“ວັນທີ 29 ເດືອນກັນຍາ–ວັນທີ 5 ເດືອນຕຸລາ: ‘ມັນເປັນບ້ານຂອງພຣະອົງ, ເປັນສະຖານທີ່ສັກສິດ’: ຄຳສອນ ແລະ ພັນທະສັນຍາ 109–110,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 109–110,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

A Glorious Light—Kirtland Temple [ຄວາມສະຫວ່າງທີ່ຮຸ່ງເຫລື້ອມ—ພຣະວິຫານເຄີດແລນ], ໂດຍ ກະເລັນ ແອັສ ຮອບຄິນສັນ

ວັນທີ 29 ເດືອນກັນຍາ–ວັນທີ 5 ເດືອນຕຸລາ: “ມັນເປັນບ້ານຂອງພຣະອົງ, ເປັນສະຖານທີ່ສັກສິດ”

ຄຳສອນ ແລະ ພັນທະສັນຍາ 109–110

ປະຕູພຣະວິຫານເຄີດແລນບໍ່ຄວນເປີດກ່ອນແປດໂມງເຊົ້າຂອງວັນທີ 27 ເດືອນມີນາ, 1836. ແຕ່ໄພ່ພົນຜູ້ທີ່ຫວັງຈະໄດ້ເຂົ້າຮ່ວມການອຸທິດ ໄດ້ມາລຽນແຖວລໍຖ້າແຕ່ເຈັດໂມງເຊົ້າ. ສະຖານທີ່ຂ້າງນອກເພີ່ມ ແລະ ແລ້ວພາກທີສອງເປັນສິ່ງຈຳເປັນ ເພື່ອຮັບຮອງທຸກຄົນ. ແລະ ບໍ່ພຽງແຕ່ຄົນທີ່ມີຊີວິດຢູ່ເທົ່ານັ້ນທີ່ຮີບຮ້ອນຢາກໄປຮ່ວມ. ພະຍານຫລາຍຄົນໄດ້ເຫັນເຫລົ່າທູດຢູ່ໃນພຣະວິຫານ ແລະ ແມ່ນແຕ່ຢູ່ເທິງຫລັງຄາ, ລະຫວ່າງ ແລະ ຫລັງຈາກການອຸທິດ. ເບິ່ງຄືວ່າ “ທູດສະຫວັນ” ໄດ້ມາເພື່ອ “ຮ້ອງເພງ ແລະ ໂຮ່ຮ້ອງ” ຮ່ວມກັບໄພ່ພົນຍຸກສຸດທ້າຍ (“ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30).

ເປັນຫຍັງຈຶ່ງມີຄວາມຕື່ນເຕັ້ນຫລາຍທີ່ສຸດ—ຢູ່ທັງສອງຟາກມ່ານ? ຫລັງຈາກຫລາຍສັດຕະວັດ, ມີບ້ານຂອງພຣະຜູ້ເປັນເຈົ້າອີກຄັ້ງຢູ່ເທິງແຜ່ນດິນໂລກ. ພຣະຜູ້ເປັນເຈົ້າໄດ້ກະທຳຕາມຄຳສັນຍາຂອງພຣະອົງ ທີ່ຈະປະທານພອນໃຫ້ໄພ່ພົນຂອງພຣະອົງ “ດ້ວຍອຳນາດຈາກເບື້ອງບົນ” (ຄຳສອນ ແລະ ພັນທະສັນຍາ 38:32). ແລະ ນີ້, ພຣະອົງໄດ້ປະກາດ, ເປັນພຽງແຕ່ “ການເລີ່ມຕົ້ນພອນ” ເທົ່ານັ້ນ (ຄຳສອນ ແລະ ພັນທະສັນຍາ 110:10). ສະໄໝທີ່ເຮົາມີຊີວິດຢູ່ໃນເວລານີ້—ພ້ອມດ້ວຍວຽກງານ ແລະ ພິທີການຂອງພຣະວິຫານທີ່ເລັ່ງດ່ວນມີໃຫ້ຫລາຍລ້ານຄົນ ທັງຄົນເປັນ ແລະ ຄົນຕາຍ—ໄດ້ເລີ່ມຕົ້ນຢູ່ໃນເມືອງເຄີດແລນ, ຕອນທີ່ “ມ່ານປົກຄຸມພື້ນໂລກ [ໄດ້] ເລີ່ມເປີດ” (“ພຣະວິນຍານພຣະເຈົ້າ”).

