Far West, Missouri, nā Al Rounds

13–19 nō ’Ātopa : « E riro tāna tusia ’ei mea mo’a a’e iā’u nei i te faufa’a ’āpī tāna e fāri’i »

Te Ha’api’ira’a Tumu ’e te mau Fafaura’a 115–120

Tē vai ra te tumu e ti’a ai i te feiā mo’a ’ia ana’anatae i tō rātou vāhi ha’aputuputura’a āpī roa a’e, i Far West, i Missouri. Te tupu vitiviti noa ra te ’oire, e au ē, e mea auhune te fenua, e tei piha’i iho noa mai o Adam-ondi-Ahman, e vahi aura’a pae vārua rahi i muta’a ihora e ananahi (hi’o Te Ha’api’ira’a Tumu ’e te mau Fafaura’a 107:53–56 ; 116). Terā rā, e mea pāpū ē, e mea fifi mau nō te feiā mo’a ’eiaha e feruri i te mau mea tei ’erehia e rātou. Ta’a ’ē atu te ti’avaru-ra’a-hia rātou i rapae ia Inidipenideni, te pū ’o Ziona, ’ua tītau-ato’a-hia i te Feiā Mo’a ’ia fa’aru’e ia Kirtland, ma te fa’aru’e i tō rātou hiero here i muri a’e e piti noa matahiti. ’E i terā taime, e ’ere te ’enemi noa nā rāpae i te ’Ēkālesia ’o tē fa’atupu nei i te fifi—e rave rahi rā melo tu’iro’o tei pāto’i ia Iosepha Semita, ’e tae noa atu e maha melo nō te Pupu nō te Tino ’Ahuru Ma Piti ’Āpōsetolo.

’Ua tāmau noa te feiā ha’apa’o maita’i i te patu ia Ziona, i Far West i teie taime, ’eiaha rā te fa’atumu noa i ni’a i te mea tei ’erehia e rātou. ’Ua rave rātou i te mau fa’anahora’a nō te hō’ē nō te hō’ē hiero ’āpī. E maha ’āpōsetolo ’āpī tei pi’ihia. ’Ua māramarama rātou ē, te ravera’a i te ’ohipa a te Atua, e ’ere ïa ē, ’e’ita roa atu ’oe e hi’a, te aura’a rā ’oia ho’i, « e ti’a fa’ahou mai » ’oe. ’E noa atu ē, e tītauhia ia ’oe ’ia fa’atusia, e mea mo’a te reira mau tusia i te Atua, « mo’a a’e […] i te faufa’a ’āpī [tā ’outou] e fāri’i » (Te Ha’api’ira’a Tumu ’e te mau Fafaura’a 117:13).

’A hi’o Feiā mo’a, 1:296–99.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 115:3–6

E mea faufa’a nō te Fatu te i’oa o te ’Ēkālesia.

’Ua parau te peresideni Russell M. Nelson ē, te i’oa o te ’Ēkālesia ’o « te hō’ē ïa mea faufa’a roa » (« Te i’oa ti’a o te ’Ēkālesia », Liahona, Novema 2018, 87). ’A feruri nō te aha e parau mau te reira ’a tai’o ai ’outou i Te Ha’api’ira’a Tumu ’e te mau Fafaura’a 115:4–6. E aha te tū’atira’a o te i’oa o te ’Ēkālesia i tāna ’ohipa ’e tāna misiōni ?

Hi’o ato’a 3 Nephi 27:1–11.

Te Ha’api’ira’a Tumu ’e te mau Fafaura’a 115:5–6

Tē pūpū nei Ziona ’e tōna mau titi i te « ha’apūra’a i te vero ».

’A tuatāpapa ai ’outou i te fa’ahōho’ara’a pūai i roto i Te Ha’api’ira’a Tumu ’e te mau Fafaura’a 115:5–6, ’a feruri i te ti’ara’a tā te Fatu e hina’aro ia ’outou, ’ei melo nō tāna ’Ēkālesia, ’ia rave fa’aoti. ’Ei hi’ora’a, e aha tā ’outou e nehenehe e rave nō te « ti’a mai i ni’a ’e ’ia ’ana’ana atu » ’aore rā « ’ia riro […] ’ei hi’ora’a nā te mau nūna’a » ? (’īrava 5). E aha te mau vero pae vārua tā ’outou e ’ite ra ’ati a’e ia ’outou ? Nāhea ’outou i te ’ite i te « ha’apūra’a » nā roto i te ha’aputuputura’a ? (’īrava 6).

