Auiliiliga mai le O Le Toefuataiga o le Perisitua Mekisateko, saunia e Liz Lemon Swindle

28 Iulai–3 Aokuso: ‟Le Mana o le Faale-atua”

Mataupu Faavae ma Feagaiga 84

Talu mai lava ona toefuatai mai le perisitua i le 1829, ua faamanuiaina lava le Au Paia o Aso e Gata Ai e ala i le mana paia o le Alii. Sa papatisoina, faamauina ma valaauina i latou e auauna atu e ala i le pule o le perisitua, e pei uma lava o i tatou i aso nei. Peitai o le maua o le mana o le perisitua e le tutusa ma le malamalama atoatoa i ai, ma sa i ai i le Atua ni mea se tele sa finagalo o Ia ia malamalama i ai Lana Au Paia—aemaise lava i le oo mai o le toefuataiga o sauniga o le malumalu. O le faaaliga i le 1832 e uiga i le perisitua, o lenei ua avea ma Mataupu Faavae ma Feagaiga 84, na faalauteleina ai le vaaiga mamao a le Au Paia e uiga i le mea moni e ta’u o le perisitua. Ma e mafai ona faia foi lea lava mea mo i tatou i aso nei. O le mea sili ona taua, e tele mea e tatau ona aoao i ai e uiga i le mana faalelagi lea e umia “le ki lava lea o le malamalama e uiga i le Atua,” e faapea ona faaali mai ai “le mana o le faale-atua,” ma faapea ona saunia ai i tatou e “vaai i fofoga o le Atua, le Tamā lava, ma ola” (fuaiupu e 19–22).

Manatu mo le Aoaoina i le Aiga ma i le Lotu

Mataupu Faavae ma Feagaiga 84:17–32

E mafai ona ou maua le mana ma faamanuiaga o le perisitua a le Atua.

Pe a e mafaufau i le upu perisitua, o le a se mea e oo mai i lou mafaufau? E faapefea ona faatosinaina lou olaga e le mana o le perisitua a le Atua?

A uma ona mafaufau loloto i nei fesili, e mafai ona e suesue i le Mataupu Faavae ma Feagaiga 84:17–32, ma saili mo le mea ua finagalo le Alii e te iloa e uiga i le mana o Lona perisitua. Mafaufau pe mafai faapefea ona e faaaogaina nei fuaiupu e faamatala ai le perisitua ma ona faamoemoega i se tasi.

O le mea e tasi o le a e maua o le, e ala i sauniga o le perisitua ‟ua faaalia ai le mana o le faale-atua” (tagai fuaiupu 19–21). Atonu e mafai ona e lisiina sauniga o le perisitua na e auai ai (o lisi i le Tusitaulima Aoao, 18.1, 18.2, e mafai ona fesoasoani). Na faapefea e nei sauniga—ma feagaiga e faatatau i ai—ona aumaia le mana o le Atua i lou olaga? O le a faapefea ona ese lou olaga e aunoa ma na sauniga?

Na aoao mai Peresitene Russell M. Nelson, “O tamaitai uma ma alii uma e osia ni feagaiga ma le Atua ma tausia na feagaiga, ma o i latou e auai ma le agavaa i sauniga o le perisitua, e mauaina le avanoa tuusao i le mana o le Atua.” (“O Oa Faaleagaga,” Liahona, Nov. 2019, 77). Mafaufau e suesue le sāvali a Peresitene Nelson, ma vaavaai mo auala e mafai ona e ‟maua ai le mana o le Faaola i lou olaga.”

Tagai foi i le Mataupu Faavae ma Feagaiga 25:10, 13, 15; 121:34–37, 41–46; Autu ma Fesili, “Perisitua,” “Aoaoga a Iosefa Samita e uiga i le Perisitua, Malumalu, ma Tamaitai,” Gospel Library; Tusitaulima Aoao, 3.6, Gospel Library.

Mataupu Faavae ma Feagaiga 84:31–44

E maua le perisitua i se tautoga ma se feagaiga.