ເບິ່ງ Saints, 1:232–41; “A House for Our God,” ໃນ Revelations in Context, 169–72 ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 109

ພຣະຜູ້ເປັນເຈົ້າສະເໜີມອບພອນອັນຍິ່ງໃຫຍ່ໃຫ້ເຮົາ ຜ່ານທາງພັນທະສັນຍາພຣະວິຫານ.

ພຣະວິຫານເຄີດແລນແມ່ນແຕກຕ່າງຈາກພຣະວິຫານທີ່ເຮົາຮູ້ຈັກໃນທຸກວັນນີ້. ບໍ່ມີແທ່ນບູຊາ ແລະ ບໍ່ມີອ່າງບັບຕິສະມາ, ຍົກຕົວຢ່າງ. ແຕ່ພອນທີ່ບັນຍາຍຢູ່ໃນ ພາກທີ 109, ຄຳອະທິຖານອຸທິດສຳລັບພຣະວິຫານເຄີດແລນ, ກໍມີໃຫ້ຢູ່ໃນບ້ານຂອງພຣະຜູ້ເປັນເຈົ້າໃນທຸກວັນນີ້ເຊັ່ນກັນ. ທົບທວນຂໍ້ຕໍ່ໄປນີ້ເພື່ອຫາພອນເຫລົ່ານີ້ ແລະ ໄຕ່ຕອງວ່າມັນຈະຊ່ວຍເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງທ່ານກັບພຣະບິດາເທິງສະຫວັນ ແລະ ພຣະເຢຊູຄຣິດແນວໃດ.

ຂໍ້ທີ 5, 12–13 (ເບິ່ງ ຄຳສອນ ແລະ ພັນທະສັນຍາ 110:6–8 ນຳອີກ): ໃນບ້ານຂອງພຣະຜູ້ເປັນເຈົ້າ, ພຣະອົງສາມາດສະແດງພຣະອົງເອງໃຫ້ປະຈັກແກ່ເຮົາ, ແລະ ເຮົາສາມາດຮູ້ສຶກເຖິງອຳນາດຂອງພຣະອົງ.

ຂໍ້ທີ 9, 15–19, 26, 78–79:

ຂໍ້ທີ 21–23:

ຂໍ້ທີ 24–33, 42–46:

ຂໍ້ທີ 35–39:

ພອນຢ່າງອື່ນໆ:

ຖ້າຫາກທ່ານເຄີຍໄປບ້ານຂອງພຣະຜູ້ເປັນເຈົ້າ, ໃຫ້ຄິດກ່ຽວກັບຄຳສັນຍາເຫລົ່ານີ້ໄດ້ສຳເລັດຜົນໃນຊີວິດຂອງທ່ານແນວໃດ.

ເພງສວດ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30) ໄດ້ແຕ່ງຂຶ້ນສຳລັບການອຸທິດພຣະວິຫານເຄີດແລນ—ແລະ ມັນໄດ້ຖືກຮ້ອງໃນການອຸທິດພຣະວິຫານທຸກເທື່ອ ນັບແຕ່ນັ້ນມາ. ໃຫ້ພິຈາລະນາທີ່ຈະຮ້ອງເພງ ຫລື ຟັງ ເພື່ອເປັນສ່ວນໜຶ່ງຂອງການສຶກສາ ແລະ ການນະມັດສະການຂອງທ່ານ. ພອນຢ່າງໃດແດ່ຂອງພຣະວິຫານທີ່ທ່ານພົບເຫັນບັນຍາຍຢູ່ໃນເພງສວດເພງນີ້?