Hi’o ato’a « Mai te hō’ē fare mori », Te mau hīmene, N°198.

E nehenehe te ’Ēkālesia a te Fa’aora e riro ’ei mori ’e ’ei ha’apūra’a i roto i te vero.

Te Ha’api’ira’a Tumu ’e te mau Fafaura’a 117

E mea mo’a tā’u mau tusia i te Fatu.

’A feruri na ē, ’o ’outou ’o Newel K. Whitney ’aore rā tāna vahine, ’o Elizabeth, tei fārerei i te hō’ē orara’a manuia roa i Kirtland ’e ’ua ani i muri iho ’ia reva atu. E aha tā ’outou e ’ite ra i roto i Te Ha’api’ira’a Tumu ’e te mau Fafaura’a 117:1–11 ’o tei nehenehe e tauturu ia ’outou ’ia rave i terā tusia ? E aha te mau tusia tā ’outou e rave nei nō te Atua ? E aha tā teie mau ’īrava e ha’api’i mai nei ia ’outou nō ni’a ’o vai te Atua ’e e aha tāna e rave ?

E mea ta’a ’ē te tusia i tītauhia ia Oliver Granger i tō Whitney mā : ’ua fa’aue te Fatu iāna ’ia fa’aea i Kirtland ’e ’ia fa’a’āfaro i te faufa’a moni a te ’Ēkālesia. ’A ti’a ai oia nō te Ēkālesia ma te parau ti’a, i te pae hope’a ’aita ’oia i manuia roa. ’A feruri nāhea te mau parau a te Fatu i roto i Te Ha’api’ira’a Tumu ’e te mau Fafaura’a 117:12–15 e tano ai i te mau mea tāna i ani ia ’outou.

Hi’o ato’a « Far West ’e Adam-ondi-Ahman », i roto i te mau heheura’a i roto i te mau parau tāpiri, 239–40.

Te Ha’api’ira’a Tumu ’e te mau Fafaura’a 119–20

E tauturu tā’u tuha’a ’ahuru i te patu i te bāsileia o te Atua.

Tē ha’amāramarama mai nei te mau arata’ira’a i roto i te mau tufa’a 119 ’e 120 e aha te tuha’a ’ahuru : e hōro’a tātou i « te hō’ē i ni’a i te ’ahuru » o tā tātou ’āpī (’aore rā te moni ’ohipa) i te matahiti tāta’itahi (hi’o Te Ha’api’ira’a Tumu ’e te mau Fafaura’a 119:4). ’Ua hau atu rā tā teie mau heheura’a e rave i te hōro’a noa i te hō’ē tātarara’a. ’Ua parau te Fatu i te Feiā Mo’a ē, e riro te tuha’a ’ahuru i te « ha’amo’a i te fenua nō Ziona ». ’E ’āhiri ’aita teie ture, ’ua parau ’oia, « e ’ore roa te reira e riro ’ei fenua nō Ziona ia ’outou na » (’īrava 6). ’Ua feruri a’enei ’outou i te tuha’a ’ahuru mai teie te huru ? Nāhea te ’aufaura’a i te tuha’a ’ahuru e tauturu ai i te ha’amo’a rahi atu ā ia ’outou, i te fa’aineine rahi atu ā ia ’outou nō Ziona ?

E aha te ha’api’ira’a tā ’outou e ’apo mai nei i roto i teie mau heheura’a nō ni’a i te huru te mau tāvini o te Fatu e fa’a’ohipa nei i te faufa’a moni nō te tuha’a ’ahuru ? E aha te mea faufa’a nō ’outou i roto i te parau ra « ’e tō’u iho nei reo ia rātou ra » i roto i Te Ha’api’ira’a Tumu ’e te mau Fafaura’a 120 ?

’Ua hōro’a Elder David A. Bednar i te hō’ē fa’a’itera’a tauturu nō ni’a i te fa’a’ohipara’a i te tuha’a ’ahuru ’e te mau ha’amaita’ira’a e tae mai nā roto i te ha’apa’ora’a i teie ture i roto i « Te mau ha’amāramarama o te ra’i » (Liahona, Novema 2013, 19–20). E nehenehe te mau uira’a i muri nei e tauturu ’a tuatāpapa ai ’outou i tāna parau poro’i :

The Windows of Heaven

Spiritual and temporal blessings come into our lives as we live the law of tithing.