O le tautoga ma le feagaiga o le perisitua (tagai i le Mataupu Faavae ma Feagaiga 84:31–44) o loo i ai se faatatauga faapitoa mo atalii o le Tama Faalelagi o e ua faauuina i se tofi o le perisitua, ae o le tele o faamanuiaga folafolaina i nei fuaiupu o loo avanoa mo fanau uma a le Atua. O a nei folafolaga, ma o le a le mea ua poloaiina i tatou e le Atua e fai ina ia maua ai?

Na aoao mai Elder Paul B. Pieper: “E mata’ina ona i le tautoga ma le feagaiga o le perisitua [tagai i le Mataupu Faavae ma Feagaiga 84:31–42, o loo faaaoga ai e le Alii ia veape o le mauaina ma le talia. Na te le o faaaogaina le veape faau’u. O totonu o le malumalu e maua ai—faatasi—e alii ma tamaitai ia faamanuiaga ma le mana o le Perisitua Arona ma le Mekisateko” (“Revealed Realities of Mortality,” Ensign, Ian. 2016, 21).

A o e suesueina le Mataupu Faavae ma Feagaiga 84:31–44, mafaufau loloto po o le a le uiga o le ‟mauaina” ma le ‟talia” o le perisitua. E faapefea ona ese lenei mea mai le faauuina i se tofi o le perisitua? O le a se isi mea ua valaaulia oe e le Alii e maua i nei fuaiupu? O faapefea ona e faia lena mea?

O a ni mea e te maua ua musuia ai oe ia faamaoni atili i le taliaina o le Faaola, Lona Tamā, Ana auauna, ma le mana o Lana perisitua?

Tagai foi i le Mataupu Faavae ma Feagaiga 121:36–46.

Mataupu Faavae ma Feagaiga 84:43-61

O le ola ai i le afioga a le Atua e aumaia ai le malamalama ma le upumoni i lo’u olaga.

O a ni upumoni e te maua i le Mataupu Faavae ma Feagaiga 84:43–61 e fesoasoani e te malamalama ai i le pogai e tatau ai ona faaauau pea ona e suesue i le afioga a le Atua? Ia maitau le faatusatusaga i le va o le malamalama ma le pouliuli o loo i nei fuaiupu; o faapefea ona aumaia e lou “gauaʼi ma le filiga i upu o le ola e faavavau” le malamalama, upumoni, ma “le Agaga o Iesu Keriso” i lou olaga? (fuaiupu 43, 45).

Tagai foi i le 2 Nifae 32:3.

Faatusatusa mataupu faavae o le talalelei i mea masani. E mafai ona e mafaufau i se talafaatusa o le a faapupula mai ai upumoni i fuaiupu 43–44? Mo se faataitaiga, e faapefea i le mulimuli i laasaga uma i se fua o se kuka e pei o le ola ‟i upu uma … a le Atua”?

“Gauai atu ma le filiga i upu o le ola e faavavau.”

Mataupu Faavae ma Feagaiga 84:62–91

O le a faatasi le Alii ma a’u pe a ou i ai i Lana galuega.

A o e faitauina nei fuaiupu, e mafai ona e faailoa ai auala ua fetalai mai le Alii o le a Ia lagolago ai Ana auauna. E ono mafai faapefea ona faatatau nei folafolaga i le galuega ua finagalo o Ia e te faia? Mo se faataitaiga, ua faapefea ona faataunuuina folafolaga o loo i le fuaiupu e 88 i lou olaga?

Mataupu Faavae ma Feagaiga 84:106–110

E mafai e tagata uma ona saofagā i le galuega a le Atua.

O le a se mea o e aoaoina mai i nei fuaiupu e uiga i le ala e faataunuu ai e le Alii Lana galuega? O a ni fautuaga ma ni faamanuiaga ua e maua? Atonu foi e te mafaufau pe na faapefea ona ‟faagaeetiaina [oe] i le agamalu atoa” ona sa e auauna atu faatasi ma se tasi sa ‟malosi i le Agaga,” e aofia ai tagata i lou aiga.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Iosefa Samita le Itiiti

• N. K. Whitney & Co. Faleoloa

• Mataupu Faavae ma Feagaiga Tusi Lesona a le Tagata Aoao

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 84:4–5

O sauniga o le malumalu e fesoasoani ia te a’u ia saunia e toe mau faatasi ma le Tama Faalelagi.

