“Oktoba 6–12: ‘Inaaj Karōk Aolep Men Otemjeļo̧k n̄an Em̧m̧an eo Ami’: Katak im Bujen Ko 111–114,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Katak im Bujen Ko 111–114,” Itok, Ļoor Eō—N̄an M̧weeo im Kabun̄ in: 2025
Oktoba 6–12: “Inaaj Karōk Aolep Men Otemjeļo̧k n̄an Em̧m̧an eo Ami”
Katak im Bujen Ko 111–114
Em̧ōj ke am̧ kar en̄jake juon en̄jake ilo jetōb eo me ekar kōm̧m̧an bwe kwon peran im inem̧m̧an ilo tōmak eo am̧ ilo Kraist—ak en̄taan ko an mour in rekar kajjieon̄ idajon̄jon̄e tōmak eo am̧, im kwar lo bwe ekar pen am̧ bōk aeņōm̧m̧an eo kwar en̄jake m̧okta? Juon men eo ekar bar waļo̧k n̄an Armej ro Rekwojarjar ilo Kirtland. Edikļo̧k jān juon iiō ālkin waļo̧ktok ko an jetōb ilo kar iien aje eo an Kirtland Tampeļ, jum̧ae ekar waļo̧k. Juon iien ekar jabwe jāān, apan̄ n̄an Doulul eo an Jon̄oulruo, im apan̄ ko jet raar jelet jet iaan Armej ro Rekwojarjar n̄an kabweer tōmak eo aer n̄an kajekdo̧o̧n m̧ōjņo̧ ko aer.
Jejjab maron̄ kōjekdo̧o̧n māliijjon̄ ko, kōn menin ekōjkan ad maron̄ kōjparoki jān aer kam̧ōjņōik tōmak eo ad im naan in kam̧ool ko ad? Bōlen m̧ōttan uwaak eo maron̄ loe ilo kapilōk eo an Irooj ilo Katak im Bujen Ko 112, kar ilo iien eo ekar ļap en̄taan ilo Kirtland. Irooj ekar ba, “karreoik būruōm̧ im̧aō” (eoon 28), “Jab jum̧ae” (eoon 15), “Mejmije laļūm̧ n̄an jerbal eo” (eoon 7), im “Kwōn kōttāik eok” (eoon 10). Ilo ad ļoor kapilōk in, Irooj enaaj “tōl [kōj] kōn peim” ilo iien apan̄ im n̄an kōmour im aeņōm̧m̧an (lale eoon ko 10, 13).
Ļōmņak ko n̄an Ekkatak ilo M̧weeo im ilo Kabun̄ in
Irooj emaron̄ “karōki aolep men otemjeļo̧k n̄an em̧m̧an eo [aō].”
Ilo 1836, Kabun̄ in ekar ļap m̧uri ko an ilo an kōm̧m̧ane jerbal eo an Irooj. Josep Smith im ro jet raar inepata kōn m̧uri kein im kar ļōmņake wāween ko n̄an kōļļāiki (lale kadkad in Katak im Bujen Ko 111).
Ilo am̧ riiti jekjōn 111, ļōmņake ekōjkan an naan ko an Irooj n̄an Josep maron̄ jerbal n̄an eok—im men ko kwoj inepata kaki. N̄an waanjon̄ak, n̄āāt eo kwaar en̄jake an iakwe eo an Anij “jab inepata ilo itok in ami ilo ito-tak in nouwe ko ami” (eoon 1)? Elmen an kar Irooj jipan̄ eok loi “mennin aorōk ko” me kar jab kōtmeni (eoon 10)? Ta eo E eaar kōm̧m̧ane n̄an “karōk aolep men otemjeļo̧k n̄an em̧m̧an eo ami” (eoon 11)? Ta eo naan in “iien eo wōt em̧ōkajtata kwomaron̄ bōki” ej katakin eok kōn Jemedwōj Ilan̄?
Bar lale Matu 6:19–21, 33; “More Treasures Than One,” ilo Revelations in Context, 229–34.
Katak im Bujen Ko 112:3–15, 22
Irooj enaaj tōl eō ilo aō kappukōt Ankilaan ilo ettā.