• Nā vai e fa’aoti nāhea te tuha’a ahuru i te fa’a’ohipahia i muri a’e i te ’aufaura’ahia te reira i te ’Ēkālesia ?

• Nō te aha te tuha’a ’ahuru ?

• E aha te mau ha’amaita’ira’a e tae mai nā roto i te ’aufaura’a i te tuha’a ’ahuru ? ’Ei hi’ora’a, e mea nāhea te ’aufaura’a i te tuha’a ’ahuru i te ha’apūai i tō ’outou aura’a ’e te Metua i te ao ra ’e ia Iesu Mesia ?

• E aha te ha’api’ira’a tā ’outou e ’apo mai i roto i te anira’a a Elder Bednar ?

• Nāhea ’outou e nehenehe ai e tauturu ia vetahi ’ē ’ia fa’arahi i tō rātou fa’aro’o i te ture nō te tuha’a ’ahuru a te Fatu ?

Hi’o ato’a Malaki 3:8–12 ; « Te tuha’a ’ahuru a tō’u mau ta’ata », i roto i Te mau heheura’a i roto i te mau parau tāpiri, 250–55.

Tauturu ia vetahi ’ē ’ia fa’a’ohipa i te mea tā rātou e ’apo mai. Noa atu ē, e hina’aro te hō’ē ta’ata e ’aufau i te tuha’a ’ahuru, i te tahi taime, ’aita rātou i ’ite nāhea. Mai te mea tē ha’api’i ra ’outou i tō ’outou ’utuāfare ’aore rā i te hō’ē piha ha’api’ira’a, ’a feruri i te rave i te tahi taime nō te fa’ata’a e nāhea ’ia ’aufau i te tuha’a ’ahuru, i ni’a ānei i te natirara ’aore rā i ni’a i te parau nō te tuha’a ’ahuru ’e te tahi atu mau ō. (Hi’o Ha’api’ira’a mai tā te Fa’aora, 27.)

Nō te tahi atu ā mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 115:4–5

E melo vau nō te ’Ēkālesia a Iesu Mesia i te Feiā Mo’a i te mau Mahana Hope’a nei.

• Nō te tauturu i tā ’outou mau tamari’i ’ia ha’api’i mai i te i’oa o te ’Ēkālesia ’e ’ia māramarama nō te aha e mea faufa’a te reira, ’a feruri i te ani ē, e nehenehe anei te hō’ē ’o rātou e fa’ahiti i te i’oa tā’āto’a o te Ēkālesia. I muri iho, e nehenehe ’outou e fa’a’ite ia rātou i te i’oa i roto i Te Ha’api’ira’a Tumu ’e te mau Fafaura’a 115:4 ’e ’ia fa’ahiti fa’ahou rātou i te reira nā muri iho ia ’outou. ’A nā reira ai ’outou, ’a feruri i te fa’a’ite atu i te mau ta’o faufa’a ’e nō te aha e mea faufa’a te reira. E nehenehe ato’a ’outou e hi’o fa’ahou i te « Pene 43 : ’Ua hōro’a mai ’o Iesu Mesia i te i’oa nō tāna ra ’Ēkālesia » (i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 164 ’aore rā, te video nō ni’a i te reira i roto i te Vaira’a buka ’evanelia) ’aore rā, e hīmene « L’Eglise de Jésus-Christ » (Chants pour les enfants, 48).

Chapter 43: Jesus Christ Names His Church: April 1838

Te Ha’api’ira’a Tumu ’e te mau Fafaura’a 115:4–6

E nehenehe tōu hi’ora’a e tauturu ia vetahi ’ē ’ia haere mai i te Mesia ra ’e ’ia ’ite i te pārurura’a.

• E ’ite paha tā ’outou mau tamari’i i te mau ta’ata e fifi nei ’e e hina’aro ra i te « ha’apūra’a » i te mau « vero o te orara’a » (’īrava 6). Nāhea rātou e nehenehe ai e tauturu i teie mau ta’ata ? E ani i tā ’outou mau tamari’i ’ia ti’a i ni’a ’ia tai’o ana’e ’outou i te ta’o ’a ti’a i roto i Te Ha’api’ira’a Tumu ’e te mau Fafaura’a 115:5. E nehenehe rātou e pānena i tō rātou manimani rima mai te hihi mahana, ’ia tai’o ana’e ’outou ’ia ’ana’ana atu. E fa’aha’amana’o i tā ’outou mau tamari’i ē nō ō mai tō tātou māramarama ia Iesu Mesia ra, ’e e tauturu ia rātou ’ia feruri i te mau rāve’a e nehenehe ia rātou « ’ia ’ana’ana atu » mai iāna te huru.

