupu faavae faatasi ai ma se folafolaga”—o folafolaga o le soifua maloloina faaletino, “poto,” ma “oa silisili o le malamalama” (Mataupu Faavae ma Feagaiga 89:3, 19).

Tagai foi i le Au Paia, 1:166–68.

Manatu mo le Aoaoina i le Aiga ma i le Lotu

Mataupu Faavae ma Feagaiga 89

Na tuuina mai e le Alii ia te a’u le Upu o le Poto e fesoasoani ia ou ola maloloina ai i le tino ma le agaga.

I le taimi muamua na faalogo ai le au toeaina i le Aoga a Perofeta i le faitauga e Iosefa Samita o le Upu o le Poto, o le taimi lava lea na latou “togiina ai a latou paipa ma pepa o tapaa lamu i le afi” (Au Paia, 1:168). Sa latou mananao e faaali atu lo latou naunau e usitai i le Alii. Atonu ua uma ona e “togiina” ese mai lou olaga ia vailaau ua lapatai mai le Upu o le Poto e tetee i ai, ae o le a se isi mea e mafai ona e aoaoina mai i lenei faaaliga? Mafaufau i manatu nei:

• Mafaufau i le faaaliga o ‟se mataupu faavae faatasi ai ma se folafolaga” (fuaiupu 3)—o upumoni tumau e taiala ai le faia o faaiuga. O a ni mataupu faavae e te maua ai e mafai ona taiala ai au faaiuga? O a faamanuiaga ua folafola mai e le Alii? (tagai fuaiupu 18–21). Na faapefea ona Ia faataunuuina na folafolaga i lou olaga?

• O a ni faataitaiga ua e vaaia o “mea leaga ma fuafuaga … i loto o tagata faufau leaga” e fesoota’i i le Upu o le Poto? (fuaiupu e 4). E faaopoopo atu i lenei faaaliga, o le a le mea ua tuuina mai e le Alii e fesoasoani ia te oe e aloese ai pe faatoilalo ai nei mea leaga?

• O le a se mea ua aoao atu e lenei faaaliga ia te oe e uiga i le Alii? E faapefea ona fesootai le Upu o le Poto i le Mataupu Faavae ma Feagaiga 29:34–35?

• O le a se mea ua musuia oe e fai e tausi faalelei ai lou tino?

Atonu na e maua ni avanoa e faamalamalama atu ai i isi le mafuaaga ua e ola ai i le Upu o le Poto—ma atonu e tele atu avanoa e te maua i le lumanai. Mafaufau pe mafai faapefea ona e faaaogaina nei avanoa e molimau atu ai i le Faaola, le paia o o tatou tino, ma isi upumoni faaleagaga. Mo manatu, tagai i le vaega “E paia lou tino,” Mo le Malosi o le Autalavou: O Se Taiala mo le Faia o Filifiliga, 22–29.

Tagai foi 1 Korinito 6:19–20; Thomas S. Monson, ‟O Mataupu Faavae ma Folafolaga,” Liahona, Nov. 2016, 78–79; Autu ma Fesili, ‟Upu o le Poto,” Gospel Library; ‟O Le Upu o le Poto,” i le Revelations in Context, 183–91; ‟Vaisu,” ‟Soifua Maloloina Faaletino,” Fesoasoani i le Olaga, Gospel Library.

Principles and Promises

President Monson testifies of the blessings that come as we obey the Word of Wisdom.

Aoao e ala i mataupu faavae. Nai loo le fatuina o lisi o mea e fai ma mea e le faia, e mafai ona tatou ola i mataupu faavae e faaaoga ai lo tatou faitalia ma le faatuatua ia Keriso. Mo se faataitaiga, mafaufau i fesili e faatatau i mataupu faavae e pei o nei e faatatau i le Upu o le Poto: O a mataupu faavae e mafai ona tuuina atu le faamalosiauga i se tasi o loo tauivi e usitai i le Upu o le Poto? O a mataupu faavae e mafai ona faamafanafanaina ai a’u pe a i ai ni o o’u faafitauli tau i le soifua maloloina e ui lava o loo ola i le Upu o le Poto?

E finagalo le Tama Faalelagi ia tatou tausia lelei o tatou tino.