ຄຳສອນ ແລະ ພັນທະສັນຍາ 109

ການອະທິຖານແມ່ນການສື່ສານກັບພຣະບິດາເທິງສະຫວັນ.

ພາກທີ 109 ແມ່ນຄຳອະທິຖານອຸທິດທີ່ສາດສະດາໂຈເຊັບ ສະມິດ ໄດ້ຮັບໂດຍການເປີດເຜີຍ (ເບິ່ງ ຫົວຂໍ້ພາກ). ທ່ານຮຽນຮູ້ຫຍັງແດ່ກ່ຽວກັບການອະທິຖານຈາກພາກນີ້? ຍົກຕົວຢ່າງ, ທ່ານອາດສັງເກດເຫັນວ່າ ສາດສະດາໄດ້ຂອບພຣະໄທສຳລັບສິ່ງໃດ ແລະ ຂໍພອນຢ່າງໃດ. ມີສິ່ງໃດອີກແດ່ທີ່ເພິ່ນກ່າວໃນຄຳອະທິຖານນີ້? ຂະນະທີ່ທ່ານສຶກສາ, ທ່ານອາດປະເມີນການສື່ສານຂອງທ່ານກັບພຣະບິດາເທິງສະຫວັນ. ທ່ານຮຽນຮູ້ສິ່ງໃດກ່ຽວກັບພຣະອົງ ແລະ ພຣະບຸດຂອງພຣະອົງຈາກຄຳອະທິຖານນີ້?

ຖ້າຫາກທ່ານຢາກອ່ານບົດອະທິຖານອຸທິດຂອງພຣະວິຫານແຫ່ງອື່ນໆ, ລວມທັງພຣະວິຫານໃກ້ບ້ານທ່ານ, ໃຫ້ເຂົ້າໜ້າສຳລັບພຣະວິຫານທີ່ temples.ChurchofJesusChrist.org.

ຄຳສອນ ແລະ ພັນທະສັນຍາ 110:1–10

ພຣະຜູ້ເປັນເຈົ້າສາມາດສະແດງພຣະອົງເອງໃຫ້ປະຈັກແກ່ເຮົາຢູ່ໃນບ້ານຂອງພຣະອົງ.

ຂະນະທີ່ທ່ານອ່ານຄຳບັນຍາຍເຖິງພຣະຜູ້ຊ່ວຍໃຫ້ລອດໃນ ຄຳສອນ ແລະ ພັນທະສັນຍາ 110:1–10, ລວມທັງພາກຫົວຂໍ້, ໃຫ້ໄຕ່ຕອງສິ່ງທີ່ຂໍ້ເຫລົ່ານີ້ແນະນຳກ່ຽວກັບພຣະອົງ.

ພຣະເຢຊູຄຣິດສະແດງພຣະອົງເອງໃຫ້ປະຈັກ—ຫລື ເຮັດໃຫ້ພຣະອົງເອງເປັນທີ່ຮູ້ຈັກຕໍ່ທ່ານ—ໃນບ້ານຂອງພຣະອົງແນວໃດ? ພຣະອົງຊ່ວຍທ່ານໃຫ້ຮູ້ວ່າ ພຣະອົງຮັບເອົາການເສຍສະລະຂອງທ່ານແນວໃດ?

ຄຳສອນ ແລະ ພັນທະສັນຍາ 110:10–16

ພຣະຜູ້ຊ່ວຍໃຫ້ລອດຊີ້ນຳວຽກງານຂອງພຣະອົງຜ່ານທາງຂໍກະແຈຂອງຖານະປະໂລຫິດ.