Thomas B Marsh, Būreejtōn eo an Doulul eo an Jon̄oulruo Rijilōk ro, ekar illu ippān Josep Smith bwe, ekar jab kennanik e, kar kūr ruo iaan ro ilo doulul eo an n̄an kwaļo̧k gospel eo ilo England. Ekar ioon Rikanaan eo, eo ekar bōk juon revelesōn n̄an jipan̄ Thomas n̄an do̧o̧rļo̧k aolep metak in en̄jake ko an. Revelesōn in em̧ōj kar je ilo Katak im Bujen Ko 112.
Dāpij wōt meļeļe in ilo kōlm̧enļo̧kjen ilo am̧ ekkatak Katak im Bujen Ko 112. Ta ko kwoj loi me emaron̄ kar kōmetak en̄jake ko an Thomas? Ilo eoon 3–15 im 22, kwomaron̄ kappukot uwaak ko n̄an kajjitōk ko āinwōt kein: Ta in ettā bōro? Ta meļeļein bwe Irooj en tōl eok “kōn pein”? Etke kwoj ļōmņak ettā ej jipan̄ eok bōk tōl an Irooj? Kwomaron̄ ellolo bar jet uwaak ilo “Jon̄ak in Ettā” ilo enaan eo an Elder Joseph W. Sitati “Jon̄ak ko an Rikaļo̧o̧r” (Liaona, Nob. 2022, 87–88).
Ļōmņak kōn juon eo kwojeļā kajjien eettā bōro. Ta eo armej in ej kōm̧m̧ane bwe en kwaļo̧k an ettā bōro? Ta eo kwoj ekkatak jān Rilo̧mo̧o̧r kōn ettā? Bōlen kwomaron̄ kappok pija ko jān mour eo An ilo An kar kwaļo̧k an ettā bōro.
N̄āāt eo kwaar en̄jake kar tōl jen Irooj ilo am̧ kar kōttāik eok make?
Bar lale Ulisses Soares, “Be Meek and Lowly of Heart,” Liaona, Nov. 2013, 9–11; “The Faith and Fall of Thomas Marsh,” ilo Revelations in Context, 54–60; Topics and Questions, “Humility,” Gospel Library; “Be Thou Humble,” Hymns, no. 130.
Rūkkatak ro rej bōk koņaer. Ļōmņak kōn am̧ maron̄ jipan̄ armej ro kwoj katakin er lukkuun bōk koņaer ilo ekkatak m̧ool ko ilo jeje ko rekwojarjar. N̄an waanjon̄ak, jipan̄ er meļeļe ta eo Irooj ej ba ilo Katak im Bujen Ko 112:10, kwomaron̄ pinej mejān juon im kōkm̧anm̧an am̧ tōl e kōn peim̧ ilo an juon iaļ in jea ak men ko jet. Ta eo jemaron̄ ekkatak kōn ettā jān waanjon̄ak in?
Katak im Bujen Ko 112:12–26, 28, 33–34
Ro rej m̧ool in oktak rej itok n̄an jeļā kajjien Jisōs Kraist.
M̧ool eo in bwe jet iaan Rijilōk ro ilo 1837 eo, raar oktak im jum̧aeik Rikanaan eo ekar juon menin kakeememej em̧m̧an jekdo̧o̧n kūr ko ad ilo Kabun̄ in ak ewi jon̄an ad jeļā kōn gospel in, kajjojo iaad jej aikuj lukkuun lale ad oktak n̄an Jisōs Kraist. Bōlen kwomaron̄ riiti Katak im Bujen Ko 112:12–26, 28, 33–34 im pukot m̧ool ko me remaron̄ jipan̄ eok eļļā jān juon mālijjon̄ in tōmak ak lukkuun oktak n̄an Irooj. Kwomaron̄ en̄jake im̧we n̄an kwaļo̧k ta eo kwoj loe n̄an jipan̄ juon armej kōkajoorļo̧k oktak eo an n̄an Kraist.
Josep Smith ekar “juon rikarejar ilo pā ko pein Kraist.”
Rikanaan Aiseia ekar kanaan kōn juon iaan ro ineen Jesse āinwōt juon “juļ” im juon “okar” (Aiseia 11:1, 10). Ilo jekjōn 113, Irooj ej kōmeļeļeik bwij in, juon rikarejaran Kraist, enaaj erom̧ kein jerbal n̄an aiintok armej ro an Irooj ilo raan ko āliktata (lale Katak im Bujen Ko 113:4, 6). Kanaan in ej lukkuun kōmeļeļe kōn Josep Smith. Ekōjkan an menin im m̧ool ko jet ilo jekjōn 113 kar lukkuun kōketak Armej ro Rekwojarjar ilo iien tarpok eo ke rekar jelm̧aeiki ilo Kirtland? Ta eo kwoj loe ilo revelesōn in me ej im̧we eok n̄an bōk kuņaam̧ ilo jerbal eo an Irooj rainin?