Mataupu Faavae ma Feagaiga 90:1–17

O Le Au Peresitene Sili o loo umia “ki o le malo.”

I le vaega 90, na tuuina mai ai e le Alii ia faatonuga e uiga i “le auaunaga ma le au peresitene” (fuaiupu 12) o Iosefa Samita, Sini Rikitone, ma Feterika G. Viliamu—o le mea ua tatou ta’ua nei o le Au Peresitene Sili. O le a le mea ua e aoaoina e uiga i le Au Peresitene Sili mai i fuaiupu e 1–17? Mafaufau e toe faamanatu ni sāvali lata mai nei mai sui o le Au Peresitene Sili. O le a le mea o loo latou faia ina ia “faatulaga tatau mataupu uma o lenei ekalesia ma le malo”? (fuaiupu 16). E mafai faapefea ona e faʻaali atu e le o ni “mea māmā” i latou ia te oe? (fuaiupu 5).

Mafaufau e usu pe faitau upu i le “O Mai Fa’alogo i le Perofeta” (Viiga, nu. 13) po o se isi viiga e uiga i perofeta e fesootai i aoaoga i nei fuaiupu. O faapefea ona fesoasoani ia te oe le auaunaga a le Au Peresitene Sili e te iloa ai le Tama Faalelagi ma Iesu Keriso?

Mataupu Faavae ma Feagaiga 90:24

“O le a galulue faatasi mea uma mo [lo’u] lelei.”

Mafaufau loloto i soo se aafiaga sa e maua ua faapea ona molimau mai e uiga i le folafolaga a le Alii i le Mataupu Faavae ma Feagaiga 90:24. Mafaufau e tusifaamaumau ou aafiaga ma faasoa atu i se tagata o le aiga po o se pele—atonu o se tasi o manaomia se faamautinoaga po o se faamalosiauga. Afai o loo e faatalitali pea i ni faamanuiaga faapitoa, mafaufau loloto i ni mea e mafai ona e faia ia tumau ai le faamaoni a o e faatalitali e vaavaai i auala “o le a galulue faatasi mea uma mo lo outou lelei.”

Mataupu Faavae ma Feagaiga 90:28–31

O ai Vienna Jaques?

Sa fanau Vienna Jaques i le aso 10 o Iuni, 1787, i Massachusetts. O se tamaitai o le faatuatua o lē sa matua’i tele lava ni ana mea tautupe na i ai, o Vienna sa feiloai muamua lava i faifeautalai i le 1831. Ina ua uma se molimau faaleagaga e faapea, e sa’o la latou savali, sa malaga atu o ia e feiloai i le Perofeta i Katelani, Ohaio, lea sa papatisoina ai o ia.

Sa usitai Vienna i le fautuaga a le Alii ia te ia i le Mataupu Faavae ma Feagaiga 90:28–31. O lana faapaiaga i le Alii, e aofia ai foai sa ia faia muamua atu i Katelani, na oo mai i se taimi sili ona taua mo le Ekalesia, i le taimi sa taumafai ai taitai e faatau mai le fanua lea o le a fausia ai le Malumalu o Katelani. O Viena sa “faamaoni … ma lē faapaiē” i lona olaga atoa ma sa i’u lava ina mafai ona “mau … i lalo i le filemu” (fuaiupu 31) i le Vanu o Sate Leki, lea na maliu ai o ia i le 96 o ona tausaga.

Mataupu Faavae ma Feagaiga 91

“O le Agaga e faaalia mai le moni”

Tatou te fetaiai uma lava ma sāvali o loo i ai ‟mea e tele … ua moni” ma ‟mea e tele … ua lē moni” (Mataupu Faavae ma Feagaiga 91:1–2). O le a se fautuaga e te maua i le vaega 91 e mafai ona fesoasoani ia te oe e iloatino ai le upumoni i sāvali e te lua fetaiai? Na faapefea ona fesoasoani le Agaga ia te oe e iloatino le mea moni mai le mea sese?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Sini Rikitone

• N. K. Whitney & Co. Faleoloa

• Upu o le Poto (MFF 89)

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 89

O le Upu o le Poto e fesoasoani ia ou ola maloloina ai i le tino ma le agaga.

