Far West, Missouri, ni Al Rounds

Oktubre 13–19: “Ang Iyang Sakripisyo Mahimo nga Labaw Pa nga Sagrado ngari Kanako Kaysa Iyang Paglambo”

Doktrina ug mga Pakigsaad 115–120

Adunay rason nga ang mga Santos mobati nga malaomon mahitungod sa ilang labing bag-ong pundokanang lugar, ang Far West, Missouri. Paspas ang paglambo sa siyudad, ang yuta ingon og abunda, ug anaa sa duol ang Adam-ondi-Ahman, usa ka lugar nga may importante nga espirituhanong kahulogan kaniadto ug sa umaabot ( Doktrina ug mga Pakigsaad 107:53–56; 116). Sa gihapon, lisod tingali kini alang sa mga Santos nga dili maghunahuna mahitungod sa unsay nawala nila. Gawas nga gipapahawa sa Independence, ang sentro nga dapit sa Zion, ang mga Santos kinahanglan usab nga mopahawa sa Kirtland, biyaan ang ilang minahal nga templo human sa duha lamang ka tuig. Ug niini nga panahon dili lamang mga kaaway sa gawas sa Simbahan ang naghimo og kasamok—daghan nga inilang mga miyembro nakigbatok ni Joseph Smith, lakip ang upat ka sakop sa Korum sa Napulog Duha ka Apostoles.

Imbes motutok sa unsay nawala nila, ang matinud-anong mga Santos nagpadayon sa pagtukod sa Zion, niining higayona didto sa Far West. Mihimo sila og mga plano alang sa usa ka bag-ong templo. Upat ka bag-ong Apostoles ang gitawag. Sila nakasabot nga ang paghimo sa buhat sa Dios wala magpasabot nga ikaw dili gayod mapukan; kini nagpasabot nga ikaw “mobangon pag-usab.” Ug bisan kon kinahanglan ka nga maghimo og mga sakripisyo, kadto nga mga sakripisyo mahimo nga sagrado ngadto sa Dios, gani “mas sagrado pa … kaysa [imong] paglambo” (Doktrina ug mga Pakigsaad 117:13).

Tan-awa sa Mga Santos, 1:333–36.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 115:3–6

Ang ngalan sa Simbahan importante sa Ginoo.

Miingon si Presidente Russell M. Nelson nga ang ngalan sa Simbahan “usa ka butang nga importante kaayo” (“Ang Sakto nga Ngalan sa Simbahan,” Liahona, Nob. 2018, 87). Paghunahuna mahitungod kon nganong kini tinuod samtang ikaw magbasa diha sa Doktrina ug mga Pakigsaad 115:4–6. Unsay kalabotan sa ngalan sa Simbahan sa mga buhat ug misyon niini?

Tan-awa usab sa 3 Nephi 27:1–11.

Doktrina ug mga Pakigsaad 115:5–6

Ang Zion ug ang mga stake niini nagtanyag og “dangpanan gikan sa unos.”

Samtang magtuon ka sa gamhanang paghulagway diha sa Doktrina ug mga Pakigsaad 115:5–6, ikonsiderar ang tahas nga gusto sa Ginoo nga imong tumanon, isip miyembro sa Iyang Simbahan. Pananglitan, unsa ang imong mahimo sa “pagtindog ug pagpakita” o “[mahimong] usa ka sukaranan alang sa mga nasod”? (bersikulo 5). Unsa nga espirituhanong mga unos ang imong namatikdan sa imong palibot? Sa unsang paagi nga ikaw makakaplag og “kadangpan” pinaagi sa panagpundok? (bersikulo 6).

Tan-awa usab sa “Brightly Beams Our Father’s Mercy,” Hymns, no. 335.

Ang Simbahan sa Manluluwas mahimong usa ka kahayag ug kadangpan diha sa unos.

Doktrina ug mga Pakigsaad 117

Ang akong mga sakripisyo sagrado ngadto sa Ginoo.

Hunahuna kon ikaw si Newel K. Whitney o iyang asawa, si Elizabeth, nga nakasinati og malamboon nga kinabuhi didto sa Kirtland ug gihangyo nga mobiya. Unsa ang imong nakita diha sa Doktrina ug mga Pakigsaad 117:1–11 nga tingali makatabang nimo sa paghimo niini nga sakripisyo? Unsa nga mga sakripisyo ang imong gihimo alang sa Dios? Unsa ang gitudlo niini nga mga bersikulo nganha nimo mahitungod kon kinsa ang Dios ug kon unsa ang Iyang gihimo?

