“Ainikien ko an Jepļaaktok eo: Doulul eo an Kōrā ro,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Doulul eo an Kōrā ro” Itok, Ļoor Eō—N̄an M̧weeo im Kabun̄ in: 2025
Ainikien ko an Jepļaaktok eo
Doulul eo an Kōrā ro
Ilo 1842, ālkin an kar ejaak Doulul eo an Kōrā ro ilo Nauvoo, Illinois, Rikanaan Josep Smith ekar ba, “Kabun̄ in ekar jab jejjet an kar ejaak m̧ae iien kōrā ro rekar ejaak.” Ejjeļo̧k oktak, juon ekatak kōn Jepļaaktok eo an Kabun̄ eo an Irooj im priesthood eo An eaar jab dedeļo̧k m̧ae iien ekobatok jeļā eo kōn Doulul eo an Kōrā ro, eo me ej make wōt “juon jepļaaktok in jon̄ak ko etto” an kōrā ro rikaļooran Jisōs Kraist.
Eliza R. Snow ekar kōm̧m̧ane juon jerbal eo eaorōk ilo jepļaaktok in. Ekar pād ke Doulul eo an Kōrā ekar jinointata ejaak im, āinwōt juon rijeje ilo jukjuk in pād eo, ekar je kobban kweilo̧k ko. Ekar kam̧ool jinointata bwe Doulul eo an Kōrā ekar ejaak “ālkin jon̄ak eo an priesthood.” Itulaļ rej naan ko an, kar je ke liin ekar jerbal āinwōt juon Būreejtōn eo Kein Karuo Eutiej an Doulul eo an Kōrā ro, n̄an jipan̄ sister ro meļeļe jerbal eo ekwojarjar im eaorōk kar jitōn̄e n̄an leddik in bujen ro nejin Anij.
N̄an ekkatak eļapļo̧k kōn wāween an Doulul eo an Kōrā ro kar ejaak, lale Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Jin̄a in Doulul eo an Kōrā ro jān Paul Mann
Eliza R. Snow
“Men̄e etan [Doulul eo an Kōrā] emaron̄ āt in raan kein, doulul eo ekar baj wōt jān etto. Kar karon̄ kōm jān [Josep Smith], bwe ejja doulul eo wōt ekar pād ilo kabun̄ eo etto, ej kwaļo̧k jet iaan kōkaļļe ko me repād ilo leta ko me rekar jeje ilo Kallim̧ur Ekāāl, kōjerbal taitōļ in, ‘kōrā in kāālet’ [lale 2 Jon 1:1; Katak im Bujen Ko 25:3].
“En̄in ej juon doulul eo me ejjab maron̄ ejaak n̄e ejjeļo̧k Priesthood, ilo m̧ool ej bōk aolep mālim im kajoor jān priesthood eo. Ke Priesthood eo ekar jako jān laļ in, doulul in barāinwōt aolep men ko rekar ekkeijel ilo laajrak eo em̧ool an kabun̄ eo an Jisōs Kraist ioon laļ in, ekar jako. …
“Ke ikar pād ilo ejaak eo an ‘Doulul eo an Kōrā ro ilo Nauvoo,’ … im barāinwōt iminene ko aō ilo doulul eo, bolen imaron̄ kwaļo̧k jet ļōmņak ko me enaaj jipan̄ leddik ro nejin Zaion n̄an wōnm̧aanļo̧k ilo jerbal in eļap an aorōk, eo me eobrak kōn eddo ko rekāāl im rellōn̄. Eļan̄n̄e jabdewōt jiron̄ im m̧am̧a ro ilo Israel rej en̄jake ke rejjab maron̄ en̄jake im̧we ilo jekjek ko rej pād ie, renaaj kiiō loe iien ko rem̧m̧an n̄an kōjerbal maron̄ ko rem̧m̧an me elōn̄ ippāer. …
Doulul eo an Kōrā ekar ejaak ilo ruum̧ ilo ilōn̄ ilo M̧ōn Wia eo etan Red Brick.
“Kajjitōk in eaar aikuj jiktōk ilo kōļmenļo̧kjeņ, kōn jabdewōt, Ta oktak eo an Doulul eo an Kōrā ro? Inaaj uwaak—n̄an kōm̧m̧an em̧m̧an—n̄an kōjerbal aolep maron̄ ko repād ippād n̄an kōm̧m̧ani men ko rem̧m̧an, ejjab wōt n̄an kōmeraik ro rijeram̧ōl ak n̄an lo̧mo̧o̧ren jetōb ko. Kobain kijejeto enaaj kōm̧m̧an eļap tōprak jān tōprak in kijejeto an juon armej make. …
“N̄an jipan̄ ro rijeramōl, Doulul eo an Kōrā ro ekar wōr an bar jet jerbal n̄an kōm̧m̧an ijjeļo̧kin wōt kōmeraiki aikuj ko an armej ilo mour in kanniōk. Mōjņo ilo kōļmeņļo̧kjen im būrom̧ōj ilowa, rej aikuj jipan̄; im elōn̄ iien rej aikuj naan in rōjan̄—jet naan in kapilōk, ak bolen idik pā kōn kam̧m̧oolol im iakwe enaaj kōm̧m̧an eļapļo̧k em̧m̧an im kam̧m̧oolol ijjelo̧kin leļo̧k pāāk in gold. …
“Ke Armej ro Rekwojarjar rej koba ippān doon jān ijoko rōttoļo̧k, ruwamājet n̄an doon, im epidodo aer jebwābwe kōn ro rej kajjieon̄ riabwe armej, [Doulul] eo an Kōrā ej aikuj jipan̄ lale [er], im kwaļo̧k kadkadier n̄an doulul eo, eo me enaaj ukot im kōketak er, im eļaptata enaaj kōkajoorļo̧k er ilo tōmak eo an Gospel, im ilo kōm̧m̧ane, maron̄ erom̧ kein jerbal n̄an lo̧mo̧o̧ren elōn̄ armej.
“Enaaj aikuj elōn̄ bok ko n̄an kwaļo̧k meļeļein jerbal ko, iien ko rem̧m̧an im eddo ko me rej itok ilowaan wōt eddo eo an Doulul eo an Kōrā. … Kōm̧m̧ane jerbal eo (ium̧win tōl eo an bisop), ilo kōmaanwa, kōttōpar, itok limo, ippān doon, im ilo jar, im Anij enaaj kōjeraam̧m̧an kijejeto eo am̧ n̄an tōprak.”