ກ່ອນທີ່ໂມເຊ, ອີລາຍ, ແລະ ເອລີຢາຈະມາປະກົດໃນພຣະວິຫານເພື່ອຟື້ນຟູ ຂໍກະແຈຂອງຖານະປະໂລຫິດ, ພຣະເຢຊູຄຣິດໄດ້ກ່າວວ່າ, “ນີ້ເປັນການເລີ່ມຕົ້ນພອນຊຶ່ງຈະຖອກເທລົງມາເທິງຫົວຂອງຜູ້ຄົນຂອງເຮົາ” (ຄຳສອນ ແລະ ພັນທະສັນຍາ 110:10). ຂະນະທີ່ທ່ານອ່ານ ຂໍ້ທີ 11–16, ໃຫ້ຄິດກ່ຽວກັບພອນທີ່ພຣະຜູ້ຊ່ວຍໃຫ້ລອດກຳລັງຖອກເທລົງມາເທິງທ່ານ ຜ່ານທາງວຽກງານທີ່ຖືກຊີ້ນຳໂດຍຂໍກະແຈເຫລົ່ານີ້. ຍົກຕົວຢ່າງ:

ຂໍ້ທີ 11: ໂມເຊ ແລະ ຂໍກະແຈຂອງການເຕົ້າໂຮມອິດສະຣາເອນ (ຫລື ວຽກງານເຜີຍແຜ່). ພຣະຜູ້ເປັນເຈົ້າໄດ້ອວຍພອນທ່ານ ແລະ ຄອບຄົວຂອງທ່ານຜ່ານທາງວຽກງານເຜີຍແຜ່ຂອງສາດສະໜາຈັກຂອງພຣະອົງແນວໃດ?
ຂໍ້ທີ 12: ອີລາຍ ແລະ ຂໍກະແຈແຫ່ງພຣະກິດຕິຄຸນຂອງອັບຣາຮາມ, ລວມທັງ ພັນທະສັນຍາຂອງອັບຣາຮາມ. ພຣະຜູ້ເປັນເຈົ້າອວຍພອນທ່ານ ແລະ “ລູກຫລານຫລັງຈາກ [ທ່ານ]” ເພາະພັນທະສັນຍາຂອງທ່ານ? (ເບິ່ງ Russell M. Nelson, “The Everlasting Covenant,” Liahona, Oct. 2022, 4–11; ຄູ່ມືພຣະຄຳພີ, “ອີລາຍ,” ຫ້ອງສະໝຸດພຣະກິດຕິຄຸນ.)
ຂໍ້ທີ 13–16: ເອລີຢາ ແລະ ອຳນາດແຫ່ງການຜະນຶກ, ໄດ້ຖືກສະແດງໃຫ້ປະຈັກຜ່ານທາງວຽກງານພຣະວິຫານ ແລະ ປະຫວັດຄອບຄົວ. ເປັນຫຍັງທ່ານຈຶ່ງຄິດວ່າພຣະບິດາເທິງສະຫວັນຕ້ອງການໃຫ້ທ່ານເຊື່ອມຕໍ່ເຂົ້າກັບບັນພະບຸລຸດຂອງທ່ານ ຜ່ານທາງພິທີການພຣະວິຫານ? (ເບິ່ງ Gerrit W. Gong, “Happy and Forever,” Liahona, Nov. 2022, 83–86.)

ທ່ານເຫັນຄວາມເຊື່ອມຕໍ່ອັນໃດແດ່ລະຫວ່າງຂໍກະແຈເຫລົ່ານີ້ກັບໜ້າທີ່ຮັບຜິດຊອບຂອງທ່ານໃນວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະເຈົ້າ (ການດຳລົງຊີວິດຕາມພຣະກິດຕິຄຸນ, ການດູແລຄົນຂັດສົນ, ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ, ແລະ ການເຕົ້າໂຮມຄອບຄົວຊົ່ວນິລັນດອນ)?

ປະສົບການໃດແດ່ທີ່ທ່ານເຄີຍມີກັບວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະເຈົ້າ? ປະສົບການເຫລົ່ານີ້ສິດສອນທ່ານຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ, ສາດສະໜາຈັກຂອງພຣະອົງ, ແລະ ວຽກງານຂອງພຣະອົງ?