Ang sakripisyo nga gipangayo ngadto ni Oliver Granger lahi kaysa ilaha sa mga Whitney: ang Ginoo misugo kaniya sa pagpabilin sa Kirtland ug sa paghusay sa mga panalapi sa Simbahan. Samtang nagrepresentar sa Simbahan uban sa kaligdong, sa kataposan wala siya magmalamposon kaayo. Ikonsiderar kon unsaon nga ang mga pulong sa Ginoo diha sa Doktrina ug mga Pakigsaad 117:12–15 magamit ngadto sa mga butang nga Iyang gihangyo nimo.

Tan-awa usab sa “Far West and Adam-ondi-Ahman,” diha sa Revelations in Context, 239–40.

Doktrina ug mga Pakigsaad 119–20

Ang akong ikapulo makatabang sa pagtukod sa gingharian sa Dios.

Ang mga instruksiyon diha sa mga seksiyon 119 ug 120 nagklaro kon unsa ang ikapulo: kita mohatag sa “ikanapulo nga bahin” sa atong tubo (o kinitaan) sa matag tuig (tan-awa sa Doktrina ug mga Pakigsaad 119:4). Apan kini nga mga pagpadayag makahimo og mas labaw pa kaysa paghatag og kahulogan niini. Ang Ginoo misulti sa mga Santos nga ang ikapulo “mobalaan sa yuta sa Zion.” Ug kon wala kini nga balaod, Siya miingon, “kini dili mahimo nga … Zion nganha kaninyo” (bersikulo 6). Ikaw ba naghunahuna mahitungod sa ikapulo sa ingon niini nga paagi? Sa unsang paagi nga ang pagbayad og ikapulo makatabang nimo nga mas mabalaan, mas maandam alang sa Zion?

Unsa ang imong nakat-onan gikan niini nga mga pagpadayag mahitungod kon unsaon sa mga sulugoon sa Ginoo sa paggamit ang mga pundo sa ikapulo? Unsay kahulogan nganha nimo mahitungod sa hugpong sa mga pulong nga “pinaagi sa akong kaugalingon nga tingog ngadto kanila” diha sa Doktrina ug mga Pakigsaad 120?

Si Elder David A. Bednar mihatag og mapuslanon nga paghulagway kon unsaon sa paggamit ang ikapulo ug ang mga panalangin nga moabot gikan sa pagsunod sa ikapulo diha sa “Ang mga Tamboanan sa Langit” (Liahona, Nob. 2013, 19–20). Ang mosunod nga mga pangutana mahimong makatabang samtang magtuon ka sa iyang mensahe:

The Windows of Heaven

Spiritual and temporal blessings come into our lives as we live the law of tithing.

• Kinsa ang motino kon unsaon sa paggamit ang ikapulo human nga kini mabayad ngadto sa Simbahan?

• Unsay gamitan sa ikapulo?

• Unsa nga mga panalangin ang moabot isip resulta sa pagbayad sa ikapulo? Pananglitan, sa unsang mga paagi nga ang pagbayad sa ikapulo mopalig-on sa imong relasyon uban sa Langitnong Amahan ug ni Jesukristo?

• Unsa ang imong makat-onan gikan sa imbitasyon ni Elder Bednar’?

• Sa unsang paagi nga makatabang ka sa uban nga molambo ang ilang hugot nga pagtuo diha sa balaod sa Ginoo sa ikapulo?

Tan-awa usab sa Malaquias 3:8–12; “The Tithing of My People,” diha sa Revelations in Context, 250–55.

Tabangi ang uban sa paggamit sa unsay ilang nakat-onan. Bisan kon ang usa ka tawo gusto nga mobayad sa ikapulo, usahay wala sila kahibalo kon unsaon. Kon nagtudlo ka sa imong pamilya o sa klase, ikonsiderar ang paggahin og panahon sa pagpasabot kon unsaon pagbayad sa ikapulo, sa online o gamit ang papel nga Ikapulo ug Ubang mga Halad. (Tan-awa sa Pagtudlo sumala sa Pamaagi sa Manluluwas, 27.)

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Oliver Granger

• Adam-ondi-Ahman

• Ikapulo

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 115:4–5

Sakop ko sa Ang Simbahan ni Jesukristo sa mga Santos sa Ulahing mga Adlaw.

• Aron matabangan ang imong mga anak nga mahibalo sa ngalan sa Simbahan ug makasabot kon ngano nga importante kini, ikonsiderar kon aduna ba nila ang makasulti sa tibuok ngalan sa Simbahan. Mahimo dayon nimong ipakita nila ang ngalan gikan sa Doktrina ug mga Pakigsaad 115:4 ug tugoti sila nga mosunod og sulti nimo. Samtang naghimo ka niini, ikonsiderar ang pagtudlo sa mahinungdanon nga mga pulong ug kon ngano nga importante kini. Mahimo usab nimong rebyohon ang “Kapitulo 43: Si Jesukristo Naghingalan sa Iyang Simbahan” (diha sa Mga Istorya sa Doktrina ug mga Pakigsaad, 164, o sa katukma nga bidyo diha sa Gospel Library) o kantahon ang “Ang Simbahan ni Jesukristo” (Songbook sa mga Bata, 48).