Bar lale Unin Tōl eo n̄an Jeje ko Rekwojarjar,“Jesse,” Gospel Library; 2 Nipai 21:10–12; Josep Smith—Bwebwenato 1:40.
Aiseia eaar jeje kōn juon “jul” im “okar” rej waļo̧ktok jān “dāpdepin Jesse” (Aiseia 11:1).
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Katak im Bujen Ko 111:2, 10–11
Men ko an Anij remaron̄ mennin aorōk n̄an n̄a.
-
Karuwaineneik er n̄an jin̄aik ta eo ej itok n̄an ļōmņak ko aer n̄e rej ron̄ naan in men aorōk Innām kwomaron̄ riiti Katak im Bujen Ko 111:2, 10–11 im keidi men aorōk ko an laļin n̄an men aorōk ko an Irooj. (Lale peij in m̧akūtkūteo an wiik in.) Ekōjkan ad maron̄ kaorōkļo̧k men ko an Anij?
Irooj enaaj tōl eō ilo pein im uwaaki jar ko aō.
-
Ālkin riiti Katak im Bujen Ko 112:10 ippān doon, kwe im ajri ro nejūm̧ maron̄ al ippān doon “Be Thou Humble” (Hymns, no. 130). Kom̧ maron̄ bar ikkure juon ikkure bwe ekoba tōl doon “kōn pā ko peid” (āinwōt juon iaļ epen). Ekōjkan an Irooj tōl kōj “kōn pā ko pein,” mekarta n̄e E ejjab pād ippād ilo kanniōk? Etke jej aikuj Irooj bwe en jipan̄ kōj? N̄āāt eo jekar en̄jake ke Irooj ekar tōl kōj?
-
Kwe im ajri ro nejūm̧ maron̄ jeje naan ko ilo Katak im Bujen Ko 112:10 im kameej kōjeraam̧m̧an ko Irooj ej letok n̄an kōj n̄e jej oktakļo̧k n̄an E ilo ettā. Kōketak ajri ro nejum n̄an kwaļo̧k iien ko me rej kajjitōk jipan̄ eo an Irooj ilo ettā im kar bōk uwaak ko n̄an jar ko aer im kar tōl er n̄an kōm̧m̧ane juon men em̧m̧an (lale Moronai 7:13, 16).
Kōmeļeļe ko jān Arise and Walk, jān Simon Dewey
Jisōs ej kōņaan bwe in iakwe aolep.
-
Kwe im ajri ro nejūm̧ maron̄ kajjojo riit jān “Jebta 41: Jorren eo ilo Kirtland” (ilo Bwebwenato ko jān Katak im Bujen Ko, 158–60). Wōn eo ilo bwebwenato in ej kōm̧m̧an jorrāān ilo Kirtland? Wōn eo ej kajjieon̄ kōm̧m̧an em̧m̧anļo̧k? Innām kwomaron̄ riiti Katak im Bujen Ko 112:11 im kōnono etke Rilo̧mo̧o̧r eo ekōņaaņ bwe jen iakwe aolep. N̄āāt eo E ekar kwaļo̧k iakwe n̄an armej ro rekar nana n̄an E? (n̄an waanjon̄ak, lale Luk 23:34). Al juon al ippān doon kōn iakwe doon, āinwōt “I’ll Walk with You” (Children’s Songbook, 140–41).
Chapter 41: Trouble in Kirtland: 1837–1838
(Katak im Bujen Ko 112:11–14, 24–26
Ro rej lukkuun oktak renaaj itok n̄an jeļā kajjien Jisōs Kraist.
-
Ālkin riiti Katak im Bujen Ko 112:24–26, kwe im ajri ro nejūm̧ maron̄ kōnono kōn oktak eo ikōtaan jeļā etan juon armej im jeļā kake er. Ta katak ko jān verses 11–14 rej jipan̄ kōj meļeļe ta meļeļein n̄an jeļā kajjien Irooj?
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.