ຫາວິທີທີ່ຈະລວມຄົນອື່ນເຂົ້ານຳ. ຖ້າຫາກທ່ານກຳລັງສິດສອນກ່ຽວກັບ ຄຳສອນ ແລະ ພັນທະສັນຍາ 110:11–16, ທ່ານອາດພິຈາລະນາທີ່ຈະມອບໝາຍຜູ້ຮຽນແຕ່ລະຄົນໃຫ້ສຶກສາກ່ຽວກັບໂມເຊ, ອີລາຍ, ຫລື ເອລີຢາ ແລະ ຂໍກະແຈທີ່ເພິ່ນໄດ້ຟື້ນຟູ. ແລ້ວຜູ້ຮຽນສາມາດແບ່ງປັນນຳກັນເຖິງສິ່ງທີ່ເຂົາເຈົ້າໄດ້ຄົ້ນພົບ. ການເຂົ້າຫາເຊັ່ນນີ້ຈະເຮັດໃຫ້ທຸກຄົນມີສ່ວນຮ່ວມໃນການຮຽນຮູ້ ແລະ ການສິດສອນ. (ເບິ່ງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 24–27).

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 109:12–13; 110:1–7

ພຣະວິຫານແມ່ນບ້ານຂອງພຣະຜູ້ເປັນເຈົ້າ.

ທ່ານ ແລະ ລູກໆຂອງທ່ານສາມາດເວົ້າກ່ຽວກັບບາງສິ່ງທີ່ທ່ານມັກກ່ຽວກັບບ້ານຂອງທ່ານ. ແລ້ວພວກທ່ານສາມາດເບິ່ງຮູບພຣະວິຫານ ແລະ ໃຊ້ ຄຳສອນ ແລະ ພັນທະສັນຍາ 109:12–13; 110:1–7 ເພື່ອເວົ້າລົມກ່ຽວກັບວິທີທີ່ພຣະວິຫານໄດ້ຖືກອຸທິດ ແລະ ກາຍເປັນບ້ານຂອງພຣະຜູ້ເປັນເຈົ້າແນວໃດ (ເບິ່ງ “ບົດທີ 39: ພຣະວິຫານເຄີດແລນໄດ້ຮັບການອຸທິດ,” ໃນ ເລື່ອງຄຳສອນ ແລະ ພັນທະສັນຍາ, 154, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ). ແບ່ງປັນນຳກັນບາງສິ່ງທີ່ທ່ານມັກກ່ຽວກັບບ້ານຂອງພຣະຜູ້ເປັນເຈົ້າ.

2:17
Chapter 39: The Kirtland Temple Is Dedicated: January–March 1836
ບາງທີທ່ານ ແລະ ລູກໆຂອງທ່ານສາມາດວາດພາບວ່າ ເພື່ອນຄົນໜຶ່ງກຳລັງພະຍາຍາມຊອກຫາເຮືອນຂອງພວກທ່ານ. ເຮົາຈະເຮັດແນວໃດເພື່ອຊ່ວຍເພື່ອນຂອງເຮົາໃຫ້ຮູ້ວ່າເຮືອນຂອງເຮົາແມ່ນຫລັງໃດ? ເຮົາຈະຮູ້ວ່າພຣະວິຫານແມ່ນບ້ານຂອງພຣະຜູ້ເປັນເຈົ້າໄດ້ແນວໃດ? (ເບິ່ງ ຄຳສອນ ແລະ ພັນທະສັນຍາ 109:12–13).

ຄຳສອນ ແລະ ພັນທະສັນຍາ 110

ພຣະຜູ້ຊ່ວຍໃຫ້ລອດກຳລັງໃຫ້ພອນຜູ້ຄົນຂອງພຣະອົງຜ່ານທາງຂໍກະແຈຂອງຖານະປະໂລຫິດ.

ທ່ານສາມາດໃຊ້ ໜ້າກິດຈະກຳ ສຳລັບອາທິດນີ້ ຫລື “ບົດທີ 40: ພາບນິມິດໃນພຣະວິຫານເຄີດແລນ” (ໃນ ເລື່ອງຄຳສອນ ແລະ ພັນທະສັນຍາ, 155–57, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ) ເພື່ອບອກລູກໆກ່ຽວກັບບຸກຄົນຈາກສະຫວັນທີ່ໄດ້ມາຢ້ຽມຢາມພຣະວິຫານ. ທ່ານກໍຍັງສາມາດໃຊ້ຮູບພາບຢູ່ໃນທ້າຍໂຄງຮ່າງນີ້ນຳອີກ.