Chapter 43: Jesus Christ Names His Church: April 1838

Doktrina ug mga Pakigsaad 115:4–6

Ang akong ehemplo makatabang sa uban nga moduol kang Kristo ug makakita og kahilwasan [safety].

• Ang imong mga anak tingali adunay kaila nga mga tawo nga naglisod ug nagkinahanglan og “kadangpan” gikan sa “mga unos sa kinabuhi” (bersikulo 6). Sa unsang paagi nga sila makatabang niini nga mga tawo? Ikonsiderar ang pagdapit sa mga bata sa pagtindog kon basahon nimo ang pulong nga tindog diha sa Doktrina ug mga Pakigsaad 115:5. Mahimo nilang ituyhad ang ilang mga tudlo sama sa mga silaw sa adlaw kon basahon nimo ang pakita. Pahinumdomi ang imong mga anak nga ang atong kahayag nagagikan ni Jesukristo, ug tabangi sila sa paghunahuna og mga paagi nga sila “makapakita” sama Kaniya.

• Ang imong mga anak mahimong magdrowing og hulagway nga nagpasabot sa Doktrina ug mga Pakigsaad 115:6. Pananglitan, mahimo silang magdrowing og unos nga may mga tawo nga midangop sa usa ka gambalay sa Simbahan. Sa unsa kaha nagrepresentar ang unos? Sa unsang paagi nga ang Simbahan sa Manluluwas naghatag og tabang? Tabangi ang imong mga anak nga maghunahuna og usa ka higala, sakop sa pamilya, o silingan nga nanginahanglan. Sa unsang paagi nga kita makadapit nila sa pagkaplag og tabang diha sa Simbahan ni Jesukristo?

Doktrina ug mga Pakigsaad 117

Ang akong mga sakripisyo sagrado ngadto sa Ginoo.

• Dapita ang imong mga anak sa pagpakaaron-ingnon nga sila si Newel K. Whitney. Unsa kaha ang ilang bation kon ang Ginoo mohangyo nila sa pagbiya sa ilang malamposon nga trabaho ug mobalhin sa usa ka bag-ong lugar? (Tingali makatabang ang pagrebyo sa “Kapitulo 41: Kasamok sa Kirtland,” diha sa Mga Istorya sa Doktrina ug mga Pakigsaad, 158–60, o sa katukma nga bidyo diha sa Librarya sa Ebanghelyo.) Samtang basahon ninyo og dungan ang Doktrina ug mga Pakigsaad 117:1–11, hangyoa ang imong mga bata sa paghunong kon makadungog sila og usa ka butang nga makatabang nila nga makabaton og hugot nga pagtuo sa pagsunod sa Ginoo. Unsa nga mga sakripisyo ang atong gihimo alang sa Dios? Sa unsang paagi nga Siya mopanalangin nato?

Chapter 41: Trouble in Kirtland: 1837–1838

Doktrina ug mga Pakigsaad 119–20

Ang Langitnong Amahan naggamit sa ikapulo aron sa pagpanalangin sa Iyang mga anak.

• Daghan sa iyang mga anak nga imong gitudloan tingali bata pa kaayo aron mangita og kwarta ug mobayad sa ikapulo, apan maayo kini alang nila nga makasabot kon sa unsang paagi nga ang ikapulo nakatabang sa buhat sa Ginoo sa tibuok kalibotan. Ikonsiderar ang paggamit sa mga hulagway ug pahina sa kalihokan sa kataposan niini nga latid aron matabangan sila nga makasabot kon unsa ang ikapulo. (Tan-awa usab sa “Kapitulo 44: Ang Ikapulo,” diha sa Mga Istorya sa Doktrina ug mga Pakigsaad, 165–66, o sa katukma nga bidyo diha sa Gospel Library.) Sa unsang paagi nga ang Langitnong Amahan mogamit sa ikapulo aron sa pagpanalangin sa Iyang mga anak? Ipakigbahin ang imong mga gibati mahitungod sa balaod sa ikapulo ug kon sa unsang paagi nga kini nakapanalangin kanimo.

Chapter 44: Tithing: July 1838

Kon kita mobayad sa ikapulo, kita nagpakita sa atong hugot nga pagtuo diha ni Jesukristo.

Alang sa dugang nga mga ideya, tan-awa ang isyu karong bulana sa Higala nga magasin.