• Ina ia fesoasoani i lau fanau ia tulimatai atu e o i le malumalu, e mafai ona e fatuina se paso mai se ata o se malumalu. I tua o vaega taitasi, e mafai ona e tusia ai se mea tatou te faia i le malumalu, e pei o le papatisoina mo tuaa, faamauina i o tatou aiga, ma osia feagaiga ma le Atua. Faitau ma lau fanau le Mataupu Faavae ma Feagaiga 84:4-5 ma fai atu ia i latou e faalogo mo le mea na poloaiina e le Alii le Au Paia e fau. A’o e tuufaatasia ma lau fanau ia le paso, faasoa i le tasi ma le isi mea e mafai ona tatou faia e saunia ai e ulufale i le malumalu.

Mataupu Faavae ma Feagaiga 84:19–22

E mafai ona ou maua le mana o le Tama Faalelagi e ala i sauniga o le perisitua.

• Ina ia fesoasoani i lau fanau ia malamalama po o le a le sauniga, mafaufau e vaai i ata o ni sauniga o le perisitua faatasi ma i latou, e pei o le Tusi Ata o le Talalelei, nu.103–8, po o le itulau o gaoioigao lenei vaiaso. Valaaulia i latou e faamatala mai le mea lea o loo tupu i ata taitasi. Ona mafai lea ona outou faitau faatasi le Mataupu Faavae ma Feagaiga 84:19–22. Aisea e finagalo ai le Tama Faalelagi ina ia tatou maua nei sauniga? Ta’u atu i lau fanau pe na faapefea ona e lagonaina le mana o le Atua ona o sauniga na e mauaina ma feagaiga na e osia. (Tagai foi i le ‟Mana, Pule, ma Ki o le Perisitua” i le faaopoopoga A po o le faaopoopoga E.)

Mataupu Faavae ma Feagaiga 84:77

O a’u o le uo a Iesu a o o’u mulimuli ia te Ia.

• A uma ona faitau faatasi le Mataupu Faavae ma Feagaiga 84:77 , fesili atu i lau fanau po o le a le uiga o le avea ma se uo. Atonu e te talanoa e uiga i ni uo lelei sa ia te oe. E faapefea ona faaali mai e Iesu ia i tatou e finagalo o Ia ia avea i tatou ma Ana uo? E faapefea ona tatou faʻaali atu tatou te mananao ai foi i lena mea? O se pese e pei o le “O Loo Ou Taumafai e Avea e Pei o Iesu,” (Tusipese a Tamaiti, 40) e mafai ona fesoasoani i lenei talanoaga.

Mataupu Faavae ma Feagaiga 84:88

E fesoasoani le Tama Faalelagi i Ana auauna.

• Atonu e fiafia lau fanau e faalogo e uiga i auala na fesoasoani ai faifeautalai ia te oe, lou aiga, po o ou tuaa ia maua le talalelei. Ona mafai lea ona e faitau e uiga i se folafolaga faapitoa na faia e le Alii i faifeautalai i le Mataupu Faavae ma Feagaiga 84:88. Atonu e mafai e lau fanau ona mafaufau i taga e o faatasi ma lenei fuaiupu. Faamatala atu e uiga i se taimi sa e auauna ai i le Alii ma lagona ai sa faatasi o Ia ma oe, e pei ona faamatalaina i le fuaiupu 88. E mafai foi ona e fesoasoani i lau fanau e mafaufau i auala e mafai ai ona avea i latou ma faifeautalai i le taimi nei. Molimau atu e fesoasoani le Tama Faalelagi ia i tatou ia iloa le tala e fai atu pe a tatou talanoa ma isi e faatatau ia Iesu Keriso.

Mo nisi manatu, tagai i le lomiga o lenei masina o le mekasini o le Uo .

Malumalu o Roma Italia