1:17
The Kirtland Temple
ເພື່ອຮຽນຮູ້ກ່ຽວກັບຄວາມສຳຄັນຂອງສິ່ງທີ່ໄດ້ເກີດຂຶ້ນໃນພຣະວິຫານເຄີດແລນ, ທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບວ່າ ຂໍກະແຈເຮັດຫຍັງໄດ້ແດ່ ບາງທີລູກໆຂອງທ່ານສາມາດປ່ຽນຜຽນກັນຈັບກະແຈ ແລະ ທຳທ່າເປີດປະຕູທີ່ປິດຢູ່. ຊ່ວຍພວກເຂົາຊອກຫາຄຳວ່າ ຂໍກະແຈ ໃນ ຄຳສອນ ແລະ ພັນທະສັນຍາ 110:11–16, ແລະ ເວົ້າລົມກ່ຽວກັບພອນທີ່ຂໍກະແຈເຫລົ່ານີ້ເປີດໃຫ້. ທ່ານອາດອະທິບາຍວ່າ ຂໍກະແຈຂອງຖານະປະໂລຫິດແມ່ນການອະນຸຍາດຈາກພຣະເຈົ້າໃຫ້ນຳພາສາດສະໜາຈັກຂອງພຣະອົງ. ແບ່ງປັນຄວາມກະຕັນຍູຂອງທ່ານກ່ຽວກັບວ່າ ພຣະຜູ້ເປັນເຈົ້າໄດ້ປະທານຂໍກະແຈຂອງຖານະປະໂລຫິດໃຫ້ເຮົາແນວໃດ.

ຄຳສອນ ແລະ ພັນທະສັນຍາ 110:15

ພຣະຜູ້ຊ່ວຍໃຫ້ລອດຢາກຫັນໃຈຂອງເຮົາໄປຫາບັນພະບຸລຸດຂອງເຮົາ.

ຫລັງຈາກທີ່ອ່ານ ຄຳສອນ ແລະ ພັນທະສັນຍາ 110:15 ນຳກັນ, ໃຫ້ບອກລູກໆຂອງທ່ານກ່ຽວກັບປະສົບການທີ່ຊ່ວຍຫັນໃຈຂອງທ່ານໄປຫາບັນພະບຸລຸດຂອງທ່ານແນວໃດ. ພວກທ່ານກໍຍັງສາມາດຮ້ອງເພງນຳກັນເຊັ່ນ “ພຣະເຈົ້າມອບພຣະວິຫານແກ່ເຮົາ” (ເພງສວດ ແລະ ເພງຂອງເດັກນ້ອຍ, 68) ນຳອີກ.
ແມ່ນຫຍັງທີ່ຊ່ວຍ “ຫັນໃຈ” ຂອງລູກໆຂອງທ່ານໄປຫາບັນພະບຸລຸດຂອງພວກເຂົາ? ທ່ານສາມາດພົບເຫັນແນວຄິດທີ່ສະໜຸກສະໜານບາງຢ່າງໄດ້ ຢູ່ທີ່ FamilySearch.org/discovery. ພວກທ່ານສາມາດຊ່ວຍກັນຊອກຫາບັນພະບຸລຸດ ຜູ້ທີ່ຕ້ອງການພິທີການພຣະວິຫານ. ເປັນຫຍັງພຣະເຢຊູຈຶ່ງຢາກໃຫ້ເຮົາເຮັດວຽກງານນີ້?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ໂມເຊ, ອີລາຍ, ແລະ ເອລີຢາປະກົດຕົວຢູ່ໃນພຣະວິຫານເຄີດແລນ — Vision in the Kirtland Temple [ພາບນິມິດໃນພຣະວິຫານເຄີດແລນ], ໂດຍ ແກຣີ ອີ ສະມິດ