• Ina ia folasia atu le vaega 89, atonu e mafai e oe ma lau fanau ona tilotilo i se ata o se malumalu pe usu se pese e uiga i le soifua maloloina faaletino, e pei o le “Ia Tuu Mai e le Alii se Malumalu” (Tusipese a Tamaiti, 73), e aoao atu ai o o tatou tino e pei o malumalu mo o tatou agaga. Fesoasoani i lau fanau e faatino auala e mafai ona latou tausia ai o latou tino.

• Ina ia aoao e uiga i poloaiga a le Alii i le Mataupu Faavae ma Feagaiga 89:10–17, e mafai e oe ma lau fanau ona tusi pe vaai i ata o mea lelei e mafai ona tatou aai ai pe faia e tausia ai o tatou tino ia maloloina (tagai i le ata ma le itulau o gaoioiga i le faaiuga o lenei otootoga). O le a le mea ua lapataia i tatou e le Alii e aua nei faaaogaina? Aisea e finagalo ai o Ia ia tatou tausia o tatou tino?

• Na fautuaina e Elder Gary E. Stevenson tagata talavou e fuafua muamua po o le a se mea o le a latou faia pe a faaosoosoina i latou i le ava malosi po o fualaau faasaina. Na ia aoao mai: “O le a e iloa ai o le faaosoosoga e itiiti lona pule i luga o oe. Ua uma ona e faia le faaiuga pe o le a faapefea ona e tali atu ma po o a mea o le a e faia. E te lē tau manaomia ona faia se faaiuga i taimi uma” (“O Lau Tusi Metotia o le Perisitua,” Liahona, Me 2019, 48). A uma ona faitau faatasi le Mataupu Faavae ma Feagaiga 89:4 ma le saunoaga a Elder Stevenson, fefautuaai ma lau fanau e uiga i le ala e mafai ai ona latou filifili nei—mo o latou olaga atoa—ia ola i le Upu o le Poto. E mafai foi ona e faatinoina pe faapefea ona latou tali atu pe afai o se tasi, e oo lava i se uo, ua ofoina mai ia i latou se mea e tetee i le Upu o le Poto. E faapefea ona faamanuiaina i tatou e le Alii a o tatou usiusitai i le Upu o le Poto? (tagai fuaiupu 18–21).

O o tatou tino o ni meaalofa mai le Atua.

Mataupu Faavae ma Feagaiga 90:5

Ua tuuina mai e le Atua ia te a’u perofeta e taitaia ma puipuia a’u.

• E mafai ona e tilotilo i ata o perofeta anamua pe usu se pese e pei o le “Mulimuli i le Perofeta” (Tusipese a Tamaiti, 58). Na faapefea ona faamanuiaina e le Atua Ana fanau e ala mai i Ana perofeta? Aisea e tatau ai ona tatou faalogo i perofeta a le Atua? (tagai Mataupu Faavae ma Feagaiga 90:5). Ona mafai lea e oe ma lau fanau ona tilotilo i se ata o le perofeta soifua ma faasoa atu nisi o mea na aoao mai e le Alii pe lapataia ai i tatou e ala mai ia te ia. E faapefea ona tatou mulimuli i le perofeta?

Mataupu Faavae ma Feagaiga 91

E mafai e le Agaga ona fesoasoani ia ou iloa le mea moni.

• E mafai ona e aoteleina le faaulutala o le vaega mo le Mataupu Faavae ma Feagaiga 91 e fesoasoani ai i lau fanau ia malamalama pe aisea na tuuina mai ai lenei faaaliga. Ona latou mafaufau lea i nofoaga, e pei o ala o faasalalauga, lea atonu tatou te maua ai e “tele mea … e moni” ma “e tele mea … e le moni” (fuaiupu 1–2). O a mea ua aoao mai e fuaiupu 4–6 ia i tatou e uiga i le Agaga Paia? E faapefea ona fesoasoani le Agaga Paia ia i tatou ia iloa le mea e sa’o?

Mo nisi manatu, tagai i le lomiga o lenei masina o le mekasini o le Uo .

‟O saito uma e lelei mo meaai a le tagata; faapea foi fua o le vine.”