• E nehenehe tā ’outou mau tamari’i e pāpa’i i te hō’ē hōho’a e fa’a’ite ra i Te Ha’api’ira’a Tumu ’e te mau Fafaura’a 115:6. ’Ei hi’ora’a, e nehenehe rātou e pāpa’i hōho’a i te hō’ē vero, ’e te mau ta’ata i te ha’apūra’a i roto i te hō’ē fare a te ’Ēkālesia. E aha tē nehenehe e fa’ahōho’a i te vero ? Nāhea te ’Ēkālesia a te Fa’aora i te hōro’a i te tauturu ? ’A tauturu i tā ’outou mau tamari’i ’ia feruri i te hō’ē hoa, te hō’ē melo o te ’utuāfare, ’aore rā, te hō’ē ta’ata tāpiri mai i roto i te hepohepo. Nāhea tātou e ani ai ia rātou ’ia ’imi i te tauturu i roto i te ’Ēkālesia a Iesu Mesia ?

Te Ha’api’ira’a Tumu ’e te mau Fafaura’a 117

E mea mo’a tā’u mau tusia i te Fatu.

• E ani i tā ’outou mau tamari’i ’ia fa’ahua ē, ’o Newel K. Whitney rātou. E aha tā rātou e fāri’i mai te mea e ani te Fatu ia rātou ’ia fa’aru’e i tā rātou ’ohipa manuia ’e ’ia haere i te hō’ē vāhi ’āpī ? (E nehenehe e tauturu ’ia hi’o fa’ahou i te « Pene 41 : Te pe’ape’a i Ketelani », i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 158–60, ’e ’aore rā, te hōho’a video nō ni’a i te reira i roto i te Vaira’a buka ’evanelia.) ’Ia tai’o ’āmui ana’e ’outou i Te Ha’api’ira’a Tumu ’e te mau Fafaura’a 117:1–11, e ani i tā ’outou mau tamari’i ’ia tāpe’a ia ’outou ’ia fa’aro’o ana’e rātou i te hō’ē mea ’o tē tauturu ia rātou ’ia roa’a te fa’aro’o nō te ha’apa’o i te parau a te Fatu. E aha te mau fa’atusiara’a tā tātou e rave nō te ha’apa’o i te parau a te Fatu ? Nāhea ’oia i te ha’amaita’i ia tātou ?

Chapter 41: Trouble in Kirtland: 1837–1838

Te Ha’api’ira’a Tumu ’e te mau Fafaura’a 119–20

E fa’a’ohipa te Metua i te ao ra i te tuha’a ’ahuru nō te ha’amaita’i i tāna mau tamari’i.

• E rave rahi paha mau tamari’i tā ’outou e ha’api’i ra e mea ’āpī roa nō te fāri’i mai i te moni ’e nō te ’aufau i te tuha’a ’ahuru, terā rā, e mea maita’i nō rātou ’ia māramarama ē nāhea te tuha’a ’ahuru i te tauturu i te ’ohipa a te ’Ēkalesia nā te ao ato’a nei. E nehenehe e fa’a’ohipa i te mau hōho’a ’e te ’api fa’a’ana’anataera’a i te pae hope’a o teie arata’i ha’api’ira’a nō te tauturu ia rātou ’ia māramarama e aha te tuha’a ’ahuru. (’A hi’o ato’a i te « Pene 44 : Te Tufa’a ’ahuru », i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 165–66, ’e ’aore rā, te video nō ni’a i te reira i roto i te Vaira’a buka ’evanelia.) Nāhea te Metua i te ao ra i te fa’a’ohipa i te tuha’a ’ahuru nō te ha’amaita’i i tāna mau tamari’i ? E fa’a’ite i tō ’outou mau mana’o nō ni’a i te ture nō te tuha’a ’ahuru ’e e mea nāhea te reira i te ha’amaita’ira’a ia ’outou.

Chapter 44: Tithing: July 1838

’Ia ’aufau ana’e tātou i te tuha’a ’ahuru, tē fa’a’ite ra ïa tātou i tō tātou fa’aro’o ia Iesu Mesia.

Nō te tahi atu ā mau mana’o, ’a hi’o i te ve’a Hoa nō teie ’āva’e.